١٤\٤\٢٠١١

سوێندى ئێمە و سوێندى ئەوان.

هیوا رەش     

ئەو دەمانەى لە گرتنى بنکەیەکى حیزبیى و سەربازیى بەعسدا ، بە گوللەى گڕدارەوە تەپڵى سەرکەوتنمان گوێى ئاسمانى کەڕ ئەکرد ، دواى هەموو نیوەڕوانێک زۆربەى شەقامە سەرەکییەکانى نێوان شار و شارۆچکەکانمان کۆنترۆل ئەکرد ، لە هەندێک شاریشدا پیاوانى بەعس لە کۆلیتەکانیان خۆیان حەشار ئەدا و نەیانئەوێرا سەر دەربکەن ، ئەو دەمانەى سوپاى فاشیستى بەعس سەرقاڵى شەڕى عێراق - ئێران بوو ، ئێمەى پێشمەرگە سەرمەستى وردە سەرکەوتنەکانمان بووین ، ئیدى شتێک نەبوو سڵى لێ بکەینەوە ، بە گژ مەرگدا ئەچووینەوە ، نەمانئەزانى دوژمن هێندە نامەردە بە مەرگى ئێمە دەسبەردارى تۆڵە نابێت ، دوژمن کەڵبە تیژ بوو ، چڕنوک درێژ بوو ، تینوو بە خوێن بوو ، سەوداسەرى بە دۆزەخ کردنى نیشتمانێکى بەهەشتیى بوو ، گەلێک بە گشتیى (پیر و لاو - ژن و پیاو) هەواڵەى مەنجەنیق ئەکات ، دەست لە ئاژەڵ و پەلەوەرى کێوى و ماڵیش ناپارێزێت ، کانیاوەکان وشک ئەکات ، ڕەز و باخ گڕ تێ بەر ئەدات ، لادیوارێک بە پێوە ناهێڵێتەوە ، ئەوەى ئەو ئەیکات بە هیچ خامەیەک نانوسرێت و بە هیچ زمانێک ناوترێتەوە!

بەو عێراقە عەرەبییە داگیرکارەى بەرپرسەکانمان سوێند بە پاراستنى خاکەکەى ئەخۆن ، بەو قورئانە عەرەبییە پڕ لە غەنیمەتەى ڕێگەى ئەنفالى بە دوژمنانمان پیشان دا و بەرپرسەکانمان سوێندى پێ ئەخۆن ، بەو خوایە میهرەبانەى کە میهرەبانیى بەرامبەر مزگەوتەکانى خۆى نەنواند و بەرپرسەکانمان لە حزوریدا دەست بە قورئانەکەیدا ئەدەن ، بەو خاکى کوردستانەى بۆتە کۆمپانیا بۆ دوو بنەماڵە و بەرپرسەکانمان تاڵانییەکانیان بۆ پینە ئەکەن ، بەو خوێنى شەهیدانەى گوێ لە خیزەى هەناسەى دایک و خوشکیان ناگیرێت ، بە سەرى ئەو بەرپرسانەى بۆ دزى هێز نیە ڕێگەیان پێ بگرێت ، بە گۆڕى ونى ئەنفالکراوەکانمان ، بە ناوى سەرکردە بێزراوەکانمان ، کە لە زینداندا بووم ڕِاپەڕین دەستى پێ کرد ، کۆڕەو بەرەو شاخەکان و ئەو دیو سنوور هەڵچوو ، دوایى بەرەو ناو شارەکان و سنوورى نیشتمان داچوو ، کە لە زینداندا بووم بەعس لە کوردستان کشایەوە و ئیدارەى خۆماڵى جێگەى گرتەوە ، کەسوکار کە ئەهاتن بۆ مواجەهە و باسى بوونى پێشمەرگەیان لە شارەکاندا ئەکرد ، ئەیانوت لەولاى زاڵگەى دوژمنەوە زاڵگەى پێشمەرگە هەیە ، بۆ پاراستنى ئاساییشى کوردستان دانراوە ، بڕوا بکەن بڕوام نەئەکرد ، وام ئەزانى خەیاڵە ، وامئەزانى خەونێکى بەتاڵە.

لەو کاتەوە سوێندێکى جیا لە سوێندى بەرپرسەکانم خواردووە ، بۆ ساتێک پشت لە دەسکەوتەکانى گەلەکەم نەکەم ، هەمیشە پێشمەرگەى خاکەکەم بم ، ئەو ئەزمونەى بۆمان هاتۆتە بەر هەمیشە خۆمى بە قوربان ئەکەم ، دژ بە یەک پارچەیى خاک و ئاوى عێراق ئەبم ، هەمیشە داکۆکیکارى یەک پارچەیى خاکى کوردستانى گەورە ئەبم ، قێزم لەوانە دێتەوە داڵدەى قاسم ئاغاکان ئەدەن ، بێزم لەوانە دێتەوە تاریق ڕەمەزانەکان ئازاد ئەکەن ، قێزم لەوانە دێتەوە سەرسامن بە ئایدیۆلۆژیاى ئەنفالى دوێنێ ، بێزم لەوانە دێتەوە کوردستان بە تونس و میسر بشوبهێنێ!

کە باس لە ناعەدالەتى ئەکرێ پەرلەمانتارێکم لە بەر چاو ئەکەوێ ، کە باس لە گەندەڵى ئەکرێ کۆپى ژمارەى پێڵاوى پێشمەرگەیەکى شاخم لە ڕوخسارى سەرکردەیەکدا بەرچاو ئەکەوێ ، هیچ دڵێکم خۆش نیە بە وەزیر و گزیر ، کە گیرفانى هاوڵاتى بۆ خۆیان ئەکەن بە نێچیر ، تفو لەو سیستمەى بەعس کە تێر و بێ ئازادى بووین ، لە سایەیدا خاوەنى شەرەفى خۆمان نەبووین ، نەفرەت لەم سیستمى حوکمڕانە خۆماڵییەى ئازادى تێیدا بێنان و بێکارە ، چ لە پەرلەمانتارێک بکەم بۆ سەیارە کڕینى خۆى بە زوویى دەست بە کارە ، چ لە وەزیرێک بکەم بە باسى خەباتى شاخ قەڵس و بێزارە ، چ لە ئۆپۆزیسیۆنێک بکەم گاڵتە بە عەقڵى شاخ ئەکا ، چ لە ئیسلامییەک بکەم بە سەر وشترى عروبەوە پەلامار ئەدا ! من ئێستا کوڕى جەماوەرم ، من ئێستا لە جاران زیاتر خاوەن باوەڕم، بڕوام وایە ئەم ئەزمونە هى گەلە و پارتى و یەکێتى ناشیرینیان کردووە ، ئەم خۆپیشاندانە هى برسى و بێمافە ئۆپۆزیسیۆن خۆى بە خاوەنى کردووە.

سوێندى من لە سوێندى بەرپرس جیایە ، سوێندى من نە بە قورئان و نە بە خوایە ، هى ئەوان بە خاک و ئاوى عێراقى داگیرکارە ، سوێندى من بە یادى ئەنفال و چواردەى چوارە ، سوێندى من بە کوردستانى گەورە و بریندارە ، سوێندى من بە یادى شانزەى سێ و چواردەى چوارە ، بە هەڵەبجە و ئەنفال و زیندە بە چاڵ و پەتى سێدارە ، سوێندە تا هەناسەم تیا ما بێ ، سوێندە تا خوێن لە جەستەما بێ . هەردەم سەربەخۆیى لە هزر و زەینما بێ ، سوێندە سوێندى بەرپرسان وەکو پێڵاو لە پێما بێ ، هەزار تف لە سوێندى وا بێ ، کە پارێزگاریى لە یەکێتى خاکى عێراقى تێدا بێ.

ماڵپه‌ڕی هیوا ره‌ش