٢٨\٨\٢٠١١

کورتە چیرۆک:

وێنە سیحراویەکەی وەرداش.

یاسین برایم   

لە نێوەراستی بازاڕی شار، ناونیشانەکەی بە ئاسانی دەدۆزریتەوە، دوکانێکی درێژ، پڕ لە کەل و پەلی کارەبایی. لە کۆتایی دوکانەکەش، کۆگایەکی بچووک و قەڵەباڵغ لە کارتۆن و کەل و پەلی یەدەگ ، هەروەها کۆمەڵێک کتێب و گۆڤار لە نێو کارتۆنەکان بەرچاودەکەون ، کە هی کۆمەڵەی هاوڕێیانی کتێبن. گەنجێکی جوان و دەسترەنگین ، راستر بڵێین پەنجە زێرین ، چونکە دەستەکانی کار ناکەن و تەنها پەنجەی گەورەی دەستی راستی دەجولێتەوە . زۆر جار لە نێو تاریکایی دوکانەکە ، چاوە جوانەکانی وەک هەلۆ دەبریسکێنەوە. هەموو تەمەنی لە سەر ئەم عارەبانەیە، ئەو بەناچاری هۆگری ئەو عارەبانەیە بووە، هەرگیز ناتوانێ دەستبەرداری بێت . رۆژانە کاتەکانی خۆی لە بەرامبەر کۆمپیوتەرێکی داگیرساو لە سەر ئەم عارەبانەیە بەسەر دەبات وپەنجە تاقانەکەی دەخاتە سەر ماوسەکەی و خەریکی کۆمپیوتەر و ئینتەرنێتە. کاتێ جەستەکەی دەبینیت ، تەنها سەرێکەو لە سەر عارەبانەیەک داندراوە ، سۆزو ویژدانت دەجوڵێنێ و بەزەیت پێدادێتەوە ، بەڵام کاتێ کار و پڕۆژە و بەهرەو داهێنان و کارە هونەریەکانی دەبینیت ، بۆت دەردەکەوێت ئەمە مرۆڤێکی چەند مەزنە ، ئەوسا ئیرەیی پێدەبەیت ولە بەرامبەر ئەو خۆت بە بچووک و کەمزان دێتە بەر چاو.تابلۆی سەر دوکانەکەو کەلوپەلەکانی نێو دوکانەکە پێتدەڵێن ئەمە دوکانێکی فرۆشتنی کەلوپەلی کارەبایە، بەڵام ئەو وێنە جوان و سەرنجڕاکێش و نایابانەی لە دوکانەکەی هەلواسراوون ، زیاتر لە گەلەرییەکی هونەری دەچێت . کەلوپەلە جۆراوجۆرەکانی دوکانەکەو وێنە جوانەکان هارمۆنیایەکیان دروستکردووە و چێژ لە بینینیان دەبینی . وێنەی پێشمەرگەو پارتیزانەکانی دەڤەرەکە ، کە وەک هەلۆ لە سەر تاشە بەردەکانن ، کۆنترین وێَنەی شار کە تەمەنی لە سەدەیەک زیاترە، وێنەی پیاوە قسەخۆشەکان و کەسایەتیە ناسراوەکان و وێنەی ئەو مرۆڤە خۆشەویستانەی ، کە خەڵک ناویان لێناون شێت ! کەچی ئەو بە فریشتەی شار ناویان دەبات ، لەم دوکانە بەرچاو دەکەون. کاتێ روو دەکەمە بازاڕ، دەبێ سەرێکی لەم دوکانە بدەم ، وەک بڵێی خووم پێوەگرتووە ، ئەگەر کورسیە سوورەکەم دەستنەکەوێت لە تەنیشتی دابنیشم ، ئەوا لە سەر تۆپە وایەرێکی سپی کە شێوەی بازنەی وەرگرتووە ، جێگای خۆم دەکەمەوە. ئەویش بە ماوسەکەی خەریکی جوانکردنی وێنەی خەڵکە ، هەندێک جاریش خەریکی کاری کۆڵاژە ، چونکە وەک جاران ناتوانێ وێنە بکێشێت ، ئیدی بە کۆمپیوتەرەکەی، بە هۆی رەنگ و هێڵ و بیرۆکە جوانەکانی خۆی ، کارێکی هونەری دێنێتە بەرهەم . ئەو زۆر هۆگری وێنەیە ، هەر لە بەر ئەمەشە کامێرایەکی لە پشتەوەی عارەبانەکەی داناوە ، بەڵام خۆی وێنە ناگرێت و هەر کاتێک دیمەنێک یان شتێکی سەرەنجراکێش ببینێت ، ئەو هاوڕێیەی لای ئەوە، ئەو بەختەی بەر دەکەوێت وێنەکەی بۆدەگرێت . بەم شێوەیە ، ئێستا خاوەن زۆرترین وێنەیە ، کە خاوەن دەستەکان ناتوانن شان لە شانی بدەن. وێنەی پیرەمێرەکان و پێشمەرگەکان و چالاکی هونەری و رۆشنبیری و وەرزیشی و مامۆستایان و شەهیدەکان و وێنەی شار بە کۆن و نوێ کۆدەکاتەوە ، ئیدی نەک هی شارەکەی ، بەڵکو هەر لە سەر ئەم عارەبانەیە دەستی بۆ گوندەکانی دەوروبەریش درێژکردووە ، ئەوانیشی لەلا دەست دەکەوێت. زۆر کەسیش کاتێ وێنەیەکی دەگمەن دەدۆزنەوە ، خۆی دەکاتە دوکانەکەی و مزگێنی دەستکەوتنی وێنەکەی پێدەڵێت ، کەچی ئەو بە زەردەخەنەوە ، رووی تێدەکات "لەمێژە ئەم وێنەیەم هەیە و مۆرم لێداوە! " ئەگەر وێنەکەشی نەبینیبێ ، وەک بڵێی زێری دۆزیبێتەوە ، بەزووترین کات دەیکاتە نێو کۆمپیوتەرەکەی . رۆژانە ئەگەر هیچ کەل و پەلێک نەفرۆشێت ، بە دەیان و سەدان وێنەی دێنە بەر دەست و ئەویش لە نێو کۆمپیوتەرەکەی هەڵدەگرێت و بۆ ئەویش کارێکی باشە. گەر وێنەیەکی جوانیش لە رۆژنامەو گۆڤار بڵاوکرابێتەوە ، تایبەت بە شارەکە بێت ، ئەرشیفی دەکات. ئێستا لە نێو کۆمپیوتەرەکەی ، بە سەدان فۆلدەر هەیە ، هەریەک تایبەتە بە بوارێک ، دیسان ئەوانیش چەندین لق و پۆپی لێدەبێتەوە . زۆر جاریش بۆ دۆزینەوەی وێنەیەک ، کاتێکی زۆری دەوێت ، تا پەیدای دەکات و هەندێک جاریش هەر خۆی لێ ون دەبێت و بە ئارەقەی شین و مۆر لە نێو فۆڵدەرەکان دێتە دەرەوە. ئێستا کۆمپیوتەرەکەی، وەک پایتەختی لێهاتووە جەنجاڵ و ئاڵۆز ، بە ئاسانی ناگاتە ئەو شتەی دەیەوێت . ئەو لەم شارە بویتە میری فۆتۆیان و شانازیش بە نازناوەکەی دەکات کە لە رێگای وێنەکان خزمەتی شار دەکات.کاری رۆژانەی هەر خەریکی چاککردن و جوانکردن و رێکخستنی وێنەکانە ، بویتە گۆگڵی ئەم شارەو ئەو کەسانەی لە دەرەوەش دێنەوە ، روو دەکەنە دوکانەکەی میری فۆتۆیان و بە دەست بەتاڵی ناگەرێنەوە ، ئەگەر وێنەی خۆشیان نەبێت ، چەند دانەیەکی هی بنەماڵەکەیان دەستدەکەوێت، کە لە ئەلبومی خۆیان دانیە و بگرە هەر بیریشان نیە کەی ئەم وێنەیان گرتووە. ئەو بە پەنجەیەک ، هەموو خەڵکی هۆگری هونەرەکەی خۆی کردووە . ئەمە بێجگە لەو پێشانگایانەی ساڵانە لە بۆنە نیشتمانی و نەتەوەیەکان دەکاتەوە. ئەو وەک مێروولەیەکی دڵسۆز ، بەیانیان لە ماڵ دێتە دەر و بۆدوکانەکەی دێت و لەوێش لە سیلەی دوکانەکە لە سەر ئەم عارەبانەیە ، کاردەکات و راناوەستێ . شەویش بە هەمان هەناسەو حەزەوە لە سەر ئینتەرنیت دەبێت و کارێک بۆ هاوڕێیەکانی خۆی دەکات ، یاخود وەڵامی پرسیارەکان دەداتەوە . ماوە بە ماوەش لە ئینتەرنیت، چەند وێنەیەکی دەگمەن، تایبەت بە شارو دەڤەرەکەی خۆی بڵاودەکاتەوە. ئەو لە سەر دروشمی لویس پاستۆری زانا (کار و کار و کار)ی کردۆتە پیشە و بەردەوام لە سەر ئەم دروشمە دەروات..

ئەو کاتانەی دەچمە لای ئەو ، وزەو توانا وبەهرەی زۆرم پێدەبەخشێت. ئاسوودە دەبم ، کە بچووکترین کاری بۆبکەم و یان ئەو کریاڕانەی شتێک دەکرن ، ئاسانکاریان بۆ بکەم و کەلوپەلەکانیان بۆ بخەمە نێو عەلاگە و پارەیان لێ وەربگرم و بەهێمنی بخەمە ژێر رانەکانی . ناوە ناوەش بەشەرمەوە ، بانگت دەکات " وەرە ئەو باسکەم بڵند بکە!" دەبێ چەند جارێک بە زانایی و هوشیاری باسکەکەی بۆ سەرەوە بڵند بکەیت ، نەبادا جێیەکی بشکێت، ئەو بەو کارەیی ئاسوودە دەبێت و وەک فۆرماتکردن بۆ ئەو وایە. ئیدی لە تەنیشت ئەو لە سەر کورسیە سوورەکە دادەنیشم. زۆر جاریش، ژەنەڕاڵی هونەر بە زەردەخەنەوە دێتە ژوورەوە ، بە هاتنی ئەو ، کەش و هەوای دوکانەکە زیاتر دەگۆرێت و هەست دەکەیت دوکانەکە دەبێتە گەلەرییەکی گەورەی پڕ هونەر ، باس و خواستی هونەر دێتە گۆرێ و گفتوگۆ گەرم دەبێت. جاری واش هەیە ، دەکەومە نێوەراستی هەردوو هونەرمەندەکە ، کە یەکێکیان گەنج و ئەویتریان پیر ، تا ئێستاش هەردووکیان زگورتین و هونەریان کردۆتە هاوسەری ژیانیان. کەس وەک ئەوان لە خۆشەویستی و گەورەیی و پاکی هونەر و ژیان تێناگەن. هەردووکیان بە خوێن وگیان ، ئاوێزانی هونەر بوینەو بۆ ساتێکیش ناتوانن بێ هونەر بژن . زۆر جاریش گوێمان لە قسەکانی ئەوان دەبێت ، کە شەویش خەون بە هونەرەوە دەبینن!

لە نێو ئەم هەموو وێنە جوانانەی ، دوکانەکەی رازاندۆتەوە ، وێنەیەکی سەرنجرکێشی (وەرداش)ە. هەرگیز لە تێڕوانینی ئەم وێنەیە تێرنابم . وێنەیەکی گەورە ، بە شێوەیەکی ستوونی ، ئەو لە نێویدا بە وەستانێکی جوان ، پێڵاوە ئەدیداسەکەی پێی چەپی خستۆتە سەرپڵاوەکەی پێی راستی.گۆپاڵێکی کەوەتی ئەستوور ، بەدەستی راستی گرتووە و سەرەکەی تری گۆپاڵەکەش ، بستێک سۆندەی پێوە هەڵکێشاوە.دەستی چەپیشی لە قەدە دارێکەوە گرتووە ، کە لە سەر شەقامەکە روواوە. کلێتێکی چڵکنی لە سەرە ، وەستانەکەی زۆر لە وەستانەکەی چارلی چاپلین دەچێت . دەمی لێککردۆتەوە وەک بیەوێت فیکەیەکی لێ بدات ، تەنها ریشەکەی بە سپی دەردەکەوێت ، جل و بەرگیشی لە پیسایی رەنگی قاوەیی گرتووە. ئەو لەو وێنەیە لە جیاتێ پشتێنێک چواری پشتێنی بەستووە ، هەریەکی لە رەنگێکە و زۆر درێژن ، ئەمەش بۆ زگی وەرداش ، بویتە تۆپە قوماشێکی گەورە . بە هۆی ئەم پشتێنەوە لە وێنەی بەگ و ئاغا و دەسترۆیشتووەکانی کۆنی شار نزیک دەبێتەوە ، کەجاران بەمەبەستی بەستنی دەمانچەو خەنجەر و فیشەکدان ، پشتێنەکانیان چەند مەترێک درێژ بوون ، تا نزیک ملیان لە خۆیان دەپێچا. منیش رۆژانە خووم داوە بەو وێنەیە ، دەزانم سەرگوشتەی پاڵەوانی ئەم وێنەیە چۆنە ! چۆن عەشق و راستگۆیی ئەو بۆلای شێتی بردووە! بە تەنیایی و بێکەسی لە شەقام و کوچەو کۆڵان و بازاڕی شار دەسورێتەوە، بەڵام ئەوەی چیرۆکەکەی دەزانێت ، سەردەمێک ئەو مەم بووە و ئێستاش زینەکەی ئەو لە گەڵ مەمێکی ترە. لەوانەیە لە لای ئەو زینە لە مێژە ئەم عیشقە مردبێت و ئەگەر جار و باریش چاوی پێبکەوێت بە شێتێکی گەورەی لە قەڵەم بدات ، کەچی وەرداش هەمیشە ئەو عیشقەی لە دڵدا دەژێت و رۆژ بە رۆژ گەورەتر و جوانتر و پاکتر دەبێت و لە نێو خەڵکیش وەک عاشقێک خۆشەویستر دەبێت. لە نێو چوارچێوەی ئەم وێنەیەدا ، مرۆڤێکی عاشق وەستاوە ، لە بەرامبەر خەم و ناخۆشیەکانی رۆژگار، بێکەسیش ریشی کردووە بە بەفر.ئەو خاوەن دڵێکە بێرق و قینە ، پڕ لە سۆزوبەزەیی و خۆشەویستی . منیش هەر بەو پاکیەی ئەو مرۆڤە هەیەتی ، لە پاکی وێنەکە ڕادەمینێم و ئۆشۆیانە دەروانمە مرۆڤ و فەلسەفەی ژیانی تیدا شیدەکەمەوە. وێنەکە، گەورەیی و خۆشەویستی مرۆڤم پێدەبەخشێت و ئاسوودەم دەکات.زنجیرەیەک تێڕامانی قۆڵ بە هزرو خەیاڵم دێت و ئاڵۆزم دەکات. ئیدی هەر ئەوە دەزانم پاڵەوانی نێو وێنەکە دەنگی دێت ، بەڵام لە نێو چوارچێوەی وێنەکە نا ، بگرە وێنەکەش هەروەک خۆیەتی ، بەڵکو بەزیندووی دەبینم لە دوکانەکە بە ژووردەکەوێت و بە زەردەخەنەیەکی مۆنالیزیانە، سەیری هەمووان دەکات و دوای بە بێدەنگی دەچێتە دەرەوە. جیاوازی لە گەڵ وێنەکە ئەوەیە ، لەوێ وەستاوە و لێرەش مرۆڤێکە سندوقێکی رەشی لە سەر خۆی ناوە . رۆژانە حەز بەوە دەکات کۆنە تەپەدۆر و کارتۆن و سندوق و تۆپی دڕاو و شتی لە کار کەوتوو بکاتە کڵاوەکەی خۆی .ئەمەش دیمەنێکی پێکەنینناوی پێدەبەخشێت و هەر بەم شێوەیەش ،بە نێو بازاڕ دێت و دەچێت. بەزۆری لە نزیک کۆنە گەرماوە و هەندێک جاریش بۆ لای (بەرباخچان) و (شیمردێر) و گۆرستانی شار، پیاسە دەکات. ئەو کاتەی لە نێو بازاڕیشە ، هەرچی کارتۆن و کاغەزی پێش دوکانەکان هەیە هەڵدەگرێتەوە و دەخاتە نێو ئەو سەبەتانە ، کە شارەوانی لە رۆخی شەقامەکان دایناوون.کاتێ مرۆڤە ئاقڵەکانیش ، ئەوانەی خاوەنی بڕوانامەشن ، شتێک فرێ دەدەن ، ئەو هەڵیدەگرێتەوە. زۆر جار تا درەنگانی شەو خەریکی کۆکردنەوەی ئەو کەل و پەلانەیە و دەخاتە نێو سەبەتەکانی زبڵ . بەیانییانیش بەدەم گۆرانی (ئامین تاقانەو مریەم بۆکانی) حەسەن زیرەک دێتە دەر و هێدی هێدی کۆپلە گۆرانیەکانی ئەم هونەرمەندە دەڵێتەوە و دەنگەکەی خۆی زیادو کەم دەکات وجاران چۆن گوێی لەو گۆرانیە بووە بەهەمان شێوە دەیڵێتەوە ، جاری واش هەیە هەر منگەمنگی لێوە دێت و کەس نازانێ باسی چی دەکات. دواتر لە بەردەم چایخانەکەی نێو بازاڕ دەوەستێت و هەندێک جاریش وەک وتاربێژ ، وتار دەدات و قسەی سەیرو سەمەرە دەکات لە ماوەی چەند خولەکێک ، کۆمەڵێک خەڵکی لە دەوری خۆی کۆدەکاتەوە، کە ئەمە دەبینی وادەزانی کەل و پەڵێک ، هەراج کراوە ، کە نزیکی دەبیتەوە بە دەنگەکەی و ئەو کەل و پەلە سەیرانەی لە سەر سەری خۆی داناوە ، دەزانی بەزمەکەی وەرداشە. هەندێک جاریش، دەبێتە ژینگە پارێزێک هەر مەپرسە ، بە دوبەیەکی ئاو ، نەمام و دارەکانی رۆخ شەقام ، ئاو دەدات و چەندجارێک ئەمە دوبارەدەکاتەوە . ئەو بە سەرماو گەرما لە دەرەوەیە ، دڵسۆزانەو خۆبەخشانە خەریکی پاککردنەوەی شارە ، وەک کرێکارە دڵسۆزەکانی شارەوانی کاردەکات . بۆ مرۆڤ و عەشق و جوانی و خاوێنی مرۆڤەکانی تر دەژێت. ئەو دەبێتە مرۆڤێکی ژیاندۆست و مرۆڤدۆست ، خۆشەویست لە نێو خەڵک . لە لای منداڵ و کچ و کورەکانی شار ناسراوەو بویتە سومبولی مرۆڤە پاکەکانی شار.

ئەوەی لەم دوکانە ئەم وێنەیە دەبینێت، قسەی خۆی بۆ وێنەکە هەیە و راڤەیەکی نوێ دەدۆزێتەوە . میری فۆتۆیانیش ، کە دەبینێت لە وێنەکە ڕاماون .ئەویش چەندین مانای جیاوازو نوێ لەسەر وێنەکە دەردەبرێت و ئیستاتیکای ئەم وێنەیە دەخاتە روو. زۆر جاریش بە زەردەخەنەوە باسی وەرداش دەکات و کاتێ خۆی دێت و سەیری وێنەکەی خۆی دەکات.لە بەردەم وێنەکە پێدەکەنێت ، کەسیش نازانێ پێکەنینی ئەو بۆ وێنەکە چیە! کە دەزانێ وێنەیەکی شازی ئەوە.هەندێ جاریش ، گۆپاڵەکەی بە ئاڕاستەی وێنەکە درێژ دەکات و دەڵێت"ماڵی قەحپە ! دەتناسم ، دەتناسم ، هجوومۆۆۆۆۆۆک !". بە بێ ئەوی خۆی گیرۆ بکات و دەچێتە دەر.لەوانەیە ناوی هجووم بۆ وەرداش زۆر خۆشەویست و گەورە بێت ، بگرەخۆشەویسترین هاوڕێی ئەو بێت .سەیریش لەوەدایە ، لە هەمووکەس زیاتر جنێو بە ئەو دەدات، چونکە ئەو وەک گەنجێکی دڵسۆز و خەمخۆر، هەموو مانگێک ،لە گەڵ چەند هاوڕێیەکی خۆی وەرداش دەباتە گەرماو .لەوێ دەستەکانی کەلەمچە دەکەن و سەری دەشۆن و ریشی دەتاشن و جووتە پێڵاوێکی باش و دەستە جلێکی کوردی نوێی لە بەر دەکەن و گوڵاو پرژێنی دەکەن. هەر کاتێ وەرداش بە جل و بەرگی نوێوە لە بازاڕ دەرکەوت ، گۆرانی گوت ، خەڵکی شار دەستخۆشی لە هجووم دەکەن و دوعای خێری بۆدەکەن.چەندین ساڵە ، نەک هەر وەرداش ، خزمەتی هەموو شێتەکانی شار دەکات و دەیانشوات ، کەنەخۆشیش دەبن دەیانباتە نەخۆشخانە . ئەگەر لە بەر ئەو نەبێت لەوانەیە لەمێژ بوو وەرداش لە ژیاندا نەمابوایە. کاتێ ناوی وەرداش دێتە گۆری ، ئیدی وەک خەمخۆرێک و کارگوزارێکی شار باس دەکرێت ، ئەو نازناوەی پێبراوە لادەچێت و دەبێتە مرۆڤێکی ئاقڵمەند، کە خزمەتی شار دەکات . زۆر جاریش ، ژەنەڕاڵی هونەر ، کە زیاتر لە نیو سەدەیە ، تێکەڵ بە دونیای هونەر بووەوجێ پەنجەی گەورەی لە هونەری ئەم شارە دا هەیە .دێتە سەر باسی وەرداش ، بەتایبەتی لەو کاتەی کە گوێی لە وشەی خەمخۆری شارەوانی دەبێت . باسەکەی وەرداش بە دەرفەت دەزانێ و تێکەڵ بە باسێکی هونەری گەورەت دەکات و دەگەرێتەوە رابردووە. بە شێوەیەکی جوان و زیرەکانە ، شارەوانی و هونەرتێکەڵ دەکات و تابلۆیەک لە مێشکت چەسپ دەکات ودیمەنی شانۆیەکی سەر شەقامت نیشان دەدات و مۆسیقاژەنێکی بڵیمەتی شارت پێدەناسێنێت . لە نێو ئەو بە سەر هاتەو گێڕانەوەی ژەنەڕاڵی هونەر ، ئەوەندە هونەرت لا شیرین و گەورە دەبێت ، تا لە نێویدا عاشقی دەبیت . خۆت دەبیت بە یەک پارچە لە هونەر.بەم شێوەیە کامیرایەکت دەداتە دەست و وەک خۆت وێنەکە بکێشیت وایە. ئەوها باسی خەمخۆرەکەت بۆ دەکات"لەمێژە ، لەم شارە، حاجیلە هەبوو ، دەروێشێکی گەورەی سافی هیرانی بوو ، دەستی شیعریشی هەبوو ، زۆر لە خەمی پاک و خاوێنی شار دابوو ، نەیدەهێشت شار پیس بێت و چاودێری بە سەر دوکاندارو فرۆشیارەکان دەکرد.کاتێ دەهاتە شار ، خەڵک نەدەوێرا لە بەرامبەری کەمترین هەڵە بکات" ئەو بەم چەند وشەیە لێت ناگەرێت و دەبێت تۆش گوێی بۆ شل بکەیت ، چونکە ئەو ژیان بە مۆسیقا دەزانێت و ئەگەر مۆسیقا نەبێت ژیان لای ئەو مانای نامینێت .بۆیە بۆ لای مۆسیقات دەبات و بەم شێوەیە درێژە بە حاجیلە دەدات" زۆر جار حاجیلە لە نێو بازار ، یان لە بەردەم مزگەوتی تەکیە ، دەفی لێدەدا، دواتر دەفەکەی چەندی مەترێک بڵند دەکرد بۆ ئاسمان و لەسەر پەنجەی خۆیی دەسوراند و خۆی نزم دەکردەوە بۆ سەر زەوی و دواتر هەڵدەستایەوە ، تا هێزی هەبوو رەمبەی لە دەفەکەی دەهێنا و دەفێکی ئەوەندە خۆش ، هەموو بازاری دێنایە جۆش و خرۆش . لە ماوەیەکی کورت بە ئەستەم حاجیلە لە نێو خەڵک دیار دەبوو دەکەوتە نێو بازنەیەکی گەمارۆدراو لە خەڵک . چەند جارێک ئەم نمایشە سەیرەی دەکرد و دەروێشانە سەری بادەدا ، لە ناکاویش بە دەنگێکی گەورۆنە هاواری دەکرد : محەمەد سەڵەوااااااااات!" . دواتر پەنجە بۆ وێنەکەی وەرداش درێژ دەکات و تێر بە چاوەکانی لێ دەروانێ ، ئەو چاوانەی بە هەزارن وێنەو تابلۆی جۆراوجۆری بینووە ، ئێستاش بەرەو لاواز دەچێت و ئەگەر لە بەر چاویلکەکەی نەبێت ، نەک هەر وێنەکە بگرە رستەیەکی نوسراویش ناتوانێ بخوێنێتەوە. سیفەتێکی جوانی ئەم وێنەیەی وەرداش دەخاتە روو ، گەوهەرێک لە نێویدا دەدۆزێتەوە نەک لە نێو جل و بەرگە چڵکنەکەی، بەڵکو دیوی ناوەوەی وەرداش ، کەخاوەنی دڵێکە لە چەشنی تاڤگە ، سپی و جوان ، دڵێک کە خۆشەویستی زۆری بۆخەڵک بەرهەم هێناوە.ئەو دڵەی رق و کینەی تیدانیەو خزمەت بە مرۆڤەکان دەکات . ئەوانەی لە نێو خەڵکدا دەژن و لە نێو خەڵکدا بۆ هەتا هەتایە دەمینێنەوە، ئەوانەن . مرۆڤە مەزنەکانیش ، بەو سەربەرزییە دەژن لە پێناو مرۆڤەکان ، نەک بۆ خۆیان ، ئەمەش راستییەکە بە ئاشکرا هەستی پێدەکرێت .ئەمەش لە لای ژەنەڕاڵی هونەر دروشمێکەو چەندین ساڵە هەڵیگرتووەو فەلسەفەی ژیانی خۆی لە سەر بنیات ناوە.هەمیشە چێژ لە خزمەتکردنی خەڵک دەبینێت و ئێستاش بەو تەمەنە رێگا بۆ منداڵەکانی شار رووناک دەکات و فێری وانەی هونەریان دەکات ، تا ژیانیان لە لاجوانتر و خۆشەویستر بێت.

ئێستا لە دوکانەکەی میری فۆتۆیان ، بینەرەکانی وێنەی وەرداش لەزیادبووندایە ، هەرکەسەکیش ، بۆیەکەم جار وێنەکە دەبینێ ، خۆی لێ نزیک دەکاتەوە و هەڵسەنگاندنێکی خۆی بۆدەکات.ئیدی وێنەکە رۆژ بە رۆژ مانای زیاتر و قۆڵتر بەرهەم دەهێنێ وجوانی زیاتر دەبەخشێت. وەرداشیش ، لە نێو وێنەکە سەر بەرزانە بەرامبەر ژیان وەستاوە. لە دەرەوەی وێنەکەش هێدی هێدی گەورە دەبێت و ململانێ لە گەڵ پیری و مردن دەکات ، تا ئەو رۆژەی چاوە جوانەکانی لێک دەنێت ، لە لای خەڵک خۆشەویستە. لە دوای مردنیش، وێنەکە و هەڵوێستە جوان و قسەخۆشەکانی وەرداش ، بۆ هەتا هەتایە لەنێو دڵی خەڵکی شار زیندوو دەبێت و لە لاپەڕەکانی مێژووش، ناوی بە جوانترین شێوە تۆمار دەکرێت.
 

ماڵپه‌ڕی یاسین برایم