٨\٣\٢٠١٢

رۆژی ٨ی مارس، بۆ؟

لێرەدا پرسیارەکە لەسەر ئەوە نییە، کە چۆن ئەو بۆنەیە لەو ڕۆژدا سەری ھەڵداوە، چونکە یەکەم بۆ کەسانێک کە دڵەخورپەی ئازادی و یەکسانییانە، بەدڵنیاییەوە بەسەرھاتی ئەو ڕۆژە و چۆنیەتی بوونی بە ڕۆژی جیھانی دەزانن و ئەوەش دەزانن کە جیھانیبوونی ئەم ڕۆژە بارەتەقای کۆششی تەنیا ژنێک (کلارا زیتکین) نییە وەک چەپەکان پاگەندەی بۆ دەکەن، بەڵکو بەرھەمی خەباتی نەپساوەی بزاڤی ژنانی ئازادیخواز و یەکسانیخوازە شانبەشانی بزاڤە سۆشیالیستییەکان لە چەند ساڵی یەکەمی پاش ڕووداوەکە لە جیھاندا و بەو جۆرە بەردەوامی خەبات لەو پێناوەدا گەیاندییە ئەو ئاستە کە زۆرێک لە وڵاتان ناچاربوون مل بەوە بدەن، کە بیکەنە پشووی فەرمی.

بەڵام ھەر زوو وەک ھەر ڕووداو و دیاردە مێژوویی پاش پیرۆزکردنی و بەرتەسککردنەوەی لە یاد و ئاھەنگگێڕاندا، گۆڕا بە ڕۆژێکی ناکارا لە خەباتی یەکسانیخوازانەدا و تەنانەت لەو ولاتانەدا کە چەپەکان تێیدا لە دەوڵەتدا بوون، ئەم ڕۆژە لە ھەلی پاگەندی پارتی و نیشاندانی ھێزی دەوڵەت، ھیچی دیکە نەبوو. ئەمەش بەپێی ڕەوتی مێژوویی ڕووداوەکان و ئاڵوگۆڕی دیاردەکان لەژێر کارایی گۆرانی مێژوویدا، شتێکی چاوەڕوانکراوە، ھەروەک بۆنە ئایینییەکان و سەردانی مەرقەدەکان بەپێی ڕەوتی مێژوویی بوونەتە شوێنی بەیەکگەیشتن و ڕابواردن، ھەرئاواش ڕۆژی جیھانی ژنان بووەتە بۆنەی پاگەندەی دەسەلاتداران و چەپە دەسەلاتخوازەکان و کرۆکە شۆڕشگێڕییەکەی لەدەست داوە. لەوەش خراپتر ئەوەیە کە ئەم ڕۆژە لە ھەر وڵات و ناوچەیەک و لە بەرنامەی ھەر پارتێکی رامیاریدا، ڕوخسارێکی دیکەی بەخۆوە گرتووە و کراوەتە بۆنەی مەزھەبی و ناسیونالیستی و پارتیی و لە بۆنە و یادێکی شۆرشگێڕانەوە کراوە بە ڕۆژێک بۆ پەخشکردنی ئایدیۆلۆجیا جۆراوجۆرەکان و ھەلێک بۆ بازرگانی، بۆ نموونە ئەم ساڵ لە ھەرێمی کوردستاندا لەبری پشووبوونی ئەم ڕۆژە، دەسەڵاتداران فەرمانیان دەرکردووە، کە ھەموو کەسێک (ژنان) دەبێت بە پۆشاکی کوردییەوە بچێت بۆ سەرکار و خوێندن، کە بێجگە ھەلی بازرگانی و کەوڵکردنی ناوەڕۆکی ئەو ڕۆژە ھیچ پەیوەندییەکی بە ئازادی ژن و بە جیھانیبوونی ئەم ڕۆژەوە نییە.

ئەگەر لەمانەش بگوزەرێین، پرسیارێکی دیکە یەخەمان دەگرێت، ئەگەر ژنان لە ساڵێکدا ڕۆژێکیان ھەیە، ئەی ٣٦٤ ڕۆژەکەی دیکە ھی کێن؟ ماف و ئەرک و ڕۆڵ و ڕێوشوێنی ژنان لە ڕۆژەکانی دیکەدا چییە و چۆن دەبێت؟

بێجگە لەمە پارتە رامیارییەکان لەپێش ھەموویانەوە پارتە چەپەکان، ھەموو ساڵ لەم ڕۆژەدا دەزگەی پاگەندەیان دەخەنەگەڕ و ڕۆژی پاشتر تەنانەت ژنە پاشرەوەکانیشیان دەگەڕێنەوە ڕۆلی ئاساییان و بوخچەی ئازادی و یەکسانیخوازییان تا ساڵێکی دیکە دەپێچنەوە و سەدان ڕووداو و کارەسات و کوشتوبڕ و بازرگانی بەسەر ژناندا دێن و دەکرێن، چەنەبازە ڕامیارەکان بێجگە لە بەیاننامەی پاگەندەیی بۆ پارتەکەیان و ئایدیۆلۆجییەکەیان، ھیچی دیکە بە ئەرکی خۆیان نازانن!

ئەمە وێنە ڕاستەقینەکانی پشت پاگەندە و ھەوڵی دەسەڵاتەکان و چەپەکانە، بۆیە بە بڕوای ئێمە بەشداریکردن لە بەئاھەنگکردنی ئەم ڕۆژە و والاکردنی مەیدان بۆ پاگەندەی ڕامیاریی دەسەڵاتخوازان خزمەتکردنە بە کۆنەپەرستی و کۆیلەراگرتنی ژنان لە کۆمەڵگەدا.

ئێمە ژنان و پیاوانی ئازادیخواز و یەکسانیخواز، لەم بارەوە بۆچوونگەلێکی دژەتەوژممان ھەیە، کە لەم خالانەی خوارەوەدا خۆیان کورت دەکەنەوە :

ڕۆژی ٨ی مارس و بەجیھانیبوونی ئەم ڕۆژە بارەتەقای پاڵەوانبازیی ھیچ سەرکردە و دەستەبژێرێک نییە و تەنیا بەرھەمی خەباتی نەپساوەی بزاڤی ئازادیخوازانەی ژنان و بزاڤی سۆشیالیستیی جیھانە بەگشتی.

ڕۆژی ٨ی مارس، ڕۆژی ئاھەنگگێران و خۆرازاندنەوە و مەیخواردنەوەی ناو ھۆڵ و باڕەکان نییە، بەڵکو ڕۆژی ڕژانە سەر شەقامەکان و دەستلەکارکێشانەوە و داگیرکردنی پارلەمان و کارگێڕییەکانە.

ڕۆژی ٨ی مارس، ڕۆژی تیندان و باگەوازکردن بۆ ئایدیۆلۆجییە مەزھەبی و ناسیونالیستی و چەپی و نیئۆلیبرالییەکان نییە، بەڵکو ڕۆژی بانگەوازکردنە بۆ خەباتی جەماوەری و کۆمەڵایەتیی بۆ پاشەکشێکردن بە ڕەوتی کۆنەپارێز لە کۆمەڵگەدا.

بە بۆچوونی ئێمە چەوسانەوەی ژنان کاری تاکە پیاوێک نییە، وەک ئەوەی فێمینیستە بۆرجوازییەکان و چەپەکان پاگەندەی بۆ دەکەن، بەڵکو کارکرد و بەرھەمی دەسەلاتی رامیاریی و دەسەڵاتی کولتوورییە، کە جیاوازی چینایەتی مامانی لەدایکبوونیانە.

ئێمە لەو بڕوایەداین، تا سەروەری مرۆڤ بەسەر مرۆڤدا بمێنێت و تاوەکو پێناوێک بۆ چەوسانەوەی مرۆڤ بمێنێت، ژنان وەک بەشێک لە کۆمەڵگە ئازادی یەکجارەکی بەدەست ناھێنن، ھەروەھا بە پێچەوانەی پاگەندەی فێمینیستە بۆرجوازییەکانەوە، لە دیموکراتترین دەسەلاتی بۆرجوازیدا و لە سایەی لیبرالیترین یاسایاندا، پیشەسازی سێکسی و کۆیلەتی ژنان و مناڵان لە پەرەسەندنەوەدایە.

بە بۆچوونی ئێمە، ئازادی ھەر تاک و توێژ و چین و نەتەوەیەک تەنیا لە دەستی خودی خۆیدایە و ھیچ ھێزێک ناتوانێت کۆیلەیەک ڕزگار بکات، ئەگەر خۆھوشیاری ئەو کۆیلەیە خۆی نەبێتە ھاندەری خەباتی بۆ ئازادبوونی، لەم پەیوەندەدا تاوەکو ژنان ئازادی خۆیان لە پاشکۆیی پرسی نەتەوە و وابەستەیی پارتە ڕامیارییەکان و چەقبەستن لە پیرۆزیی ئایدیۆلۆجیاکان، جیا نەکەنەوە، وەک ئەزموونە مێژووییەکان نیشانمان دەدەن، شکست لەدوای شکست گەورەتر و بەئازارتر دەبێت.

ئێمە ھاوکاتی ئەوەی کە کۆڕ و کۆمەڵی خۆھوشیاریی ژنان بەپێویست و کارا دەبینین، بەشداریی و چالاکبوونی ژنان لە ڕێکخراوەی سەربەخۆی جەماوەریی چین و توێژە کۆمەڵایەتییەکاندا بە مەیدانی سەرەکی خەبات و چەکی کارا بۆ سەپاندنی داخوازییەکانمان و مەیدانچۆڵکردن بە دەسەلاتی رامیاریی و دەسەلاتی کولتووریی دەبینین و دەزانین. ژنان بەبێ بەشداری چالاکانەیان لە خەباتی سەربەخۆی ئابووریی ئەو چین و توێژە کۆمەڵایەتییانەدا و بەبێ بەشدارییان لە پێکھێنان و بوونیان لە پەیکەربەندیی ڕێکخراوە سەربەخۆ جەماوەرییەکاندا، ناتوانن ھاوکار و ھاوچین و ھاوەڵ و ھاوسەرە پیاوەکانیان ناچار بە بەشداریکردن لە خەباتی یەکسانیخوازانەدا بکەن و ناتوانن ببنە دینەمۆی خەباتی کۆمەڵایەتی بۆ کۆتاییھێنان بە کۆیلەتی خۆیان.

ھەڵبەتە نەوتراو نەمێنێتەوە، ئێمە ھەموو ڕێکخراوێکی بەناو جەماوەریی ژنان، کرێکاران، خوێندکاران، ساڵمەندان و کەمئەندامان و مناڵان و … تد، کە لەسەر پەیکەربەندی قوچکەیی (ھەرەمی) واتە دەسەلاتداریی ھەندێک بەسەر ھەندێکی دیکە، پێکھاتوون، ڕەتدەکەینەوە و پێموانوایە کە دەستەمۆیی و نادەربەرستیی ژنان زیاتر و قوڵتر دەکەنەوە و ئەمە بۆ خەباتی ھەموو چین و توێژە کۆمەلایەتییەکان بە ھەمان شێوە دەبینین.

با ئەم ساڵ ئاھەنگ و کۆڕە میریی و پارتیی و دەسەلاتخوازانەکان بایکۆت بکەین و لەبەرامبەردا خۆمان لە کۆڕ و کۆمەڵی سەربەخۆیی شوێنەکانی کار و خوێندن و گەرەکەکاندا ڕێک بخەین و داخوازییەکانمان بەڕووی کۆمەڵگە و دەسەلاتدارانیدا بەرز بکەینەوە و دەسەلاتی ڕامیاریی و کولتووریی وەک بکەر و ڕاگری کۆیلەتی یاسایی و کۆمەڵایەتی ژنان بخەینە ژێر پرسیارەوە.

ئازادی و یەکسانی ژنان تەنیا لە خۆھوشیاریی و خۆڕێکخستن و خۆکارابوون و خۆبیرکردنەوەی خودی ژناندایە.

سەکۆی ئەنارکیستانی کوردستان
٧\٣\٢٠١٢
www.anarkistan.tk
anarkistan@activist.com