رۆژی ئاشتی

دەرفەتێکی تر بۆ سەلماندنی نیازی ئاشتیخوازانەی کورد لەباکوور.

ستارە عارف  

رۆژی 1/9ی هەموو ساڵێک کەرۆژی ئاشتی جیهانیە و یادی دەکرێتەوە لەرۆژهەڵاتی ناویندا تەنها لەباکووری کوردستان بۆتە کەلتورێک و ساڵانە یادی رادەگیرێت، هەمیشە وەک هەلێک بۆ پیشاندانی ئەو مەرامە خاوێنە بەکاردێت کە زیاتر لە30ساڵە خەباتی بۆ دەکەن و لەسەرەتای خەباتدا تا ئێستا لەپێناو ئامانجێکدا بوە کەئاشتی و وتوێژ و کەلتوری دیموکراسی بوە.

ئەمڕۆ لەئامەدی گەورە شاری کوردستانی باکوور و لەلایەن پارتی کۆمەڵگەی دیموکراتیکەوە کەرنەڤاڵێکی یەک ملیۆن کەسی ساز دەکرێت، ئەمە بێجگە لەوەی مەبەستی پاش شۆڕشی چەکداری پیشاندەدات، کەهەرگیز رێکخستنێکی کوردی و گەلە بەئیرادەکەی لەباکووری کوردستان نەیانویستوە بەچەک کێشەکان یەکلایی بکەنەوە و ئەوە دەوڵەت بوە کەپابەندی ئاگر بەستە یەکلایەنەکانیان نەبوە لەهەمانکاتدا رووبەڕوبونەوەی لێدوانە ناهاوسەنگەکانی سەرانی باشوری کوردستانیشە کە بانگهێشتی ئەم رێکخستنە دەکەن بێ مەرج و بێ پڕەنسیب خۆیان ئاسایی تەسلیم بەهەموو مەرج و داخوازییەکی دەوڵەت بن و دووربین نەبن، نمونەی لێدوانەکانی تاڵەبانی ئەم رۆژانە و هەمیشەش کەکردویەتی داخوازی لەگەل و رێکخستنێکی کوردی خاوەن پڕەنسیب دەکات، بەپیر داواکانی دەوڵەتەوە بەبێ مەرج و تەسلیمکارانە بچن.

ئەمڕۆش کە1/9یە باکووری کوردستان دەیانەوێت باشتر و گەوهەریانەتر گوزارشت لەرۆژەکە و مەبەستی راستەقینەی رێکخستن و خەباتی چەند ساڵەیان بکەن، باکووری کوردستان هەموو ساڵێک ئەم دەرفەتەیان بۆ نیشاندانی ئامانجی خەبات و رێکخستن قۆستۆتەوە، بە پێچەوانەی ئەو لێدوانانەی کەداوا لەپەکەکە و باکووری کوردستان دەکەن، بێ مەرج دەست لەچەک بەربدەن و داوا کەم و سادەکانی تورکیا پەسەند بکەن، کوردی باکوور ئەو رۆح و فەرهەنگە نمایش دەکەنەوە کە هەرچەندە لە15ی ئابی 84 و لەئەڕۆ شەمزینان، یەکەم فیشەکی ژیانەوەی کورد تەقێنرا، بەڵام ئەو ساڵە سیستەمێکی کودەتاچی و سەربازی بەفەرماندەیی کەنعان ئەڤرەن کە سەرۆک ئەرکانی ئەو کاتی سوپا بو، کودەتای 12ی ئەیلولی ساڵی 1980ی بەرپاکرد و بەچڕی نکۆڵی لەبونی کورد کردەوە و کوردی ناچار کرد بەچەک وەڵامی بدەنەوە، هەرچەندە لەلولەی تفەنگی کچان و کوڕانی گەریلاوە ئامانجی پاش گوللەکان گوڵ بوو، هەمیشەش ئاگربەستی یەکلایەنە راگەیەنراوە و هەوڵدراوە بەئاشتی پرسەکە چارەسەر ببێت، بۆیە لەهەر یادێک و بەتایبەتیش لە1/9 کاندا دەرفەت بۆ نمایش کردنی رۆحی ئاشتیانە و دوایهێنان بەشەڕ لەلایەن کوردی باکوورەوە چەند بارە کراوەتەوە.

ئەم پێوانانە بۆ سەرانی باشوری کوردستان وەک ئەوەی ئەوان لەشاخ و شاردا کردویانە و پڕەنسیب و خیانەت و تەسلیمبون و شۆڕشیان تێکەڵ بەیەکتر کردوە و جیاوازیان لەنێوان ئەم هێڵانەدا نەکردوە و قەت خۆیان بۆ یەکلایی نەبۆتەوە چونکە بێ ئامانج و بێ پڕەنسیب چونەتە شاخ و هەرگیز خاوەنی بەرنامەڕێژی نەبون، دەیانەوێت هەمان مەیلی سۆزداری و ناهاوسەنگی خۆیان بەسەر رێکخستنی پارچەکانی تریشدا بسەپێنن وەک ئەوەی ئەم کردەیەی ئەوان زۆر بەرهەمدار بوبێت، لەکاتێکدا تاڵەبانی و سەرانی باشور بێ ئاگان لەوەی کە کەم تەمەنترین و نوێترین شەرڤانی پەکەکە پێکەنینی بەم قسانە دێت و بەکەسانی خەڵەفاو لەقەڵەمیان دەدەن، چونکە ئەوان باش لەو راستیە بەئاگان کە هیچ کاتێک سەرانی باشور و دار و دەستەکەیان راستگۆ نەبون و داردەستی دوژمنەکانیان بون، بۆیە باشترە ئەم وڕێنانە رابگرن، هەموو ئەو هەوڵ و نمایش و چالاکیە بەردەوامانەی باکوور و گەل و رێکخستن و رێبەر ببینن کە هەموو جۆرێک لەتاکتیک و شێواز و تەرزی ئاشتیانە و بێ شەڕیان تاقیکردۆتەوە و ئەمڕۆش نمایشێکی یەک ملیۆن کەسی ئەو راستیە باش شیدەکاتەوە و پەیامێکە کە کورد وەک هەمیشە ئامادەیە بۆ قۆناغی ئێستای کرانەوە بەرووی ئاشتی و چارەسەریدا ئەو راستیە دووپات دەکەنەوە کەکورد لەم پارچەیە ئامادە نەبوە شەڕ بکات، بەڵکو شەڕی پێ فرۆشراوە و بەڵگەش بۆ ئەوە پەکەکە هەموو کاتێک رایگەیاندوە کەئەوان هێرشبەر نین و لەحاڵەتی پاراستنی رەوادان و تەنها خۆیان دەپارێزن سەرەڕای ئۆپەراسیۆنی بەردەوامی تورک و گوێنەگرتن لەگەل و هەوڵەکانی چارەسەری، بۆیە ئەم کۆبونەوە یەک ملیۆنیە بەتایبەتی لەم پێواژۆیەدا جارێکی تر ئامادەگی کورد بۆ قۆناغی چارەسەری پیشاندەداتەوە و جیهانیش بەسەرنجەوە بۆ چالاکیە ئاشتیخوازییەکانی کورد دەڕوانێت.