په‌یوه‌ندیپه‌رتووکخانه‌رۆشنبیرییلینکئه‌رشیفنووسه‌رانده‌سپێک

٣١\١٠\٢٠١٠

     خرۆشان و خەپاندن.

دارا ئەحمەد

چاوم هەردەم
     تێنیی و تامەزرۆی کەسکایی و
     رەنگی زەردەی خۆرەتاو و
     پڕووشەبارانی مێخۆش و
     نیگا و غەمزەی چاوبازان و
          پەلکەزێڕینەی ژۆر سەری
               گۆی مەمکۆڵانی یار بووە.
گیانم هەردەم
خولیای ژووان و رامووسان و
     دەستبازیی بووە؛
     لە تەک دەست و پەنجەی یار و
     چیمەنی پڕ لە بەیبوون و
          نەمامی تازەپشکفتیی و
               شۆڕەبییە شلک و ناسکەکان.
لێوم هەردەم
     لە پەیدۆزی یەک لێو بووە؛
     تورت و پتەو
     پڕ لە پەنگر، پڕووشە ئاور..
     بە دەنگی تەنیا یەک ماچی
          دەری و پەنجەرەی ژۆرەکان،
          کلاورۆژنە و بنمیچەکان هەرتەکێنێ و
               ئاسمان تەی کا و بەرگی ئۆزۆن کونبەدەرکا.
وەلی چ بکەم
     تا بیست بەهارم بەڕێکرد
          هەر گۆتیان و گۆتیانەوە:
               نەکەی رۆڵە، شەرمە، گوناهە، هێشتا ساوای...
بیست بەهاری دیشم، گشتی
                      ئاوری خەبات و تێکۆشان پڕووکاندی.
نووکەش ئەوە چەند بەهارە
    لە نێو (چلە)ی ماته‌مینیی تەمەنمدا روونیشتینه‌ و
           هەر دەبێژن و دەبێژنەوە:
           نەکەی زڕبۆز، شەرمە.. گوناهە.. تازە کەلکی
           چاوچاوانێ و ماچ و مووچ و رامونسانت نییە و نابی
                               شەرمە، نەکەی...
وەلی چ بکەم
هێشتا گڕی لێو و چاو و تێکڕای گیان و جەستەم بەرزە و
    دانامرکێ و دانامرکێ و دانامرکێ...

                        وەلی چ بکەم، ئەز نازانم!؟

                                      ئەز نازانم؟!

١٠\١٠\٢٠١٠ - لەندەن

ماڵپه‌ڕی دارا ئه‌حمه‌د