١٦\٦\٢٠١٧

راگەیاندنێک لە دەستەی ئامادەکاری بزووتنەوەی دژی هەژاریی.

ئەمڕۆ خەڵکی کوردستان بە قۆناغێکی ئاڵۆزو دژواردا تێدەپەڕن. قەیرانێکی هەمەلایەنەی ئابوری و سیاسی و ئیداری و حکومەتی، کوردستانی داگرتوە. حیزبه‌ دەسەڵاتدارەکان بەردەوام هەوڵی ئەوە دەدەن باری قەیرانەکان بەسەر شانی خەڵکی هەژار و کەمدەرامەتی کوردستاندا بشکێننەوە. بە ناوی پاشەکەوتی موچەوە، گیرفانی سەدان هەزار کرێکارو کارمەند و مووچەخۆری حکومەتیان داتەکاندوە. باج و رسوماتی زۆریان لەسەر هاوڵاتیان داناوە. نرخی خزمەتگوزاریە پزیشکی و تەندروستیەکانیان بەشێوەیەکی سەرسوڕهێنەر گران کردوە. خوێندنی خۆڕایی و حکومی خەریکە بەرەو نەمان دەچێت. دەیان هەزار کەس، بەتایبەتی توێژی لاوان، روبەرووی بێکاری کراونەتەوە و هیچ سەرچاوەیەکی داهات شک نابەن! لەولاشەوە، لەرێگای دەست گرتن بەسەر پارەی نەوت و داهاتی کوردستان و قۆرخکردنی بازاڕەوە، سەرمایەی خەیاڵی بۆخۆیان و کۆمپانیاکانی نزیك لە خۆیان کەڵەکە دەکەن. بانکە جیهانیەکانیان لە داهاتی تاڵانکراوی خەڵك پڕکردوە. ئەم بارودۆخە ئابوری و سیاسیە سەختە، توێژە کەمدەرامەتەکانی کۆمەڵگای بەرەو هەژارییەکی کەمەرشکێن پاڵ پێوەناوە.

بۆ رزگاربوون لەم بارودۆخە نالەبارەی ژیان، خەبات و بەرەنگاربونەوە، وەك کاردانه‌وەیە‌کی به‌ردەوام و بە هەموو شێوازەکانیەوە له‌لایه‌ن خه‌ڵکی هه‌ژار و به‌شمه‌ینه‌تی کوردستانه‌وە دەستی بۆ براوە‌. هاتنه‌مه‌یدانه‌ جەماوەریه‌کانی ئه‌م دواییانه‌ی شارەکانی کوردستان، بە دەربڕینی ناڕەزایەتی و خۆپیشاندان و مانگرتن و بایکۆت، نمونه‌ به‌رجه‌ستە و ئامرازەکانی ئه‌م خه‌بات‌ و تێکۆشانەن‌ دژی گەندەڵی و ناعەدالەتیی دەسەڵاتدارانی هەرێم. هەنگاوەکانی داهاتووی ئەم خەباتە ئەوەی پێویست کردوە کە بزووتنەوەیەکی جەماوەری گشتی و هەمەلایەن لە ‌دژی هەژاریی و نه‌داری و دەرباز بوون لەم ژیانە کولەمەرگیە بەرێ بکەوێ.

وەستانەوە بەرووی هەژارییدا لە هەلومەرجی ئێستادا پێویستی بە هەنگاوی گونجاوی عەمەلی و رێکخراوەیی هەیە و ئاراستە سەرەکیەکانی ئەم خەباتەش دەکرێ لەم سێ خاڵەی خوارەوەدا دیاری بکرێ:

یه‌که‌م: وە‌ستانه‌وە‌ دژی هەر نەخشە و پلان و پرۆژەیەک کە دەسەڵات بە ناوی چاکسازیەوە، بیەوێ هەژاریی و بێکاری و برسێتی بەسەر جەماوەری کرێکار و زەحمەتکێش و نەداردا بسەپێنێ.

دووەم: خه‌بات‌ لەپێناو سه‌پاندنی ئه‌و خواسته‌ ئابوری و سیاسی و کۆمه‌ڵایه‌تیە دەستبەجێیانەی که‌‌ دەبێتە مەرجی فەراهەم کردنی ژیانێکی شایستەو گونجاو بۆ هاوڵاتیانی کوردستان.

سێیەم: هەوڵدان لە پێناو گەڕاندنەوەی پارە و سامانی بەتاڵانبراوی خەڵك لەلایەن دەسەڵاتداران و لێپرسراوانی حیزبە فەرمانڕەواکان و تەرخانکردنی بۆ خزمەتی خەڵکی کوردستان.

بانگەوازی هەموو حیزب و لایەن و گرووپ و رێکخراوێکی سیاسی و جەماوەری و مرۆڤدۆست دەکەین کە وەستانەوە بە دژی هەژاریی و برسیکردنی خەڵک بە ئەرکی سەرشانی خۆیان بزانن و دەوری چالاکیان هەبێت لە بەرێخستنی بزووتنەوەیەکی بەهێز لەدژی هەژاریی و پێشگرتن لە رودانی برسێتی و کارەسات لە هەرێمی کوردستان.

دەستەی ئامادەکاری ''بزووتنەوەی دژی هەژاریی''