٢٤\١\٢٠١١

رۆڵى گەنج لە میدیاکاندا.

بێستون حەسەن  

میدیا بەهەموو لایەنەکانیەوە ئه‌رکی هەرە گەورەى ئەوەیە کە ڕووى دیاردە ناباوەکان و هەموو ئەو فاکتەرانەى ڕێگرە لەبەردەم نیشاندانى شتەکان بەجۆرێکى دى بداتەوە بە چینى خوێنەر و خەڵکە نۆرماڵەکان و ئەوانەشى دوورن لە واقعى بەریەککەوتنەکان کە هەیە لە ژیانى ڕۆژانەدا ، لەناو میدیاکانیشدا کۆمەڵێ کەسان هەن کە بەویست و ئارەزوو و حەز تێکەڵ بەو دونیایە بوون و بەڕێوەى ئەبەن ، هەندێکیش لەبەر بژێوى ژیان و پڕکردنەوەى فەراغە ماددییەکان کارى تێدا دەکەن و ناوبەناویش کەسانێک هەن کە تەنها خواستیان ئەوەیە دەرکەون و ناوێک بۆخۆیان دروستکەن و بچنە مێژووى ڕۆژنامەگەرى و کارى میدیاییەوە.

لەم ناوەندەشدا گەنج ڕۆڵێکى بەرچاوى هەیە لە بەڕێوەبردن و کارى ڕۆژنامەوانیدا ، بەم دوواییانە و لە ماڵپەڕێکى فەرمى سەر بە ڕاگەیاندنى وڵاتى نەمسادا بڵاوبوویەوە کە لە کۆى سەدو چواردە کەناڵى حکومى و ئەهلى ئەو ووڵاتە و لە پێکڕاى کارمەندەکانى ئەو ناوەندانە بە ڕێژەى لەسەدا حەفتاو نۆ (79%) گەنجان توانیویانە پێگەى خۆیان دیارى کەن و تا ئەندازەى پێویست بوونەتە زەرورەتێ کە دواجار بێ گەنج ڕەنگە کارەکان وەک خۆى نەچێتە پێش و چه‌مکی ڕاستەقینەى ڕۆژنامەوانى نەدا بەدەستەوە.

دەکرێ ڕوونتر لە تواناکانى گەنج بڕوانین و جوانتر بەها و شوێن و پێگەیان بنرخێنین وەک ئەوەى کە لەهەندێ جێگەدا شارراونەتەوە و تواناکانیان خەفە کردوون ، ئاوڕێک لە میدیاکانى خۆمان بدەینەوە و بەچاوێکى حەق بینانەوە تەماشاى هەڵسوڕێنەرانى دەزگاکان بکەین دەبینین بەڕێوەبەر و ستافى بەڕێوەبەرێتى و تا دەگاتە کارمەندانى ناوەند و تەنانەت کارگوزار و ئەوانەشى بەهەر هۆیەیەکەوە بێ کارلەوێ ئەکەن بەشێکى هەرە زۆریان لە گەنج پێکدێن و گەنجن ، ئەمە بۆخۆى مایەى دڵخۆشییەو دەبێ شانازى بە گەنجانى خۆمانەوە بکەین کە پێموابێ هیچیان لەوانە کەمتر نییە کە بوونەتە هۆى بەرەوپێشچوونى وڵاتێک ، لەلایەکى تریشەوە گەر لە ڕووى مامەڵەکردنى ڕاستەوخۆى خەڵک و ناوەندى کارکردن بڕوانین دەبینین ڕێژەى هەبوونى گەنج لە دەزگاکاندا واى کردووە زۆرترین خەڵک و زۆرترین جەماوەرى تایبەت بەخۆى کۆبکاتەوە ، کەئەمە ڕوویەکى ترى ئەو جوانییەیە کە گەنج داویەتى بە ڕاگەیاندنەکان.

ببینە لەزۆربەى هەرەزۆرى ئەو پرۆگرام و کارە ناوازانەى کە بوونەتە جێى سەرنج و پێگەیان دیارە کۆمەڵە گەنجانێک بەڕێوەى ئەبەن کە حەزو خواست و عەشقیان بۆ کارەکانیان واى کردووە بەوجۆرە بناسرێن ، ڕەنگە هەنێکیش لەوگەنجانە دەرچووى بوارێکى ڕاگەیاندن نەبن بەڵام قاڵ بوون و خۆشەویستى بۆکارەکانیان واى کردووە وەک کەسێکى سەرکەوتوو و پرۆفشناڵانە بناسرێن و بتوانن لەناوەوە و دەرەوەى وڵات بڕوانامەى ڕێزلێنان و مەدالیاى سەرکەوتنیان بەسەردا ببەخشنەوە ، کەواتە دەبێ بەهەموو لایەکمانەوە پاڵپشت و هاندەرى هەموو ئەو گەنجانە بین کە کارى ڕاگەیاندن ئەکەن یاخود بەهیوان ڕۆژێ وەک کەسێک یان وەک گەنجێک لەدونیا جوانەکەى میدیادا خۆیان ببیننەوە . حەق وایە حکومەتى هەرێم و لایەنى پەیوەنددار بە کارکردن و دەستگرتنى گەنجان شێوە فەراهامکردنێکیان بۆ بخولقێنن کە بتوانرێ سوود و تواناى گەنجان پشانبدەن لەهەربوارێک کە ئارەزووى دەکەن ، چونکە گەنجان هەڵسوڕێنەرى هەموو کایە مەعریفییەکانى کۆمەڵگە دەژمێردرێن . دەبا خۆنەویستانە لە توانا و بەهرەکانى گەنجان بڕوانین و دەستى ماندوونەبوونیان بگوشین .

ماڵپه‌ڕی بێستون حه‌سه‌ن