١٥\١٢\٢٠١٤

روونکردنەوەی یاساییمان لە دەستگیرکردنی رۆژنامەنووس دلێر عەبدوڵا دەوێ.

لە رۆژی ١١/١٢\٢٠١٤ و تا ئەمرۆ، چوار رۆژە رۆژنامەنووس دلێر عەبدوڵا محمد بە فرمانێکی بنکەیەکی پۆلیس و دادگایەکی شاری ھەولێر بە پێی ماددەی ٩ لەیاسای ژمارە ٣٥ ی رۆژنامەنووسی، ئەو رۆژنامەنووسە لەشاری سلێمانی دەستبەسەرە، لە کاتێکدا یاسای ژمارە ٣٥ دەستگیرکردنی رۆژنامەنووسی تێدا نەھاتوە..

لەسەردانی ئێمەدا بۆ بنکەی پۆلیسی رزگاری و بەندیخانەی گرتن و گواستنەوە لە شاری سلێمانی بۆمان دەرکەوت کە فرمانی دەستگیرکردنی ئەم رۆژنامەنووسە لە شاری ھەولێر دەرچوەو داوا لە پۆلیس و دادگای سلێمانی دەکات ناوبراویان بۆ دەستگیر بکەن، واتە فرمانی دەستگیرکردن گەیشتوەتە شاری سلێمانی نەک لێکۆڵینەوە، لەکاتێکدا ئێمە وەک لقی سلێمانی سەندیکای رۆژنامەنووسانی کوردستان لەم بڕیارە ئاگادار نەکراوینەتەوە و ناشزانین ئەمە بە چ یاساو پێوەرێک ئەنجام دراوە..

لەکاتێکدا گرتنی رۆژنامەنووس دلێر عەبدوڵا بە پێشێلکردنی زەق و ئاشکرای کاری رۆژنامەنووسی وئازادی و ئازادی وتن لە قەڵەم دەدەین، داواکارین لە دادگاکان چیتر سەروەری و ئازادیی رۆژنامەنووسان پێشێل نەکەن و ھیوادارین ئەنجومەنی دادوەری لە ھەرێمی کوردستان لەمە زیاتر رێگە بە پێشێل کردنی یاسای ژمارە ٣٥ نەدات و سنوورێک بۆ دەستگیرکردنی رۆژنامەنووسان لە چوارچێوەی ئەو یاسایەدا بپارێزێ..

لقی سلێمانی سەندیکای رۆژنامەنووسانی کوردستان
١٤/١٢\٢٠١٤
sandika.sul@gmail.com