٢٨\١١\٢٠١٢

''سەرێ کانی'' وانەیەک بۆ فێربوون.

جەلال محەمەد      

٨\١١\٢٠١٢ بە یەکێک لە ڕۆژە گرنگەکان دادەنرێت بۆ ھەڵسەنگاندنی ڕاستیەکان ، لەو ڕۆژەدا ھەم فرمێسکە تیمساحیەکانی ئەردۆغان دەرکەوتن و ھەم ئازادیخوازیەکەی ئارتەشی بەناو ئازادی سوریا خۆی نواند و ھەم دەمامکی ئەو ھێز و لایەنە بەناو کوردیانەش ئاشکرا بوو کە چ مەرامێکی پیس لە ژێر دەمامکەکاندا خۆی حەشار دابوو.

ئەگەرچی زۆر ھەوڵی ئەردۆغان درا بۆ شاردنەوەی ڕوخسارە فاشیەکەی ئاکەپە ، ھەم لە ڕێگەی فرمێسک ھەڵڕشتن بۆ منداڵە برسیەکانی سۆماڵ و ھەم لە ڕێگەی ھاوارکردن بۆ منداڵانی غەزە ، بەڵام لە ھەمبەری کورداندا ڕوخسارە ڕاستەقینەکەی ئەردۆغان و ئاکەپە دەرکەوت کە تەنھا ڕوخسارێکی فاشیانەیە و ھیچیتر . ھێنانی ئیسلامیە توندڕەوە کۆنەپەرستەکان بۆ خامۆشکردنی شاری "سەرێ کانی"ی ڕۆژئاوای کوردستان تەنھا پەیوەستە بەو زھنیەتە فاشییەی ئاکەپەوە کە ئیسلامگەراییان کردۆتە وەسیلەیەک بۆ وێرانکردنی کوردستان و دووبارەکردنەوەی ئەنفال و قەڵاچۆکردنی کوردان.

ھاتنی ئارتەشی (ئازاد)ی سوریا بۆ ڕۆژئاوای کوردستان ئەو ڕاستیە دەردەخات کە ھیچ جیاوازیەک لە نێوان زھنیەتی ئیخوان‌الموسلمین و زھنیەتی بەعسیەکاندا بەدی ناکرێت لە بەرامبەری کورداندا و بگرە ئیخوانەکان زۆر لە بەعسیەکان مەترسیدارترن بۆ کوردان . ئەگەر بەعسیەکان لە باڵادەستیدا کوردانیان سەرکوت کرد ئەوا ئیخوانەکان لە گەرمەی بێ دەسەڵاتیاندا کوردان قبوڵ ناکەن و ھەوڵی پاکتاوکردنیان دەدەن.

لەگەڵ سەرھەڵدانەکانی سوریادا ، ھەموو پەلەقاژەی ئیخوانەکان بۆ گرتنە دەستی دەسەڵات بوو ، ئەم پەلەقاژەکردنەش ئاڕاستەی شۆڕشی بە جۆرێک گۆڕی کە جگە لە ئاژاوەگێڕی ھیچ پێناسەیەکی دیکە بۆ ئەوسەرھەڵدانە ناکرێت . تەنھا جێگەیەک کە لە سوریادا بە ئارامی مایەوە و بوویە جێگە حەوانەوەی سەدان ھەزار ئاوارەی ناوچەکانی دیکە کوردستان بوو ، تەنھا جێگەیەک کە ناوەڕۆکی شۆڕشی تێدا مابوو کوردستان بوو ، کەچی ئیخوانەکان ھەم وەکو زھنیەتی کۆنەپەرستانەی خۆیان و ھەم وەکو ویستەکانی ئەردۆغان ئەو ئارامیەیان شێواند.

ھاتنی ئارتەشی (ئازاد)ی سەر بە ئیخوان‌الموسلمین بۆ "سەرێ کانی" ھەم ئارامی شارەکەی شێواند و ھەم بوویە سەرەتایەک بۆ پێکداھەڵپڕژانی نەتەوە جۆراوجۆرەکان و ھەم دزی و تاڵانیشیان کردە پیشەی خۆیان و ئەو جێگەیەی دەستیان پێی گەیشت تاڵانیان کرد . ئارتەشی (ئازاد)ی سوریا نەک ھەر خەڵکەکەی نەپاراست بەڵکو ئەوەی لە شمشێری ئیخوانەکان ڕزگاری بوو دوچاری ئاوارەیی ھات ، ئارتەشی (ئازاد) نەک ھەر ڕزگارکەر نەبوون لە "سەرێ کانی" بەڵکو ھۆکاری ھەموو فیتنە و نالەبارییەک بوون ، نەک ھەر ئازادکەر نەبوون بەڵکو سەرچاوەی وێرانی شارەکەش بوون ، دەتوانم بڵێم ھاتنی ئارتەشی (ئازاد)ی سوریا بۆ ڕزگارکردنی "سەرێ کانی" نەبوو لە دەست داگیرکەر بەڵکو بۆ ڕزگارکردنی ئەو شارە بوو لە دەست دانیشتوانەکەی.

شەڕفرۆشیەکانی ئارتەشی (ئازاد)ی سوریا لە بەرامبەر کورداندا ، لە لایەک ئاشکراکردنی نیازە گڵاوەکانی ئیخوان‌الموسلمین بوو لە لایەکی دیکەوە سەنگی مەحەک بوو بۆ ھەڵماڵینی دەمامکی حیزبە دەمامکدارە بەناو کوردیەکان ، چونکە شانبەشانی دڕندایەتی ئیخوان‌الموسلمین و ئارتەشە بەناو ئازادەکەیان چەندین لایەنی بەناو کوردیش بوونە کەرەستەیەکی بێ بەھای دەستی ئارتەشی (ئازاد)ی سوریا دژ بە کوردان ، کە نموونەی ئەو لایەنە دەمامکدارانەش ( الپارتی و پارتی ئازادی و تیار الموستقبل ) بوون کە لەگەڵ دەرکەوتنی ئارتەشی (ئازد)ی سوریا چەندین کەتیبەیان دامەزراند بۆ کوشتنی کوردانی "سەرێ کانی" ، نمونەی ئەو کەتیبانەش کەتیبەکانی (مەلا مستەفا بارزانی ، ئیدریس بارزانی و مەشعەل تەمۆ ) بوون . ھەڵبەت لە ڕابردوشدا ھەر خودی ئەو پارتە بەناو کوردیانە لە پشت دامەزراندنی چەندین کەتیبەی دژە کوردی دیکە بوون وەک کەتیبەکانی( شەھید سەدام حسێن ، سەڵاحەدینی ئەیوبی و کەتیبەی پێشمەرگە) کە دەستیان بە خوێنی کوردانی حەلەب سور کرد.

پاش بەرخۆدانی دلێرانەی یەکینەکانی پاراستی گەل "یەپەگە" تەواوی ھێزە توندڕەوەکانی ئارتەشی (ئازاد)ی سوریا تێکشکان و ڕاونران ، بەرخۆدانی "یەپەگە" ھەم بەرنامە کوشندەکەی ئیخوان‌الموسلمینی ھەڵوەشاندەوە و ھەم نیازە پیسەکانی دەمامکدارە کوردەکانیشی زیندە بەچاڵ کرد . بۆ ئەوەی دەمامکدارە بەکرێگیراوەکان سەرلەنوێ بتوانن خۆیان ساز دەنەوە ھانایان بردەوە بەر سەرۆکی ھەرێم "ھەرچەند سەرۆکی ھەرێم ھەم لە پشت دەمامکدارەکانەوە بووە و ھەم لە ھێرشی دڕندانەی ئارتەشی (ئازاد)ی سوریاش بێ ئاگا نەبووە".

لێ بەڵێ ؛ سەرۆکی ھەرێم "مەسعود بارزانی" جارێکی دیکە بە ڕوخسارێکی دیکەوە خۆی کردەوە بە ڕیش سپی کایەکە ، ھەڵبەت نیازەکانی سەرۆکی ھەرێم شاراوە نییە ، ئەو نیازانەش لەو وتارەدا دەرکەوت کە لە کۆنگرەی حیزبەکەی ئەردۆغاندا پێشکەشی کرد . ئەم ڕیش سپێتیەی سەرۆکی ھەرێم جگە لە گێرەشێوێنی ھیچ شتێکی دیکەی لێ شین نابێت ، چونکە ھەر دوای کۆبوونەوەی حیزبە دەمامکدارەکان لەگەڵ مەسعود بارزانیدا یەکسەر باسیان لە سازدانی ھێزێکی چەکداری دیکە کرد بۆ ڕۆژئاوای کوردستان . ئەم باسکردنە لە کاتێکدایە کە زیاتر لە ساڵێکە ھێزێکی چەکداری وەک "یەپەگە" بوونی ھەیە و تەواوی ناوچە کوردنشینەکانیشی لە کردەوەی نەخوازراو پاراستووە و ھێرشی دڕندانەی ئارتەشی (ئازاد)ی سوریاشیان تێکشکاند ( واتە باسکردن لە ھێزێکی چەکداری دیکە تەنھا بۆ ئاژاوەگێڕی و سەر لێشێواندنە) ، چونکە لە کاتێکدا "یەپەگە" بوونی ھەبێت و توانای پاراستنی ڕۆژئاوای کوردستانیشی ھەبێت ئەوا ھیچ پێویست بە بوونی ھێزێکی چەکداری دیکە ناکات.

ھەڵبەت دەبێت باشوور و ڕۆژھەڵاتی کوردستان بکەینە نموونە بۆ بوونی دوو ھێزی چەکدار . چونکە لە ھەر یەک لەو دوو پارچەیەدا دوو ھێزی چەکدار ھەبووە و ئەنجامەکەشی شەڕی ناوخۆیی و لە دەستدانی ھەموو دەستکەوتەکان بووە . خۆ ئەگەر بێت و لە ڕۆژئاوای کوردستاندا ھێزێکی چەکداری دیکە دروست بکرێت ئەوا بە دڵنیاییەوە شەڕی ناوخۆیی دروست دەبێت و ئەنجامەکەشی تەنھا بە لە دەستدانی دەستکەوتەکانی ئەو پارچەیە کۆتایی نایەت بەڵکو کاریگەری زۆر خراپ لەسەر پارچەکانی دیکەش دروست دەکات.

لێرەدا پێویستە ئەم دوو پرسیارە ھەم لە مەسعود بارزانی و ھەم لە حیزبە دەمامکدارەکان بکەین و بڵێیین:

١- چۆنە ئێوە ئامادەن لە ڕێگەی لایەنگرەکانتانەوە کەتیبەی چەکداری دروست بکەن و بیانخەنە ژێرفەرمانی ئارتەشی (ئازاد)ی سوریا بۆ خزمەتکردنی ئیخوان‌الموسلمین بەڵام ئامادە نین لایەنگرانتان بنێرنە نێو ڕیزەکانی "یەپەگە" بۆ خزمەتکردنی ڕۆژئاوای کوردستان؟
٢- ئەگەر ھێندە بە پەرۆشی ھێزی چەکدارین ، ئەی بۆچی ھەوڵی ئەوە نادەن کە ھەڵبژاردنێکی پەڕلەمانی ساز بدەن و ھەموو ھێزی چەکداری ببێتە ماڵی پەڕلەمان؟

گلەیی و گازندە:

گلەیی و گازندەی من زیاتر لە ئەنجومەنی گەلی ڕۆژئاوی کوردستانە ، چونکە ئەم ئەنجومەنە تاکو ئێستاش نەیتوانیوە سنورێک بۆ دەستێوەردانەکانی پارتی و بارزانی دابنێت لە ڕۆژئاوای کوردستاندا . پێشینیان دەڵێن " مرۆڤی زانا دوو جار لە کونێکەوە پێوەی نادرێت " ، کەچی ئەنجومەنی گەلی ڕۆژئاوای کوردستان نەک دوو جار بەڵکو دەیان جار لە ھەولێرەوە پێوەیان درا و ھێشتاش وانەیان لە پیلانەکانی بارزانی وەرنەگرت.

ئەوە بارزانی بوو کە لە ژێر ناوی " کۆنفرانس بۆ کوردانی سوریا " گەورەترین ئاژاوەی لە نێوتاندا ساز کرد ، ئەوە بارزانی بوو کە نیوەی دەستەی باڵای خستە باوەشی داود ئۆغڵو دژ بە نیوەکەی دیکە ، ئەوە بارزانی بوو کە پارتەکانی نزیک لە خۆی ناردە لای ئەخزەر ئیبراھیمی تاکو بە نێوی ھەموو کوردانی ڕۆژئاواوە لێدوان بدەن ، ئەوە بارزانی بوو کە خۆی کردە دەمڕاستی کوردانی ڕۆژئاوا و بەبێ پرسکردن چوویە کۆنگرەی دەوحە ، ئەوە بارزانی بوو کە لە پشتی پەردەوە لەگەڵ کاربەدەستانی تورکدا دادەنیشت بۆ کۆچبەرکردنی کوردانی ڕۆژئاوا ، ئەوە بارزانی بوو کە بڕی یەک ملیۆن دۆلاری بەخشیە ئارتەشی (ئازاد)ی سوریا بۆ ھێرشکردنە سەر "سەرێ کانی" ، ئەوەش بارزانییە کە لە دوای تێکشکاندنی ھێرشەکەی ئارتەشی (ئازاد)ی سوریا جارێکی دیکە دەیەوێت لە ڕێگەی دیداری ئێوە و پارتە دەمامکدارەکانەوە سەریەشەتان بۆ ساز بکات.

ئیمڕۆ زۆربەی شار و ناوچەکانی ڕۆژئاوای کوردستان ئازاد کراوە و ئەو سیستەمەی لە ڕۆژئاوای کوردستاندا پەیڕەو دەکرێت بۆ سەد ساڵی دیکەش لە ھەولێردا پەیڕەو ناکرێت ، ئیتر چ ھۆکارێک ھانی داون کە بۆ ھەموو دیدارێک ڕوو لە ھەولێر بکەن و ھەوڵی ئەوە نەدەن کە دیدارەکانتان لە شارەکانی ڕۆژئاوادا ئەنجام بدەن؟؟؟؟!!!!

بە دڵنیاییەوە تاکو قیبلەتان ھەولێر و ڕیش سپیتان بارزانی بێت ئەوا لە سەرئێشە ڕزگارتان نابێت و بەرەوە پێشیش ناچن ، لەبەرئەوە کاتی ئەوە ھاتووە کە دیدارەکانتان بگوازنەوە بۆ شارەکانی ڕۆژئاوای کوردستان و ڕیش سپیشتان بنەماڵەی شەھیدان بێت ، تاکو چی دیکە دوچاری سەر ئێشەی پارتی و بارزانی نەبن.

ماڵپه‌ڕی جه‌لال محه‌مه‌د