٧\٩\٢٠١٤

    پێشمەرگایەتییم لە بەریتانیا!*

دارا خونچە

پێشکەشە بەو چەکدارانەی کە لە بەرەکانی دژ وە چەتە ئیسلامییەکانی (داعش) دەجەنگن و پێیان دەبێژن (پێشمەرگە)!

ئەوشۆش
لە تەمەنی هەمیشە شەوەزەنگمان
وەک سوپایەکی هەمیشە لەسەرپێ
داڕژاینە نێو (ستان)ە رووتپۆشەکان و
     لە قاچاغە رووبەرەکی تایبەتدا
                            گیرساینەوە،
پێش خەوتنان؛
    لە جیات خۆمان
        جامەکانمان سەرمەست کردن!

دەمی خەوتنان؛
    بێ وەستان و پسانەوە
       هەر دەروبەرمان دەنگ دەدان!

شەو.. هەر دەروەستمان نەهات و
       بارانیش.. هەر زوو قوچاندی..

تا شەو راشکا
هەر سەرمەستی
چریکە و ژەنینی (پێشان) و
      گەڕەلاوژێی (ئێستا)مان بووین!

لق و پۆپی درەختەکان
    تا نێوقەد و بنوبۆتکیان
    تەڕ و هیشکیان.. لە بن دەستمان
            هەر هاوار و زیڕەیان بوو!

شەو تەواوەک راشکابوو
هۆشداریی لە دوای هۆشداریی
         هێرشیان هانی و
        (هەڕوگیڤ) کاتی راوەستاند..

    تا سپێدە و رۆژبوونەوەش
        جامەکانمان هەر هەڵیانداین

    ئیدی شکستیان پێ هانین...

    چارمان نەما و
         ناوزەدمان کرد وە پاشەکشێ!   

    هەرچەند بێ زیانی گیانی بووین
    لێ وە گێژیی و لاریی و وێریی
    هۆرتە هۆرتە

    بەرەو بنکە و مۆڵگەکانمان

                             گەڕاینەوە!

_____________________________

* بێ هیچ وەخۆ نازینەک دەبێژم ئەمن پێشمەرگەی سەردەمی پێش راپەڕین و دەستپێکی راپەڕین بووم لە ساڵانی (١٩٨٥ - ١٩٩٢)، هەر کە پێشمەرگایەتیی بووە پاسەوانیی لە بەر دەرکەی بەرپرسە گەندەڵ و گەلۆرەکان ئیدی چەکەکەم فڕێ دا، لەبەرهەندێ ئەمن هەر وە کەش و رەوشی پێشمەرگایەتیی دێرین - لێ وە پێی پێشکەتن و پێداویستییەکانی سەردەم - هەموو کاروبار و پیشەیەکم رادەپەڕێنم، داوای بووردن لەو کەسانە دەکەم کە ئەو خەسڵەت و هەڵسوکەوتانەی منیان پێ هەرس ناکرێ چونکە رەنگدانەوەی سەرڕاستیی و بەرخۆدانیی ژیانی پێشمەرگایەتییمن و هەرگیز ناتوانم دەستبەرداریان ببم!

کۆتایی ئابی ٢٠١٤ - دێبدن هاوس
ماڵپه‌ڕی دارا خونچە