په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

١٢\١١\٢٠١٩

    شنەشنی دڵەکەت گوڵێکە لە باخچەی رۆحمدا.

کەژاڵ ئیبراهیم خدر

١
تۆ خونچەی گوڵێکی شارم بووی
بووی بە ئاونگی بەیانی
بوویت بە تریفەی مانگەشەو
دوا جاریش بە گەڵا
منیش لە ژانی شیعرێکمەوە
تریفە و، گەڵام نووسیەوە
وەک بای دەشت و نمەی باران
بە ئەسپایی ھاتنە باوەشمەوە.


٢

من سۆراخی عەشقی ئاوابوونی ئەو بووم
بۆت بوومەتە دەروێشێکی قژ درێژ و
دەفژەنێکی سەرگەردان
وەک رەشەبایەکی سەرشێت
لەگەڵ ئاواز و گۆرانی، شیوەنی چیادا
بوومە ھەڵم و چوومە ئاسمان.


٣

بوومە ھاوڕێی پەڵە ھەورێ
لە خەیاڵما، ھاتیتە نێو دڵمەوە و
بووی بە پەپوولەیەکی
باڵ نەخشینی زەرد
چەندە جوان و، نەشیمیلە بووی
پاک و بێگەرد.


٤

لەگەڵ بارینی باراندا
کزە بایەکی سارد کەوتە جەستەمەوە و
تۆش بوویتە کاروانچیەکی راگوزار
لە ناو مێرگی ھەتاومدا
لەگەڵ شیعرەکانما دەست لەملان بوون و
یەکتریتان ماچ دەکرد
تێکەڵاو بووین بە ھەتاو سێبەر
منیش بووم بە بەفرێکی زستانە و
دواتر بووین بە ژن و درەخت.


٥

تاڵێ پرچت، ژێی شیعرم بوون
بوون بە دەریاچەی خەمەکانت
جوانیی خۆمم تێدا بەخشی
لە نێو نیگاو خەندەی تۆدا
عشقی ژنێک لەدایک بوو
ژووانەکانی بە چرپەوە بۆ باس کردی.


٦

لە نێو ژاوەژاوی بادەی
نیوەشەوی شەرابێکدا
خەیاڵ و بیرم، با ئەیبا
ئەی ناسکترین پەڕەی رۆحم
کاتێ دەبیتە درەختێکی وەنەوشەیی
لە نێو پەنجەرەی دڵتەوە
بە ئامێزێکی گەرمەوە
سەوز سەوز پێئەکەنی
کاتێکیش دەبیتە تراویلکە و
گوڵاوپژێنی دڵم دەکەی
بۆت دەبمە کەنارییەکی بێ دەنگ و
ھەندێ جار یش فرمێسک گەردنم تەڕدەکات
بە کوڵ دەگری.


٧

کاتێک شیعرێک دەنووسم
وەک لاولاوی ماڵەکەمان
لەگەڵ شنەی بەیانیاندا سەما دەکا
بۆیە نزادەکەم و دەپارێمەوە لە یەزدان
ھەرگیز نەمری
تاکو پەلکەزێڕینەی دەرکەوێ و
مەل لە جریوە نەکەون
ئەتۆش نەگری.

 
٨

تۆ سپیترین بەفری منی
کاتێ لەگەڵ پۆلێ
وشەی ناسک ناسک
عەشق و مەیلی منت تێدا دەڕوێ
ھەرگیز نامەوێ تەنیابیت
تاکو بەژن و باڵای چنارت و
قژی رەنگاو رەنگ و، لێوت ناسکت
وەک شۆڕەبی بەرز دەبێ.


٩

کە دەتبینم لە سنەوبەرێکی سەوزی
پرچ ژاکاوی سەری ساڵ دەچی
بۆت دەبمە پەپوولەیەکی رەنگاوڕەنگ
دەت خەمە سەر کەلی شاخم
دەتگرمەوە نێو باوەشمەوە
پاک و بێ دەنگ.


١٠

تکا دەکەم
تەنیا و، بێ کەس و، غەریبم مەکە
تاکو پایز: بە کراسێکی ساردی خەزانەوە
بە کەمەری باریک و، قژی بە شیعر داپۆشراوە
نەگاتە دونیای برژانگت و
چاوە خومارەکانت.


١١

باران نمە، نمە
بەسەرتدا دادەبارێ و
گەرووی وشکەوەبووی
چەند ساڵەت تەڕدەکا
تۆش وەک ژنێکی نازەنین
لاوانەوە یەک، بۆ جوانی نیشتمان و
بەستەکانی خاک دەنووسی.

 
١٢

کە دەتبینم
لەوپەڕی ئاسۆی شارەوە
بەدەم ھەناسەی کزەباوە
قژت رەشی قەتراینە و
روومەتە سورەکانت، ئەگەشێنەوە.

______________________________________________
تێبینی: ئەم شیعرە پێش مەرگی نووسیویەتی "لە دەفتەرەکەیدا ھەیە" ھەندێک دێڕ و وشەی دەستکاریی کردووە "بە شێوەیەکی سەرەتایی".

 

ماڵپهڕی که‌‌ژاڵ ئیبراهیم خدر

 

 

 

 

په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک