''رێگاى کوردستان'' و ''بیرى نوێ''
فیستیڤاڵى رێزنان لە محەمەدى مەلاکەریم سازدەکەن.

ئا:محه‌مه‌دی مشیر

رێککەوتى 17ى تەمموز لە هۆڵى ئازادى نێو بارەگاى مەکتەبى سیاسی حزبى شیوعى کوردستان لە هەولێر بە ئامادەبوونى کۆمەڵێک سەرکردەی دێرینی حزب و وەزیرى رۆشنبیرى حکومەتى هەرێمى کوردستان بە وەکالەت و جێگرى پارێزگارى هەولێر ونەقیبى سەندیکاى رۆژنامەنووسانى کوردستان و جێگرى یەکێتى نووسەرانى کوردو چەندین نووسەر و رۆژنامەنووس و کەسایەتى دیارى کوردستان و دۆست و هاوڕێیانى حزب رێورەسمى رێزنان لە نووسەر و تێکۆشەرى ناودارى گەلەکەمان محەمەدى مەلا کەریم بەڕێوەچوو.

فیستیڤاڵەکە پتر لە دوو کاتژمێرى خایاند کە تێیدا چەندین وتار پێشکەش کران و چەند کەسایەتیش تیشکیان خستنەسەر رۆڵى نووسەر و بنەماڵەکەى لە پارستن و پەرەپێدانى کەلتور و ئەدەبى رەسەنى کوردى لەماوەى پتر لە پەنجا ساڵى رابردوودا. پێویستە ئەوەش بگوترێ کە رێزنان لەو کەسایەتى و نووسەر و رۆشنبیرە پڕبەرهەم و داهێنەرانەى هێشتا لە ژیاندا ماون یەکێ لە هەنگاوە گرنگ و دەستپێشخەرییە بەرچاوەکانى حزبى شیوعى کوردستانە و ئەمەش لە پارساڵەوە تا ئێستا دووەمین دەستپێشخەرییە.