|
١٠\٤\٢٠١٢
راگەیەندراوی
پادک سەبارەت بە ئاستەنگ کردنی دیداری بەڕێز
عەبدوڵا ئۆجەلان و بارودۆخی مانگرتوان.
نەتەوەی وڵات داگیرکراوی کورد!
کۆمەڵانی ئازادیخواز و ئاشتیخوازی خەڵکی کوردستان!
پارت و ڕێکخراو و کەسایەتییە شۆڕشگێڕ و سیاسییەکانی کوردستان!
ڕێکخراوەکانی سیاسی و مەدەنی و پارێزەرانی مافی مرۆڤی ئوروپا !
سەدان ساڵە کوردستان داگیرو نەتەوەکەشی زۆر دڕندانە کەوتۆتە بە ھێرشی
ناڕەوا و نامرۆڤانەی داگیرکەرانی کوردستان و بێبەش کراوە لە ھەر جۆرە
ماف و ئازادییەک، ئەمە وێڕای ئەوەی کە ڕۆژ نی‌یە چەندین کەس لە ژنان و
پیاوانی نەتەوەکەمان بە شێوە و بیانووی جۆراو جۆرەوە لە بەندیخانەکان
ئەشکەنجە و ئازار یان لە سێدارە نەدرێن و لە نێو وڵاتی خۆشیان دا
نەردێنە بەر دەسڕێژی گوللـەی ھێزی داگیرکەر و شەھید نەکرێن، لە
بەرانبەر ھەموو ھێرش و پەلامارێکی دڕاندانەی ھێزی پڕ چەک و بێ بەزەیی
داگیرکەران بۆ سەر کوردستان و لە پێناو پاراستنی وڵات و نەتەوەکەمان،
ئەگەر لە نێو ماڵی خۆمان دا دەست بۆ چەک بەرین لە پێناو پارێزگاری کردن
لە ژیان و سەر و ماڵی خۆمان، ئەوە بە شەڕخواز و شەڕ ھەڵگیرسێنەر
تاوانبار دەکرێین و دەھۆڵی تیرۆریست بوون و شەڕخوازیمان بۆ ھەڵدەگرن بۆ
ئەوەی بێ بەزەییانەتر لە پێشوو بمانکوژن و بمانچەوسێننەوە، سەروەت و
سامانی وڵاتەکەمان بە تاڵان دەبەن و دەیگۆڕنەوە بە بۆمبی ژاراوی و
جارێکی دیکە بەسەرمانیدا دەڕێژن، کەچی ئەگەر ھاوار بکەین و ناڕەزایەتی
دەربڕین تاوانبارین بە سەربزێوی و یاخیبوون و یاساشکێنی.
ھیچ کەس و لایەنێک نی‌یە ئاگاداری ئەو ڕاستییە نەبێت کە ٢٥٦ ڕۆژە بەڕێز
عەبدوڵا ئۆجەلان سەرۆکی پارتی کرێکارانی کوردستان ڕێگای ھەرجۆرە دیدار
و چاوپێکەوتنێکی لەگەڵ ھەر یەک لە پارێزەر و بنەماڵەکەی پێنەدراوە، لەم
ماوە دوور و درێژە و ھەر جارەی بە بیانویەک و ھەر ھەفتەی بە بەھانەیەک
ڕێژیمی داگیرکەری تورک ڕێگری کردووە لە ھەر جۆرە دیدار و چاوپێکەوتنێکی
بەڕێز ئۆجەلان، ئەمە سەرەڕای ئەوەی کە دوورگەی ئیمرالی شوێنێکی شێدار و
نەگونجاوە بۆ ژیان و زەرەری زۆری ھەیە بۆ زۆر لە بەشە ھەستیارەکانی
لەشی مرۆڤ و بەتایبەت ھەناسەدان، کەچی بەڕێز ئۆجەلان لەم شوێنە دا زیاد
لە زیاتر لە ١٣ ساڵە زیندانی و ٢٥٦ ڕۆژە ھیچ زانیارییەک لەسەر
تەندروستی ناوبراو نی‌یە و نازانرێت کە بارودۆخی جەستەیی بەڕێز ئۆجەلان
لە چ ئاستێکدایە.
داگیرکەرانی کوردستان و تەنانەت دونیای دەرەوەش ئەگەر ھەتا ئێستا
کوردیان تاوانبار دەکرد بە شەڕخواز و تاوانی شەڕکردنیان دەدانە پاڵ،
ئەوە ئێستا لە پێناو کردنەوەی دەرگای دیدار و چاوپێکەوتنەکان، لە پێناو
ئاشتی و پێکەوە ژیان و ئاگاداربوون لە بارودۆخی بەڕێز ئۆجەلان دا،
ماوەی ٥٢ ڕۆژە نزیک بە ١٥٠٠ بەندکراو لە بەندیخانەکانی دەوڵەتی تورک و
چەندین چالاکی سیاسی و مەدەنی لە شاری ستراسبۆرگی فەرانسە لەپێش چاوی
ئەوانەی بەند و بڕگەکانی مافی مرۆڤ دەنووسنەوە٣٩ ڕۆژە دەستیان داوەتە
مانگرتن و لە ڕێگای خەباتی مەدەنییەوە داوای سەرەتاییترین مافی شەرعی و
یاسایی بۆ بەڕێز ئۆجەلان وەک بەندکراوێکی ڕێگای ئازادی و ئاشتی و
پێکەوەژیان دەکەن، ئاشکرایە کە مانگرتنی ڕۆڵەکانی نەتەوەکەمان لە
بەندیخانەکانی دەوڵەتی تورک و لە جەرگەی ئوروپای پارێزەری مافەکانی
مرۆڤ، لە پێناو سەقامگیرکردنی ئاشتی و ئازادی و وەدیھێنانی عەداڵەتی
کۆمەڵایەتی و مافی مرۆڤ و دێمۆکراسی دایە، کەچی ئەوە لە دوو مانگ نزیک
دەبێتەوە و باری تەندروستی و لەشساغی مانگرتوان بەرە و لاوازی دەچێت،
بەڵام پارێزەرانی مافی مرۆڤ، ئازادیخوازان و کۆمەڵگای مەدەنی و
نێونەتەوەیی گوێی خۆیان ئاخنیوە و چاویان لە ئاست راستییەکان نوقاندووە،
ئەدی کوان ئەوانەی دەم ئازادی و مافی مرۆڤ دەدەن، لە کوێن ئەوانەی
دەڵێن پارێزەری ئاشتی و پێکەوە ژیان و ئاسوودەیی مرۆڤەکانن، چیان بەسەر
ھاتووە ئەوانەی پارێزگاری لە نەتەوە مەزلوم و ستەملێکراوەکان دەکەن،
ڕێکخراوی خاچی سوور و مانگی سووری نێودەوڵەتی لە کام دونیا و ھەسارە دا
دەژین و کەی گوێبیستی داد و ھاواری نەتەوەی کورد دەبن، ئەوە کچان و
کوڕانی کوردن و بە بەر چاوی دونیای مرۆڤایەتی و ناوەندەکانی پارێزەری
مافەکانی مرۆڤەوە خەریکە سەبر سەبر گیان لەدەست دەدەن و دەبنە قوربانی
لەپێناو وەدەستھێنانی سەرەتاییترین مافی ئینسان، پارێزەرانی مافی مرۆڤ
و ئازادی و دێمۆکراسیخوازان لە کوێن و بۆچی لە خەوی قوڵی قازانج و
بەرژەوەندیخوازی ڕانابن، ئەی نابینن ڕۆڵەکانی نەتەوەی زوڵم لێکراوی
کورد لە زیندانەکانی تورکیا و لە جەرگەی ئوروپا و لە پێناو مافی مرۆڤ
دا خەریکە گیان لەدەست دەدەن.
ھەر لەم ڕوانگەیەوە پارتی ئازادی دێمۆکراسی کوردستان، وێڕای مەحکوم
کردنی کردەوەی شۆوێنیستانە و نامرۆڤانەی دەوڵەتی تورکیا، پشتیوانی بێ
ئەملا و ئەولای خۆی لە داخوازی مەشروع و یاسایی مانگرتوانی
بەندیخانەکانی دەوڵەتی تورکیا و شاری ستراسبۆرگ دەکات، ھەروەھا
داواکارە لە سەرجەم ھێز و لایەنە سیاسیی، کۆمەڵایەتی و مەدەنییەکانی
کوردستان، ڕێکخراوەکانی پاراستنی مافی مرۆڤ، ئازادیخوازان و سەرجەم
مرۆڤایەتی، بۆ ئەوەی چیتر بێ دەنگ نەبن بەرانبەر بە ھەڵوێستی دژە
مرۆڤانەی دەوڵەتی تورک بەرانبەر بە بەڕێز عەبدوڵا ئۆجەلان سەرۆکی پارتی
کرێکارانی کوردستان.
کوردان و ئازادیخوازان و پارێزەرانی مافی مرۆڤ پێویستە بەبێ لەبەر
چاوگرتنی ئیدئۆلۆژی و بیروباوەڕ و فکریەتی سیاسی پشتیوانی بکەن لە
مانگرتوانی نێو بەندیخانەکانی تورکیا و ستراسبۆرگ، گومانی تێدانی‌یە کە
سەرکەوتنی مانگرتوان سەرکەوتنی مافی مرۆڤە بەسەر دیکتاتۆری و سیستەمی
دژە مرۆیی و وەدەست خستنی سەرەتاییترین مافی مرۆڤێکی ئازادیخوازە لە
بەندیخانەی دەوڵەتێکی دژ بە ئازادی و بنەماکانی مافی مرۆڤ، لە
بەرانبەریش دا بەچۆک داھاتن و شکانی مانگرتوان، واتای تێکشکانی ئازادی
و مافی مرۆڤ و مرۆڤایەتییە بەرانبەر بە دیکتاتۆری و سیاسەتی دژە مرۆیی.
ھەر لەم پێویەندییەش دا داوا لە سەرجەم ھێز و لایەن و ڕێکخراوە سیاسی و
مەدەنی و کەسایەتیە سیاسیەکانی کوردستان دەکەین بۆ ئەوەی کوردبوون بکەن
بە بنەمای ھاوکاری و ھاوفکری و ھاوھەڵوێستی، نەتەوەکەمان پێویستە ھاو
دەنگ و ھاوھەڵویست پشتیوانی بکەن لە دەنگ و داخوازیی مانگرتوان لە
پێناو سەرکەوتن بە سەر دیکتاتۆر و پێشێلکەرانی مافەکانی مرۆڤ، ئێمەی
کورد پێویستە چیتر بێدەنگ دانەمێنین و شاھێدی مەرگی خوشک و برایانمان
نەبین کە لە پێناو وەدەست خستنی سەرتاییترین مافی مرۆڤ زیاد لە ٥٢ ڕۆژە
بە برسێتی سەر دەنێنە سەر سەرین، لەم پێناوە دا دەبێ کوردان سنووری
جیاوازی بیر و بۆچوونی سیاسی و خەت و ڕێبازەکان وەلابنێن و کوردانە
بڕواننە دۆزی ڕەوای نەتەوەی گەورەی کورد و سەرکەوتنی نەتەوەکەمان لە
ھەر کام لە پارچەکان بە سەرکەوتنی سەرجەم نەتەوەی کورد و شکست و
نەھامەتییەکانی بە تێکشکانی نەتەوەی گەورەی کورد بزانن، وەک چۆن
دوژمنان لە کوشتن و زیندانی و ڕاونان و دەرکردن دا، لە سوتاندن و کیمیا
باران و ڕووخاندن و کوێرکردنەوەی کانیاوەکان دا بێ ڕەحمانە و بە یەک
چاو دەڕواننە سەرجەم نەتەوەی کورد و کۆمەڵگای خەڵکی کوردستان و وڵاتی
داگیرکراومان، پێویستە ئێمەی کوردیش لە دوژمنەکانمانەوە فێری یەکگرتن و
ھاوھەڵوێستی و پارێزگاری کردن لە یەکتری بین، لە کاتە ھەستیارەکان و لە
پێناو سەرکەوتن بەسەر داگیرکەران دا پێویستە بیروباوەڕی سیاسی و خەت و
ڕیبازەکان وەلابنێین و کوردایەتی و کورد بوون و خزمەت کردن بە کوردستان
و نەتەوەکەمان بکەین بە بنەمای سیاسەتی کوردانەمان لە پێناو ئازادی
کوردستان و نەتەوەی گەورەی کورد دا.
سەرکەوێ خەباتی ڕزگاریخوازی نەتەوەی گەورەی کورد
ئازاد و ئاوەدان بێت کوردستان
ئەنجومەنی سەرۆکایەتی
پارتی ئازادی و دێمۆکراسی کوردستان
٢٠ی خاکەلێوەی ٢٧١٢
contact@padkurdistan.org
|
