|
|
|
٥\٣\٢٠١١ تۆ بڵێی سەرۆک بە راستى بێ؟!
ناسک عه‌زیز
وا دیارە دیکاتۆریەت و دیکتاتۆرەکان وەکو هەر نەخۆشییەک کۆمەڵێ خەسڵەتى هاوبەش کۆیان دەکاتەوە ، بۆیە کاتێک مرۆڤ دووچارى نەخۆشییەکى درێژخایەنى کوشندە ئەبێت و ئەبینێت هاوەڵەکانى بە هەمان پەلەقاژەى مەرگ بەرۆکى پێ گرتوون ! و ئاکامەکانى لا ڕوون ئەبێت بیر لە چارەسەر و خۆ پارێزى ئەکەنەوە بۆ دواخستنى مەرگى حەتمییان ، جا ئەگەر سەرۆکى هەرێم زیتەڵتر بێت لە هاوەلەکانى وکو موبارەک و بن علی و قەزافى ئەوە ئەتوانێت لانى کەم مێژووى بنەماڵەکەى زیاتر ناشیرنتر نەکات و وەکو هەر مرۆڤێکى ئاسایى لە باوەشى نیشتمان بمێنێتەوە و نەکەوێتە زبڵدانى مێژووەوە ، یان ئەمەش سیناریۆیەکى دیکەى بنەماڵەیە ! بۆ ئەوەى هاوشێوەى جومعەى شادى کە بەناوى خەڵکى هەولێرەوە بەڕێخرا ، ئەمجارەش لە ڕێگەى پیاوان و ڕۆبۆتە مشەخۆرەکانى دەسەڵات و حیزبەکەیەوە ، سیناریۆکەى کۆنگرەى پارتى دووبارە ئەکاتەوە و بە ئیلحاحى دەستوپێوەندەکانى و بە پارە و داهاتى خەڵک بەرامبەر بەو ( 50000 – پەنجا هەزار ) واژۆیەى لە بۆسەدان بۆى تا ماڵئاوایى پێ بکەن لە بەرامبەردا ( 100000 – سەد هەزار ) واژۆى سوودمەندى پارەخۆر و ( 100000 – سەد هەزار ) واژۆى ساختەش نەخاتە پاڵى و بۆ چاوبەستەکى ڕاى گشتیى و چەواشەکردنى ڕاى ناوخۆ ودەرەوە پاساو بۆ پاشگەزبوونەوەى نەهێنێتەوە ؟! ئه‌مانە هەمووى گریمانەن و لەوانەیە ڕاستگۆیى سەرۆک بخەنە ژێر پرسیارەوە.
با سەرنجێک بدەین و بە ناو دونیاى سەرۆک بارزانیدا گەشتێک بکەین و بزانینگریمانەکەمان لە جێى خۆیدایە یان مایەى نیگەرانى و ڕەخنەیە ، ئەگەر سەرۆک ئەوەندە گەورەیى بنوێنێت و قایل بێت وێنەکانى لە کوچە و کۆڵان و شەقام و بارەگا و فەرمانگەکاندا نەمێنێت ، یاخود دەزگا هەواڵگرییەکانى بکرێن بە دەزگاى پاراستنى ئاساییشى نیشتمانى و سەرۆک و سەرجەم هاوڵاتییان بە یەکسانى بپارێزێت ، یان ناوچە گەشتیارییەکانى سەرى ڕەش و سەڵاحەدین و پیرمام و ئاکرێ کە موڵکى گشتین و بۆ خاوەنەکانى بگەڕێندرێنەوە و بکرێن بە شوێنى پێشوازیى لە ئاهەنگى نەورۆز وگەشتیارانى کوردستان پێش مردنیان بەو شوێنانە شاد ببنەوە و بە ئازادانە و بێ سانسۆر گەشتى خۆیان لەوێدا بکەن ، کە بەمەش داهاتى بوارى گەشتیاریمان بۆ زیاد ئەبێت و بە داهاتەکانى و ئەتوانین زانکۆکانى گەرمیان و هەڵەبجە و ڕانیەى پێ پێشبخەین و لاوانى ئەم گەلەى تێدا بەرهەمدارتر بکەین تا بۆ ئاییندەى وڵات سوودى گەورەتر پێشکەش بە گەلەکەیان بکەن ، تۆ بڵێى سەرۆک بەوە قایل بێت لە فڕۆکەخانەى هەولێرەوە لە برى ئەو سەرۆکیکى تر پێشوازاى لە کەسە پایەدارەکانى دنیا بکات ! کاتى ئەوە هاتووە ماڵئاوایى بکەیت پَیش ئەوەى گەل ماڵئاواییت پێ بکات و بە حوسنى موبارەک ئاسا بکەویتە ژێر فشارى برسى و بێکار و بێنەواکان ، دڵنیا بەخەڵکى ئێمە زۆر لەوە گەورەترن تا سەر ڕازى بن کەجەنابتان بە مەرسومى سەرۆکایەتییەکەت میدالیاى ئازایەتى بکەیتە ملى پاڵەوانە گەندەڵکارەکانى ئەمڕۆ و بازرگانەکانى شەڕى ناوخۆى دوێنێ و خیانەتکارە ئەنفالچییەکانى پێرێ و بکوژى خۆپیشاندەرانى سبەینێ ، تۆ بڵێیت بە ڕاستت بێت و بەڵێنەکەت ببەیتە سەر تا ئێمەش چاوپۆشیى لە هەموو نەهامەتییەکانى ئێوە بکەین و لە کەرنەڤاڵێکى نیشتمانیدا میدالیاى ڕزلێنان بکەینە گەردنى تۆ و ویسامى بوێریى بە بەرۆکتدا هەڵواسین و لە ئەم خەونەمان بێتەدى ؟ ! یاخود خەونەکانى ئێمەش وەکو سۆرانى مامەحەمە و سەردەشت عوسمان ئەبنە ئاواتێکى وەدى نەهاتوو !
|
|
|
