٢١\٥\٢٠١٢

تاوانى کۆمەڵکوژیى (رۆبۆسکى) شایەنى ئیدانەکردن بوو، نەک کوژرانى چەکدارانى داگیرکەر.

هیواڕەش         

ئایدیۆلۆژیاى ڕەگەزپەرستیى کەمالیزم و ئەو تاوانگەلەى لە پەنایدا پەیتاپەیتا دژ بە ڕۆڵەکانى گەلى کوردمان لە باکور ئەنجام دراوە و دەدرێ قێزەونترین لاپەڕەى ڕژێمە توتالیتارە یەکلەدوایەکەکانى تورکیایە ، نکوڵیکردن لە بوونى گەلى ژێردەست و خاکى داگیرکراو و زمانى دایک ، تەواوى ڕۆڵەکانى گەلى کوردیان ناچارى پەنادان بۆ چەک و بەڕەنگاربوونەوەى پەلامارى نەگریسى دوژمنە کۆنەپەرستە تورکى و فارسى و عەرەبییەکان کردووە و لەو ناوەشدا هەزاران لە ئێمە و دەیانهەزار لەوان بوونەتە قوربانیى سیاسەتى شۆڤینیزمانەى دوژمنە داگیرکارەکانمان .

شەڕى داسەپاوى داگیرکاران ناڕەوایە و شەڕى بەرگریى ئێمەش ڕەوایە ، چونکە ئەوان دەسدرێژیکار و مافزەوتکەرن و ئێمەش بەرگریکار و مافزەوتکراوین ، ئەوان لە ماڵى خۆیانەوە خۆیان کۆک و تەیار دەکەن و هێرشمان بۆ دەهێنن ، ئێمەش لە ماڵى خۆمان دانیشتووین و بەرگرى لە خۆمان دەکەین ، ئەوان سامانى وڵاتمان دەدزن و دەیدەنە چەک و کوشتارگەى ڕۆڵەکانمانى پێ بەرپا دەکەن ، ئێمەش بێبەش لە سەروەت و سامانى خۆمان جگە لەوەى برسیمان دەکەن کۆمەڵکوژمان دەکەن .

ئەمڕۆ سەرۆکایەتى هەرێمى کوردستان ، بە سەغڵەتى و پەرۆشییەوە جگە لە نیگەرانیى بۆ کوژرانى چەند بکوژێکى داگیرکەرى تورک لەسەر دەستى گەریلا شۆڕشگێڕەکانى پارتى کرێکارانى کوردستان ، لە هەمان کاتدا زۆر تورکانە ئیدانەى ئەو چالاکییە قارەمانانەیە دەکات و وەکو ئەوەى گەریلا چووبنە قوڵایى خاکى تورکیا و تەعەدایان کردبێ ! نەک کەمالیستەکان هاتبنە ناو خاکى کوردستان بە مەبەستى جێبەجێکردنى سیاسەتى قڕکارانەى ڕۆڵەکانى گەلەکەمان ، ئەم زمانە پڕدڵسۆزییە بۆ کەمالییەکان بۆ ؟ ئەگەر مەبەست دژایەتى شەڕ و کوشتن و کاولکارییە ! خۆ تاوانى ڕۆبۆسکى ئەسڵەن لەگەڵ چالاکییەکى ئاوهادا بەراوورد ناکرێ ، ئەدى بۆچى شەرمنانە هەڵوێستیان وەرگرت ؟ ! و لەگەڵ ئەوەشدا خۆ گەریلا نە شەڕى هەڵایساندووە و نە کەسى بێتاوانى کوشتووە و نە لە ختوخۆڕا دەستیان داوەتە چەک .

لەوانەیە پاساوى ئەوەیان هەبێ گوایە دۆخى نێودەوڵەتى و هەڕەشە و مەترسییەکانى سەر گەلەکەمان وا دەخوازێ زمانێکى (د ى پ ل ۆ م ا س ى) بەکاربێنن ، بۆ ئەمەش باشتر وابوو بێدەنگییان هەڵبژاردایە وەیا دەکرا بە هەمانشێوەى هەڵوێستى ڕابردوویان لە ئاستى تاوانى گەورەى ڕۆبۆسکى لە ژێرلێوەوە شتێکیان بووتایە .

دڵنیام ئەگەر تەواوى سەرۆک و سەرۆکایەتییەکانى هەرێمەکەمان نیگەران و ناخۆشحاڵ بن لە دڵڕەنجانى داگیرکاران بەناوى پاراستنى ئەزمونى باشورى کوردستان و ئیدانەى زەبرى شۆڕشگێڕانەى گەریلا بکەن ، ئەوا بە پێچەوانەوە تەواوى خەڵکى بەشمەینەت و خەباتگێڕ بە دڵ و بە گیان دەسخۆشیى لە هەڵمەتى گەریلا دەکەن ، هەر خەڵکى زەحمەتکێشیش بوو لە ڕاپرسیدا دەنگیان بۆ سەربەخۆیى کوردستان دا و سەرکردەکان لەباریان برد و ئێستاش هەر ئەو خەڵکە پشتیوانى خەباتى ڕەواى ڕۆڵەکانى باکورمانن و بەیاننامە و خۆشکردنى پەیوەندى ئابورى و بازرگانیى سەرکردەکان ، تۆزقاڵێک لە ئەرکى نیشتمانى و نەتەوەیى دووریان ناخاتەوە ، گەریلاش پارێزەر و وڵاتپارێزى خاکێکى سوتماک و گەلێکى ستەملێکراون و پشتیوانیکردنیان ئەرکێکى موقەددددەسە .

ماڵپه‌ڕی هیوا ره‌ش