٣١\١٢\٢٠١٦

وە (روجاوا) سوپاسگوزار بووین.. کەچی ئەویشیان نەهێشت!*

دارا خونچە      

کوردانی رۆژاوا وە هۆی چەوسانەوەی زمانیی و هەژموونی زمانی عارەبی لەسەر زمانی کوردی وە (رۆژاوا) دەبێژن (روجاوا) تەنانەت هێندەک خەڵکی ئەمەریکا و ئەوروپاشیان فێرکرد ببێژن (روجاوا)، لێ ئێمە هەر سوپاسگوزار بووین چونکە هیچ نەبی هەر واتای بەشی رۆژاوای نیشتمانە داگیرکرایەکەمانی دەگەیاند، کەچی لەپڕ لە پێناو سەرنجڕاکێشانی دوژمنان و ئەو دیموکراسییە پەڕپووتەی کە هەرگیز لەو زووانە لە نێو عارەبان جێی خۆی ناکاتەوە.. ئەویشیان نەهێشت!

گۆڕینی ناوی (رۆژاوا) وە (فیدرال دیموکراتیکی باکووری سوریا) وەک ئەوە دێتە بەر چاوان کە کەسەکی پێگە لاوازی نێو خێزانەکی پەرشوبڵاو و پڕ ئاژاوە هەر رۆژە وە جۆرەک قسە بکا و بڕیار بدا؛ رۆژەک ببێژی پێویستە ئاریشەکانی خێزانەکەمان چارەسەر بکەین و هەموومان پێکەوە خێزانەکی یەکگرتیی و یەکسان دروست بکەین.. کەچی ئەوانی دیکە مێش مێوانیان نەبی، رۆژەکی دیکە ببێژی گرفتەکانی خێزانەکەمان چارەسەریان نییە و دەی بەشەکەی خۆم بدەنێ و ئەمن جودا دەبمەوە.. کەچی هیچ کەسەک قسەکەی وە گرنگ وەرنەگری، رۆژەکی دیکەش ببێژی باشترین رێ ئەوەیە ماڵەکەمان بکەینە چەند بەشەک و پاشان هەموومان خێزانەکی هاوبەشی لێ چێبکەین.. کەچی دیسان هەر جێی سەرنجی کەس نەبی و... تد!

ئەگەر پەکەکە دەوڵەتەکی سەروەخۆ و پڕ لە ئازادیی و یەکسانییش لە کوردستانی رۆژاوا دابمەزرێنی ئەوە پارتی هەر دژایەتیی دەکا! ((پارتی وە دەیان جار رایگەیاندیە کە پەکەکە لە پێناو لەباربردنی دۆزی کوردان چێبووە!))، کەواتە با واز لە را و ویست و بڕیارە ملهوڕییەکانی پارتی بهینین. ئەدی پەکەکە، هەڵبەتە ئەگەر پارتیش دەوڵەتەکی سەروەخۆ لە باشوور دابمەزرێنی و تەنانەت ئەگەر سەرسەختانەش دوژمنایەتیی دەسەڵاتی تورکیا بکا ئەوە پەکەکە هەر دانی پێدا نانێ! ئەو دوو هەڵوێستەی پارتی و پەکەکە لە ئەنجامی ئەو ململانێیە ناڕەوایە حیزبییەیان پەیدابووە کە هەر لایەو دەیەوێ بەرانبەرەکەی دابڕووخێ تا خۆی هێزی یەکەم بی لە کوردستان. زۆر وە داخەوە کە چارەنووسی گەل و نیشتیمانەکی بندەست بەو دەردە دەبردرێ!

ئەگەر گریمان پەکەکە - هەرچەندە هەرگیز ئەوەی لێناوەشێتەوە - سەرجەمی کوردانی رۆژاواش لە کوردبوون دابشۆری و بیانکاتە خزمەتکاری هێز و لایەنە سیاسییە عارەبییەکانی سوریا و تەنانەت گەلی عارەبی سوریاش.. ئەوە هێشتا ئەو هێز و لایەنانە تەنانەت گەلی عارەبی سوریاش هیچ گۆڕانەکیان وەسەردا نایێ و هەرگیز ناتوانن دان وە سادەترین ماف و ئازادییە نەتەوەیی و نیشتیمانییەکانی رۆژاوا دابنێن، ((رژێمی سوریا کە فاشیست و رەگەزپەرستە هەردەم دەبێژی زۆر وە توندیی بەرانگژی هەر هێز و لایەنەک دەبینەوە داوای فیدرالیی بکا و (سوریای عارەبی!) پارچە پارچە بکا، بەرهەڵستکارە عارەبییەکانی سوریاش ئەوە هەموویان ئیسلامیی و رەگەزپەرستن و سەت خۆزگە وە کفن دز، هیچ رۆژەکیش نەماندیت پێشکەوتنخواز و سێکۆلاریستەکانی عارەبی سوریا کە زۆر کەمن یان هەر وە نەبوو دەخووندرێنەوە ببێژن ئێمە بڕوامان وە مافی گەلان و دیموکراسی هەیە.. دەی فەرموون کوردان لە نێو خۆتان گشتپرسییەک بکەن و ئەنگۆش پێویستە وە مافەکانی خۆتان بگەن جا چ دەتانەوێ پێکەوە بژین چ جودا دەبنەوە،)).

هەڵبەتە ئەمەریکا و وڵاتانی وە ناو دیموکراتی و پێشکەوتنخوازیش هەرگیز وە هۆی گۆڕینی (رۆژاوا) وە (فیدارال دیموکراتیکی باکووری سوریا) پەکەکە لەو لیستە نێوەرۆک پووچ و ستەمگەرییەیان وە ناوی ''لیستی تیرۆر'' دەرناکەن، ((دەسەڵاتدارانی ئەمەریکا و وڵاتانی ئەوروپا وە رووسیاشەوە وە دەیان جار گۆتیتیان پارچەکردنی ئێراق یان سوریا لە لایەن کوردان کێشە و ئاژاوە لە ناوچەکە دروست دەکا و ئێمە لەگەڵ سەروریی و یەکپارچەیی هەردوو وڵاتین، وە کورتییەکەی دەبێژن دەبی کوردەکان واز لە مافە نەتەوەیی و نیشتیمانییەکانی خۆیان بهینن چونکە سیاسەت و بەرژەوەندییەکانی ئەوان ئەوە ناخوازی و بازاڕی ساغکردنەوەی کاڵایەکانیان تێکدەچی!)).

فیدرالیی یان کۆنفیدرالیی دەگەڵ لایەن و هێزگەلەک دەکرێ کە دان وە ماف و ئازادییەکانت دابنێ وەک ئەوەی خۆی هەیەتی.. نەک ئەوەی کە بەرانبەرەکەت وە دوژمنت بزانی و دەرفەتت پێ نەدا تەنانەت سادەترین مافی خۆت کە گشتپرسییە لەسەر چارەنووسی میللەتەکەی خۆت ئەنجام بدەی!

کەسیش نییە ئەوە نەزانی کە بێ ناۆەرۆکترین دەستەواژەی سیاسی تا ئێستا - نەک هەر لە لە نێو گەلان و وڵاتە داگیرکەرەکانی کوردستان و رۆژهەڵاتی ناوین بەڵکە لە تێکڕای جیهان - دەستەواژەی (دیموکراسی)یە، ((وەک دەیبینین ئەوروپا کە لانکەی دیموکراسییە کەچی دوو دەوڵەتی داگیرکەری وەک بەریتانیا و ئیسپانیا لە رێی گوشارە ئابووریی و سیاسییەکانیان تا ئێستاش رێ وە گەلانی نێو وڵاتەکانیان نادەن لێیان جودا ببنەوە و دەوڵەتی سەروەخۆی خۆیان دابمەزرێنن!)).
______________________________
* قسەکردنی من لەسەر رۆژاوا بەرگرییکردنە لە دەستکەوتەکە و خوونی لەخوبووردووان، دەنا ئەمن نە باوەڕم وە حیزبایەتیی هەیە نە لایەنگریی لە هیچ دەسەڵاتەک دەکەم، لێ پێویستە و هەر دەبی لە پێناو مافە نەتەوەیی و نیشتیمانییەکانی میللەتەکەمان تێبکۆشین و پێ وە پێی گەلانی دیکە رۆڵی خۆمان لە چارەسەرکردنی کێشە کۆمەڵایەتییەکان بگێڕین و هەرچی زۆرترە ئامانجەکانی گەل لە ئاسوودەیی و خۆشگوزەرانیی وەدستبهینین.

٣١\١٢\٢٠١٦ - لەندەن

ماڵپه‌ڕی دارا خونچە