|
|
|
١١\٩\٢٠١٥ وەرزی شەوەزەنگ!
دارا خونچە هەر (شەو)ە گەڵا و گوڵی باخچەکەم و بەژن و باڵای دار سنەوبەرەکانم لێ دەشێرتەوە! هەر (شەو)یشە ناچارمان دەکا چرا و ئاور داگیرسێنین تا بێ ئەژمار پەڕوباڵی پەپوولەکان پەڕندە١ چووک چووکەلەکان هەڵکڕووزێن! هەر (شەو)یش بوو (ژۆری سازان٢) و (ژۆرە تاریکەکان٣)ی لە رەشاییەکانی خۆی سازکرد تا؛ ژیان و ڤیان لە خم٤ بگرن تا؛ هزر و بیر لە خوا٥ بگرن تا؛ ژن لە رەشکاو٦ هەڵکێشن تا؛ نان قاتیی٧ بکەن و پەیڤەکان٨ سەرببڕن تا؛ (ئاڵان٩)و ئاڵانەکان بن ئاو بخەن!!! ئەز زۆر جاران وە١٠ زەویم گوت: ''تکایە چیدی خول مەخۆ رووی خامۆشت لە رووی گەشت جوداکەوە شەوپەرستان وە دیوی شەو بسپێرەوە رۆشندۆستان وە خۆرەتاو''! ئەز زۆر جاران راشکاوانە وە زەویم گوت: ''چارەنووس و سەرەنجامت وە خوونی ئاڵی ئاڵان و ئاڵانەکان زۆر زۆر شڕ و سەرەولێژە''! ئەز زۆر جاران وە زەویم گوت لێ هەرگیز هیچی نەژنەوت١١!!! ______________________________ پەراوێز و فەرهەنگۆک: ١- پەڕندە: واتای هەموو جۆرە باڵدارەک دەدا.. لێرە مەبەست لەو زیندەوەرە باڵدارە زۆر گچکانەیە کە لە رۆشنایی چرا و ئاور خڕدەبنەوە، وەک (پەروانە و پێشکە و... هتد). ٢- ژۆری سازان: ئەو ژۆرەیە کە سیاسەتبازەکان لە پاش دروستکردنی قەیران و بارگرژییەکان تێیدا گرددەبنەوە و زۆر بێ شەرمانە لە رێی پووچکردنەوەی هەڵبژاردنەکانی دیموکراسیەتە پەڕپووتەکەی خۆیان گاڵتە وە دەنگەکانی جەماوەرەکەیان دەکەن و سازش لەسەر دابەشکردنەوەی کورسییەکانی دەسەڵاتە ستەمگەرییەکەیان و لەسەر رۆڵ ئاستی هەر حیزبەک لە سەرکوتکردن و لەخشتەبردنی خەڵک دەکەن و دەسازێن! ٣- ژۆرە تاریکەکان: ئەو ژۆرانەن کە سیاسەتبازەکان تێیاندا کۆدەبنەوە و بێ لەبەرچاوگرتنی را و خواستی خەڵک تەنێ لە نێوان خۆیاندا و وە پێی بەرژەوەندییە دڕندەییەکانی خۆیان ژێربەژێر رێکدەکەون و بڕیار لەسەر تێکڕای بوارەکانی ژیانی مرۆڤەکان و تەنانەت ژیانی گیانلەبەران و ژینگەش دەدەن! ٤- خم: ئاوێتەیەکە لە رەنگی شین و مۆر. ٥- خوا: ئەو ئەفسانە نەرێنییەی کە مرۆڤ خۆی پێ گەڕاندەوە دوایێ. ٦- رەشکاو: ئەو ئاوە رەشە گیراوەیە کە رەنگی ریس و خوریی پێ رەش دەکەن یان لە سەردەمانەکی زوو ژنان لە کاتی پرسەدا جلکوبەرگە رەنگاوڕەنگەکانیان پێ رەش دەکردن. ٧- قاتیی: قاتوقڕیی، نەبوونیی. ٨- پەیڤ: وشە، وتە، (پەیڤین: ئاخافتن، دوان). ٩- ئاڵان: ئەو زارۆکە بوو کە وەک هەزاران پەراگەندەبووی دیکەی رێی ''هات و نەهات''ی ئاوارەیی زۆر تراژیدییانە گیانی پەپوولە ئاسای خۆی لە دەست دا و تێکڕای دەسەڵاتداران و تاریکپەرستانی جیهانی سووک و ریسوا و شەرمەزار کرد! ١٠- وە: بە. ١١- نەژنەوت: نەبیست.
٩\٩\٢٠١٥ - لەندەن
|
|
|
