٨\١٢\٢٠١٢

روونکردنەوەیەک لە کەمپینی دژ بە لەکەدارکردنی شکۆمەندیی و کەسایەتی گەنجان.
- سەبارەت بە راگەیاندنی بەرێوبەرایەتیی ئاسایشی سلێمانی -
 

دوابەدوای بڵاوبوونەوەی رووداوێکی قیزەوەن لە رێگەی پێگەی کۆمەڵایەتی (فەیسبووک) کە گەنجێکی مێردمنداڵ بە شێوەیەکی ئەوپەڕی نامرۆڤانە لە ژێر هەڕەشەدا دەستدرێژیی دەکرێتەسەر و هاوکات بە مەبەستی شکاندنی کەسایەتی و لەکەدارکردنی ئەو دیمەنە دڕندانەیە بڵاودەکریتەوە کە ویژدانی هەموو مرۆڤەکانی لە دەرەوە و ناوەوە کوردستان راچلەکاند و دیمەنی بەردبارانکردنی دوعای جارێکی تر لە ناخماندا هەژاند. کەمپینی دژ بە لەکەدارکردنی شکۆمەندیی و کەسایەتی گەنجان راگەیەنرا، لە هەنگاوی سەرەتادا دەیان کەس لە کەسایەتی و ئازادیخوازان لە دەرەوە ناوەوە پەیوەستی خۆیان بەم کەمپینە راگەیاند و هەر لەو راستایەدا خۆپیشاندانێکی نارەزایەتی لە لایەن ژمارەیەک لە رۆژنامەنووسان و خەڵکی مرۆڤدۆدۆست و ئازادیخوازی کوردستان لەبەردەم باخی گشتیی بەرێوەچوو و نارەزایەتی بەرفراوانی لێکەوتەوە و سەرئەنجام بەرێوەبەرایەتیی ئاسایشی سلێمانی راگەیاندنێکیان بڵاوکردوە و تێیدا ئەوەیان خستەڕوو"کە ئەو رووداوە هیچ پەیوەندییەکی بە هەرێمی کوردستانەوە نییە.

راگەیاندنی ئەوەی:

١- کە ''ئەو رووداوە لە دەرەوەی هەرێمی کوردستان روویداوە'' بە تەنها و بە بێ هیچ بەڵگەیەکی په‌سندکراو و رۆشن ناتوانێ سەلمێنەری بەدواداچوونی دەزگە پەیوەندیدارەکان بێ بۆ خستنەڕووی راستییەکان، بە بێ راگەیاندنی کات و شٶێنی رووداوەکە و خستنه‌ڕووی به‌ڵگه‌ی دۆکیومێنتیی به‌وه‌ی رێکارێک کە بەرامبەر بە تاوانکاران بەرێوە چووە دیار نەکراوە.

٢- سنووری ئەو تاوانە گرنگ نییە بە تەنها پێویستە رابگەیەنرێ دەسەڵاتی ئەو شۆێنە چ رێکارێکی گرتۆتەبەر؟

٣- کەمپینی دژ بە لەکەدارکردنی شکۆمەندیی و کەسایەتی گەنجان سنووری چالاکییه‌کانی فراوان و بێ سنووره‌ و بەردەوام دەبێ لە بەدواداچوون و لێکۆلینەوە لە راستیی و دروستیی تاوانه‌که ‌و دواتر هەموو لایەک ئاگادار دەکەینەوە.

راگەیاندنی ئەم کەمپینە بە تەنها سنووردار نابێنتەوە بەم کەیسە بەلکو نموونەی لەم جۆرە کەیسانە لە کوردستان و هەرێمی کوردستاندا لە لەکەدارکردنی کەسایەتی و رێزداریی مرۆڤ تا پەنابردن بۆ ناوزڕاندن و کەسایەتی شکاندن و تۆمەت هەڵبەستن بۆ تاکەکانی کۆمەڵگەی کوردستان و بەکارهێنانی (سولحی عەشایری) بۆ کێشە کۆمەلایەتییەکان کۆششێکی نەبڕاوە بووە لە کوردستاندا چۆتە پێش. بۆیە بەتەنگەوەهاتن و سنووردان و بەکاربردنی یاسا و داگا لە کاتی هەر رووداوێکی نەخوازراوی لەو شێوەیە ئەرکێک دەخاتە سەر شانی دەسەلاتداران و حکومەت بە ئاراستەی پاراستنی کەسایەتی و پایەداریی مرۆڤ و ریزگرتن لە مرۆڤ.

که‌مپینی دژ به‌ له‌که‌دارکردنی شکۆمەندیی و که‌سایه‌تی گه‌نجان
٨\١٢\٢٠١٢

shabazmahmud@yahoo.com - arazhady@yahoo.com