|
٤\٧\٢٠١١
تۆ و باران لە
یەک ئەچن...
شوان عوسمان
که دائه‌به‌زیت
لەو ئاسمانە ته‌ڕم ئه‌که‌ی و
که ته‌ڕیش ئه‌بم ،
له‌و دانەبه‌زین و ناچۆڕانەوەی خۆمدا ،
لە خۆم ئه‌به‌زم و
له‌سه‌ره‌خۆ گلۆر ئه‌بمه‌وه بۆ لای تۆ...
ئەوسا خۆم نیم ،
ئه‌بمه ئاوێک و
به قه‌د و باڵات دائه‌چۆڕێم...
خۆم ناگرمەوە تا له گۆمی بن که‌وشەکانت قەتیس نەبم ،
لەوێ وێنەی مانگێک لە سەرسەرمەوە ئەبینم ،
بە شلەقانێک من نامێنم و
چیتر خۆشم نابینمەوە...
وەکو بلقێک بە خۆمدا ئەتەقم و
لە ناوتدا بزر ئه‌بم...
وەکو کلۆیەک شەکر لە ناو ئاوی رۆحتدا ،
تام ئەگرم و
ئه‌توێمه‌وه ...
تاوی به تاوی زیکری توانەوەم ،
لە بن رێژنەی ئه‌و تاوه‌بارانانه‌ت ،
تاوم ئه‌ده‌ن و
هەناسەم له قاف هەڵئه‌کێشن و
ئه‌مخه‌نه دەمی تێنوووی تنۆکێک و
له چاوه‌کانت خڕم ئه‌که‌نه‌‌‌وه...
تا خه‌مێک له دڵتدا دانه‌بارێنم ،
ده‌ست له ره‌حمه‌تی ئه‌و بارانه‌ت ،
هه‌ڵنا‌گرم..
بار ناکه‌م و به ئاسانیش دانابارم ،
من دەمێکە بە تەقەتەقی ئه‌و ئاشه ئاو لێبڕاوه ،
راهاتووم ،
هه‌رگیز چاوەڕێ مەبە ئەو ئاشە وا زوو به‌تال که‌م ،
تا به ئاوی حه‌یاتت ته‌ڕ نه‌بمه‌وه و
جەستەی بە برێشکەی پڕ شەهوەتم ،
بە وسلێکت تەڕ نەبێتەوە ،
هەرگیز چاوەڕێ مەبە چاوەڕێت نەکەم...
لە شەو بەراتێکی ،
شەولەبانی ئەو مەنفایە ،
بێسەروبەرەم ،
بەراتی هه‌یاران و مه‌یارانی تۆم ،
لێ باری...
چ بارینێک بوو ئەو بارانە...
کە تۆش هاتی وەکو ئاوی باران بە سەرم باری و
تێرتێر داباری...
خێرت هێنا و بەخێر هاتی ،
بەرەکەتی هەردوو دونیاشم بە سەر ،
داباری....
لە نێوان تاڵە مووە رەش و
تاڵە قاوەییەکانت...
حەزی قاوەیەکی تاڵ و
بۆنی فنجانێکی سوتاو ،
لە مێشکم ئەدا ...
وەکو زەرگەتەیەکی ناوەخت ،
لە لەزەتی خەیاڵێکتم ئەکات و
تارای شەوەزەنگم لەتوپەت ئەکات...
خۆر لە دەمکەلێکی پرچت ،
به پێدزه‌وه سه‌ر دەردێنێ...
به‌و شنە بەرەبەیانه‌وه مه‌ستم ئەکات ،
لێوەکانت...
که له بەرەبەیانێکی ناچاوانواڕیدا ،
پێکەنینێکت خۆری لەو ئاسمانەی خۆت ،
گزنگی لۆ من هێنا ،
به‌و خۆره‌تاوه‌‌وه بارانت ته‌شریف و
موژدەی ته‌ڕکردنی جەستە و
شوشتنی رۆحی منی داهێنا....
من هەر ئەوەندە ئەزانم ،
لەگەل یەک، وەکو دوو تنۆکی جۆتمانی تەریو ،
بووینە یەک دلۆپ...
بە پێچەوانەی هاوکێشەکانی جەبر و ریازیات...
کە یەک لەگەل یەک ئەبن بە دوو....
ئێمە دوومان کردەیەک...
لاولاوی تەمەنمان بە یەکەوە ئاڵان و
هەموو شتەکان به یه‌که‌وه لکان....
تەنانەت سێبەرەکانیش ،
هەر یەکە لەگه‌ل یەکتر قەرەقەرانێی رازیان ،
ئالوگۆڕ کرد و
جووت بوون و
کەوتنە دەستبازی یەکتر و
بە دوای تارمایی یەکتریش ،
عاشقانه لە ماچی هەموو لەتێکی بەژنی یەکتر ،
شەوگەڕانە ئەگەڕان....
تۆ بە خوێنی رۆح ودڵم ،
چرای شه‌وه‌زه‌نگت هەڵکرد...
بەو چراخانەش دڵت ئاوی نەخواردەوە ،
شەپۆڵت دا و
منیشت بە هەمان تاسە و
تەزوو ...
خستە بەردەم شەڕی دەریا و
تەوژممان لرفەی شه‌پۆڵه‌کانی ئەبەزاند و
یەکەیەکەیانی لەت ئەکرد...
لەو بەلەمەی گەمەی شەڕ و
مەلەوانی مانەوەمان..
ئەگەر هەناسەمان له سه‌ر یەک وه‌ته‌ری مۆسیقادا ،
سەمای نەکردایە ،
سەوڵیشمان بەیەک هه‌ناسه و
بە یەک ئاراستە ،
بە یەکتاو تاوی نەبردبایه....
بێگومان هەرگیز لەو سەفەرەمان ،
بە مەنزلێکی لەنگەر بوون ،
نەئەگەیشتین...
خەتای من نەبوو ،
لە ساتی هەلکوڵانماندا ،
پەیڤم لە ئاست ترپەترپی دڵ و
بڵقەبڵقی خوێنینم ،
گەرم و گوڕ نەبوو...
زاری پیاوەتی منێکی پیاو ،
کاول بێت کە ئه‌و ره‌شاوه‌ی به گه‌روومدا ،
شۆڕ کرده‌وه...
قەدەری تاڵه ژێیەکانی گەرووم بوو ،
بە حەیرانێک رانەهاتبوون ،
کە بێ پەروا و بێشەرم و
بە ئیرادەوە بلێت ،
خۆشم ئەوێی...
ئاخر ژن و باران ،
ئەو رەحمەتە ته‌ڕو سەوزەن ،
کە لە مەزاری پیاوچاکێکی به‌خته‌وه‌ر و
سەرکەسک ئەچن ،
لە سۆزی تەڕ و
رەحمەتی عیشقی تەڕتر ،
وشک نابن....
بۆیە دەخیلتم ...
ئەی باران...
ئەی ژن....
هاتوومەتە بەر قاپیتان ،
تا مرازم حاسل کەن و
بمبەخشن....
من کە ئێستا لە بەردەبازی ئەمڕۆکه نا ،
له‌وانه‌ی دوێنێکەمە ،
لە بەر تانۆکی ئەو باخەی ،
حەوا لە سەر سێوێک ،
پیاوی بە هەلەدا برد...
ساتمە ئەکەم و
هەلئەنگوێم...
خۆزگە ئەخوازم کات بوەستێت و
زەمەن بمگەڕێنێتەوە باوەشی ئەو ساتانەی ،
لە دەفتەری زاکیرەدا نەماون و
بەسەرچوون.....
تا دەرفەتێکی دیکە لۆ خۆم بقۆزمەوە ،
هەلێکم ببێت و
جارێکی دیکە سێوێک هەڵپروکێنم ،
تا دڵت راگرم....
زاری رێکەوتێکم ئەوێت جارێکی تر ،
تا ئەوەی هەمە لە کیسم نەچێت...
من بێئاگا بووم ،
بێئاگاییش هەر ئەوە نیە سەرخۆش بیت و
کاڵفام بیتەوە ،
من کاڵفام بووم له به‌رامبه‌ر مەستی ئه‌وینت ،
من هەر ئەوە بووم لە زمانی بێدەنگی ،
ژن و باران بێ خەبەر بووم...
ئێستا من و باران ،
ئەوەندە بە یەکەوە چووین ،
مووێکمان بە نێواندا پیاسە ،
ناکات...
تۆش بۆ من ئەو پارچە زەویە ،
تێنووە بووی ،
بە بارانێک لە ئەوین تەڕم ئەکردی....
لە نێوان تۆ و ئاسمانی منیش ،
بارانێک نەبوو ،
نامەی دڵنەواییمان لە نێوان بگۆڕێتەوە و
تەڕمانکاتەوە...
ئەی باران دە وەرە ،
تا زووە بە یەکترمان تەڕکەوە...
گوناهەکانمان داشۆرە و
بە سەر برۆی پەڵکەزێڕینەیەکی رەنگاورەنگ ،
لە سەرچاوی تنۆکێکی دڵتەڕت ،
چاوەکانمان بە یەکتر بگەیەنەوە...
خۆ من بە بێ چاوی ئەو بێچاوم...
من بە بێ بارانێک کە لە ئاسمانی ئەوەوە ،
ئەبارێت...
ناتوانم لە تۆ تێبگەم...
بە بێ تۆش نازانم ،
چۆن لە خۆم تێبگەم...
کە باران نەبوو ،
خۆشمان بە بێ باران ،
نابین و
وشک ئەبین و
زەرد ئەبین و
ئەمرین.....
با لەو بارانەوە دەرسی رەهێل و
رژانی ئەبەدی و
دابارین بۆ یەکتر فێر بین...
تا یەکتر فێرکەین لەبەردەم زریان و
تۆفانیش چۆک دانەدەین و
لە بارین نەکەوین....
با قژی ئەمڕۆکەمان بە بارانی یەکتر تەرکەین...
رابردوومان بروسکە باران کەین ،
تا هەورێک لە ئاسمانی سەر سەرمان ،
دابەزێ و
ئاسمان وزەویمان ،
پڕکات لە شێی شێتی و
شەیدایی بوون...
تەمومژی سەرخۆشی و
سەودا بوون بە تەراتێنیکی تەڕ بوون....
تێرتر تنۆکەکانمان تەڕمان کاتەوە و
دونیامان بەر شەپۆل ولرفەی ،
ئەو بارانە سەرشێتە کات...
کە هیچ چەترێک ناتوانێت ،
رێ لەو دابارین و
گریانی ئەو هەوری عیشقە بگرێت ،
جێ لەو تێک ئاڵانەی ماچ و
لستنەوەی خوناوێکی سەر لێو ،
بگرێت....
١٤\١\٢٠١١
- هۆلەندە - دێلفت
ماڵپه‌ڕی
شوان عوسمان
|
