بێکه‌س خه‌لیل

په‌له‌ت نه‌بێ هه‌ر دێمه‌لات

هه‌رچیت هه‌یه به‌سه‌رسه‌ر و به‌سه‌رچاوان

                              بۆ سکاڵات..

دڵنیامه ئێستاکه‌ تۆش

             هه‌روه‌ک خاکی تێنووی ووڵات

به‌ڕێت کردووه

چه‌ند زستانی ووشکه‌ساڵیی و هات‌و نه‌‌هات..

په‌‌له ‌مه‌‌که‌ ئازیزه‌که‌‌م

                 ئه‌وڕۆسبه‌‌ی ده‌‌گه‌مه‌ لات..

هاکا بینیت ساڵ هات و چوو ساڵی نه‌‌هات.

کاتێک ده‌گه‌م

هه‌روه‌ک بارانی به‌هاران

               ووشکه‌ساڵیی هه‌ڵده‌بڕم..

گه‌ڵاو گوڵ و

باڵای قه‌شه‌نگت سه‌رتاپای له‌ئاوده‌گرم،

جا ئه‌‌و کاته‌

تا له‌ گله‌یی و سکالاکانت تێبگه‌م؛

         به‌ ناخی گیانت رۆده‌چم..

    هورده‌ هورده‌ نیگاکانت ده‌خوێنمه‌وه‌

سانتیم به‌ سانتیمی باڵات ده‌نووسمه‌وه‌.

١٢\٨\٢٠٠٨

له‌و کاته‌وه‌ی دوعا کوژرا
سروشت و مانگ و ئه‌‌ستێره‌ و
شه‌و و رۆژ و زه‌وی و ئاسمان..
      وه‌رزه‌کانیشمان لێتۆران
جار جار نه‌بێ.. زستان نه‌ده‌هاته‌ سه‌ردان..
که‌ ئه‌و جار جاره‌شیان ده‌هات

     له‌ جیاتی تارای زیوینی

     تارایه‌کی ره‌ش له ‌سه‌ر و‌
            بێ قسه‌‌ی خۆش..
            به‌ رووگرژیی و بێ پێکه‌نین..

هیشکوبرینگ.. بێ باران و بێ ئاو ده‌هات،
پایزیش وه‌کو بووکێکی زیز
به‌ ره‌نگزه‌ردیی و زۆر کزومات
     به‌ میوانی بۆمان ده‌هات،
به‌هاریش هه‌ر لێی‌مه‌پرسه‌
ئه‌ویش هه‌ر له‌ خه‌می دوعا
بێ بۆنی گوڵ..
بێ جله‌ جوان و ناسکه‌که‌ی
ده‌هات بێ ده‌نگ.. یه‌کجار لالووت
      ده‌ڕۆیی و هیچی نه‌ ده‌گوت
له‌ دواجاردا بارگه‌وبنه‌ی پێچایه‌وه‌ ..
تا هه‌نووکه‌ش هیچ ئاوڕێکی نه‌دایه‌وه‌.

٢٠٠٨