|
٢٥\٦\٢٠٢٦
شەڕی
ئەمەریکا و ئیسرائیل لە گەڵ ئێران!
ئەمەریکا و ئیسرائیل ئەو شەڕەیان لەسەرچی لەگەڵ
ئێران دەستپێکرد؟
شەڕ ئامانجی هەیە. کەواتە ئایا ئامانجەکانی ئەو شەرە هاتوونەتەدی؟
ئایا شەڕەکە بە تەواوی کۆتایی هاتووە؟
شوان عەزیز
ململانێی سیاسیی و سەربازیی لە نێوان ئەمەریکا و ئێراندا شتێکی تازە
نیەو مێژوویەکی هەیە. کاتێکیش کە ڕێبازی سیاسیی و دیبلۆماسیی شکەست
دەهێنێت و ئامانجەکانی بە تەواویی بەدەست ناهێنێت، ئیتر ڕێبازی شەڕو
توندو تیژیی دەگیرێتەبەر!
لەو ململانێیەدا ئیسرائیل وەک بەرەی پێشەوەی ئەمەریکا لە ناوچەکەدا
دەردەکەوێت نەک تەنها وەکو پرۆکسیەکی ئەمەریکا و بەس! مێژووی سیاسی و
سەربازیی ئەمەریکا بریتییە لە هەوڵی مانەوەی وەکو تاکەجەمسەری جیهان و
تا ڕاددەیەکیش تاکو ئەم دواییانەش ئەمەریکا توانیویەتی لەو هەوڵەیدا
سەرکەوتوو بێ!
ئەمەریکا زۆر دەمێکە وەک تاکە جەمسەری بەهێزی جیهان مامەڵە لە گەڵ
دەوڵەتاندا دەکات بە تایبەتی لە دوای کۆتایی هاتنی جەنگی جیهانی
دووەمەوە!
ئێستا جیهان لە ڕووی سیاسیی و سەربازییەوە گۆرانی بەسەردا هاتووە. لە
بەرامبەر ئەمەریکادا هێزی زۆر کاریگەری تر سەری هەڵداوە بۆ نموونە چین
کە بۆتە مۆتەکە بەسەر دڵی کۆمپانیا زەبەلاحە سەرمایەدارییەکانی
ئەمەریکاوە! چین لە ڕووی ئابووری وسەربازیی و تەکنەلۆژیاوە توانیویەتی
بە ئاشکرایی ترس بخاتە ناو هەناوی سیاسەتمەدارە تاک جەمسەر ویستەکانی
ئەمەریکاوە!
ئێستا کێشەی سەرەکی نێوان ئەمەریکاو ئیسرائیل لە گەڵ ئێران، لە
بنەڕەتدا ململانێیەکی جیۆپۆلەتیکیی و ئایدۆلۆژیی قووڵە کە بە زەقی لە
دوای ١٩٧٩وە کە کۆماری ئیسلامی دامەزرا سەریهەڵداوە. ئەمەریکا دەیەوێت
بەرژەوەندییەکانی خۆی و بەرژەوەندی و سەقامگیریی هاوپەیمانەکانیشی، کە
ئیسرائیل بە پلەی یەکەم دێت، لە رۆژهەڵاتی ناوەڕاستدا بپارێزێت.
ئێران لەو نێوەدا ڕێگرێکی گەورەیە لەبەردەم ئەمەریکا و ئیسرائیلدا.
چونکە ئێستا چین و ڕووسیا بە تایبەتی چین لە ڕووی ئابووریی و سەرمایەو
بازارو تەکنەلۆژیاوە خەریکە تەنگ بە ئەمەریکا هەڵبچنێت.
ناوچەی ڕۆژهەڵاتی ناوەڕاست کە پڕە لە سەرچاوەی سرووشتیی بەتابەتی نەوت
و گازی شل، کە چین زۆری پێویستن و ئەمەریکاش ئاگای لەمە هەیە و دەیەوێت
ڕێگریی بۆ چین درووست بکات، بەڵام لەو نێوەدا ئێران ڕێگرە. ئێرانیش
لەبەرامبەردا زۆر بە ئاشکرایی دژی هەژموونی ئەمەریکایە و هەوڵدەدات
نفوزی خۆی لە ناوچەکەدا فراوان بکاتو وەک تاکە جەمسەریش لە ناوچەکەدا
دەربکەوێت!
بەهانە سەرەکیەکانی ئەمەریکا و ئیسرائیل کە شەڕیان لەگەڵ ئێراندا
دەستپێکردووە هەندێکیان کە بە ئاشکرا باسیان لێوە دەکەن بریتین لە:
ئێران بەرنامەی ئەتۆمی هەیەو چەکی ئەتۆمیی درووست دەکاو لە دژی
بەرژەوەندیی و دۆستەکانی ئەمەریکا، کە مەبەستی بە پلەی یەکەم لە
ئیسرائیلە، بە کار دێنێت!
ئێران بەرنامەی مووشەکی بالیستیکی هەیەو پەرەی پێدەدات و مووشەکی
بالیستیکی درووستکردوون و ئەمەش هەڕەشەیە بۆ سەر ئەمەریکا و ئیسرائیل و
بەرژەوەندیەکانیان لە ناوچەکەدا! بە تایبەتی ئیسرائیل ترسی زۆری لە
ئێران هەیە.
ئیران بە ئاشکرایی شیعاری مەرگ بۆ ئەمەریکای بەرزکردۆتەوە.
ئێران ئەمەریکا بە شەیتانی گەورە ناودەبات و هەر بەوپێەش مامەڵە لەگەڵ
ئەمەریکا و بەرژەوەندیەکانی ئەمەریکا و دۆستەکانی ئەمەریکا بە تایبەتی
ئیسرائیل لە ناوچەکەدا دەکات!
ئەمەریکا دەڵێت کە ئێران دەست وەردەداتە نێو کاروباری دەوڵەتەکانی
ناوچەکەو لە دژی بەرژەوەندیەکانی ئەمەریکا و ئیسرائیل لە ڕووی سەربازیی
و سیاسیی و ئابووریەوە هەنگاوی کرداریی ناوە!
ئێران، بە قسەی ئەمەریکا و ئیسرائیل، پاڵپشتیی لە تیرۆرو پشگیریی لە
گرروپە تیرۆریستەکان دەکات و گرووپی تیرۆریستیش لە دژی دۆستەکانی
ئەمەریکا بە تایبەتی ئیسرائیل لە ناوچەکەدا درووست دەکات کە ئیسرائیل
دەمێکە بەدەست ئەو گرووپانەوە گیری خواردووە!
ئێران نیازی سڕینەوەی ئیسرائیلی هەیە بە تەواوی دیارە لە ڕیگەی ئەو
گرووپ و تاقمانەوە کە ئەمەریکا و ئیسرائیل بە تیرۆریستیان ناودەبەن.
بۆیە کێشەی ئەمەریکا و ئیسرائیل لە گەڵ ئێران نابێت تەنها وەک کێشەیەکی
ئابووری یان سیاسیی ئاسایی چاوی لێبکرێت، بەڵکو ئەو کێشەیە ململانێیە
لەسەر دەسەڵات و بەرژەوەندییە ستراتیژییەکان لە ناوچەیەکی هەستیاری وەک
ڕۆژهەڵاتی ناوەڕاستدا!
ئەمەریکا و ئیسڕائیل وا بۆدووجار دەچێت کە شەڕیان بەشێوەیەکی بەرفراوان
لە ڕووی دەریایی و ئاسمانییەوە لە دژی ئێران دەست پێکردووە بە مەبەستی
ڕووخاندن یان لابردنی ئەو هەڕەشانەی کە بە هۆی ئێرانەوە دەکرێنە سەر
ئەمەریکا و ئیسرائیل و بەرژەوەندیەکانیان لە ناوچەکەدا. کە لەو نێوەدا
هەندێک لە دەوڵەتەکانی کەنداویش وەک دۆست و پرۆکسی ئەمەریکا و ئیسرائیل
ناویان دەهینرێت کە ترسیان لە ئێران هەیە!
ئەمەریکا و ئیسرائیل لەو شەڕەدا توانییان لە ڕووی سەربازیی و
ئابووریەوە زەرەرو زیانێکی زۆر بە ئێران بگەێنن. بۆ نموونە:
هێزی ئاسمانیی و دەریایی ئێرانیان بە تەواوی لە کارخستووە، توانییان
ڕیزی یەکەم و دووەم و سێهەم و تەنانەت چوارەمی فەرماندە هەرێ باڵاکانی
هێزی سەربازیی ئێران بکوژن، توانییان زووربەی هەرێ زۆری زانا
ئەتۆمیەکانی ئێران بکوژن، توانییان بەرنامە ئەتۆمیی و مووشەکیەکەی
ئێران لە کاربخەن یان وێران بکەن، توانییان ژێرخانی سەرربازیی و
تەکنیکی و تەکنەلۆژیای ئێران لە ناوبەرن یان لەکاری بخەن، توانییان
سەرکردەکانی حەماس و حیزبوڵا و هەندێکیش لە فەرماندەکانی حوسییەکان
بکوژن.
توانییان حەماس لە ناوبەرن و حیزب اللەش بەتەواویی لاواز بکەن.
توانییان گەمارۆی ئابووریی لەسەر ئێران زیاتر بکەن و نەوت و
بەرهەمەکانی نەوتیش هەم هاوردەو هەم بردنەدەرەوە لە ئێران ببرن،
توانییان زەرەرو زیانی داخستنی گەرووی هۆرمز، کە ئیران دەڵێت لە ژێر
دەسەڵاستی خۆیدایە، بەسەر ئێراندا زیاتر بشکێننەوەو داخستنی ئەو گەرووە
لە لایەن ئیرانەوە چەندە زیانی بۆ ئەمەریکا و هاوپەیمانەکانی هەیە
ئەوەندەش داخستنەکەی بۆ ئێران خودی خۆی زەرەری هەیە، توانییان بەشار
ئەسەد لابەرن و جۆلانی کە داردەستی خۆیانە بهێننە شوێنی.
زۆر شتی تریش کە ئەمەریکا و ئیسرائیل لەدژی ئێران کردیان و هێشتاش
بەردەوامن بە تایبەتی ئیسرائیل وەستانی نیە.
بەڵام ئێران هێشتا وەک سیستەم و وەک حکومەت و وەک دەوڵەت و وەک هێزی
سەربازیی لە ناوخۆ بۆ ڕاگرتنی بارودۆخی ناوەوەی ئیران نەڕووخاوەو هەروا
خۆی قایم دەکاتەوە!
ئیران هێشتا وەک ئەمەریکا مەرج دادەنێت و لە مەرجە سەرەکیەکانی خۆی واز
ناهێنێت! بۆ نموونە گەرووی هوۆرمز دەبێ لە ژێر دەستی ئێراندا بێت،
بەرنامەی ئەتۆمی و بالیستیکی هەر درێژە پێدەدات، هاوکاری پرۆکسیەکانی
لە ناوچەکەدا بە تایبەتی حیزبوڵای لوبنان درێژە پێدەدات و هاوکارییان
دەکات.
هێشتا ئێران هەڕەشە دەکاتو زیرەکانە دانووستانەکان بەڕێوەدەبات و
ڕیکەوتن لە پێناوی ڕیکەوتندا ئەنجامدەدات و مەبەستی سەرەکیشی ڕیکەوتن
نیە بەڵک و کات بەدەست هێنانە! کە ئەمەیان ئەمەریکا بە قازانجی نیە!
ئێران تاکو ئێستاش هیچ بەڵێنێکی بە ڕاستی نەداوە کە بەرنامە ئەتۆمیەکەی
لە ناودەبات و مووشەکی بالیستیکی ناوێت و هاوکاری پرۆکسیەکانی ناکات و
گەرووی هۆرمز وازلێدێنێت.
ئێران زۆر بە ناڕوونیی دەچێتە ناو دانووستانەکان و ئاشکرا نیە چی دەکات
و چی دەبن سەریەوەیە!
ئێستا ئێران ئامانجی سەرەکی ئەوەیە کە داواکەی خومەینی جێبەجی بکات کە
دەیگوت "پاراستنی کۆماری ئیسلامی ئێران لە نوێژو رۆژوو فەرزترە!".
بۆیە شەڕ کۆتایی پێنەهاتووە چونکە ئەو ئامانجانەی کە شەریان لە
پیناویدا هەڵگیرساندووە هێشتا بە تەواوی بۆ هەردووک لایەنی شەڕەکە
نەهاتوونەتەدی، بە تایبەتی بۆ ئەمەریکا و ئیسرائیل و بە تایبەتیتریش بۆ
حکومەتە ڕاستڕەوەکەی ئیسرائیل.
ئیسرائیل پێی وایە ئەو لە دەرەوەی ئەو رێکەوتنەدایە!
ناتانیاهۆ،سەرۆک وەزیرانی ئیسرائیل،لە ٢٢ی حوزەیران لە کۆبوونەوەیەکی
گشتی دا بە ئاشکرا گوتی: ئەگەر ئەمەریکا لە شوێنی ئیمە بایە هەمان کاری
ئێمەی دەکرد لە دژی حیزب اللە. بۆیە ئیمە بەردەوام دەبین لە پاراستنی
ئاساییشی ئیسڕائیل و خەڵکی خۆمان و ریگە نادەین لە هیج شوێنێکەوە
هەڕەشە بکرێتە سەر ئاسایشی ئیسرائیل و خەڵکی ئێمە.
ڕۆژی ٢٣ی حوزەیرانی ٢٠٢٦ ڕۆژنامەی ئیندیپێندەنتی بەریتانیا سووربوونی
ئیسرائیلی لە بەردەوامیدان بە شەڕ لە گەڵ حیزبوڵادا دووبارەکردەوەو
هەروەها بۆ پاراستنی ئاسایشی ئیسرائیل، سوپاو هێزی سەربازیی ئیسرائیل
لە شوینەکانی خۆی لە ناو لوبنان و فەلەستیندا ناکشێتەوە!
بۆیە بە بڕوای من چاوەکان لە سەر ئەوەن کە شەڕەکە کۆتایی نەهاتووە . من
پێم وایە شەڕەکە کاتێک کۆتایی دێت کە ئێران بەتەواوی ملکەچی
داخوازیەکانی ئەمەریکا و ئیسرائیل ببیت.. ئەگەر ئێران وا نەکات ئەوا بێ
سێودوو دەبێ یان چاوەڕیی شەڕ بکات لەگەڵ ئەمەریکا و ئیسرائیل، جا پێی
بکرێت یان پێی نەکرێت ئەوە شتێکی ترە، یاخود دەبێ ئێران چاوەڕێی
ڕێگایەکی تر بکات کە ئەمەریکا و ئیسرائیل دەیگرنە بەر بۆ ڕوخاندنی
یەکجارەکی دەسەڵای کۆماری ئیسلامیی لە ئێران!
ئەوەتە ئەمڕۆ ٢٣ی حوزەیرانی ٢٠٢٦سەرۆکی تازەی موسادی ئیسرائیل دەلێت:"
دەبێ لە ڕێگەیەکی تر بگەڕێین بۆ ڕووخاندنی ڕژێمی ئێران" واتە شەڕ
کۆتایی نەهاتووەو نەهێشتنی کۆماری ئیسلامیی ئێران هەر لە سەر مێزی
شەڕانگێزیی سیاسەتمەدارانی سەربازیی و سیاسیی ئیسرائیل و و
ئەمەریکادایە.
ئەوەی کە جێی تێڕامانیشە ئەوەیە کە هێشتا خەڵکی ئێران زۆر باوەڕیان بە
ئەمەریکا و ئیسرائیل نیەو دەزانن کە هەر ئەمەریکا و ڕۆژئاوابوون کە ئەو
سیستەمیان بەسەر خەڵکی ئێراندا سەپاند!
هەروەها خەڵکی ئێران دەزانن کە ئەمەریکا و ئیسرائیل لەبەر خاتری خەڵکی
ئێران نیە کە شەڕ بە دژی کۆماری ئاخوندەکان دەکەن، بەڵکو لەبەر
بەرژەوەندی خۆیانەو بەرژەوەندی ئەوان و خەڵکی ئێرانیش دوو شتی زۆر لیک
جیان.
مێژووی ناوچەکەش ئەوە نیشان دەدات و هەر ئەوەش دووپات دەکاتەوە کە
ئەگەر هەر هێزو دەوڵەت و گرووپێک لەگەڵ ئیسرائیل ناکۆکی درووست بکات و
ناتەبا بێت، دەبێ باش بزانێت کە جێگەی خۆی لێژدەکات و ناتوانێت دەوام
بکات! جا درەنگ بێت یان زوو!
ماڵپهڕی
شوان
عەزیز
|
