په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٧\٢\٢٠١١

ته‌وه‌ری رووخانی‌ ده‌سه‌ڵاته‌ دیکتاتۆریی و بنه‌ماڵه‌ییه‌کان. - ٧ -

 

 

سه‌لام عه‌بدوڵا:

له‌ کوردستانیش ئه‌و دیاردانه‌ له‌به‌رچاون

ئه‌گه‌ر حکومه‌ت به‌خۆیدا نه‌چێته‌وه‌، ئه‌وا

خه‌ڵک ئیمڕۆ یان سبه‌ی له‌ ئاستیدا بێده‌نگ نابن.

 

سازدانی ته‌وه‌ر: ئه‌مڕۆ

 

رووداوه‌کانی ئه‌م دواییه‌ی تونس و میسر ئه‌وه‌نده‌ کاریگه‌ر بوون، که‌ هه‌موو خه‌ڵکی جیهانیان به‌ خۆیانه‌وه‌ خه‌ریک کردووه‌ و بوونه‌ته‌ بابه‌تی کۆبوونه‌وه‌ی سه‌رۆک و سیاسه‌تمه‌داره‌کانی ده‌وڵه‌ته‌کانی ئه‌مریکا و ئه‌وروپا و ناوچه‌که‌ و نواندنی هه‌ڵوێستی چاوه‌ڕواننه‌کراو. له‌ وڵاتانی رۆژه‌ڵاتی ناوه‌ڕاستیش خه‌ڵک به‌و جموجوڵانه‌ و ده‌سکه‌وته‌کانی تا ئێستای خۆشحاڵ بوونه‌ و هه‌ست به‌ وره‌ و ئومێدێکی پتر ده‌که‌ن بۆ به‌ده‌سهێنانی ژیانێکی باشتر و ئازادیی و ده‌سه‌ڵاتێکی زیاتر. دوا به‌دوای ئه‌و جموجوڵانه‌ هه‌رچی سه‌رۆک و پاشا و رابه‌ری شۆڕشی وڵاتانی ناوچه‌که‌یه‌ که‌وتوونه‌ته‌ خۆیان و پاره‌ و پوول و به‌ڵێنی سه‌وز و سوور ده‌به‌خشنه‌وه‌. هه‌روا که‌سایه‌تی و حیزب و لایه‌نی سیاسی ئۆپۆزسیۆنیش لێره‌ و له‌وێ تووره‌گه‌یان بۆ ده‌سکه‌وته‌کانی ئه‌و جموجوڵانه‌ ئاماده‌ کردووه‌.

ماڵپه‌ڕه‌که‌ی ئێمه‌ش - ئه‌مڕۆ - به‌ گرنگییه‌کی تایبه‌ته‌وه‌ ده‌ڕوانێته‌ ئه‌و جموجوڵانه‌ و له‌و باوه‌ڕه‌دایه‌ که زه‌مینه‌خۆشکردن و فه‌راهه‌مکردنی ده‌رفه‌تێک بۆ‌ لێکدانه‌وه‌یان و ئاشناکردنی خوێنه‌ران پێیان خۆی له‌ خۆیدا وه‌ڵامدانه‌وه‌یه‌که‌ به‌ به‌شێک له‌و ئه‌رکانه‌ی که‌ بۆ خۆی داناوه‌. بۆ ئه‌و مه‌به‌سته‌ به‌ پێویستمان زانی ئه‌م ته‌وه‌ره‌ ئاماده‌ بکه‌ین و ئه‌م پرسیارانه‌ی خواره‌وه‌ ئاراسته‌ی ئێوه‌ی به‌ڕێز بکه‌ین:

 

‌ئه‌مڕۆ: به‌ ڕای ئێوه‌ هۆکاره‌کانی ئه‌و خۆپیشاندان و ڕاپه‌ڕینانه‌ چین که‌ تا ئێستا له‌ وڵاته‌کانی ڕۆژه‌ڵاتی ناوه‌ڕاستدا بۆ رووخاندنی ده‌سه‌ڵات ڕوویان داوه‌؟

 

سه‌لام عه‌بدوڵا: قەیرانی دارایی بانقەکان(سەنتەری سەمایەداری دارایی) لە سیستێمی ئابووری جیهان روویداوەو لە پلەیەکی زۆر ئاڵۆز و ترسناکەو خودی بیرمەندو زاناکانیان ناتوانن چارەسەری بۆ بدۆزنەوە. رەنگدانەوەی ئەم قەیرانە خۆی لە ناڕەزایەتی لەسەر ئاستی جیهان بینیوەتەوە، بۆ نموونە(فەرەنسا، ئیسلەند، یونان)و، ئێستا لە تونس، مەغرب، مۆریتانیا، یەمەن، ئەردەن و سبەی لە وڵاتانی تر روودەدەن.


قەیرانەکە بووە بە هۆی(گرانی بازاڕ، گەندەڵی لە هەموو بارێکەوە، بێکاری، بەهێزکردنی کەرتی تایبەت و ناعەداڵەتی کۆمەڵایەتی). سەرمایەداری بەشێوەیەکی قیزەوەن وەک گەنە لەسەر جەستەی پڕوکاوی ملیونان ژێردەستە دەژێن. چەندین ساڵە ناکۆکییەکان نێوان خەڵک و دەسەڵاتدارەکان کەڵەکەیان کردووەو ئێستا گەیشتە پلەیەک ناتوانن لەتەنیشت یەکتر هەڵبکەن و گەیشتە ئەم تەقینەوەیەو درێژەیان دەبێت. 
  

 

‌ئه‌مڕۆ: لێکدانه‌وه‌ی ئێوه‌ بۆ ئه‌وه‌ چیه‌، که‌ له‌ شوێنێکی وه‌ک میسردا (که‌ ژماره‌ی دانیشتوانه‌که‌ی ٨٠ ملیۆنه‌ و ته‌نیا ژماره‌ی ئه‌ندامانی حیزبی ده‌سه‌ڵاتدار و حیزبه‌ هاوپه‌یمانه‌کانی له‌ چه‌ند ملیۆنێک پترن و ژماره‌ی ئه‌ندامانی ده‌زگاکانی پۆلیس و ئاسایش له‌ ملیۆنێک پترن) که‌چی خۆپیشاندان و راپه‌ڕینی چه‌ند سه‌د هه‌زار که‌سێک، بووه‌ته‌ مایه‌ی ئه‌و هه‌موو ترس و شپرزه‌ییه‌ له‌ ریزه‌کانی ده‌سه‌ڵاتدا؟

 

سه‌لام عه‌بدوڵا: دەسەڵاتداران بەخۆیان باشتر لە"یارییەکە"دەزانن! راستە ژمارەی بەشداربووانی ناڕەزایەتییەکان لەبەراوردکردن لەگەل ئەندامانی حزبە دەسەڵاتدارەکان کەمن، بەڵام هەڵویستی ئەو کەمایەتییە بووە بە دەربڕی هوشیاری کۆمەڵایەتی و تەواوی خەڵک و حزبەکان لە بەردەم هەڵویستوەرگرتن رادەگرن، واتە ریزبەندی خەڵک و هەر لایەنێک دەبێ قسەی خۆی بکات. لێرەشدا هەموو ئەوانەی لە وەهمی باشکردنی بارودۆخی ژیان بەشێوەی(هەر کەسێک خۆی ژیانی خۆی باش بکات...من هەقم چییە...خوا کەریمە...) لەو وڵاتانە رزگارکرد و بوون بە ئومید و توانیان ملیونان هەژاری تر بۆ ناڕەزایەتییەکان رابکێشن و دەسەڵاتدارەکانیان تۆقاند! 

 

‌ئه‌مڕۆ: به ‌پێی لێکدانه‌وه‌ی ئێوه‌، ئه‌و ئاڵوگۆڕانه‌ چی ده‌بن که‌ دوای ئه‌م راپه‌ڕینانه‌ به‌سه‌ر ئه‌م وڵاتانه‌دا دێن؟

 

سه‌لام عه‌بدوڵا: ئەمە پرسیارێَکی دڵتەزێنە! پێشوەخت دەڵێم جارێ گۆڕانکارییەکانی میسر و تونس بە ئاراستەی دنیای عەداڵەتی کۆمەڵایەتی ناڕوات. جەماوەری ژێردەستە چاوەڕوانی"پێشڕەو" ناکەن و بەخۆیان داوا دەکەن ناموبارەک بڕوات، بەڵام کێ جێگای دەگرێتەوە؟ بەهۆی لاوازی بەرەی چەپ و بەگشتی بزووتنەوەی شوعی، هەر هێزی ریفۆرمخواز و ئیسلامی لە گۆڕەپانەکەیەو دەتوانن نارەزایەتییەکە بەرەو هێشتنەوەی ئەقڵ و فکری چەوساندنەوە ببەن...لەباشترین حاڵەت هەر وەک ئەزموونی ئیرانیان لێدێت، بە مەرجێک چەپ لە ئێران پێگەیەکی بەهێزی هەبوو. ئاڵگۆڕەکە بە ئارەزووی ئێمە نایەتەوە، بەڵام بەگشتی بڕوا بۆ هەژارو لەگەلیاندا بزووتنەوەی چەپ دەگەڕێتەوە کە دەتوانن بەهێزترین دەسەڵات بە ملیونان سەرباز و جاش و موخابەرات و ئاسایش و دەزگاکانی چەواشەکاری راگەیاندنەکانیان، بگۆڕن. هەر ئەمە دەستکەوتێکی گرنگەو چەپ دەتوانێ خۆی بۆ ئایندە رێکبخات، چونکە هێزەکانی تر ناتوانن وەڵام بە پێداویستییەکانی چەوساوەکان بدەنەوە.

 

‌ئه‌مڕۆ: ئه‌گه‌ری روودانی ئه‌و جموجوڵانه‌ له‌ کوردستاندا تا چ راده‌یه‌که‌؟ له‌و رووه‌وه‌ چ لێکدانه‌وه‌یه‌کتان بۆ په‌رچه‌کرداری خه‌ڵکی کوردستان و هێزه‌ سیاسییه‌کان(ده‌سه‌ڵات و ئۆپۆزسیۆن) سه‌باره‌ت به‌و جموجوڵانه‌ هه‌یه‌؟

 

سه‌لام عه‌بدوڵا: کوردستان وەک بانق، حزب، کۆمپانیا و فەرمانبەرایەتی لەدەرەوەی سیستێمی جیهانی نییەو هەرچی لە سیستێمی ئابووری جیهان رووبدا، لە کوردستانیش بە هەزار شێوە رەنگدەداتەوە. گەمژەکان پێیانوایە کوردستان سەر بە ئەستێرەیەکی ترە یان بارودۆخمان جیاوازە! هەژاری و نەگبەتی و قەرزاری هەموو برایەتییەک تێکوپێکدەدات، وتارخوێندن و درووشمی نەتەوایەتی و هەڕەشەی"دوژمنان"یش کە واقیعن، نابن بە نان و کەرمەت و رووسووری بۆ ژێردەستەکان. تەلاری ناعەداڵەتی دز و جەردەیی گەندەڵکاران، گشت جۆرە برایەتییەک لەناودەبات.


نا! لە کوردستانیش ئەو دیاردانە لەبەرچاون و ئەگەر حکومەتی هەرێم بە سیاسەت و رێکخستنی ئابووری و پەیوەندییەکانی نەچێتەوە، ئەوا خەڵک ئیمڕۆ یان سبەی لەئاستیاندا بێدەنگ نابن و وڵامیان دەبێت. وڵامدانەوەی سیاسەتی لیبڕالیزمی نوێ حەتمییە و ئۆباڵی هەر خوێنڕشتن یان زیندانیکردن، لەئەستۆی حکومەتەو هیچ هەڕەشەیەک دادیان نادا. پێش ئەوەی بارودۆخەکە بەو ئاراستەیە بڕوات، باشە ئەگەر حکومەتی هەرێم ئەم هەنگاوانە بنێت:


1- خۆماڵیکردنی کەرتە تایبەتەکان(نەخۆشخانەی ئەهلی، زانکۆی ئەهلی، بەڵێندەرایەتییەکانی بیناسازی، بانقی ئەهلی، بازرگانی، و کۆمپانییە فرەرەگەزەکانی نەوت و گاز...هتد).
2- جیاوازی شێتانە لەنێوان موچەی بەرپرس و هاوڵاتی کەم بکرێتەوە وەک یەکەم هەنگاو بۆ سیستێمی دادوەری کۆمەڵایەتی!
3- دابینکردنی خانوبەرە بۆ هاوڵاتیان.
4- بوژاندنی کەرتى کشتوکاڵی.
5- لەناوبردنی بێکاری و بێکاری پۆشراو...هتد
6- بەرفراوانکردنی زەمینەی ئازادی بیروبۆچوون.
7- کۆتاییهێنان بە قۆناغی دوو ئیدارەیی.


پێشی چەند رۆژێک گۆڕان بەشێوەیەکی هەڵەشەیی بەیاننامەیەکیان بڵاوکردەوە و داوای هەڵوەشاندنی حکومەت و پەرلەمانیان کرد. لەبەر ئەوەی ئەو بەیاننامەیە کاتی نەبوو، هیچیشی لێ سەوز نەبوو(بەخۆم پێشی نزیکەی 2مانگ کەمپینێک بۆ دەستلەکارکێشانەوەی سەرۆکی هەرێم و حکومەت دامەزراند، بەڵام لەبەر ئەوەی کاتی نەبوو، بە بێبەر مایەوە!). ئێستا کەناڵی(ک.ن.ن)بۆ پۆشینی ئەو هەڵەیە، خەریکە پرسیار لە خەڵک دەکەن تا بیسەلمێنن کە خەڵک پشتیوانیان لێدەکەن! لەولاوە مەکتەبی سیاسی هەردوو حزبی دەسەڵاتدار بەیاننامەیەکی عەنتەریانە بڵاوکردەوە و چوار تەنەکە شڕی-دەبابەکان- سەردەمی بەعسیان هێنایە سەر شەقام: هەردوو لایەن یاری منداڵانەیان کرد بۆیە شایانی پێکەنینن، چونکە وەک کات، زمان و ناوەڕۆکی خیتاب و شێوەو کردارو پەرچەکردارەکان هستیریانە بوون. نە جەماوەر قەناعەتی بەو درووشمانە هەیە و نە خۆی ئامادەکردووە بۆ بەرگریکردن لە مافەکانی. ئەگەر بارودۆخەکە لە ئاستی ئەو درووشمانە بوایە، ئەوا حەتمەن خەڵک لەو چەند دەبابە سکرابانە نەدەترسان و شەقامەکانیان داگیر دەکردو هەمووشمان دەزانین کە هێزی حکومەتی هەرێم لە ئاستی هێزی بن عەلی یان ناموبارەک و حکومەتی فەرەنسا و یونان نییە. بزووتنەوەی گۆڕان بەو بەیاننامەیە سەلماندی کە زۆر هەرزەکارن و هێشتا زۆریان ماوە! من لەو بڕوایەم کە گۆڕان بەشێوەیەکی زۆر باش خزمەتی بە حکومەتی هەرێم کرد، وەک بڵێی هەر بەناوی"ئۆپۆزیتسیون"وە زامنی لێدانی بەرگری هەژارەکانە ئەگەر رۆژێک شەقامەکان داگیربکەن. (ک. ن.ن)لەگەل پیشاندانی بارودۆخی هەژارەکانی کوردستان، بەرنامەی زانستی عەدالەتی کۆمەڵایەتی روونناکەنەوە.

 

‌ئه‌مڕۆ: به‌ رای ئێوه‌ ده‌بێ خه‌ڵکی کوردستان چ وانه‌ و ئه‌زموونێک له‌و جموجوڵانه وه‌ربگرن؟‌

 

سه‌لام عه‌بدوڵا: خەڵک دەبێ بەباشی لە مانۆری حکومەت لەسەر شەقام، نووسینی بەیاننامە و گوتارە ساختەکانیان تێبگەن، هێزە جیهانییەکان چۆن بە دووڕوویی رەفتار دەکەن((ئەگەر ئۆباما یان وڵاتانی ئۆروپا راستدەکەن با بێکاری، گرانی، هەژاری و ناعەداڵەتی کۆمەڵایەتی لە وڵاتەکەی خۆیان چارەسەر بکەن!))؛ ئایا بەرادعی، ئیسلامی و سوپا و لیبڕاڵەکان دەتوانن کێشەی خەڵکی هەژار چارەسەر بکەن؟ خۆرسکانە چوونە سەر شەقام بە بێ رێکخستن و روونی درووشمی گونجاو، سەرئەنجامی چاوەڕوانکراوی نابێت.


بۆ تێگەیشتن لەم بارودۆخە، چەندە پرسیار بکەین هێشتا کەمەو چەندە لێی تێبگەین ئەوەندە باشتر دەتوانین سەرکەوتووانە هەنگاو بنێین، بە کورتییەکەی راپەڕین و شۆڕش زانستن و ئەگەر مەرجە بابەتی و خۆییەکانیان پێنەگەن، ئەوا جوانترین و بریقەدارترین درووشم، ژێردەستەکان ناجووڵێنێ. لەدواییدا ئێمە عەداڵەتی کۆمەڵایەتی و ئازادیمان دەوێت، ئەمەش ئومیدی مرۆڤایەتییەو پێویست ناکات بیشارینەوە یان شەرمی لێ بکەین و دەبا هەموو هێزمان بۆ ئەم داخوازییانە رێکبخەین!
    

٥\٢\٢٠١١

 ماڵپه‌ڕی سه‌‌لام عه‌بدوڵا