|
٢٠\٢\٢٠٢٠
تا ئەمن!
دارا خونچە
تا ئەمن.. وە
هەزار و یەک دەردەسەریی
یەک نەمام دەنێژم
ئەوان - تەنانەت باغەوان و ژینگەپارێزانیش -
وە ملیۆنان
باڵەخانان دەبەنە تاقی ئەسمانێ!
تا ئەمن.. وە هەزار و یەک بەڵگە و بیانگە
بڕوا وە یەک کەس دەهینم؛
ماسی و کسۆک و شالوور و ئاژەڵێن دن
لە کونجی ماڵ زیندان نەکا
ئەوان - تەنانەت ئاژەڵدۆست و ئاژەڵپەروەرانیش -
ملیۆنانیان لێ دارکاریی و سەرکوت دەکەن!
تا ئەمن.. وە هەزار و یەک تێهزرین و توێژینەوە
دەست وە پەیڤەک دادەهینم و
راست و پوختی دەکەمەوە
ئەوان - تەنانەت وێژەوان و پسپۆڕەکانی رێزمانیش -
نەک هەر سەدان پەیڤ
و رستە دەشێوێنن!
دەیان هۆزان و چیڕۆکان
وە زاراوەی کەزەمزێ
و تەمبوورقوڕان دەترەکێنن!
تا ئەمن.. وە هەزار و یەک ئازار و حەسرەت
یەک ماچ دەگێڕمەوە باوەشی
خۆشەویستیی
ئەوان - تەنانەت شیرین و فەرهادەکانی سەردەمیش -
ملیۆنان
ماچ وە ڤایرۆسی تۆڕە جڤاکییەکان
ئاڵوودە و شەرمەزار دەکەن!
تا ئەمن.. وە هەزار و یەک بینەوبەردە
یەک گان لە شەرم و بێ
ئابڕوویی دادەشۆرم
ئەوان - تەنانەت مێباز و نێربازە پێشڤەڕۆیەکانیش -
وە گان دەبێژن ''جۆتبوون'' و
وە ژنەوتنی لە شەرمەزارییان مت دەبن!
تا ئەمن.. وە هەزار و یەک هاندان و ورژاندن
یەک ژن دەخەمە رێزی
پیاوانی یەکسانییخواز
ئەوان - تەنانەت ژنە بزۆز و چالاکڤانەکانیش -
ملیۆنان ژن
وە دین و یاسا و نەریتان هەوسار دەکەن!
تا ئەمن.. وە هەزار و یەک رەنج و کۆشش
رێز لە بەرهەمی یەک کارگەر
دەگرم
ئەوان - تەنانەتە چەپە هەرە توندئاژۆیەکانیش -
سووکایەتیی وە بەرخۆدانی ملیۆنانیان
دەکەن
جامەکانین لە خوون و ئارەقەی ئەوان
پڕ دەکەن و نۆشیان دەکەن!
تا ئەمن.. وە هەزار و یەک کۆڕ و کۆبوونەوە
یەک هاوزێدم وەلێدەکەم
داخوازیی سەروەخۆیی نیشتیمان بکا
ئەوان - تەنانەت نەتەوەپەروەرانیش -
لە دژی
خاوەنەکەیان خۆهەڵدەدێرن و
دەبێژن ''نا ئێستاکە''!
ئەوان ''ولۆ''ن...
لێ هەر ئەزم؛ ژینگەی لەبار
بوونەوەری بێ خەوشوخاڵ
ئازادییەکان وەدەستدێنم
چون ئەز ''ولۆ''م ژیان دەژەنم!
ژیان دەژینم!
ژیان دەژیێنم!
زۆر شەکەت و فرە سەرقاڵ و جەنجاڵم؛
ئەز ژ بیر کر بۆ وە بێژم:
تکا دەکەم.. پاش خوندنەوەی ئەو دێرانە
دەری و پەنجەرەی
ئەسمانان خڕ دابخەن
تاکو ئەوان؛ زانا و
دانا و فەیلەسووفان
ئیدی نەکارن ستێرک و ئەسمانێن دن
ژاراویی کەن!!!
نێوەڕاستی شوباتی
٢٠٢٠
ماڵپه‌ڕی دارا
خونچە
|
