|
٩\١\٢٠١٤
راگەیاندنی
کۆمەڵەی مافی مرۆڤی کوردستان
سەبارەت بە
رووداوەکانی ئەو دواییەی باشووری کوردستان.
 لە
چەند رۆژانی رابردوودا و دوای دەستپێکردنى خۆپێشاندانەکانی شارۆچکەی "سەید
سادق" لە باشووری کوردستان هێزەکانى ئاسایش و پۆلیس بە گولە رووبەڕووى
خۆپیشاندەران بوونەوە، کە ئەوەش بووە هۆى گیان لەدەستدانى "بڕیار حەسەن"
و بریندارکردنى زیاتر لە دوو سەد خۆپیشاندەرى دیکە و خەڵکى کوردستانیش
سەرەتاى ساڵى نوێى بەسەرکوت و کوشتن و بریندارکردن دەستپێکرد.
وێڕاى ئەوەى گوللەبارانکردنى خۆپیشاندەران و هەڵکوتانى توندوتیژانەى
هێزە ئەمنیەکان بۆ سەر خۆپیشاندەران جێگەى نیگەرانییە ئاماژەیەکى
ترسناکى دیکەى پێشێلکاریى مافەکانى مرۆڤیشە. لە ئێستاشدا
توندوتیژیەکانیش لە بڵاوبوونەوەدایە بە شار و شاروچکەکانیتردا.
لە بەردەوامیى رووداوەکانی شارۆچکەی کەڵەکیشدا نیگەرانی چاودێرانی
بواری مافی مرۆڤی زیادیکردوە و بەو بۆنەیەش کۆمەڵەی مافی مرۆڤی
کوردستان وێڕاى ئیدانەکردنی نزیکایەتیى توندوتیژانەى هێزە ئەمنییە
حیزبیی و حکومییەکان رایدەگەیەنێت وەکوو رێکخراوێکی داکۆکیکار لە
مافەکانی مرۆڤ لەگەڵ ئەوەی داوای پێکهێنانی لێژنەی بێلایەن دەکەین بۆ
بەدواداچوونی ئەو شێوازە ڕووبوونەوەیە لەگەڵ خۆپێشاندەران، جۆرى
هەڵکوتانە سەر خۆپیشاندەرانیش بە کارێکی نامرۆڤانە و دوور لە هەموو
پێوانەکانی مافی مرۆڤ دەزانین و پێشێلکردنی بڕگەی نۆزدە و بیستەمى
جاڕنامەى گەردوونی مافەکانی مرۆڤیشە، کە تیایدا هاتوە ھەموو مرۆڤێک
مافی ئازادیی بیروڕا و ئازادیی دەربڕینی ھەیە و بە گوێرەی ئەم مافە
ھەموو مرۆڤێک بێ دەستتێوەردان ئازادە لە ھەڵبژاردنی بیروڕا، گەڕان
بەدوای زانیاری، وەرگرتن و بڵاوکردنەوەى زانیاری و بیروڕا بە ھەموو
شێوازێکى دەربڕین و بێ گوێدانە سنووری ناوچە.
هەروەها بە پێی بڕگەی بیستەم ھەموو مرۆڤێک مافی ھەیە ئازادانە بەشداریی
کۆبوونەوە و گردبوونەوەی ئاشتییانە بێ. هەر بەو پێیەش سەبارەت بەو
رووداوانە کۆمەڵەی مافی مرۆڤى کوردستان هۆکاری خۆپێشاندانەکە هەر شتێک
بووبێت و خۆپێشاندەران هەر داواکاریەکیان هەبێت، گولە بەردانە گیانی
چالاکڤانانی مەدەنی و بێڕێزى و سووکایەتیکردن بە خۆپێشاندەران بە
نەریتێکی دواکەوتوانە و دژە مرۆڤانە دەزانین و وێڕاى هاوخەمی لەگەڵ
بنەماڵەی گیانبەختکردوو "بڕیار حەسەن" و ئارەزووی گەڕانەوەی تەندوروستی
بۆ بریندارانی خۆپێشاندانەکان، داواش دەکەین بکوژان و بکەرانی ئەو
کارەساتە مرۆییە لە دادگایەکی بێلایەندا لەسەر پێشێلکردنى مافەکانى
مرۆڤ لێپرسینەوەیان لەگەڵ بکرێت و بە پێى یاسا هەڵسوکەوت لەگەڵ
پێشێلکارانى مافەکانى مرۆڤ و توندوتیژکاراندا بکرێت، چونکە بە پێى
یاساى خۆپیشاندانى هەرێمیش نابێت هێزە ئەمنییەکان بە چەکەوە بڕۆنە
شوێنى خۆپیشاندان و نابێت چەک و گوللە بەرامبەر خۆپیشاندەران بەکار
بهێنن.
کۆمەڵەی مافی مرۆفی
کوردستان
info@kmmk.info
www.kmmk.info
|
