|
٢٧\٤\٢٠١٦
قامیشلو و
توزخورماتو، دوو کێشە و یەک ناوەرۆک!!
عەبدوڵا ساڵح
ماوەیەکە شەڕو پێکدادان لەم دوو شارەدا دەستی پێکردوە لە نێوان ئەو
ھێزە چەکدارانەی لەوێ جێگیرن ، لایەنێکیان لەھەردوو شارەکە کوردزمان و
ئەویدیکەیان عەرەبزمان و تورکمان زمانن ، ئەنجامی ئەوپێکدادانە چەندین
کوژراو برینداری، چەکدارو سڤیل ، لە ھەردووک لا لێکەوتۆتەوە .
ھەموو لایەنە بەشداربوەکانی ئەم شەڕە بەرامبەر دوژمنێک وەستاون ناوی
داعشە ، بۆیە لێرەدا پرسیارەکە ئەوەیە ھۆکاری ئەم پێکدادانە چی یە و
بۆچی دەبێ لە ڕێسای ( دوژمنی دوژمنم دۆستمە ) بەدەر بێ ؟
ڕاستیەکی حاشا ھەڵنەگرە داعش لەباری سەربازیەوە لە پاشەکشەدایە ،
مانەوەی ئەم ھێزە ، بەگوێرەی ھەواڵەکان ، بەندە بەکاتەوە ، ئەگەر زۆر
دوور نەڕۆین نزیک بە ساڵێک کەمتر یا زیاتر ، گەورە بەرپرسانی ئەمریکا
باس لە ھەڵاتنی چەکدارانی ئەو گروپە دەکەن بەرەو لیبیا و ئەوەش وەک
نیشانەیەک بۆ تێکشکانیان و سەرکەوتنی بەرەی دژ بەوان لەقەڵەم دەدەن .
داڕشتنی پلان بۆقۆناغی دوای داعش لە ئێستاوە زۆر بە جدی کەوتۆتە
بەرنامەی کار و سیاسەتی ھەموو ئەو لایەنانەی لە شەڕی دژ بە داعشدا
خۆیان بە براوە دەزانن ، چ دەولی ، چ ئیقلیمی و چ ناوچەیی ، ھەریەکە بە
گوێرەی بەرژەوەندی تایبەتی خۆیان . مەسەلەی سەرلەنوێ دابەشکردنەوەی
ناوچەی نفوزو دەسەڵات ناوەرۆکی ئەم پلانەیە .
دەنگۆی ئەوەھەیە جەزائیر کەوتبێتە نێوانگیری بەینی ئەردۆگان و بەشار
ئەسەد چونکە ھیچکام لەم دوو لایەنە بە شەڕ پشتی یەکتریان پێ لە
عەرزنەدرا ، وەواپێدەچێ بەشار ئەسەد وا زوو نەڕوا ، جگە لەوەش نیمچە
دەوڵەتێک لە باکوری سوریا خەرێکی دامەزرانەو ھێزێکی سەربازی تۆکمەو
بەتوانای ھەیە کە ھیچکام لەم دوو دەوڵەتە نەک تەنیا چاویان پێھەڵنایە ،
بگرە بەخەتەر گەورەی دەزانن بۆ دواڕۆژی دەسەڵاتیان.
لە توزخورماتو کینەو بوغزی قەومی و تایفی لەسەردەستی ھێزە دەسەڵاتدارە
قەومی و تایفیەکانی ناوچەکە مێژویەکی قێزەونی ھەیە ، ئەمە کراوە بە
بنەما و بیانوو بۆ ھەڵایساندنی شەڕێکی نگریس بەمەبەستی سەرلەنوێ
دابەشکردنی ناوچەی نفوزو دەسەڵات بۆ قۆناغی دوای تێکشکانی سەربازی داعش
لەلایەک ، وە پەردەپۆش کردنی ئەو ئیفلاسە سیاسی و ئابوری و
کۆمەڵایەتیەی سەرانی ھەردووک لا خۆیان و کۆمەڵگایان تێوەگلاندوە
لەلایەکی تر.
ھەر لەسەرەتای دامەزراندنی دەوڵەتی عێڕاق لە بیستەکانی سەدەی ڕابردوو
تاکو ئێستا ئەم ووڵاتە حکومەتی وا فاشلی بەخۆیەوە نەدیوە وەک ئەوەی
ئێستا شیعە بەڕێوەی دەبا .
سوور بوون و پێداگری حیزبە دەسەڵاتدارەکانی کوردستانیش لەسەر
قوڵکردنەوەی شەڕی دوزخورماتو بە بیانوی بەرگری لە ھاونەشتمانیە
کوردەکانی ئەو شارە جگە لە خۆڵکردنە چاوی خەڵک ھیچیتر نیە ، مەگەر ئەو
کارەساتەی ئەمڕۆ ھەر ئەو حیزبانە بەسەر چەندین ملیون خەڵکی ھاوزمانی
خۆیانیان ھێناوە لە کوردستان دەلیل نیە بۆ ئەو سیاسەتە چەواشەکاریە ؟
ئەو دەسکەوتە گەورەو بەرچاوانەی لە کوردستانی سوریا بەدەست ھاتوون نابێ
بکەونە نێو تەڵەی شەڕی قەومیەوە چونکە بێشک دەبێتە مایەی لەدەستدانی
ھەلێکی مێژویی کە ڕەنگە وا زوو دووبارە نەبێتەوە .
شەیپور لێدان بۆ ھەڵگیرساندنی شەڕی قەومی و کردنی بە بنەمایەک بۆ
بەردەوامبونی ئاڵوزی و پشێوی و نەھێشتنی ئاشتەواری ناو کۆمەڵگا
بەبیانوی بەرگری لە " خاک و نەتەوە " لەھەر لایەنێک و بۆ ھەر مەبەستێک
بێ پێویستە ڕیسوا و ئیدانە بکرێ.
٢٥\٤\٢٠١٦
a_salih11@hotmail.com
|
