٨\٤\٢٠١٥

    سۆژیان.

دارا خونچە

زۆر جار ئاورم تێبەربووە:
   - ئاوری ئاسایی ئاوردان؛
      چزەی لە دەست و پەنجانم وەهانیە
      لەشولارمی لە تەقەلۆ دەرهاوردیە
         لێ هەر سۆژیانم نەناسی و
                وە دیداری ئاشنا نەبووم!
   - ئاوری تیرۆژی گەلاوێژ؛
      ئاسۆی بینایی چاوانمی داگیر کردیە
      کەللە و مەژیمی وەک بەڕوو برژاندیە
         لێ هەر سۆژیانم نەناسی و
                وە دیداری ئاشنا نەبووم!
   - ئاوری چەخماخەی برووسکان؛
      تێکڕای لەشمی ئەنجنییە
      تا سەر هێسکانمی بڕییە
         لێ هەر سۆژیانم نەناسی و
                وە دیداری ئاشنا نەبووم!
   - ئاوری گوللە و ساچمەگوللان؛
      لا جانگ، لا رانمی دابێژییە
      کسپەی لە ناخم هەستاندیە
         لێ هەر سۆژیانم نەناسی و
                وە دیداری ئاشنا نەبووم!
   چەندین جۆرە ئاوری دیکە:
   - ئی شین.. ئی سۆر.. ئی زەرد.. ئی مۆر...
   دەستدرێژییان کردە سەرم
         کەچی هیچیان

         نە سۆژیانیان پێ ناساندم
              نە دەرفەتی دیداریان دام!!
لێ ئەو دەمەی ئاوری ئەوین
             لوولی کردم و راپێچی دام
       ئەوجا زانیم
       سۆژیان کووە..

                 شێوەی چتۆیە..

                            واتای چیە!!!
تا ئاوری سۆز و ئەوین
                لەسەر سەری نەسووڕاندم
      هەرگیز ئەمن نەمدەزانی
      ئیدی سۆژیان لە نان و ئاو..
         لە هەناسە پێویستترە و
         گەرەکە تا.. چاو لێکدەنێم

                          هەر بسۆژیێم!
تا ئاوری سۆز و ئەوین
      لە هامێزی گڕکانیی خۆی
                نەیکردمە یەک دڵۆپە ئاو
      هەرگیز ئەمن نەمدەزانی
      سۆژیان هێندە وە ژانوژۆ و

                    پڕ ئازار و سفتوسۆیە!!!
      سۆژیان هێندە پڕ شیرینیی و
                هێندە وە چێژ و پڕ بۆیە!!!

تا ئاوری سۆز و ئەوین

      لە گڕ و بلێسەی سۆژیانی دانەڕێژتم

      پێینەبێژتم
      هەرگیز نابی و ناکرێ و ناشێ
           بێی وی بژیم.. بێی وی بمرم!!!

سەرەتای نیسانی ٢٠١٥ - لەندەن

ماڵپه‌ڕی دارا خونچە