٧\٤\٢٠١٣

    سەمایەک لە من و منێک لە سەما.

پەری رەش

-١-
کاری من تێگەیشتن نییە
لە فڕین
کاری من سەیرکردنی باڵندەکانە
لە کاتی فڕین.

-٢-
دەمەوێ بتخوێنمەوە
بەس چۆن
نازانم!!

-٣-
ئەگەر دوو باڵم هەبووایە
لە ئاسمانا پیاسەم دەکرد
رووم دەکردە ئێرە
ئاخر لێرە باڵدارەکان
دەکوژرێن.

-٤-
عەشقێک
بەردەوام
لە ناو مندا دەگری.

-٥-
تازە زانیومە کە من
لە خۆم دوورم
خۆم لە خۆم جیا بوومەتەوە
بۆیە هێندە
غەریبی خۆم دەکەم.

-٦-
دڵت بۆتە مەیخانە
هەر ساتە
و
کەسێکی تیا
مەست ئەبێ.

-٧-
چ شەوێکی
بێدارە
منیش بۆ
بێدەنگی خۆم
دەدوێم.

-٨-
چ دەبێ تۆ بێیت
و
رابردووم بە دەستی
خۆت بۆ بێنیتەوە..؟

-٩-
چ فەنابوونێکە
مەستبوون
لەگەڵ سەمای
باڵندەکان؟

parirash2010@hotmail.com