١٣\٧\٢٠١٧

خاڵبەندیی مەكەن.

ئەرسەلان مەحمود  

 
دروستكردنی یەكڕیزی نیشتامانی لەسەر پرسە چارەنونسسازەكانی خەڵكی كوردستان، دوای ئاسایی كردنەوەی پاڕلمانی كوردستان ئەنجامدانی ڕیفراندۆم لەسنوری كارگێڕی هەرێمی كوردستان و، ناوچە دابڕێندراوەكان بەئامانجی ڕاگەیاندنی سەربەخۆیی، دروستكردنی هاوپەیمانی نێوان فراكسیۆنەكانی "یەكێتیی و گۆڕان" لەئەنجومەنی نوێنەرانی عیراق و پارلمانی كوردستان و ئەنجومەنی پارێزگاكان. وەك دوا بڕیاڕی دوا كۆبوونەوەی ٩\٧\٢٠١٧ سەركردایەتی هاوبەشی نێوان یەكێتیی نیشتمانی و بزوتنەوەی گۆڕان، بەلای منەوە دڵخۆشكارن.

دڵخۆشكارن لەبەر زۆر شت، خەڵكى فەوتان، هەلا هەلان بەدەست نەداری و بێدادی و، چارە گرانی ئەم دۆخە ڕوشێنەرە سیاسیەوە، بەڵام حیكمەت پێش ئەوەی لەجێبەجێكردنی ئەم بڕیاڕو ڕاسپاردانەدا بێت، لەپابەندبوندایە، ئەگەر پابەندبون نەبێ‌، جێبەجێكردن بەدینایەت، پابەند بوون وەك مۆڕاڵ، وەك موخاتەبكردن لەمیدیاو، ڕەنگپێدانەوەی لەپراكتیكدا. ئەمەیش پەیوەست و پەیوەندە بەجیددی و حەددی بوونی یەكێتییەوە، دیارە نە لەبەر ئەوەی ئەوە یەكێتییە تا ئێستا نەیویستووەو نایەوێت بەنمونە ڕێككەوتنی نێوان خۆی و گۆڕان جێبەجێبكرێت، بەڵكە لەبەر ئەوەی نابێ‌ لەوە زیاتر مرونەت بنوێنێت، دەی ئیتر دەبێ هەستیار بێت.

سەیركەن: پێڕەكانی ململانێ‌ و شەڕی بەرژەوەندییە كەسیەكانی ناو "ی.ن.ك"، تایبەت لەم دۆخە هەستیارو تەژی لەمەترسییەدا، جگە لەخوڵقاندنی نەسازی دەرون ڕێكخراوەیی لەخۆیدا، جگە لەپەرت و پەرێشانكردنی ئایدیاو گوتاری یەگكرتووی حیزبی لەخۆی و بەڕوی دەرەوەی خۆیدا، جگە لەتەخشان و پەخشانكردنی تەنزیمی و جەماوەری و بەشینەوەی بەسەر ئەم و ئەوی كەسیدا، وایكردوە هات و هاوارو هەرای نەبڕاوەی سایكۆلۆژیسازو عاتیفەگەرایی خاوەن پێگە لەپێشەكانی بزوتنەوەی گۆڕان، تایبەت لەمیدیادا، جگە لەونكردنی شاڕێگەی خەباتی دو لایەنە، پێش ئەوەی خەڵك وەك جەماوەر، خەڵك وەك یەكەی پێكهێنەری جڤاكی، خەڵك وەك یەكەی بڕیاردەرە چارەنوسسازەكان، فریا ئەوە بكەون پرسیار لەخۆیان بكەن و بڕیار بدەن ئاخۆ كێ‌ و چۆن دەبێ‌ حوكمیان بكات، پارتی لەسورو سنور بداو حوكمیان بكات، ئەو سورو سنورانەی بەلای لانیكەمی زۆرینەی هەرە زۆری خەڵكی ئەم كوردستانەوە بەهادارن، ئەو حوكمە كۆنكرێتییەی جگە لەخۆرهەڵات، بەلای زۆرینەی هەرە زۆری جیهانیانەوە، وجودی لەسەر نەخشەسازی تەواوی دنیای ئەمڕۆ نەماوەو نابیندرێت.

مامەڵەی یەكێتیی و بزوتنەوەی گۆڕان، ئەگەر مەبادئەو، بڕیارە وەك دیفاكتۆ سەیرو جێبەجێبكرێت، دەبێ‌ لەیەكخستنەوەی دیووی ناوەوەی توانست و تواناسازییە مرۆیی و جەماوەرییەكانیانەوە دەستپێكرێت، ڕاستە ئەوانەی بیر دەكەنەوە، كەمترو بەزەحمەت دەتوانن وەك یەك وڵام بدەنەوەو بڕیار بدەن، ئەسڵەن خودی بەهاو بوونی ژیانیش لەجیاوازیدا دەبینن، بەڵام پێكهاتە جەماوەرییەكەی ئەم دوو حیزبە، ئەگەر لەسەر زۆر شتیش كۆك نەبن، بەڕەهاییەوە دەتوانم بڵێم لانیكەم لەسەر ئەوە تەبان كێ‌ و چۆن دەبێ‌ حوكمی وڵات بكات. با ئەمە بەجۆرێكی دی، ڕونبكەمەوە:

سلێمانی، پێكهاتەیەكی جوگرافی سەرنجڕاكێش و جوانی هەیە، خەڵكەكەی سەرەڕای قەیرانە شمولیەكەی هەرێم و سەر شارە تایبەتیەكەی خۆیان، هەردەم دڵخۆش و كراوەو بەگەشبینییەوە لەتێپەڕاندنی دیاردەو دەركەوتە جیاوازەكان و ئایندەی وڵاتەكەیان دەڕوانن، ئەوەی هەیانە هەردەم دەیڵێن، ئەوەی بیانەوێ‌ سەربەست و ئازادانە هەر كات و چۆنێك بخوازن دەیكەن، لەمپەر شكێنن، كەچی لەشارەكانی تری هەرێمدا، وێڕای ئەوەی هەمان ئەو جوانیە جوگرافی و سروشتییەی بوونی هەیە، وێڕایی ئەوەی هەمان ئەو بونییە مرۆییە بێگەردەی وجودی هەیەو، چەند سەد كیلۆمەترێكیش لەسلێمانیەوە دورن، بەڵام خەڵكەكەی خەریكە تەقینەوەی بەرمیلە باڕوتەكانی نەرێت، جوینەوەی بانگەوازە بەسەرچووەكانی سیاسەت، ترس لەبۆمبا تۆقێنەرە تەوقیتكراوە یەكڕەنگ و چاودێر سزییەكانی حیزب، بەتەواوی لەخوداو خۆیشیان دەكات!!

بێگومان ئەوانەی دەیانەوێ‌ لەولا ژیان و ئازادی زیاتر بفراژێ‌ و، لەملا زیاتر بخنكێت، لەڕاستیدا خەڵك و پێكهاتە جڤاكییەكە نیە، سیاسەتە لەوێ‌، مەزهەبگەرایی نیە، حیزبە لەوێ‌، ئەوەی لەخەڵكەكەدا هەیە تەنها ئەوەیە: هەندێك بەدەرەوەی خۆیانداو، هەندێكیش لەناوەوەی خۆیاندا دەكوڵێن و دەتەقنەوە، كوڵان و تەقینەوە وەك مەنجەنیق و بوركانی ڕكاوى نا، وەك لۆژیك، لەبەر ئەوە بەلای هەندێكیانەوە دنیا لینگ درێژەو، بەلای هەندەكەی تریانەوە، دیوار بەندیخانەیەو، هەرچی زووە دەبێ‌ بڕوخێندرێت، بەڵام دواجار هەمووان هەر دەیانەوێ‌ سەربەخۆیی نەتەوەیی و دەوڵەتی كوردانەی خۆیان هەبێت، ئەمەیش دروشم و ئامانجی لەمێژینەو هەر لەسەرەتاوەی یەكێتییە، ئێ‌ چۆن دەبێت ئەو بوارو دەرفەتە لەژێر كاریگەری و هەژموونی مەجازی و میزاجی هەر لایەن و لایەكدا بداتە پارت و لایەنی دی! یەكێتیی دەبێ‌ لەسەر هەر لایەن و لایەك پۆینت و خاڵیكدابنێت، نەك پۆینت و خاڵبەندیی بكرێت، بەتەجروبە دەركەوت شڵەژان و غیابی یەكێتیی لەگۆڕەپانەكەدا، هاوتایە بەخاڵیبوونەوەی بەها لەپرانسپە نەتەوەیی و نیشتمانییەكاندا، هاوتایە بەلەدەستدانی خزمەتگوزاری و خۆشگوزەرانییەكانی خەڵك لەهەرێمی كوردستاندا.

بزوتنەوەی گۆڕان، وەك پارتی جا با لەفۆڕم و تێرمی جیاوازیشدا بێت، ئەگەر هەروا ڕم لیبَداو ڕامان بكا: ئەوانەی لەگەڵیدا تەباو هاوڕان، پێكسڵ سپین و، ئەوانەی جوداو جیاواز دەڕواننە پرۆسەكەو، وەك ئەوەی ئەو دەیەوێ‌ بیر ناكەنەوە، پێكسڵ ڕەشن، جگە لەهەناو ڕەشی لەم وڵاتەدا، مرۆ نابێ‌ ئیتر چاوی لەوەبێ‌ شتێكی تری بەماناو بەهاو ڕون دابكاو ببارێ‌، وەها شێرپەنجەیەك نابێ‌ بەربێتە جەستەو ڕوئیاو پێكهاتە مرۆییەكەی سەركردایەتی یەكێتی، هەر كەسێك بیەوێ‌ وەك ئەوەی هەیە لەم حەقیقەتە تێبگا، سادەیە، سەرەتا با تەنها لەخۆی بپرسێت ئەو درمە چییە لەم بەشە ڕزگاركراوەی كوردستاندا، كۆتایی نایەت؟ پاشانیش ئاوڕ لەدەیانساڵەی ڕابردوی دورو نزیك بداتەوە، بەسە، وڵامەكەی چنگ دەكەوێت، ئەوانەی ناسازێن لەسیاسەتدا، نەسیاسەتكارو، نەسیاسەتیش دەكەن لەڕاستیدا، خۆپەرست و خۆپەسندو بەرچاو تاریك و برسین، سەرئەنجام تەماح وەك تەرزە لەباخ و بەرسیلەی وجودو بەرژەوەندییەكانیان دەدات، "وجودو بەرژەوەندییە كەسییەكان نا، گشتییەكە، وەك فەزا "سياسەت و هەڵكردن لەگەڵ ئەوانەی باوەڕیان بەخەباتی پاڕلمانی و بنەما دیموكراسییەكان نیە بەمانا فكری و فەلسەفییەكەی، چۆكدادان نیە بەڵام خەتخەتێن و هەڵماقۆكردنيش نیە، دوزینەوەی ئەلتەرناتیڤە، هەڵێنجانی مانایە، نەك كەللە ڕەقی، دنیای ئەمڕۆ بۆ هەموو شتەكان وەك دوێنێ‌ نیە، ملهوڕی بەملهوڕی كۆتایی نایەت، دەستاو دەستپێكردنی دەسەڵات بەهات و هاوار نایەتە دی.

دەرو دراوسێكان ئەمڕۆ، لەهەر كات زیاتر شەڕیا نە لەسەر بردنی سەرخان و ژێرخان و خاكی كورد، كەچی كورد خۆی شەڕیەتی لەسەر دەسەڵات لەخۆیدا، لەكاتێكدا نەمانی بەعس دەركەوت بەس نەبوو، دڵنیام هاتنەخوارەوەی بەرزانیش هەر بەس نابێت، ڕەش بردنەوەی درزە فەرهەنگی و ئابوری و سیاسی و سنورییە كوردی و كوردستانیەكان، ئەنجامدانی كۆنگرەی نەتەوەیی و، ڕزگاری یەكجارەكی خاك و خەڵكى كوردستان و، ڕاگەیاندنی دەوڵەتی سەربەخۆی كوردى خاوەن سیستم و دیمۆكراس، یەكێتیی و هەنگاو پشودرێژی دەوێ‌.
 

ماڵپه‌ڕی ئه‌رسه‌لان مه‌حمود