|
٨\١٠\٢٠١٥
قولاپی
چاکسازییەکانی وەزارەتی دارایی کێ دەگرێ؟
فەرمان
عەزیز شەریف
وەزارەتی دارایی حکومەتی ھەرێمی کوردستان نوسراوێکی بەژمارە ٢٨٥ لە
٢٢/٩/٢٠١٥ ئاراستەی ئەنجومەنی وەزیران کردووە . سەبارەت بەکەمکردنەوەی
خەرجیەکان و زیادکردنی داھات .
زۆر باس لەوە کرا وەزارەتی دارایی دەستی کردووە بەچاکسازییەکانی ,
ھەرچەندە نامەوێت رەشبین بم , بەڵام وەزارەتێک نەتوانێت موچەی مانگێکی
فەرمانبەران دابین بکات , بەدڵنیاییەوە ناتوانێت ئەو چاکسازیانەش
ئەنجام بدات , ڕەنگە نیەت و ھەوڵێکی چاکسازی لەلایەن بزوتنەوەی گۆڕان
ھەبێت , بەڵام ناتوانن , ئەوە ساڵێک زیاتر بەسەر ئەو کابینەیە تێپەڕی
سێ ساڵی دیکەش بۆ گۆڕان و وەزارەتەکەی بابزانین لەو ١٤ خاڵەی وەزارەتی
دارایی دیاری کردووە چاکسازی تێدا بکات , دەتوانێت چەندی جێ بەجێ بکات
, دواتر خۆیان بەدواداچوونی بۆ بکەن و بۆ ڕای گشتی رایبگەیەنن لەو
پڕۆژە چاکسازیە چەندیان جێ بەجێکردووە , ئەو بڕگە و خاڵانەی پەیوەندی
بەھەژارانەوە ھەیە بەدڵنیاییەوە جێ بەجێ دەکرێت و ئەوانی دیکە ماڵئاوا
, چونکە لەو وڵاتە یاسا تەنھا لەسەر ھەژاران جێ بەجێ دەکرێت .
وەزیرێک لەماوەی ساڵێکی دەست بەکاربوونی ھێشتا چاکسازییەکانی
وەزارەتەکەی خۆی بەتەواوی ئەنجام نەداوە , چۆن دەتوانێت لەسەرجەم
بابەتە دارایی یەکانی دیکە چاکسازی ئەنجامبدات , نەیتوانیووە لیستی
موچە بەتەواوی پاک بکاتەوە لەموچەخۆری بندیوار و دوو موچە و سێ مووچە ,
چۆن دەتوانێت لەبوارەکانی نەوت و وەبەرھێنان ... ھتد چاکسازی بکات .
وەزیرێک وەزیری دارایی بێت و یەک دیناری ئەو وڵاتەی لانەبێت , دەپرسم
ئێوە چ ناوێک بۆ ئەوە دەدۆزنەوە ؟ حکومەتێک ١٦ حیسابی بانکی بکاتەوە و
تەنھا یەک دانەی لای وەزیری دارایی بێت و ئەویش بەتاڵ بێت , ڕەوانەی
تورکیا بکرێت بۆ ھێنانەوەی پارە و حیسابەکەی بەتاڵ بێت , ئەمە لوتکەی
سوکایەتی نیە , وەزیریش بەوپەڕی خۆشحاڵیەوە خەریکی بردنی دیاری بێت بۆ
سەرۆکی حکومەت بەبۆنەی رۆژی لەدایک بوونیەوە .
خەڵک زۆر دەمێکە دەستی لەپارتی و یەکێتی شووشتووە , تاکو گۆڕانکاری لەو
وڵاتە بکەن , چونکە دوای ٢٤ ساڵ ھەموومان شاھیدبووین و تێگەیشتین ,
بەڵام خەڵکێکی زۆر ھیوایان لەسەر گۆڕان ھەڵچنیبوو , کەچی گۆڕان ئەو
ھیوایەشی لەگۆڕنان , بۆیە گەیشتین بەو ڕۆژگارە . کاتێک گۆڕان ئۆپۆزسیۆن
بوو خەڵک دەیگوت : گۆڕان ھەیە و بگاتە دەسەڵات چاکسازی دەکات , گوڕان
یش ھەمان قسەی دەکرد , تەنھا بگەنە دەسەڵات ئەو وڵاتە دەکەنە شامی
شەریف , کەچی نەیتوانی سادەترین گۆڕانکاریش بکات , نەبوونی موچە و
قەیرانی دارایی و ئاڵۆزی نێوان ھەولێر و بەغدا و کۆچی بەلێشاوی گەنجان
... ئیتر شتێک لەو وڵاتەدا نەماوە خەڵک دڵی پێ خۆش بێت .
یەکەم کاری گۆڕان کە وای کرد لەیەکەم بەشداری کردنی لەھەڵبژاردن ٢٥
کورسی بەدەست بھێنێت , کارکردن بوو لەسەر گەندەڵی و دۆسیەی دزینی نەوت
و دارایی , ھەربەو نەفەسە کارکردن لەچوار ساڵی ئۆپۆزسیۆن بوونی زیاتر
متمانەی خەڵکی پەیداکرد , توانی بۆ جاری دووەم ٢٤ کورسی دیکە
لەپەرلەمانی کوردستان بەدەست بێنێتەوە , خەڵک ئیتر ئەو قەناعەتەی
لادروست بوو ھێزێک ھەیە پارە و سامانی ئەو وڵاتەی دەگەڕێنێتەوە , کەچی
لەیەکەم ھەنگاوی چوونی بۆ دەسەڵات خەڵکی کوردستانی نائومێد کرد .
گۆڕان با دڵنیابێت چۆن لەچوار ساڵی ئۆپۆزسیۆن بوونی بەجدی کاری لەسەر
دۆسیەی نەوت و دارایی کرد و ھەموو خەڵکی کوردستانی ھۆشیار کردەوە
لەپارە و سامانی ئەو ولاتە و خەڵکی تێگەیاند داھاتی ئەو وڵاتە بۆ کوێ
دەڕوات و دەبێ بۆ کێ بگەڕێتەوە ؟ ئەگەر لەو سێ ساڵەی لە تەمەنی ئەو
کابینەیەی ماوە بەڕاستی داھاتەکە نەگەڕێنێتەوە بۆ خەڵکی کوردستان و ھەر
لەدەستی چەند کەس و حیزبێک بێت , دڵنیابن ئێوەش بەر نەعلەتی میللەت
دەکەون و لەسزای گەل رزگارتان نابێت.
farmandween@yahoo.com
|
