|
٩\١\٢٠٢٦
ڕژێمی تاریکپەرستی
ئێران
بەرەو ئاوزینگدانە!
 ئەوا
دیسان دروشمی نارەزایی و بەرەنگاربوونەی خەڵک و دژ بە ڕژێمی چەقبەستووی
ئێران لە شەقام کؤڵانەکان دەشەکێنەوە. خۆشبەختانە ئەو جارە ئەو
خۆپیشاندان و ڕاپەڕینە هەر تەنیا لە ڕۆژهەڵاتی کوردستان نییە کە وەک
هەموو جارەکانی دیکە گەنجانی کورد لە سەرهەڵدانەکان پشکی شێریان
بەرکەوتوە لە قوربانییدان! بەڵکە گڕوتین و هەڵوێست و ڕوبەڕووبوونەوەی
ڕژێم و حەزی لەناوبردنی ئەو ڕژێمە سەرتاسەری ئێرانی گرتۆتەوە. لەمێژە
ئەو دەسەڵاتە هەموو ئازادییەکان پێشلدەکا و سیستەمی تۆقاندن و داپلۆسین
و تیرۆر پەیڕەو دەکا، لەوە دەچێ ئەو جارە لە پەلەقاژەی دوایین
هەناسەدانی خۆیدا بێ. وەک دەیبینین خەڵک چیدی بەرگەی ئەو ژیانە پڕ لە
چەرمەسەرییە ناگرن و ئیدی بەرەو گەشانەوە و زیندووبوونەوەی ژیان لە
تێکۆشاندان. بەپێی پێداچوونەوە بە ئەزموونەکانی مێژوو دەکرێ مرۆڤ یان
میللەتان بۆ ماوەیەکی درێژ بەرگەی سیستەمێکی تۆقێنەر و دیکتاتۆر بگرن
بەڵام بەرگەگرتن لە بەرانبەر برسیەتی و بێ خەونیی و نەبوونی هیچ
هیوایەک هەر دەبێ بە بەرانگژبوونەوە و شۆڕشێک کۆتایی بێ کە ئامانجی
ڕزگاربوون و ئازادبوونە. ژیانی کولەمەرگیی و نەبوونی ئازادییەکان ئیدی
بەرگەی خۆڕاگرتنی بە خەڵک نەهێشتۆتەوە و تووڕەیی گەیشتۆتە ترۆپکی
تەقینەوە. (کورد دەڵێ برسیەتی رێیەکی لە هارییدایە!) ئەوەی لە ئێران
ڕوودەدا رێک ئەوەیە و بە شێوەیەکی گشتیی خەڵک تێنووی ژیانێکی ئازاد و
خۆشگوزەرانییە بە تایبەتییش رەگەزی ژن کە بە هۆکاری دینیی و فەرهەنگ و
سیستەمی باوکسالاریی بە تەواویی لە هەموو ماف و ئازادییەکان
دابڕێندراون.
ڕاپەڕینەکە لە سیستان و بلوچستان دەستیپێکرد، بە چەند رۆژێک گەیشتە
زۆربەی شارەکانی دیکەی ئێران و تارانی پایتەخت. دیارە تووڕەیی خەلک
بەرانبەر رژێمێکی چەقیوی وەک رژێمی ئێران کاردانەوە و تووڕەیی توندی
ئەو ڕژێمەی لێکەوتۆتەوە وەک گرتن و قڕکردنی هاوڵاتیانی ئازادییخواز.
ڕژێمی ئێران دەزانی بارودۆخێکی دەرەکیی و ناوەکیی باش لە کایە دایە بۆ
ڕووخاندنی هەر بۆیە لە لێکەوتە و سەرئەنجامەکانی ئەو راپەڕینە تۆقیوە.
هیچ گومانی تێدا نییە کە بارودۆخی زۆر خراپی باری وەبەرهینان، دابەزینی
نرخی تومەن، بێکارییەکی بێ وێنەی گەنجان، قڕکرنی درێژخایەنی
ئازادییەکان، ستەمی دڕندانەی نەتەوەیی و داگیرکاریی، تووندڕەویی لە
داپلۆسین و چەوساندنەوە، پەیرەوکرنی لەناوبردن بە شێوازی لەسێدارەدانی
ئاشکرا و شاراوە، زێدەڕەویی لە دژایەتیکردنی ئازادیی ژنان... هەر دەبێ
ببنە هۆکاری لەنێوبردنی ئەو دەسەڵاتە. رژێمی ئیسلامیی ئێران هەر لە
شۆڕشی ئازادیی (ژینا) وە تا ئێستا هەر لە خەمی کورسیی دەسەڵات دایە و
نایەوێ دەستبەرداری ببێ، هەر لەبەرئەوەشە لەو دواییانە دەستی بۆ هەندێک
چاکسازیی سەرەتایی و رووکەش بردوە لە شێوازی بەڕێوەبردن، لەوانەش سووکە
ئازادییەک لە لەچک و باڵاپۆشیی و رێدانێکی سنووردار بۆ رادەربڕین،.
بەڵام ئەو یارییەی ڕژێم بە هیچ جۆرێک نەبۆتە وەڵامێک بۆ تێرکردنی
برسیەتیی خەڵک و پڕکردنەوەی پێداویستییەکانی دەنگ و رەنگی ئازاد.
لێرەدا ئێمە وەک رێکخراوی ''ئازادیی دەربڕین'' کە بەشێکی زۆری لە ژنان
و لە پێناو ئامانجەکانی ژنان پێکهاتوە، لامان گرنگە ئاماژە بە (شۆڕشی
ژینا) بکەین کە بووە دەستپێکێکی زۆر گرنگی تەقینەوەی دەنگە
خنکێندراوەکانی تێنووی ئازادیی لە رۆژهەڵاتی کوردستان و ئێران و
کاردانەوەی ژنانەکی زۆر لە سەرتاسەری جیهان لە بەرانبەر هەر رژێم و
بارودۆخێک کە دەبێتە هۆی درێژەدان بە سەرکوتکردنی ژنان و کپکردنی
هاواری ئازادیی لە پێناو ژیانێکی ئاسوودە و دوور لە هەر جۆرە
چەوساندنەوەیەک.
کە جامی چەوساندنەوە پڕدەبێ، سەرکەوتن ئەمڕۆ یان سبەی تەنیا لەسەر کات
دەوستێ!
رێکخراوی ''ئازادیی دەربڕین''
٦\١\٢٠٢٦
rojnamen@yahoo.com
|
