|
٢٥\٢\٢٠١٧
پەیاموو یونسکۆی بە بۆنەو ڕۆ گەردوونی زوانی
ئەڎایی.
موختار کەریمی
--. وانای و پەروەردە و وەڵاکەردەیەو زانیاری بە زوانی ئەڎایی بێ گومان
پەی ڕەوت و کارایی فێربیەی بە گردی حاشاھۆرنەگێرەن و پەی بەرزبیەیەو
باوەڕ بە ویبیەی(اعتماد بە نفس) و وێوەشسیای و ڕیز جە وێ گێرتەی(عزت
نفس) فرە پەیوازەن. ئی دوە تایبەتمەندیا ھەرپاسە ھاندەری فرە کاراێنی
پەی وەڵکەوتەی و سەقامگیری کەسایەتی.
--. ژیواو ئێمە گرێدریاو زوانەکەیمانە. فەرھەنگەکا، پەیلوایەکا،
ھەستەکا و ئاواتەکا پەی دنیایە خاستەرێ بە پلەو یۆھەمی جە ڕاو زوانیەو
و بە واتێ تایبەتێ ئا زوانیە بەر وزیا و وێشا مرمانا. بەھا
مرۆڤایەتیەکا و ئا دورەدیمەنا کە کۆمەڵگاو مرۆڤایەتی دەوڵەمەنڎ کەرا و
ماناش پەنە مڎا ، جە ڕاو زوانیەو ڤاریاوە.
خاتوو ئیرینا بۆکۆوا وەرپەرسەو یۆھەمەو ڕێکوزیاو یونسکۆی سەر بە نەتەوە
یۆگێرتەکا بە بۆنەو ڕۆ گەردوونی زوانی ئەڎاییەو پەیامێوەش جە ڕۆ
٢١.٠٢.٢٠١٧ی ئاراستەو ویرووڕاو گردی جەھانی کەرد. دەقوو پەیامەکەی بە
زوانی ھەورامی پی جۆرەنە:
" بە بۆنەو ڕۆ گەردوونی زوانی ئەڎاییەو یونسکۆ وەفا‌ڎاری و وەرپەرسی
گردلایەنەو وێش بە بیەی چنزوانی و ڕەنگاوڕەنگی زوانی بەروزۆ و سەرشەو
پاگێری کەرۆ. زوانەکا بەروزوو کێبیەو ئێمەنێ و ویر و وێبیەو ئێمە پی
زوانا قەوارە گێرا. بە بی ڕێزگێرتەی جە ڕەنگاوڕەنگی و چنزوانی دیالۆگێو
متمانەدار و ھامکاریەو کارای میانەتەوەیی، کە پەی ئەنەیاواینێوە ڕاس و
ھەقەتینی جە فەرھەنگەکا پەیوازەن، ڕێک نمەگنۆ. باوەڕ بە بیەی فرەزوانی
و ھەرپاسە تەیاربیەی بە چنزوانی بۆ بە ھۆکاروو وریایی و بەرزبیەیەو
زانایی نەتەوە جۆراجۆرەکا و ئەنەیاواینێوە ڕاسی دوەلایەنە بەینوو ئی
نەتەوا. فێر بیەی و پەروەردەی چن زوانی ھامعان ویش پەیامێو وھەرپاسە
وەفا‌ڎارین بە ئاشتی و نۆباوی جە ئاستوو دنیاینە.
پەیاموو تایبەتوو ڕۆ گەردوونی زوانی ئەڎایی ئیمساڵی فێربیەی و وانای بە
چنزوانین کە ئینە ویش دەرفەتێوەن پەی بە ئەنجام یاوانای ئامانجەکاو
پرۆژەو "وەڵکەوتەی بیوچان"ی، بە تایبەیت ئامانجوو چوارەموو ئی پرۆژەیە.
دەسیاوای و دەسەبەرکەردەی وانای و فێربیەی گردی بە چەنیەتیەو(کیفیت)
بەرزەو پەی گردیۆی و ھاندای گردی پەی فێربیەی بێوچانی ئامانجوو
چوارەموو ئی پرۆژەینە. وانای و پەروەردە و وەڵاکەردەیەو زانیاری بە
زوانی ئەڎایی بێ گومان پەی ڕەوت و کارایی فێربیەی بە گردی
حاشاھۆرنەگێرەن و پەی بەرزبیەیەو باوەڕ بە ویبیەی(اعتماد بە نفس) و
وێوەشسیای و ڕیز جە وێ گێرتەی(عزت نفس) فرە پەیوازەن. ئی دوە
تایبەتمەندیا ھەرپاسە ھاندەری فرە کاراێنی پەی وەڵکەوتەی و سەقامگیری
کەسایەتی.
ژیواو ئێمە گرێدریاو زوانەکەیمانە. فەرھەنگەکا، پەیلوایەکا، ھەستەکا و
ئاواتەکا پەی دنیایە خاستەرێ بە پلەو یۆھەمی جە ڕاو زوانیەو و بە واتێ
تایبەتێ ئا زوانیە بەر وزیا و وێشا مرمانا. بەھا مرۆڤایەتیەکا و ئا
دورەدیمەنا کە کۆمەڵگاو مرۆڤایەتی دەوڵەمەنڎ کەرا و ماناش پەنە مڎا ،
جە ڕاو زوانیەو ڤاریاوە. گرنگیدای پی زوانا دوورەدیمەنێ ڕەنگاوڕەنگی
ئایەندەیما پەی کەراوە و وزە و تاوای تایبەتما پەی یاوای پی
دوورەدیمەنا پەنە بەخشا.
چی ڕۆنە و پی بۆنەوە من بە نامێ یونسکۆیەو داوا کەروو کە فێربیەی
چنزوانی جە گرد یاگێوەنە و جە گرد ویەریوەنە، بە تایبەت جە ویەروو
سیستموو وانای و پەروەردەی، سیستموو ڕاوەبەردەی، ئاسەوارە فەرھەنگیەکا،
ڕایاونەرە گردیەکا، دنیای مەجازی و بازاروانی و...بە ڕەسمیەت بشناسیۆ و
پەیڕەو کریۆ. ئێمە ھەر چنە بە زوانەکا ئێژایی بڎەیمی و ڕیزشا وەنە
گێرمێ، پا ئەنڎازە تاومێ پەی وەشکەردەی دنیایە وەشتەرێ کە شایانوو
مرۆڤایەتی بۆ، بە شیوازێو کارا ھەرمانە کەرمێ".
ئیرێنا بۆکۆوا وەرپەرسەو یۆھەمەو یونسکۆی
٢١\٢\٢٠١٧
- ئاڵمان
shahoko22@yahoo.de
|
