په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

١\۴\٢٠١٠

شۆفینیزمى عەرەب یەکگرن ، بەر لە خواستى کورد بگرن.
- دیوى ناوەوەى بیرکردنەوەى شۆفینیزمى عەرەب بەرامبەر بە گەلى کورد -


هیوا ڕەش   


دەمارگیرى و شۆفینیەت ، چەمکێکى هێند قێزەونن هەرگیز نە بەلایاندا چوومە و نە بەلاشیاندا ئەچم ، هەمیشە پێم خۆش بووە ژیانێکى شایستە بۆ تاک و کۆمەڵ و نەتەوە و گەلان فەراهەم بێت ، چۆن دەستدرێژى کردنە سەر مافى خۆم وەکو تاک ، مافى کورد وەکو نەتەوەکەم پێ ناخۆشە بە بارتەقاى ئەوەش ئازار ئەچێژم لەکاتى چەوساندنەوەى بەرامبەرەکەم جا سەر بە هەر کەس و نەتەوە و ئایینێک بێت .

بەدرێژایى مێژووى کورد ، لەکاتى شکست و سەرکەوتندا ، لەخۆشى و ناخۆشیدا ، لە سیاسەت و ئەدەبدا ، بەردەوام کوردى هەموو پارچە داگیرکراوەکانى کوردستانى گەورە لە فەرهەنگى ڕۆشنبیرى و کۆمەڵایەتى خۆیاندا ( برایەتى و برایەتى ، دیسانەوە برایەتى ) دروشمى سەرەکییان بووە لەگەڵ نەتەوە سەردەستە داگیرکارەکاندا ، مخابن ئەوان ئەگەر مناڵێکیان خەون بەبرایەتى ئێمەوە ببینێت سزاى ئەدەن و بەردەوام ( کۆیلەیەتى و کۆیلەیەتى و دیسانەوە کۆیلەیەتى ) دروشمى بنەڕەتییان بووە بەرامبەر بە ئێمەى کورد و هەوڵیان داوە بە لۆژیکى ( مافى خۆم بۆ خۆم مافى تۆش ئەخۆم ) ڕەفتارمان لەگەڵدا بکەن !

لەکوردستانى باشورى بەشە داگیرکراوەکەى ئێراقى داگیرکاردا ، لەئاکامى فشار و بەرخودانى شۆِرشە نەپساوەکانمان گەلێک جار بەرامبەرەکەمان ناچار کراوە خۆ بدەنە دەستى واقعەوە ، لەو پێودانگەوە ملیان داوە دان پێدانان بە کەمۆکەیەک لە مافە زەوتکراوەکانمان ، تا گەییشتە ئەوەى ڕژێمێکى دکتاتۆرى فەرخەفاشى ئەو سەردەمەى بەکر و سەدام لە ساڵى 1970 دا بەیانى 11 ى ئازار ڕاگەیەنن ، وەلێ دواى پڕچەک کردنى خۆیان دووبارە ناوەڕۆکى خۆیان کە لەدیوى ناوەوەیاندا حەشار درابوو ئاشکرا کرد و بەربوونەوە وێزەى گەلەکەمان و ئەو بەیاننامەیەى بەڵێنى جێبەجێ کردنى ناوەڕۆکەکەیان دابوو فڕێیان دایە مێژووى خوێناوى خۆیانەوە .

سیناریۆى ڕێزلێنان و دان نان بەمافە نەتەوایەتییەکانى کورد لەکاتى لاوازى دوژمناندا بەرەو هەڵکشان چووە و لە کاتى خۆبەهێز کردنیشیاندا داکشاوە ، ئەمە لە سەروبەندى داتەپینى ڕژێمە کوردکوژییەکەى سەدام حوسێندا لە ساڵى 2003 دا بەجوانى دەرکەوت ، تەنانەت زۆر لە خواستە گەورەکانى کورد کران بە ماددەى دەستوری ، چونکە شۆفینیزمى عەرەبى عێراق بە نەمانى سەدام کۆستێکى گەورەیان کەوتبوو ، دووچارى گەورەترین نەهامەتى هاتبوون کە چوارپەلیانى شکاندبوو ، بۆیە ملکەچ بوون بۆ داوا ڕەواکانمان لە بە فیدڕاڵى ناساندنى عێراق و بەشەبودجە و ماددەى 140 ى تایبەت بە ناوچە داگیر و دابڕاوەکانى کوردستان .

هەموو ئەمانە سەرکردایەتى سیاسى کوردیان نە تەمبێ کردووە نە فێرە سیاسەتیش ، لەبەرئەوەى حزبایەتییان خستۆتە پێش کوردایەتییەوە و باشترین بەڵگەش دابەش کردنى پۆست و پلە و پایە و بودجە و پارەى دەستهاتووى گەلەکەمانە لە نێوان هەردوو بنەماڵەى بارزانى و تاڵەبانى و حزب و پیاوەکانى خۆیان بەبێ لەبەر چاو گرتنى ئەو بارودۆخى ناهەموارەى گەلەکەمان ، هەر ئەم کەلێنەشە زەمینەیەکى گونجاوى ڕەخساندووە بۆ دوژمنانمان کە دزە بکەن بۆ درز خستنە ناو خواستەکانمان تا بەرەبەرە پاشگەز ببنەوە لێیان ، ساڵح موتڵەگ لێوى ئەکرۆشت بۆ ئەوەى کە ئێستا دەستیان بەستراوەتەوە و هەر کاتێک بۆیان بڕەخسێت هەڵەبجە و ئەنفال بە شێوازێکى مۆدێرن تر لەسەر خوانى شۆفینیزمى پێشکەش بە گەلەکەمان ئەکەنەوە ، ئەسیل نجێفى پێشمەرگە ناشیرین ئەکات و یەکێکى تریان هەرێمەکەمان هەڵئەوەشێنێتەوە و ئەوى تریان کەرکوک زەوت ئەکات ، ئەوەتا دوا لێدوانى پڕ ڕق و کینەى عەبدولهادى حەسانى بە گاڵتەجاڕییەوە باسى جێبەجێ کردنى ماددەى 140 ئەکات ، ئەگەر چاوێک بە ئینتیماى سیاسى هەر یەکێک لەوانە بخشێنرێت هەریەکە و سەر بە لایەنێکن لە بەعسى و ئیسلامى سوننە و شیعە و - - - - - کە سەرەنجام هەموو بۆچوونەکان ئەڕژێنە ڕووبارەکەى سەدامى دکتاتۆرەوە و ئەیانەوێت بەمە لافاوى شۆفینیزمى بدەن بەسەر خواستەکانى گەلى کوردمان و بە ئاقارى نغرۆ بوون دا بیبەن .

ئەمڕۆ بەدەر لەوەى سەنگ و قورسایى پێشوو ترمان لەدەست داوە ، ئەبێت هەموو لایەنە کوردستانییەکان بۆ بەرگرتن لەم ئاراستە دژە مرۆییە یەک هەڵوێست بن و چى تر بەرژەوەندى حزب نەخەنە سەرووى بەرژەوەندییەکانى گەلەکەمانەوە و بە مکوڕییەوە پێداگیرى بکەن لە سەر ئەو بڕگە و ماددە دەستورییانەى کە بۆ پاراستنى مافى گەلى کورد بڕیارى لەسەر دراوە ، چونکە دڵنیام پیلانە کۆنەکان تازە ئەکرێنەوە کە لەوە پێش دەرهەقمان پیادە ئەکرا ، هەرکاتێک شۆڕشى کورد برەوى سەندبێت وەزیرانى دەرەوەى تورکیا و ئێران و سوریا و ئێراق بۆى کۆ ئەبوونەوە تا لاوازى بکەن ، ئێستاش شیعە و سوننە ، ئیسلامى و عەلمانى ، دیموکرات و شۆفینى هەموو کۆکن لەسەر ئەوەى ئامانجەکانمان لە ( خلف الکوالیس ) ەوە خۆیان خواردوو بکەن ، هەرچەندە سەدام وەکو جەستە نەمابێت بەڵام وەکو هزر هێشتا زیندووە و مەترسییە بۆ سەر خواستە ڕەواکانمان .

 


07701309524

Hewarash1@yahoo.com