٢٥\٣\٢٠١٧

    تۆ بڵێی ئاسمان دایک بێ؟

کەژاڵ ئیبراهیم خدر

١
نەرم ،نەرم ،کلو ،کلو
لەسنگی بێگەردی ئاسمان
بەفر دادەبارێ
تۆ بڵێی ئاسمانیش دایک بێ
شیر لەمەمکی بێتە خوارێ.

 
٢
بەفر گریا
ووتی "من دەمەوێ
چوار وەرزی ساڵ ،سپی بنوێنم
تا بۆگشت بووکە جوانەکانی نیشتمان
رەنگی سپی بنەخشێنم.

٣
شەڕە بەفرم لەگەڵ مەکە
بەرگەی ئەو تۆپەڵە ناگرم
چونکە من ھێشتا مناڵم
بۆگەلێ شت گڕوو دەگرم.

 
٤
بەفر لەتۆ دەچێ
یان تۆ لەئەو
من نازانم لە شەوێکی بەفرانباردا
چۆن دەردەکەوی
وەک مانگەشەو.

٥
درەختەکان زۆر دڵخۆشن
کاتێ بەفر
تاڵی قژیان سپی دەکا
ئەی تۆ نەت ووت
قژت جوانە
وێنەی بەفر نیشان دەدا.

٦
بابە نۆئێل زۆر راست دەکا
بەرگی سوور، لەگەڵ بەفر جوانە
وێنەی روومەتت دەنوێنێ
کاتێ لای قژم میوانە.

٧
ئەزمڕ بەو بەرگی سپیەوە
چاوەڕێی پیاسەی تۆ دەکا
ئەونازانێ عەشق وایە
بۆھەمیشە لە ناو قژی سپی مندا
خۆی وون دەکا.

٨
زەیتونەکەی بەردەرگەمان
سپی بووە
رەنگە سەوزەکەی نەماوە
تۆخوا تۆش رەنگت بگۆڕە
حەزم لەو ڕەشە نەماوە.

٩
بەبەفر بڵێ
بابەسەرمنداببارێ
من دەمەوێ چاوەکانت
ھەر لەقژی من بنواڕێ.

١٠
لەناو پێستی سپی تۆدا
من ھەر وێنەی خۆم دەبینم
تۆ لەسروشتەوە سپی
یامن وەک بووکە بەفرینە
دەتنەخشێنم.

ماڵپه‌ڕی که‌‌ژاڵ ئیبراهیم خدر