|
٢١\٣\٢٠١١
سەدیق تەعریف لە
ئەوروپا ئاواز و گۆرانی کوردی پێشکەش دەکا.
مه‌نسوور جیهانی
 گروپی
موزیکی "نەورۆز" بە دەنگی گۆرانیبێژی کورد "سەدیق تەعریف" لە وڵاتە
جۆراوجۆرەکانی ئەورووپا کۆنسێرتی گۆرانی و موزیکی کوردی سازدەکات.
بە پێی راپۆڕتی راگەیاندنی گشتی گروپی موزیکی "نەورۆز"، گۆرانیبێژی
کورد "سەدیق تەعریف" بە هاوکاری گروپی موزیکی "نەورۆز" پێکهاتوو لە
موزیکزانی کورد "سادق تەعریف" بە ئامێری دەف و تونبەک، "نەوید دێهقان"
بە ئامێری کەمانچە، "حامید فەکووری" بە ئامێری تار و "ئەمین گوڵستانی"
بە ئامێری عوود، لە بەرنامەیەکدا بە ناونیشانی "باغ و بەهار و ئاوێنە"
لە وڵاتانی فەرەنسا و ئیتاڵیا و هەروەها بڕیاروایە لە هەندێک لە
شارەکانی وڵاتانی سوید، هۆڵەندا و دانیمارک، کۆنسێرتی گۆرانی و موزیکی
کوردی و هەروەها موزیکی ئێران پێشکەش بکات.
ئەم زنجیرە کۆنسێرتە ئەورووپیەی گروپی موزیکی "نەورۆز" بە سەرپەرەستی و
دەنگی گۆرانیبێژی بەناوبانگی سنەیی "سەدیق تەعریف" سەرەتا لە رۆژانی 18
و 19ی مارس لە شاری پاریس لە وڵاتی فەرەنسا بەڕێوەچوو، و لە رۆژی
یەکەمی نەورۆزدا 21ی مارس لە شاری لیلی ئەم وڵاتە درێژەی دبێت.
گروپی "نەورۆز" لە درێژەی بەرنامەکانیدا، هەر ئەو کۆنسێرتە لە رۆژانی
25 و 27ی مارس و 1 و 3ی ئەپریل لە شارەکانی پێسکارا، رۆم، ڤێنیز و
میلان لە وڵاتی ئیتاڵیا بەڕێوەدەبات. ئەم گرووپە بڕیاروایە لەو زنجیرە
کۆنسێرتەی ئەورووپادا لە شارەکانی ئیستۆکهۆڵم و یۆتۆبۆری لە وڵاتی سوید
و هەروەها لە هەندێک لە شارەکانی وڵاتانی هۆڵەندا و دانیماراک کۆنسێرتی
گۆرانی و موزیکی کوردی پێشکەش بکات.
کۆنسێرتی "باغ و بەهار و ئاوێنە" لە دوو بەشدا بەڕێوەدەچێت، لە بەشی
یەکەمدا سەدیق تەعریف چەندین پارچە موزیک و مەقام لە موزیکی ئێران بە
شێعری حافز، سەعدی، فەرەیدوون موشیری، ه.ا. سایە و خاتوو سیمین
بێهبەهانی لە مایەکانی بەیاتی ئیسفەهان، دەشتی، شوور و شووشتەری
مەنسووری پێشکەش دەکات و لە بەشی دووەمدا چەندین گۆرانی و پارچە موزیکی
ناوچە جۆراوجۆرەکانی کوردستان لە مەقامی شوور و دەشتیدا پێشکەشی
هۆگرانی موزیک دەکات.
ئەم رۆژانە هاوکات لەگەڵ بەڕێوەچوونی کۆنسێرتی گروپی موزیکی "نەورۆز"
لە وڵاتانی ئەورووپا، ئەلبوومی "مەهتاب" بە دەنگی سەدیق تەعریف و بە
ئاوازدانان و دابەشکردنی موزیک لە لایەن موزیکزانی ناوداری کورد "حوسێن
یۆسف زەمانی" کە بە پێی شێعری "مەهتاب" هۆنراوەی شاعیری بەناوبانگی
ئێرانی "نیما یووشیج" و پێنج پارچە موزیکی دیکە بە پێی شێعرەکانی سیمین
بێهبەهانی، حافز، سەعدی و ... بۆ ئۆرکسترای سەمفۆنیکی تاران، موزیکی بۆ
دابەشکراوە، کەوتۆتە بەر دەستی هۆگرانی موزیکەوە.
بەڕێوەبەرایەتی راگەیاندنی گشتیی گروپی موزیکی "نەورۆز"
mansourjahani@gmail.com
|
