|
١٠\٤\٢٠١١
''قبوڵ ناکەم''،
باربی و یه‌کی ئایار.
سەلام
عه‌بدوڵا
سەرۆکی هەرێم وتی:
(قبووڵ ناکەین هیچ کەس بەناوی میللەتەوە قسە بکات و ئێمە وەک
دژی بشوبهێنێ...). "زۆر باشە"، بەڵام پرسیارێک هەیە: چۆن قبووڵیان
کردووە لەسایەی دەسەڵاتەکەیدا، ئەو هەموو ناعەداڵەتی و گەندەڵییانە
ئەنجام بدرێ؟ ئایا ئاگایان لێ نەبووە؟ چۆن تا ئێستا لەئاستیاندا
بێدەنگیان هەڵبژاردووەو؟ چۆن هیچ هەڵویستێکیان نەنواندووە دژ بەو درزە
قووڵە لەنێوان داهاتی رۆژانەی بەرپرسەکانی حزب و حکومەت و بێکار، کەم
ئەندام، کرێکار، مامۆستا تازە دامەزراوەکان، پۆلیس، سوپاو ئاسایش و
فەرمانبەرەکان؟ کەواتە ئۆباڵی هەموو تاوان و کەموکوڕییەکان لە ئەستۆی
ئەوە.
پێدەچێت سەرۆکی هەرێم لەسەر وەهمی رێگای سەرەڕەش- هەولێر دەژێ و
راوێژکارەکانی دەوروبەری قسە و نوکتەی خۆشی بۆ دەگێڕنەوە.
ئێوەش گەندەڵن!
گەندەڵکارەکان بوون بە باسی راگەیاندە گەندەڵەکان، یەکەمەکەیان بووە بە
هۆی گرانی و بەدبەختی بۆ"کەمایەتی"و دووهەمەکەیان گەرچی لافی فرەڕەنگی
دەکەن، بووە بەهۆی شاردنەوەی راستی تر و کوشتنی مافی هاوڵاتیان لە
وەرگرتنی زانیاری و بۆچوونەکانی تر. ئەمە راستییەکە و ساڵانێکە بە
ئەزموونی خۆم لەگەل ئەو رۆژنامەو گۆڤارانە هەستم پێکردووە. دەسەڵاتی
فرۆشتن و ناساندنی کەسانی نەزان وەک"روناکبیر"و"بیرمەند" بە خوێنەران،
هەمان ئەو دەسەڵاتەیە کە بەڵێندەرایەتی، عەقار، پلەوپایە بە بەرپرسە
حزبییەکان و هاوپەیمان و کەسوکارەکانی دەدا، بەهێزکردنی هەمان
ئۆتۆرتێتی ساختە و گەندەڵە...رووی تری هەمان وێنەی ئەو دەستە شاراوەیە
کە عەقڵ دەروخێنی.
هەمەج و نەزانەکان چی دەڵێن.
بۆ نموونە گەندەڵی فکری و نەزانی گەیشتووەتە ئەو ئاستە هەندێ کەس وەک
بەختیار عەلی بڵێ(گومان لەوەدا نییە کە سیاسەتی نوێ پێویستی بە
نوخبەیەکی ئیداری و ئابووریناس و سیاسەتمەداری گەورە هەیە تا بتوانێن
دەوڵەت لە فۆرمە نوێکەی ببات بە بەڕێوە...بە نوخبەی رۆشنبیری و تەکنیکی
و فیکری هەیە تا بتوانێت ئیش بکات. سیاسەت و حوکمڕانی لە سەردەمی نوێدا
ناتوانن بێ فەلسەفەیەکی رۆشنی ئابووری و سیاسی و ئیداری بژین...پێویستی
بە ژمارەیەکی گەورە لە عەقڵ هەیە بیری بۆ بکاتەوە...)
.
ئایا حکومەتی فەرەنسا، یونان، ئیتالیا، تورکیا، ئیران، سعودیە...هتد
نوخبە و رۆشنبیر و تەکنیک و فەلسەفەی رۆشنیان نییە؟ دیارە هەیانە،
بەڵام مەسەلەکە لێرە نییە، بەڵکو لە پرسیاری چ فەلسەفە و تەکنیک و
رۆشنبیرییەکیان هەیە.
فەرەنسا، بەریتانیا و ئەڵمانیا و ئەمریکا هەموو ئەو شتانەیانە هەیەو
خۆیان بە ئاشتیخواترین و دیموکراتترین رژێمکانی دنیا دەزانن، بەڵام
لەناوەوە وەک سەرمایەدارییەکی چاوچنۆک ولەگەل گەلانی تر وەک
جەندەرمەیەکی تورک رەفتار دەکەن. عەقڵی هەمەجی، لۆژیکی هەمەجی هەیە و
راگەیاندنە کوردییەکان و"سەربەخۆکان" ئەو جۆرە"زانستە دەگمەنانە" بە
خەڵک دەفرۆشن.
"خوایە لە نەخۆشی و کۆمونیزم بمانپارێزە"!
پێشی چەند ساڵێک جەلال تالەبانی وتی(سەردەمی جیڤارا بەسەرچووە)و ئیمرۆ
نەبەز گۆران دەڵێ(سەردەمی ئۆباما)یە و "روناکبیر"ە بلیمەتەکان لە لڤین،
ئاوێنە، هاوڵاتی، رۆژنامە و کەمال میراودەلی و فاروق و ئاراس و بەختیار
و مەریوان(نازی و مارکسی بەیەک دەشوبهێنن). ئەو بۆچوونانە بۆ
خزمەتکردنی دیکتاتۆرییەتی ژەنەڕاڵە سەربازییە کۆزەرڤاتیفە نوێکانی
ئەمریکایە.
سەردەمی سەرمایەی وەحشیگەرە کە تسیگلەر دەڵێ(کویلەکەران لە بۆرێە
دانیشتون). بۆرسە بەشێکی چارەنووسسازن بۆ مانیپۆلکردنی(ئاراستەکردن)ی
سیاسەت و بارودۆخی مرۆڤ لە جیهان.
وەک لە هەواڵەکان هاتووە، مام جەلال هەوڵیداوە بۆ نزیککردنی حزبە
کوردییەکانی رۆژئاوا لەگەل بەشار ئەسەد، بۆیە بەشار بڕیاری داوە
ناسنامە بە کوردان بدەن. ئایا حەق نییە مام جەلال هەمان ئەو هەوڵە بدا
بۆ کوردە"ئاوارەکانی" رۆژهەڵات کە ماوەی پتر لە 30ساڵ لە خانەقین،
شیرەوەن و کەلار و ئاوایی دەورە دەژێن و بەهەزار شێوە لەگەڵ هاوڵاتیانی
ئە دەڤەرە تێکەڵ بوون، بەڵام هێشتا وەک ئاوارە مامەڵەیان لەگەل دەکرێ و
لە گشت مافێک رووتکراوەنەتەوە؟!
ئێستا سەردەمی(قەسابەکەی لیون)ە.
کلاوس باربی نازییەکی تاوانبارەو لە1946 ناوی لە لیستی داواکراوەکان
بوو، بەڵام پاش1947 ناوەکەی لە لیستی موچەوەگرانی دەزگایەکی جاسووی
ئەمریکا بیرا و بۆ بەگوێرەی دۆسییەکە لە1966بۆ هەواڵگری ئەڵمانیا کاری
کردووەو سەردانی بیرۆ، بەرازیل، سپانیا، پورتوگال و مەکسیکۆ کردووە،
ئەمریکا شاردیەوەو رەگەزنامەی نهێنی بۆ چێ کرد، لە 1951گەیشتە پۆلیڤیا
و بەناوی(کلاوس ئەڵتمان)دەژیا و لەوێ خولی تەکنیکی ئەشکەنجەدان و
بەگژداچوونی پێشمەرگە کردەوە، لە 1979بوو بە بازرگان و مادەی(گای
چینی)بە کۆمپانیای ئەڵمانی(بویرینگە مانهایم)فرۆشتووەو زۆر شتی تر....لەدواییدا
دەستگیرکراو رادەستی فەرەنسا کرا و بەهۆی کوشتنی پارتیزان و شوعی و
پەیەکان لە شاری لیون، بە زیندانی هەتاهەتای سزا درا. بە کورتییەکەی
ئەوەی هەموو ئەو رێکخراو حکومەت و دەزگایانە کۆدەکردەوە: دژایەتی
شوعییەت بوو و خودی ئەم هۆیە ئیمڕۆ لە کوردستان حزب و لایەن و باربی
کلاوسە کوردەکان کۆدەکاتەوە کە هەروەک خاوەن زەمینەکە لە فیلمی(Glanz
und Elend)لە ژووری مێوانەکەی و لە ژێر وێنەکەی مریم نووسیبوو: خوایە
لە نەخۆشی و کۆمونیزم بماپارێزە!
درۆی"ئۆپۆزیسیون".
لە رووپێوی هەواڵ و راگەیاندنەکاندا درۆکردن بە لێشاو جێی راستی
گردۆتەوە. کۆمەڵ و یەکگرتوو و گۆڕان وایان بڵاوکردەوە کە لەمەودوا
بەشداری خۆپیشاندانەکان دەکەن، بەڵام راستییەکەی ئەوەیە کە پێش ئەو
راگەیاندنە نەک تەنها بەشداریان کردووە بەڵکو هەوڵیانداوە ناڕاستەوخۆ
خۆیان بکەن بە خاوەنی.
شەریکە دزی -
دەسەڵات بە تەوافق!
خاڵ بە خاڵی پڕۆژەکەی ئۆپۆزیتسیونی راستڕەو لە 3/3خوێندەوەو تاقە
وشەیەکم نەبینی لەبارەی عەدالەتی کۆمەڵایەتی: نە داواکاری بیمەی
کۆمەڵایەتی، نە یاسای کار، نە کورتکردنی دەستی کەرتی تایبەت، نە
خۆمالًیکردنی کەرتی نەوت و گاز، چ جا لە ئابوروی هەرەوەزی!
نە حکومەت ونە"نەیارەکەی"تەنانەت هەوڵ نادەن سوود لە بەرنامەکەی(neu
deal)ەکەی رۆزفێڵد وەربگرن، بەڵام هەموویان بۆ گاڵتەجاڕی بە هیوای خەڵک
باسی عەدالەتی کۆمەلایەتی دەکەن!
ئەوەی بۆ ئەو سێ هێزە گرنگە ئەمەیە:
قوربانیانی تیرۆری حکومەتی هەرێم لەلایەن(کۆمەڵ، یەکگرتوو و گۆڕان)ەوە
وەک لە راگەیاندنەکەیان لە رۆژی 5/4/2011هاتووە"بەناوی خوای بەخشندە و
میهرەبان"، کران بە بناغە بۆ حکومەتێکی"تەوافق"ی ناتەکنۆکرات. ئەو
هێزانە شەرم دەکەن رێکورەوان بنووسن: ئێمە دەمانەوێ ببین بە شەریک!
ئۆباما لەنێوان لیبیا و"شۆڕشی"کوردستان!
نووسەرانی ئەو نامەیە کە بۆ"سەرۆک" ئۆباما ناردووە، چاوەڕوان بوون،
فڕۆکە جەنگییەکانی بۆ بۆردومانکردنی بنکە ستراتیژییەکانی دەسەڵات بنێرێ،
بەڵام وا بە پەلە وەزیری بەرگری بۆ کوردستان رەوانە کردووەو سبەی
ئامانجەکەی دەپێکێ: تاوتوێ کردنی بارودۆخی ئەمنی عیراق و پرسی پێشمەرگە
و کشانەوەی هێزەکانی ئەمریکا لە عیراق. گیتس و ئیدارەی ئەمریکا خەمی
تریان هەیەو پێشتر هێڵی سووریان بۆ"ئۆپۆزیتسون"و داواکارییەکانی کێشاوە.
ئەوەی بیەوێ یارییەکە تێک بدا، کراس سپییە دیموکراتەکان لەناو
پەرلەمانەکانیانەوە بەشێوەیەکی سیڤیلانە لەدژیدا جەنگی سپی-لە میدیاکان
وێنەی خوێن و وێرانکاری پیشان نادرێ-، بەرپادەکەن.
ناتەکنۆکراتی، تۆمەت و گەمە، گاڵتەو هەڕەشە!
ئۆپۆزیتسیون لە داوای دامەزراندنی حکومەتە تەکنۆکراتەکەی پاشگەز بووەو
پارتی و یەکێتیش وەک"شێر" 3 خاڵەکەی "ئۆپۆزیتسیونەکەیان"رەتکردەوەو هەر
لە ئێستاوە تۆمەتیشیان بۆ ئامادەکردوە(ناتوانین هەندی جموجۆڵی
ئۆپۆزتسیون لە نیازی هەندێ شۆفێنیست جیا بکەینەوە). هەروا دووپاتیشیان
کردووە کە(دامودەزگاکانی هەرێمیش وڵامی داواکارییە رەواکانی
خۆپیشاندەرانیان داوەتەوە...). لەولاوە ئەنجومەنی کاتی دەنووسن(ئێمە
پەنجا رۆژە لەسەر شەقام نین بۆ میکاژکردن بان پینەکردنی ئەم دەسەڵاتە
شکستخواردووە، بەڵکو بێرەین بۆ هێنان کایەی ئەزمونێکی نوێ)و دوو
سبەی(نەخشەی رێکا)کەی بۆ دامەزراندنی دەسەڵاتداریەکی تر رادەکەیەنن.
کەواتە حکومەت دەیەوێت وەک خۆی بمێنێتەوەو چاوەڕوانە خەڵکیش بۆ ماڵەوە
بڕۆنەوە" گەرنا دەسەڵات رێگە و شێوە و توانای خۆی هەیە بۆ پاراستنی
مافی هەمووان، بە مافی خۆپیشاندەرانی ئۆپۆزیتسیونەوە" و دیارە
ئۆپۆزیتسیون ئەمەی پێ قوت نادرێ، بەڵام نە ئەندامەکانیان لە پەرلەمان
دەست لە کار دەکێشنەوە، نە بەرپرسەکانی حزب و حکومەن حکومەتیش وەک لە
یەمەن دەچێتە ریزی ناڕەزاییکەران!
"راوێژکارە" شاراوەکانی پشت پەردەی ژوورەکانی بەرپرسە حزبی و حکومی و
ئۆپۆزیتسیون، پێیان باشە بارودۆخەکە وەک خۆی بمینێتەوەو لێرەو لەوێ
چاکسازی بچوک بکرێ، بەڵام سیستێم و خاوەن بەرژەوەندییەکان وەک خۆی
بمێنێتەوە. کوا ئەو هێزە کە نزیکەی 200ساڵ دەنگ و رەنگی چەوساوەکانی
جیهان بوو؟
تروسکەیەک لە رۆشنایی ناو تاریکستان ئۆپۆزیسیون و حکومەت.
نەبوونی هێزێکی راستەقینە و رۆشن بۆ دامەزراندنی عەدالەتی کۆمەلایەتی
لەبەرچاو نییە...ئەو هێزە لە کوێیە کە بۆ هەڵوەشاندنی شتە بێ
گیانەکان(کاڵاو پارە)سەپاوەکان کاردەکات؟ نامۆکردنی مرۆڤ و بەو شێوەیە
کە وەک بوونەوەرێکی پەککەوت لە بڕیارە کۆمەڵایەتییەکان دەبینرێ. ئەمە
وا دەکات مرۆڤ رەشبین ببێت لەبەرامبەر باڵادەستی ئەم گۆڕەپانە سیاسییە
کە لەلایەن هەموو لایەنەکانەوە ژەهراویکراوەو خەڵک و داخوازییە
رەواکانی لە هەڵدێرەوە بۆ هەڵدێرێکی تر دەبرێن.
رۆژی چینی کرێکار لەپێشمانەوەیە، ئایا چەپەکان لە ئێستاوە بە گیانێکی
یەکگرتووانە خۆیان بۆ ئەو رۆژە ئامادە دەکەن تا لەبەرامبەر ئەو هەموو
سەوداکارییانە، شەقامەکان بە داخوازییە چینایەتییەکان پڕ بکەن؟ ئایا
چەپەکان بەبێ پاشقولدان و کاری هەرزەکارانە و فرتوفێڵکردن لە یەکتری
هەوڵ بۆ رزگارکردنی کەرامەتی خۆیان و چینەکەیان؟ سەرەتایەکی ژیر و
دڵسۆز تۆمار دەکەن؟ یان هەر بەوشێوەیە کە هیچ لایەک ئێرەیان پێ نابات،
لە شوێنی خۆیان دەمینێتەوەو خەڵکیش بەدەم گاڵتەجاڕییەکانیەوە، نەفرەت و
نەعەلەتیان لێدەکەن؟!
هاوڕێیان!
ئەوان بە رەشبیرەکانیانەوە بەهۆی پەرتەوازی ئێمەوە بەهێزن...ئێمە دتوانین
ئەم هاوکێشەیە بگۆڕین!
ئومید لە هەینی و نوێژی ئومید و حکومەت نییە، بەڵکو لە
یه‌کێتیی بەرەی چەپی کۆمەڵگایە!
ماڵپه‌ڕی سه‌‌لام عه‌بدوڵا
|
