تا که‌نگێ نوێنه‌رمان له‌ به‌غدا لاواز بێ !؟

   عه‌باس نادر

شەوى پێش دەنگدان سێ برادەر و ناسیاو بە تەلەفۆن ئاگاداریان کردمەوە کە ئاوارەى قەزای مەخمووری نیشتەجێی هەولێر دەتوانن لە بنکەکانی دەنگدانی ناو شاری هەولێر دەنگبدەن و قایمقامی مەخمووریش راگەیاندنێکی هەر بەو ئاراستەیە دابوو، هەرچەندە لەدوای هەلبژاردنی سالی 1992 وەک زۆربەى خەلکی کوردستان هەولێرى گووتەنی( تێرمان لێیان خواردووە ) و گفتیشم بەخۆم داوە لەدەنگدانی ناوخۆی کوردستان بەشداری نەکەم هەتا یەکێتی و پارتی بەم عەقلیەتە مامەڵە بکەن بەلام هەندێ شت کەچارەنووسی ناوچەو گەلەکەم دیاری دەکات ناچارم بەشداری بکەم ، گەرچی سوڕ دەشزانم لەسەرێک بە قازانجی بەرژەوەندی هەردوو حزبەکە دەگەرێتەوە ، بەلام من و هەزارانی وەک من دەبێ پشکداربین هەرچەندە هەڵەکانی ئەم دووحزبەش هەر وەک خۆی دەڕوات ،من واش دەبینم پارتی و یەکێتی هەتا تێکشکان نەبینن میللەتیان لەبیر نیە. کە دەستەڵاتیشیان بە هێز دەبێتەوە پێشی هەمووشتێک جۆرەها گوشار دەخەنە سەر کەسە دڵسۆزو نیشتمانپەروەرەکان، کەبەیانی هات بریارم دا بچم نەک هەر خۆم بەڵکو کەسانی دەورو پشتیشم هان بدەم، واش مەزانن سوودمەندبوومە، نەخێر ! چەندە حکومەتی عێراقی ئازاری داوین و برینی لە جەستە کردووین ، ئەمانە لە جیاتی سارێژی بکەن ، دێن زیاتری دەیکولێننەوەو زۆرجاریش خوێی پێدادەکەن بۆ ئەوەى زیاتر تەشەنە بکاو بزوورێتەوە .

کاتێ بەیانییەکەی چووم و پرسیارم کرد گوتیان لە ئامادەیی رزگاری دەتوانی دەنگ بدەى ، کە گەیشتمە ناو ئامادەیی رزگاری تەماشام کرد بێ سەرو بەرییەکی زۆر هەیە و زووش تووشی شۆک بووم بەوەى هەر لەپێش دەرگاوە خەلکی دەڤەرەکەی خۆم بینی بە پرتەو بۆڵە دەرۆیشتن ، چونکە نەیانهێشت بوون دەنگ بدەن لە بەر ئەوەى کوردن و ماددەی 140 یان پڕکردۆتەوەو ، کابرایەکی جوامێرى بەتەمەنیشم دیت لەگەڵ کۆمەڵێک کەسی تر قسەى دەکرد دەیگوت ( کاکە وەڵڵا ئەمە بێ ساحێبین ، ئەگەر ساحێبمان هەبیت لۆ ئەوها رەزیل دەکرێین ........) ، کەچوومە ژوورەوەش قەرەباڵغیەکی بێ سەرو بەرم بینی خەڵکێک هەبوو لە رێز وەستابوو لە دەم و چاویشیان دیاربوو ماندوو بوون هەندێکیان جلی عەرەبیان لەبەربوو هەنێکیشیان بەکوردی موسڵ دەچوون ، خەڵکێکی تریش هەبوون بەر دەرگایان گرتبوو ژوورەوەش دە جمجما لە خەڵک ، ئەوەى لاشم سەیربوو هەبوونی عەرەبێکی تەواویش کەجلی خێڵەکیان لەبەربوو لە ریز وەستابوون باشە موسل ئەوەتە هەندە لە هەولێر دوورنیە؟! دوایی خۆی عەرەب کوردێکی زۆری لە موسڵ دەرکردووە خۆ کەس عەرەبی لە موسڵ دەرنەکردووە ، باشە ئەوانە چ دەکەن لێرە ؟ مەگەر هەر یەکێتی و پارتی بزانن !! ، ئنجا لە ژوورەوە دیاربوو کەسێک خۆی بە لێپرسراوی ژوورەکە دەزانی لە ناو قەرەبالغی ژوورەکە هەستاو چووە سەر رەحلەیەک بە دەنگێکی بڵند هاواری کرد ئەوەى خەلکی مەخموورە با برواتە دەرێ ناتوانی لێرە دەنگ بدات وە ئەوەى ماددەى 140 ی پڕکردۆتەوە با لێرە نەمینێ ، من بەحوکمى ئەوەى خەڵکی دیبەگەم خەلکێکی تەواوی قەراج و کەندێناوەو گوێڕم لەوێ دیت کە بە هەناسە ساردی لەو ناوە دەسورَانەوە بە ئومێدیش بوون لێیان بگەرێن دەنگ بدەن. بەڵام بێ سوودبوو لەدوایی هەولێری گۆتەنی (لەتەشکی خۆمان دا)و شوێنەکەمان بەجێهێشت و لەجیاتی ئەوە فۆرمێکی سکالامان پرَکردەوە .

بەقسەی نوسینگەى مەخمووری ماددەی 140 هەژدە هەزار خێزان فۆرمی 140 یان پڕکردۆتەوەو ئەگەر هەر خێزانێک لەسەر چوارکەس دابنێین کە مافی دەنگدانیان هەیە 18000×4 =72000 کەس لە دەنگدان بێ بەشکران و کاری کردە سەر رێژەى کورد لە موسل ، رۆژێک دادێ وەک دیکۆمینت عەرەبی عێراق بەچاومان دادەدەنەوە . ئەوە ش بزانین کەدیبەگە ناحیەکەو ئاوەدانی لێیە نوێنەرانی کورد نەیانتوانیوە بنکەیەکی دەنگدانی بۆ دابین بکەن ، خەلکەکەشیان لە دەنگکدان مەحروم کرد .

لێرە من ئەو گریان و بابەڕۆیەم بۆ حزبە کوردییەکان نیە ، بەڵکو بۆ کێشەى گەلەکەمە کە حکومەتی عێراق چ زولمێکمان لێ دەکات و نوێنەرانمان لە بەغدا چەند لاوازن ، فۆرمی خۆراکی ئاوارەى مەخموریان پێگواستینەوە سەر نەینەوا بەلام بە هەزار ئیهانەوە ، تۆ بڕوانە بەسەدان فۆرمی ئاوارەى دیبەگە کە لە هەولێر دادەنیشی بۆ حاجی علی و باقرتیان گواستتەوە کە ئەو شوێنانە جگە لە دووریان ، هێلی تەماسی تیرۆریستانیشن ، ئنجا دوایی ئاوارەیەکى هەش بەسەر کە لە زەمانی بەعس هەر زەرەر مەندبووە ئێستاش نەخانوو و گوندەکەى بۆ چاک دەکەنەوە ، لەجیاتی فۆرمەکەی بگەرێننەوە مەڵبەندی نزیک بەخۆی کەچی دوورە دەست فڕێی دەدەن ، مانگێ بۆ فەردە ئاردێک و هەندێک بەشە خۆراک رێگای هەولێر باقرت یان حاجی عه‌لی بگری و تەنانەت من کە خەڵکی دیبەگەم بۆ بچم لەمەخموور وەریبگرم .

بۆیە رووى دەمی قسەکانم بۆ ئەو کەسانەیە کە لە سەرمان کراون بە نوێنەر لە بەغدا کەتۆ 5 ساڵ زیاترە ناتوانی مەخوور بگەڕێنیتەوە سەر هەولێرکە تۆیەک ناتوانی گوندەکان و ناوچەکەمان ئاوەدان بکەیەوە کەتۆیەک ناتوانی قەرەبوو بۆ خەڵکە زەرەر مەندەکە دابین بکەی کە تۆیەک تاکو ئێستا نەتوانیوە مەخموور لە گوندەوە بکەیتەشارۆچکە لە رووی ئاوەدانیەوە ، کەتۆیەک ناتوانی فۆرمی بەشە خۆراک بۆ خەڵک بگەڕێنیتەوە ناو مەڵبەندی خۆی ، کە تۆیەک ناتوانی مافی دەنگدان بۆ نە یەک و نەدوو بگرە 70 هەزارکەس دابین بکەی تۆ چی دەکەی لە بەغدا ؟ بەس بێمان بڵێ تۆ چی دەکەى؟؟؟!!! تا که‌نگێ ئەو سەنسەناتەى بە ناوی نوێنەری کورد لە بەغدا لێدەدەى ؟؟!! ، تا که‌نگێ لە نیوەى کۆبوونەوەکانی بەغدا ئامادە نابی؟؟!! ، تا که‌نگێ لە هەولێر لێپێچینەوەتان لەگەڵ ناکرێ و تا که‌نگێ خەلکیش لێتان قەبووڵ دەکات ؟؟؟!!! و تا که‌نگێ و ..... سەدان تا که‌نگێی تر....؟؟؟!!!
 

abassh21@yahoo.com