|
١٣\١١\٢٠٢١
تەنزە چیڕۆک:
خانەنشینیی.
جەلال قادر
ئێوارەی چوارشەممەی رابردوو، کاتێ مامۆستا (موسلح)م لەگەڵدابوو لە ناو
تەکسییەکەم، لێمپرسی: بۆچی ناتەوێ خۆت خانەنشین بکەی و کاتێکی خۆش
لەگەڵ نەوەکانت بەسەربەری؟
بە پێکەنینەوە گوتی: وەڵایی، ئەگەر پێم شەرم نەبووایە یەک جڕتم بۆ
لێدەدای... ژن و منداڵەکانم لە ماڵەوە وەک پیرەمێردێکی خەڵەفاو سەیرم
دەکەن... دەست بۆ هەر شتێک دەبەم، پێمدەڵین دانیشە، خەراپی دەکەی!
- ببوورە مامۆستا. هیوادرام قسەکانم بەردڵتی نەگرتبێ. ماشەڵا تەمەنی
بەڕێزتان نزیک حەفتا ساڵ دەبێ، کەچی هێشتا لەوپەڕی جوانییت.
مامۆستا موسلح سەرە زڵە کەچەڵەکەی هێنایە پێش و گوتی: لەبیەن خۆمان بێ،
من خانەنشینم. خۆبەخش دەچم بۆ زانکۆ و موحازەرە دەڵیمەوە.
نەمتوانی وەڵامێکی دروستی بدەمەوە، پێمگوت: کارێکی چاکدەکەی و بۆ خۆتیش
کەمێک لە ماڵەوە دوور دەکەیتەوە.
تاوێک بێدەنگیی کەوتە نێوانمانەوە. تا نزیک بە پیتزا رەستورانێک
بووینەوە. ڕووخستەم لە موسافرەکەم (مامۆستا موسلح) وەرگرت تا پیتزایەک
بکڕم و بۆ ماڵ و مندالەکانمی بەرمەوە.
لە پاش دە خولەکێک بە دوو پیتزا باکسی گەورە گەڕامەوە، تەکسییەکەم
داگیرساند و کەوتینەڕێ.
کاتێ گەیشتینە بەردەم ماڵی مامۆستا موسلح. یەکێ لە پیتزاکانم پێدا و
گوتم مامۆستا دانەیەک پیتزاشم بۆ تۆ کڕیوە... لەمەودوا هەوڵدە قەد بە
دەستبەتاڵیی مەگەڕێوە ماڵ.
- نا پێویست ناکا...سوپاس.
- مامۆستا تۆ پەنجا ساڵە نان دەکەی بەدەم ئەم منداڵانەوە، ئێستا کە
دەبینن بە دەستی خاڵی دەگەڕێیتەوە، وەک پیرەمێردێکی پەککەوتە تەماشات
دەکەن. زۆربەی مرۆڤ وایە، نانی دوێنێ و رابردوویان زوو لەبیردەچێتەوە.
مامۆستا (موسلح) بزەخەنەدەیەکی کرد و گوتی: تۆ ئەم هەموو شتانە لە کوێ
دەزانی؟
بە پێکەنینەوە گوتم: دەی منیش هەروەک تۆ خانەنشینم. بەڵام بۆ ئەوەی یەک
دوو عانە پتر پەیدا کەم و ماڵەوە لێم بێزار نەبن تەکسی دەکەم!
ماڵپه‌ڕی جه‌لال قادر
|
