٥\٨\٢٠١٣

تاوانی جینۆسایدی کوردانی رۆژئاوا زۆر بە توندیی شەرمەزار دەکەین.

لە سەرەتای دەستپێکردنی شۆڕشی گەلانی سوریا لەدژی ڕژێمی بەعسی کە بەشار ئەسەد سەرۆکایەتی دەکا ، گەلی کورد لە ڕۆژئاوای کوردستان فاکتەرێکی گرنی دەستپێکردن و بەردەوامبوونی شۆڕشەکە بووە، دەیان ساڵ پێشتریش بۆ بەرەنگاربوونەوەی سیستەمی دیکتاتۆریەتی بەعسی کورد لەشۆڕش کردن بەردەوامبووە، لەو ڕێگایەش قوربانی زۆری داوە.

لەڕاپەڕینی ئەمجارەدا کەبە بەهاری عەرەبی ناونراوە ،کورد هۆشیارانە شۆڕش و سیاسەتدەکات ،بەتایبەتی کەسەربەخۆیی خۆی پاراستووە، ناوچەکانی کوردی ڕزگارکردووە و بەباشی ئیدارەیان دەکات ،بەشێوەیەک کەبۆتە جێگای سەرسوڕمانی دۆست و دوژمن، دوژمنانی گەلی کورد بۆ لەباربردنی شۆڕش و دەستکەوتەکانی پەنایان بۆ زۆر ڕێگا برد ،بەڵام سەرکەوتوو نەبوون ،چونکە شۆڕشەکە پشتئەستورە بەجەماوەری کورد ، بەڵام لە ناوەڕاستی مانگی تەمووزەوە واتە لە سێ هەفتەی ڕابردوودا دوژمن دوای ئەوەی لەشەڕەکانی سەڕکانیێ و بەرەکانی تری شەڕ لەڕۆژئاوای کوردستان شکستی هێنا ، ماوەی هەفتەیەکە بە پلان و پاڵپشتی تاقمی فەتحوڵا گوڵەن چەتەکانی سەر بە دەولەتی عیڕاق و بیلاد شام و بەرەی نوسرەی سەربە قاعیدە ، لە هەردوو شارۆجکەی تەلعەران و تەلحاسڵی سەر بە شاری حەلەب هێرش دەکەنەسەر خەڵکی سڤیلی ئەو ناوچانە بەپێی زانیارییەکان زیاتر لە ٥٠ کەسیان بەشێوەیەکی نامرۆڤانە کۆمەڵکوژ و شەهیدکردووە کە زۆربەیان ژن و منداڵن، هەروا زیاتر لە ٥٠٠ هاووڵاتی کوردیان ڕفاندووە ،لەهەمانکاتدا مەلایەک کە ناوی (ئەبو عەبدوڵا بەقاری)ە سەر بە بەرەی نوسرەیە ماوەی چەندین ڕۆژە فەتوای کوشتنی هاووڵاتیانی کورد و حەڵاڵکردنی ژنانی کورد و تاڵانکردنی ماڵی کوردان دەدا بەو هۆیەوە هەزاران کورد هەڵاتوون بەرەو بیابانەکان و بەرەو چارەنووسێکی نادیار.

ئێمە وەکو ڕێکخراوی نەهێشتنی ئەشکەنجە و لەسێدارەدان ، زۆر بەتوندی هەموو ئەو تاوانانە مەحکوم دەکەین ، بەپێێ یاساکانی نێودەوڵەتی ئەو تاوانانە تاوانی جەنگن لەهەمانکاتدا تاوانی جینۆسایدە دژ بەگەلی کورد، بۆیە داوادەکەین:

١- ئەنجوومەنی ئاسایشی نێودەوڵەتی بڕیاری پێویست لەسەر ئەو هەموو تاوانە بدا.
٢- دادگای لاهای هەموو ئەو تاوانانە بەدیکۆمێنت بکا و خودی فەتحوڵا گوڵەن و ئەنجامدەرانی دادگایی بکا.
٣- پارتەکانی ڕۆژئاوای کوردستان بەزووترین کات ناوماڵی کورد لەڕوژئاوای کوردستان ڕێکبخەن.
٤- مامۆستایانی ئایینی و لیژنەی فەتوا لەهەرێمی کوردستان ڕۆژێک تەرخانبکەن بۆ بەرپەرچدانەوەی فەتوا ناشەرعیەکەی چەتەکان.
٥- پێویستە هەر سێ سەرۆکایەتیەکەی هەرێمی کوردستان و ڕۆژنامەنووسان و ڕێکخراوە مەدەنیەکان و ڕۆشنبیران و شەقامی کوردی ئەو هەموو تاوانەیان لەبەرچاو بێت ، پاڵپشتی گەلەکەمان لە ڕۆژئاوای کوردستان بکەن.

رێکخراوی نەهێشتنی ئەشکەنجە و لە سێدارەدان

٣\٨\٢٠١٣

وێنەیەک بۆ:
- دادگای باڵای تاوانەکانی نێودەوڵەتی لاهای.
- نەتەوە یەکگرتووەکان.
- راگەیاندنەکان.