په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

١٦\٨\٢٠١٠

 خەون و خودا.


هیوا رەش   


ئەمشەو خودا بەڵێنى دامێ کە لەمەودوا دادپەروەر بێت ، منیش لە بەرامبەردا کڕنووشم بۆى برد و بەڵێنم پێ دا ئیتر نوێژى بۆ بکەم .

ڕۆژووم لەسەر نەما ، هێندە دادپەروەریى نواند کەس برسى و کەسیش لەکەس تێر تر نەبوو ، تەنانەت ئاسکیش یەخسیرى کەڵبەى پڵنگ نەبوو ، چەقەڵ و مریشک لە دارستانەکاندا پێکەوە گەمەیان دەکرد و مرۆڤیش ببووە گیاخۆر و گەرابۆوە دۆخى قۆناغى کۆمۆنەى سەرەتایى .

زەکات باوى بەسەر چوو ، ( خوداداماوێک ) نەما چاوى لە دەستى ( خوداپێداوێک ) بێت ، گوناهەکان بوون بە هەڵم و پیویستمان بە حەمامى حەج و خۆ پاککردنەوە و تۆبە نەما ، شەیتانیش بوو بە برامان و لە ڕەجم و نەفرەتمان ڕزگارى بوو .

ڕۆژى دوایى ، هیچ گۆڕانکارییەک ڕووى نەدا بوو ، بەدخۆراکیى منداڵەکەى دراوسێمانى خستبووە گیانەڵا و کێردى ناموسپەرستیى جەستەى بێوەژنەکەى پشتمانەوەى کەلاکەلا کردبوو ، براکەم توێشویەک نان و تەماتەى دەپێچایەوە و بەرەو مەیانى کرێکاران دەکەوتە ڕێ ، نان و ئازادیش خزابووە ئەپارتمانى دەوڵەمەندێکەوە و لەوێشەوە چارەنووسمان دیارى دەکرا .

لە بڕیارەکەم پەشیمان بوومەوە ، شایەدمانم هێنا بە قسەکەى " ابی در الغفاری " * کە دەڵێت : پێم سەیرە هەژارێک دەبینم ! منداڵەکەى برسى دەبێت و شمشێر هەڵناکێشێت و لە ملى دەوڵەمەندى نادات * ، ئەمجارەیان بڕیارم دا لە ناعەدالەتییەکان یاخى بم و چى تر لە پاداشتى ملکەچیى چاوەڕوانى زەیى کەس نەبم ، سووتانى ئێرەم بکەم بە قوربانى باغى ئیرەم و هەوڵ بدەم دۆزەخى ژیان بکەم بە بەهەشتێک بۆ هەمووان ، چەشنى ئەو بەهەشتە ونەى نەماندیوە و بەرۆکمانى بۆ دائەدڕین .

 

 

کێو.

 


کێو.
کە گەییشتمە لوتکەى کێوى سینەت ، کانیى قەدپاڵى باڵام تەقییەوە .

سێو.
باوکم لەسەر سێوێک لە بەهەشتەوە فڕێیان دایە زەوى ، من بۆ دوو سێو بۆچى لە زەوییەوە ڕێگەى دۆزەخ نەگرمە بەر ؟ !

لێو.

باوکم بە کارەباى دەووت " عەلەتریک " ، لێوى تۆش چەشنى عەلەتریک هەم ڕامدەکێشێ و هەم ڕامدەگوشێ .

نێو.
نێوى تۆم لا خۆشە و بۆ نێو جێگەکەت سوێم بۆتەوە ، دەترسم لە نێو ئەم دوو نێوەدا گوم نێو بم .

خێو.
بە منداڵى باسى خێویان بۆ کردم ، بە پیریى عەشقى تۆ وەکو خێو دەستى نایە گەردنم ..

مێو.
لە خەونمدا قەدوباڵات وەکو دارى مێو لێم ئاڵا بوو ، کە هەستام سەرینەکەم لە ژێر سەرمەوە هاتبووە باوەشم .

 


نور و نار.

 


هەر ئەو حەزە ئاساییەى یەزدان پێى بەخشیبووین هانى داین زیاتر لێک بئاڵێین ، تا دەهات ئاگرى ناخمان زیاتر کڵپەى دەستاند ، ئەگەر لێوەکانمان نەبوایە کە جارجارە بۆ یەکدى هەڵماندەمشت و هەڵماندەکرۆشت ڕەنگە ببواین بە قەرەبرووت .

لەگەڵ زۆرانبازییە بێئامانەکەمان هەڵاوگێڕ و سەروبنى یەکترمان دەکرد تا جلەکان لەبەرماندا شیتاڵ شیتاڵ بوون ، وەکو ئادەم و حەوا ڕووت و عوریان لە بەهەشتى سێکسدا جەستەمان کانى ئاسا ئاوى لێ هەڵدەقوڵا !

لە گەرمەى هانکە هانک و تەکاندا لێمان وەژوور کەوتن ، لە برى ئاو و ئارەقە ئەمجارەیان لە سەرتاپاى لەشماندا خوێن قەڵبەزەى کرد .

لەوسەر دنیادا ، لەباتى ئەوەى لە یەکدیمان مارە بکەن و دڵى دوو خۆشەویست بە یەک شاد بکەن ، ئێمەى ( تاوانبار ) ى دیوانى خالق، بە شایەدى بکوژەکانمان بڕیارى چوونە دۆزەخمان بەسەردا درا ، ئەو هێندە سووتا بووە پارچەیەک لە ( نور ) و منیش شەیتان ئاسا بوومە تۆپەڵێک گڕ ، لەوساوە هەر دەگەشێمەوە و دانامرکێمەوە بۆ دیدەنى ئەو .

پێتان سەیر نەبێت کە شەیتان عاشقى خودایە !

ماڵپه‌ڕی هیوا ره‌ش