۴\٥\٢٠١٠

پێویستە ئیسلامی سیاسی کوردستان ‌و مەلای مشەخۆر سنووریان بۆ دیاری بکرێ!

جه‌مال عه‌زیز  

ژیانی ڕۆژانەی خەڵکی جەزائیر لەسایەی ئیسلامی سیاسیەوە لەساڵانی ڕابردوو لای زۆرینەی خەڵکی کوردستان نامۆنیە، لەیادمانە چۆن مرۆڤەکانیان کۆمەڵ کوژ دەکردیان لەیادمانە چۆن گوندەکانیان لەگەڵ مرۆڤەکاندا دەسووتان،تەنها تاوانیان هاوپشتی نەکردنی ئیسلامیە سیاسیەکان بوو.

خەڵکی کوردستان بەگشتی‌وهەورامان بەتایبەتی شاهیدی ئەوتاوانانەن کە ئیسلامی سیاسی لەکوردستان ئەنجامیان داوە، گۆڕی مردوەکانیشیان لەخاک دەرهێنا‌و هەموو پیرۆزیەکی خەڵکیان لەناوبرد کەمێژووی هەریەکێکیان بۆ چەندین ساڵ دەگەڕایەوە،باسکردن لەدین‌وپێشەوایانی دین تەنها تایبەت نیە بەپیاوانی دینی‌وئیسلامیە سیاسیەکانی کوردستان ،باسکردن لەخوداو پەیامبەرانی تەنها موڵکی ئیسلامی سیاسی نیە،هەرگیز کفر نیە گەر مرۆڤ بیەوێ تێگەشتنی ڕاستی بۆیان هەبێ،ڕاڤەو شرۆڤەکردنی قورئان تەنها پەیوەست نیە بە مەلایەک یان بەئەندامانی ئیسلامیە سیاسیەکانی کوردستانەوە، پروپاگەندەی نوێنەرایەتی‌و تێگەشتن لەدین بە تەواوی نەئێمەو نەئەوانیش دەگەێنێتە ڕاستی، گەر باسکردن لەخوداو پەیامبەرانی تەنها تایبەت بێت بەوان‌و بۆ ئێمە بڤە بێت، گەر ڕەخنە لەقورئان‌وئیسلامی سیاسی بەزاندنی هێڵی سوور بێت تەنها سزایی کوشتنی هەبێت ئەی بۆ دەبێت مەلایەک یان ئیسلامێکی سیاسی مافی پارێزراوبێت و دیموکراتیەتی بۆ فەراهەم کرابێت تاکو بتوانێ بەمێشکی پووچیەوە زانست‌و تەکنەلۆژیا بەکاری پڕوو پووچ ناوزەند بکات، گەر نووسینی شیعرێک یان خوێندنەوەی شیعرێک کفر بێت ، ئەی دەبێت کلکایەتی‌و سیخوڕی بۆ دوژمنانی گەلی کوردو وڵاتانی دراوسێ چی قسەوباسێکی لەسەر بکرێت، گەرباسکردن لەخۆشەویشتی‌وجوانی تاوان بێت ئەی دەبێت بۆ کوشتنی بەکۆمەڵ جیان هەبێت تاکو پێمانی بڵێن.

شیعرو دراما‌و چیرۆکی خۆشەویستی کلتورێکی هەمیشە زیندووی گەلی کوردە، کورد چیرۆکی خۆشەویستی نیشتیمانی هاوشانە لەگەڵ خۆشەویستی دڵدارەکەی ئەگەر نێربێت یان مێ، کورد بۆ جەنگ دژ بەدوژمنانی داگیرکار هەڵپەڕکی کردوە، پاش سەرکەوتنی لەجەنگ هەڵپەڕکێی کردوە،کاتی لەخاک نانی شەهیدێک بەهەمان شێوە هەڵپەڕکێی کردوە، هەڵپەڕین‌و ڕەشبەڵەک سیمای ئازادی‌و سەربەستی ئافرەتی کوردە، بەرگی ڕەنگاوڕەنگی ئافرەتی کورد سەرچاوەی سروشتی کوردستان‌و پەیوەستی خەڵکی کوردستانە بەوخاکەوە، تۆ ئەی ئیسلامی سیاسی چۆن دەتوانی بەفتوایەکی کوێرانە ئەم کلتورە جوانە حەرام بکەیت لەبری ئەو کلتورە ڕەسەنە کلتوری بیابان‌و خێڵی داگیرکار پیرۆز دەکەی لای تاکی کورد.

دەستی هاوکاری‌و هەرەوەز هەمیشە خاڵێکی جوان‌و بەرچاوی ژیانی ڕۆژانەی خەڵکی کوردستان بووە،(سواڵ‌و سەدەقە زەکات‌وسەرفترە) ژیانی بەدرۆ هەمیشە لای گەلی کورد ژیانێکی قێزەون بووه هیچ کەسێکی کورد ئاواتەخوازی ژیانی وا نەبووە، بەڵام ئەمڕۆ مەلای بێکارو بێبەرهەم لەکۆمەڵگای کوردەواریدا دەیەوێت میللەتەکەمان بگەڕێنێتەوە بۆ سەردەمانێک کە مرۆڤ دراوسێکەی خۆی دەکوشت بۆ چەنددەنک خورمایەک، دەیەوێت کۆمەڵگایی کوردەواری بگەڕێتەوە بۆ سەردەمانێک کە براوباوک کچ‌وژنەکانیان لە ترسی دراوسێکانیان بەزیندووی دەکردە ژێر خاکەوە، ئەم سیاسەتە بۆ چەسپاندنی سیاسەتی دوژمنانی کوردەو بۆ سڕینەوەی مۆرکی نەتەوەی گەلی کوردە، دەیانەوێت جوانی و خۆشەویستی لای گەنج‌ولاوی کورد ناشیرین کەن.

شیعر ڕەنگدانەوەی ناخی گەشی ڕەنجدەرانی کوردستانە، شیعر هەوێنی ئازادی‌و بەرخودانە، دراما ئاوێنەی ناخی کۆمەڵگایە هەموو مرۆڤێکی بەشمەینەتی ئەم کوردستانە کارئەکتەری درامایەکە کەباس لەئازارو مەینەتیەکانی گەلی کورد دەکات،دراما گەڕانەوەی مرۆڤەکانە بۆ سەردەمانێک کەهەموو زمانمان لاڵ بوو بۆ قومێک ئاو گەڕانەوەی منداڵ‌و لاوەکانمانە بۆ سەردەمێک کە ئەوهێشتا لە پشتی باوکیشیدا نەبوو باسکردنی کورد قڕانە کە لەسایەی قورئان‌و فتوای مەلاکانەوە کوشتنمان غەزاوتاڵانی ماڵمان حەڵاڵ بوو، ئەو تاوانانەی بەرامبەرگەلی کورد کراون هێندە قێزەونن تێکڕا مرۆڤایەتی بەرامبەریان شەرمەزارە دوژمنەکانمان نایانەوێ جیهانی لێئاگادار بکەین بۆ ئەوەی هەستی مرۆڤی ئازادیخواز بۆ لای کورد ڕانەکێشین، هەروەها دوژمنانمان ئێستا ناتوانن وەک ڕابردوو هەموو کارێکی جوانمان لێیاساخ بکەن لەڕێگەی داردەستەکانیانەوە لە کوردستان لەڕێی فتوای مەلایەکی مشەخۆرەوە ئەو باسانە حەرام دەکات، فتوای کوشتنی نووسەرەکەی دەدات چاوترسێنی خەڵکی دەکات، ئەم فتواو حەرام کردنەی مەلاکان بۆ هەموو شتێکی کوردیە وەک کلتور، فەرهەنگ، شیعر، چیرۆک، زەماوەند، سیاسەت، نێشتیمان پەروەری ، ڕۆژانە چەندین دراماو گۆرانی بیانی ڕووت یان نیمچە ڕووت لە کەناڵە کوردیەکانەوە پەخش بکرێت یەک مەلای چاو بەخاڵ فزە لەدەمیان نایەت هۆکەشی ئەوەیە کە موڵکی کوردی پێوە نیە.

لای زۆربەمان ڕوونە کەیەکگرتوی ئیسلامی کوردستان هەمان ڕێکخراوی برایانی مسوڵمان(اخوان مسلمین)ی میسر‌و وڵاتانی عەرەبیە، ئەوانیش بۆ گەشتن بە مەرامیان دژایەتی هەموو بیرێکی ئازادی خوازانەیان دەکرد لە وڵاتەکەیاندا، دەستیان دەخستە ناودەستی ئینگلیزەکان بۆ کوشتنی کەسە چەپ‌و ئازادی خوازەکان، سڵیان لەهیچ کەس نەدەکردەوە بەسەرکردایەتی ئاغای گەورەیان حەسەن بەنا هەموو جۆرە تاوانێکیان لە میسردا داهێنابوو، ئەمانەی کوردستانیش خاوەنی هەمان بیروهۆشی سیاسین، هەمان ڕێبازی حەسەن بەناو ئوسامەو زەواهیریان هەیە بەڵام تاکاتی خۆی دێت، یەکگرتوی ئیسلامی‌و ئیسلامیە سیاسیەکانی کوردستان گەورەترین‌و بەهێزترین دوژمنی سەرسەختی گەلی کوردن لەڕوانگەی نەتەوەییەوە بەهێزترین بەرهەڵستکاری دروست بوونی دەوڵەتی کوردین وەک دژایەتی برایانی موسڵمان لەمیسر بۆ حوکمەتی پاشایی‌و کۆماری میسری، یەکگرتوی ئیسلامی کوردستان باشترین‌و دڵسۆزترین پیاوی حیزبی دادو گەشەپێدانی تورکیایە چونکە هەردوکیان جۆگەلەی یەک سەرچاوەن ، یەکگرتووی ئیسلامی کوردستان خەباتی ڕەوای کورد لەباکور بەتیرۆر باس دەکات، هاوپەیمانی دوژمنانی کوردە، کلتوری گۆرانی‌و زەماوەندو خۆشەویستی بەحەرام ناو دەبات، ژیانی ئاسودە بۆ ژن‌و پیاوی کورد بەڕەوا نابینێ، ناسین‌و لەیەک گەیشتنی کچ‌و کوڕی کورد بەحەرام دەزانێ ،دەیانەوێ ئەوڕاستیە بشارنەوە کە هەمیشە گەلی کورد لەخەباتدا بووە بۆ برەودان بەژیان‌و باشتر کردنی ژیانی ڕۆژانەی خەڵکی کوردستان بەخەون‌ دەزانن،گاڵتەیان بەفرمێسکی چاوی ژنێکی مێرد ئەنفال کراودێت گاڵتەیان بەچاوەڕوانی کێژێکی دەزگیران بێسەروشوێن دێت،دەبێت ئێمەی کورد مافی ئەوەمان هەبێت بەحوکمەتی هەرێمی کوردستان بڵێین تاکو کەی سنور بۆ ئەم مەلا بێکارو بێ بەرهەمانەی کوردستان دانانێیت کە خۆیان لەهەموو کارێکی ڕۆژانەی خەڵکی کوردستان هەڵدەقورتێنن وەک سێبەریان لێهاتوەو لە شوێنمان نابنەوە، گەر حوکمەتی هەرێم لە ئاست ئەم هەموو ناهەقیەی مەلاو ئیسلامیەسیاسیەکان بێدەنگ بێت، گەر فتوای کوشتن‌وحەرام کردن لەلایەن مەلاکانەوە بەردەوام بێت کەواتە خوێن بەرماڵی هەموومان دەگرێت، دەبێت مەلای چاو بەخاڵ خۆی ساخ بکاتەوە یان لای یەکگرتو مووچە وەربگرێت یان لای حوکمەت بێت‌و لە یاساو دەستووری هەرێم لانەدات، چونکە مافی ئازادی‌و ڕادەربڕین لەدەستوری هەرێمدا ئاماژەی پێدراوە.
 

ماڵپه‌ڕی جه‌‌مال عه‌زیز