٦\٣\٢٠١٩

سەردەمی پرسیارە گەورەكە هاتووە.

ئەرسەلان مەحمود  

بە ئەزموون دەركەوت، غەم و ئێش و ئازار و بە هاتوهاوار، بە ڕوخاندن و سوتاندن، بە پڕاكتیزەكردنی هزری یەكتر سڕینەوە و بە نانەوەی ئاشوب و پشێویی، یا بە دروستكردنی دەستگەریی و پەنابردنە بەر میزاجگەرایی و مەجازی پەرتەكەو زاڵبە لە سیاسەت و بوارە كارگێڕییەكاندا، كۆتایی نایەت.

ئێمەی كورد گەر بمانەوێ‌ برەو بدەینە گیانی بەیەكەوە ژیان و ڕاپەڕینسازی، بێگومان لەپێناو هەبوونێكی باشترو ئایندەیەگی شایستەترو ڕوناكتر، ئەوا پێویست بەوە ناكات ئەوەی هەیشەو بەدەستهاتووە، جا لەژێر هیچ بڕو بیانووێكدا یا لەبن هەر دروشمبازی و هەر پاساوێكدا ژیرەوژو بكرێت، ئەم دەیانساڵەی دوای ڕاپەڕین، گەر هەر هیچی ساغنەكردبێتەوە، ئەمەی بەیانكردوەو ڕونكردوەتەوە، ئەوانەی پتر ڕوخێنەرن، ناشێت و نابێت هەرگیز ئەوەندە بیناكاربن!

گۆڕانكاریی ڕیشەیی دیارە لەگشت بوارو شتێكدا، لەتەكاندانی تەپوتۆزی سەر ئەو شتەو شتەكانی تردا بەتەواوەتی و، خوڵقاندنی زەمینەسازی دەست پێدەكات، ئەوانەی چەندینساڵە بەژێر لێوی چاكسازی و پاكسازییەوە ئیددیعای ئەوە دەكەن دنیایەكی تری بەتەواوەتی نوێ دەهێننە دی، ڕاست ناكەن و ڕاستیان نەكرد، خەڵكی كوردستان نە دەیانەوێ‌ هەولێر بكرێتە دوبەی، نە كەركوك"ـیش بكرێتە برۆكسل، دەیانەوێ‌ لێگەڕێن ئەم وڵات و خەڵكە وەك ئەوەی دەیانەوێ‌ خۆی بەسروشتی خۆی گەشە بكاو هەمووان تیایدا ئارام بژین بەسە.

دەمێك ساڵە سەردەمی ئەوە بەسەرچووە شڕمبڕمێن و جەنگ بتوانێ‌ گۆڕانكاری و بەهای نوێ لەهەبووندا بەرهەم بهێنێت، هیچ یەكێك لەجەنگ و ململانێی دەوڵەتانەكاندا شەڕێك نییەو نادۆزیتەوە لەسەر حەقیقەت و بەهایەك قەومابێ‌ و بەكۆتا هاتبێت، تەنانەت خودی هەرێم و خاكێكیش نابینیت و نادۆزیتەوە كێشەی یەكەم و دواهەمین بوبێتن، جگە لەوەی دەوڵەت بتوانێت بمێنیتەوە، ئەمەیش بەهەر بەهاو نرخێك بووە، لەبەر ئەوە هێشتا درەنگ نەبووەو كاتییەتی كورد هاودەنگییەكی نەتەوەیی و نیشتمانی لەخۆیدا بكاتە بژاردەی هەرە لەپێش و بنەڕەتی، ئەمەیش تەنها بەتێپەڕاندنی هزرو فۆرمی حیزبی داخراوو پێشڕەو نەبێ‌ نایەتە دی.

كورد لەبری گەشەپێدانی نیشتمانی، هەتا بیر لەشوێن پێلێژ كردنی یەكتری و جێگرتنەوەی یەكتری بكاتەوە، مومكین نییەو هەرگیز ناگاتە ئارامی و ناگاتە هەبوونێكی بەمانا تر، ئێمە گەر نەتوانین لەخۆمانداو لەگەڵ جیاوازییەكانی نێوان خۆماندا هەڵبكەین و بسازێن، بەدڵنیاییەوە ناتوانین بەرگەی مانەوە بەمانا شایستەییەكەی بگرین، جا چجای گەشەكردن.

لەماوەی ئەم دەنساڵەی دوای ڕاپەریندا، بەداخەوە ئێمەومانێ‌ شاهێدی ئەوەین شتانێكی ئەوتۆی گەورەو كاریگەر نەگۆڕدراوەو نەهاتووەتە دی، ئەمە بەو مانایەی ئەوەی بەدیهاتووە كەم نییە بەڵام هێزی گەورەو زۆری تیادا نییە، لەبەر ئەوە ئێستا كاتی كردنی پرسیارە جیددی و مەزنەكە هاتووە، ئەویش ئەوەیە: هەر بەراست حكومڕانێتیكردن بەو جۆرەی هەیەو دەگوزەرێ‌ لەكوردەواری و لەكوردستاندا چیتر ڕەواو پێویستە؟!

وڵام، بێگومان نەخێر، بەڵام بۆچی؟ بێگومان چونكە ئیتر سەردەمی ئەوە بەسەرچووە حیزب لەجێگەی حكومەت دابنیشێت و حوكم بكات، واتا لەبری ئامانجە گەورەكان، ئەوانەی دەچنەوە خانەی خزمەت خەڵك و گەشەپێدانی هزری مرۆی و نیشتمانی، دەسەڵات و هەیمەنەو هەژمونی حیزبی بسەپێنرێتە سەر خەڵك و خاك، ئەو سەردەمە تێپەڕیووە رێبەران و پلەدارانی باڵای دەسەڵات بەرژەوەندی هاوبەش لەناو خۆیاندا پەیدا بكەن و دڵخوازانە لەسەر كەوڵی خەڵك بلەوەڕێن، ئەم سیاسەت و ڕێكارانە ئێستا تەواو لەدژایەتییەكی قورسدان لەگەڵ بەرژەوەندی چین و توێژە كۆمەڵایەتییەكانی خوارەوە، بەردەوامیپێدانیشیان ئەمانە دەكات بەدیكتاتۆرێكی ڕوت و ڕەجاڵ لەواقیعدا.

ئەزموونی ئەم دەیانساڵەی ڕابردو لەحكومڕانێتیكردندا، بێنەخش نەبووە، بەڵام لەڕاستیدا سەركەوتوش نەبووە، ئێستا ئەركەكە لەجاران قورستریش بووە، چۆن عیراقمان بونیاد نایەوە لەڕابردودا، ئێستا دەبێ‌ هەم كورد لەبەغداو هەم لەهەولێریش بونیادو بینا بكەینەوە. تا گەیشتن بەوەها حەقیقەتێك و تێپەڕادنی، ڕاپەڕین لەفۆڕم و بونیادێكی تردا، بێگومان خۆشیمان بێ‌ و ترشیمانبێ‌ بەردەوام دەبێ‌ و لەبرەوی خۆی ناكەوێت.

ماڵپه‌ڕی ئه‌رسه‌لان مه‌حمود