٢٧\٢\٢٠٢٤

تاک و ئازادیی!

دارا خونچە       

توانست و شیانی تاک لە نێو سیستەمی چەوسێنەردا - کە لەمێژە گشت مرۆڤایەتی لە نێو سیستەمی چەوسێنەری سەرمایەداریی و پەیوەندییەکانیدا دەژی - هەرچەندەی مەزن و پڕ کاریگەر بی لە وەدەستهێنانی ئازادییەکانی.. لێ هێشتاکە ناتوانی وە پێی پێویستی خواستە مرۆییەکانی دەستەبەریان بکا و بێ هیچ چاودێر و لەمپەرەک لێیان بەهرەمەند بی و وە سەربەستیی خۆی دەرببڕی. ئەوەش لەبەرئەوەیە خودی چەوسانەوەکە رەهەندەکی جڤاکیی هەیە و تاکەکانی چینە چەوسێنەرەکانیش وە وەکاربردنی ئەو فەرهەنگە نەرێنییەی کە زادەی ئابووریی رامیاریی نەریتیی نێو کۆمەڵە جوولەی چەوسێنەرانەی خۆیان دەکەن. کەواتە کۆشانی تاک تەنێ ئەو دەمە بە پڕاوپڕیی جێی خۆی دەگری و هەتەری خۆی دەبی و سەرەنجامیش ئارمانج دەپێکی کە لە رێی خەباتی بەکۆمەڵ و هەرەوەزیی ''توانست و شیان''ی تۆکمەی جڤاکیی بەرجەستە دەکا.

بەداخەوە هێشتا زۆربەی هەرە زۆری تاکەکانی کۆمەڵ درکیان بەو راز و نهێنییانە نەکردیە کە ژیان و کەتوارە نەخوازرایەکەی پەنهانیان کردینە.. تەنانەت زۆر لەو کەسە یەکسانییخواز و ئازادییخوازانەی کە خەریکی کاری فەرهەنگییشن هێشتا بەو ئاستە نەگەیشتینە کە گۆڕان و وەرگۆڕانی ریشەیی و پێشکەوتن فرە پەیوەستە وە چەندیەتی و چۆنیەتی کاری بەکۆمەڵ و هەرەوەزیی.. واتە ئەگەر کەسانی دەستەبژێر هاودەنگ و هاوکاری خەڵک نەبن لە تێکۆشانی رۆژانە و هەر لە دەرێی کۆمەڵ بژین ئەوە بەرهەمەکانیان هەرگیز لە دووتوێی پەرتووک و ئامرازەکانی دیکەی تۆمارکردن پتر بڕ ناکەن و هەر لەوێشدا مرداردەبنەوە!

هەرچەندە سیستەمی ئێستای جیهان وە هۆی پتر رسکان و پێگەیشتنی لە دڕندەییترین قۆناغی خۆی دایە کە پێشتر نموونەی نەبووە.. بەوەش تا دێ جەور و ستەم هەر لە هەڵکشانە تەنانەت ئاژەڵان و ژینگەش لەبەردەستی بەدادەدادن.. لێ هەر لە ژێر کاریگەرییەکانی ئەو گۆڕانە و دەرکەتن و ئاشکراتربوونی سیستەمەکە خەڵک وە شێوەکی گشتیی و خۆبەخۆ هۆشیار بووینەوە لەوەی بە بێ چاککردنی سیستەم لە پێناو گەیشتن وە ئامانجە نێزیکەکان و تێکۆشان لە پێناو گۆڕینی سیستەمەکە وە شێوەکی ریشەیی هەرگیز ماف و ئازادییەکان دەستەبەر نابن، ئەو بارودۆخە وەیکردیە تاکەکانی نێو چین و توێژە کرێکارییەکان* وە دەستەبژێرەکانیشەوە هەستبکەن بەرژەوەندییەکانیان وە بەرژەوەندییە گشتییەکانەوە پابەندن و پێویستە لەنەوپاش وە کار و تێکۆشانی هەرەوەزیی و بەکۆمەڵ پەیوەست بن.. ئەوەش وەک سەرەتایەکی کۆتاییپێهینانی سیستەمەکە فرە دڵخۆشکەر و هومێدبەخشە.
_____________________________________________
* چین و توێژە کرێکارییەکان: گشت ئەو کەسانە دەگریتەوە کە وە هێزی هزر و بازوو وە گرێبەست و وە کرێ کاردەکەن و هیچ سەرمایەیەکیان نییە تا وەک چین و توێژە چەوسێنەر و دەسەڵاتدارەکان زێدەبایی یان پارەی مفتی پێ پەیدابکەن.

ماڵپه‌ڕی دارا خونچە