په‌یوه‌ندیپه‌رتووکخانه‌ئێمهلینکئه‌رشیفنووسه‌رانده‌سپێک

٩\٢\٢٠١٠

خوێندنەوەیەکى خێرا بۆ مێژووى هه‌فتاوپێنج ساڵەى حیزبى شیوعى.

هیوا ڕەش    

بەشى چواردەم (ب)

قۆناغى دەرفەت دۆڕان. 2003 2005


سەرکردایەتى حزبى شیوعى وەکو پیشەى لێ ڕاهاتوویان کە هەمیشە دڕ بوونە بۆ گیان هاوڕێکانیان و لە بەرامبەر دوژمنیش دا ملکەچ و موونەرم ، ئەمجارەشیان بەرامبەر ئەو هاوڕێیانەى داواى چاکسازییان ئەکرد لە ناو حزب دا وا بوون بەڵام بارودۆخەکە گۆڕابوو و نەگونجاو بوو بۆیان ، هەرچەندە هێزى چەکدارییان کۆکردەوە و هەڕەشە و گوڕەشەیان ئەنجام دا بەڵام خۆیان ووتەنى نەیانتوانى سحق مان بکەن چونکە پێگە حزبییەکە ووریا بوون و هەڕەمەکى بڕیارى ناپەسەندى سەرکردایەتییان بە سەر هاوڕێکانى خۆیان دا جێبەجێ نەئەکرد ، بۆیە شێوازى ئەمجارەى سەرکردایەتى زیاتر پەنا بردنە بەر درۆ و دەلەسە و بوختان و پڕوپاگەندەى خراپ بوو بۆ نمونە : هاوڕێیانى ڕیفۆرمخواز داواى دادگایى مەلەفدارانى ناو حزبیان ئەکرد کەچى سەرانى حزبەکە ئەیانویست هاوکێشەکە پێچەوانە بکەنەوە لە برى ئەوەى ملکەچى ئەو داوایە بن و برادەرە مەلەفدارەکانیان لە سەرکردایەتى دا سزا بدەن کەچى بۆیانیان دیزە بەدەرخۆنە ئەکرد لە ناو حزب دا و لە دەرەوەى حزبیش دا پڕوپاگەندەى ئەوەیان ئەکرد کە ئێمە داکۆکى لەو جاسوسانە ئەکەین کە لە دوایی دا دەرکەوت کێ بوون ئەوانەى داکۆکییان لە سیخوڕ و جاسوس ئەکرد و پلەکانیشیان لە ڕیزى حزبەکەدا بۆ بەرز ئەکەنەوە ، لە هەمبەر هاوڕێیانى ( کۆڕى تێکۆشان لە پێناو چاکسازى حزبى شیوعى کوردستان ) دا هەڵوێستێکى دووفاقى و دیماگۆگیانەیان گرتبووە بەر چونکە ئەیانزانى ئەوانەى ئەو بزووتنەوەیە بەڕێوە ئەبەن مێژووى خەباتى سیاسى و پێشمەرگایەتى و ڕێکخستنیان زۆر لە هى سەرکردایەتى باڵاتر و پاکتر و پڕ هەڵوێست ترە .

دواى ئەوەى بۆ سەرانى هەلپەرستى حزبى شیوعى دەرکەوت کە ئەم باڵە ( کۆڕى تێکۆشان لە پێناو چاکسازى حزبى شیوعى کوردستان ) دەسبەردارى هەڵوێستى خۆیان نابن لە پێداچوونەوە بە سیاسەتى حزبەکە دا و کاراکردنى چاودێرى دارایى ناوەندى و سزادانى مەلەفداران و پاککردنەوەى ڕیزەکانى حزب لێیان کە تا ئەهات هاوڕێیانى ڕێکخستنەکانمان زیاتر لێ کۆ ئەبوونەوە بۆیە بیریان لە گەلەکۆمەى چەکدارى کردەوە تا لە بارەگاکان دەرمان بکەن ، ئەویش بە هەڵە تێگەیاندنى هاوڕێیان لە دەربەندیخان و هەڵەبجە و ڕانیە و ئەو شوێنانەى چەکداریان لێى هەبوو گوایە ( کۆمەڵێک بە پشتیوانى لایەنێکى دەسەڵات ئەیانەوێت بارەگاى حزب داگیر بکەن ) ، بۆیە ئێمە وامان بە باش زانى خۆمان لەو شەڕى لابەلایە لابدەین تا نەهێڵین بە پیلانى سەرانى حزبەکە هاوڕێیانمان دەستیان بە خوێنى یەکتر سوور بێت و ناچار بارەگاکانمان بۆیان جێهێشت و نووسینگەیەکى تایبەت بە خۆمان دانا و لەوێوە هەر بە ناوى کۆڕى تێکۆشان لە پێناوى چاکسازى حزبى شیوعى کوردستان پەرەمان بە کارەکانمان دا و بڵاو کراوەى تایبەت بە خۆشمان دەرچواند و سەرانى حزبى شیوعیش لە درۆ و بوختان بۆ ناوزڕاندنمان یەک ساتێک خافڵ نەبوون .

ئێمە ئومێد بڕاو بووین لە بەخۆداچوونەوە و خۆنوێکردنەوەى حزبەکە و ئاستەنگى دروست کردن لە بەردەم هەموو هەوڵێک بە ئاراستەى پێشخستن و گیان وەبەر هێًنانەوەى حزبەکە و زیندوو کردنەوەى بگیرێتە بەر بۆیە لە 2 7 2004 دا لە لایەن لیژنەى ئامادەکارییەوە بە مەبەستى دامەزراندنى حزبى شیوعى کوردستان باشور بەیانى ڕۆژنامەوانى ڕاگەیەنرا کە ئەمە دەقەکەیەتى :

بەیانى ڕۆژنامەوانى.

ساڵێک لەمەوبەر چەندین هاوڕێ و کادیرى بە ئەمەکى حزب لە پێناوى بەرز ڕاگرتنى ئاڵاى حزب و پاراستنى مێژووى پڕ سەروەرى شیوعییەکان ، لە هەڵوێستێکى مەبدەئیانەدا دەستیان خستە سەر کەموکوڕییە سیاسى و فیکرى و تەنزیمییەکان لە ڕیزەکانى حزب و دەرکردنى لەو قەیران و ئاستەنگییانەى دووچارى هاتووە ، بەڵام لە وەڵامى ئەم هەڵوێستەدا گیانى بیرۆکراتیەتى دەستەیەکى بڕیاردەرى ناو سەرکردایەتى سەرکوتێکى حزبى تەسکى گرتە بەر و قایل نەبوون بە ڕێگەیەکى دیموکراتى و بە کۆششى هەمە لایەنە بە پێشوازى ئەو تەنگژانەوە بچن و بۆ ئەمەش دەستیان دایە پڕوپاگەندە و چەواشەکارى دەرهەق بە هاوڕێیانى کۆڕى تێکۆشان کە لە پێناوى چاکسازى حزبى شیوعى کوردستاندا تێدەکۆشان .

دواى تاقیکردنەوەى هەموو ڕێگاکانى گفتوگۆ و گوێگرتن لە دڵسۆزانى حزب ، دەرکەوت دەستەى بڕیاردەرى سەرکردایەتى دەیانەوێ بەڕە لە ژێر پێى ئەو هاوڕێیانەدا ڕابکێشن و تووشى سارد بوونەوەیان بکەن ئەمەش بە ڕاشکاوى لە کۆنگرەى سێهەمى ئەو تاقمە و ئاکامەکانى دا دیارە و لە دواى ئەوەشەوە لە سەر ڕێگەى نامەبدەئى خۆیان بەردەوامن و دەیانەوێ ئەسپى لەڕى خۆیان لە مەیدانى تۆزاویدا تاو بدەن و مەبەستیان نییە حزب لەو قەیرانانە دەرباز بکەن چونکە ئەمە لە بەرژەوەندى خودى خۆیاندا نییە ، بۆیە لە دوا کۆبوونەوەى ئەمجارەدا لە 2 7 2004 بە کۆدەنگى سەرجەم هاوڕێیان بڕیار درا لیژنەیەکى ئامادەکارى پێک بهێنرێت لە پێناوى بنیاتنانەوەى حزبى شیوعى کوردستان بە شێوازێکى نوێ تر و پوختە تر .

حزبى شیوعى کوردستان باشور دەبێتە سەکۆى هەموو شیوعیەکان و چەپەکانى کوردستان ، داوا لە سەرجەم هاوڕێیانى دڵسۆز و کەسان و گروپى چەپ و پێشکەوتووخواز دەکەین بە هەماهەنگى لە پێناوى ئەو ئامانجە پیرۆزەدا تێبکۆشین تا چیتر ڕێگە نەدرێ سازشکارى بە مەسەلە پیرۆزەکانەوە بکرێت .
سەرکەوتن بۆ ڕاستییە
شەکاوە بێت ئاڵاى مارکسیزم لینینیزم

لیژنەى ئامادەکارى حزبى شیوعى کوردستان
باشور
2 7 2004


سووربوونى هاوڕێیانى کۆڕى تێکۆشان لە سەر هەڵوێستى خۆیان و ڕاگەیاندنى حزبى شیوعى کوردستان باشور و دەرچواندنى ڕۆژنامەیەک بە ناوى ( کۆڕى تێکۆشان ) ەوە و چالاکى بەردەوام و پەیوەندى گرتن لە گەڵ لایەن و گروپ و کەسایەتییە چەپ و پێشکەوتووخوازەکان و پێشڕەوایەتیى ناڕەزایەتییە جەماوەرییەکان و تێکۆشانى مەیدانى لە پێناو دەستەبەرکردنى مافە خزمەتگوزارییەکانى هاووڵاتییان ، سەرانى حشکع ى ناچار کرد ڕایەڵەیەکمان لە گەڵ دا بهێڵنەوە بۆ ووتووێژ و گفتوگۆ بەڵام هەموو دەستەکانیان ئاشکرا و دیار بوو کە بە سیاسەتى ( پەرت کە و زاڵ بە ) ڕەفتاریان ئەکرد و ئەیانویست هاوڕێکان لە یەک جیا بکەنەوە تا بەم شێوەیە هەوڵى هێز لەبەر بڕینیان بدەن و لاوازیان بکەن ، هاوڕێیانى کۆڕى تێکۆشان وێڕاى پیلانە نەگریس و ئاشکراکانى سەرانى حشکع دەرگاى گفتوگۆیان دانەخست و هەر کاتێک ئەوان داوایان کردبێ ئێمە بێ دوودڵى پێشوازیمان لێ کردوون تا درۆ شاخدارەکانیان پووچەڵ بکەینەوە کە گوایە ئێمە بۆ دژایەتى حشکع دروست کراوین ، ساختەکارى هەوڵەکانى ئەوان هێندە ئاشکرا بوو لە هەمان کات دا ئێمەش هێندە بە ووریاییەوە مامەڵەمان ئەکرد تا وەرەقەى قومار کردنیان لە دەست دا بدڕێنین .

دواى چەندین دانیشتنى یەک بە دواى یەک و نەگەییشتن بە هیچ ئەنجامێک کە ئێمە جگە لە پێ داگرتن لە بەخۆداچوونەوە و پێداچوونەوەى سیاسەتى حزب و سزادانى مەلەفدارە جاسوسەکان هیچ خواستێکى تەعجیزیمان نەبوو ، ئەوان کۆبوونەوەکانیان ئەدایە دەم یەک و سەرقاڵى فێڵ و پیلانگێڕى بوون ، بۆیە ئێمەش لاى خۆمانەوە بڕیارمان دا ئیتر بۆ لەمەودوا بە هیچ جۆرێک لەگەڵیان دا دانەنیشین و هەموو دەرگاکانى گفتوگۆیان لێ دابخەین ، بەڵام ئەوان دەستبەردارى هەوڵە نەزۆکەکانى خۆیان نەبوون و داواى دانیشتن و ووتووێژیان کردەوە و ئەیانویست ئێمە تووشى هەڵوێستێکى ئیحراج بکەن ! ئێمە ئەمجارەشیان بە ووریاییەوە وەڵاممان دانەوە و بۆ ئەوەى ترش و خوێ بە درۆ و دەلەسەکانیانەوە نەکەن پێمان ڕاگەیاندن کە ئێمە بە دڵپاکى تائێستا ڕەفتارمان کردووە و ئێوەش بە فرت و فێڵن لە گەڵمان دا بۆیە ئەمجارەیان مەرجى دانیشتنمان ئەوەیە کە بە نووسراوى ڕەسمى مەکتەبى سیاسى داوا بکەن تا پێًکەوە دانیشین ، بەمە ئەوان کەوتنە هەڵوێستێکى ئیحراجەوە و ملیان دا بۆ داواکەمان ، بەڵام ئەو کەسەى نامەکەیان پێدا ڕەوان کردبوو داوایان لێ کردبوو کە نامەکەمان پیشان بدات بیخوێنینەوە بەڵام نەیداتە دەستمان ، ئەمە یەکێکە لە مەهزەلەکانى شێوازى گفتوگۆکانى سەرانى حشکع ! ئەمەشمان قبوڵ کرد چونکە دڵسۆزانى مەسەلەکە فشار و ڕێزى خۆیان بەکار هێنا ، لە وەڵام بەو نامەیەى کە ئەمەى خوارەوەیان تێدا نووسیبوو :

بەڕێز هاوڕێ هیوا ڕەش
سڵاوى گەرممان


پێمان باشە بەیەکەوە دانیشین و لە کوێ و کێ دێت ئێمە ئامادەین - - - - - ، بە نامەیەکى ڕەسمى بە هەمان ڕێگەدا بەم شێوەیە وەڵاممان بۆ ناردنەوە و ئامادەیى خۆمان بۆ داواکەیان پیشان دا :


حزبى شیوعى کوردستان باشور

ژمارە : تایبەت
بەروار : 25 8 2004

بەڕێز هاوڕێیانى م . س حشکع
گەرمترین سڵاو

لە ڕێگاى هاوڕێ هیوا وە ناوەڕۆکى نامەکەتانمان پێگەییشت . . پێمان خۆشە ئاگادار بن کە ئێمە لە گەڵ مەبدەئى حیوارداین لە گەڵ ئەوەى نامەکە بە شەخسى ئاراستە کراوە . . ئێمە ئێستا وەک کۆمیتەى ئامادەکارى حزبى شیوعى کوردستان باشور کار دەکەین ، ئامادەین شاندى خۆمان بنێرین بۆ دیالۆگ و هەروەها پێمان باشە هەوڵ بدرێت بە تایبەتى هاوڕێ مەلا حەسەن ئامادە بێ لە نێواندا .


لەگەڵ ڕێز دا
مۆر و ئیمزا
حزبى شیوعى کوردستان باشور
کۆمیتەى ئامادەکارى


بە ناردنەوەى وەڵامەکەمان ئەوان بۆ ژوان و شوێنى دانیشتنەکە ئێمەیان سەرپشک کرد ، ئێمەش بۆ ڕێز گرتن لەو هەڵوێستەیان بڕیارمان دا ئێمە بچین بۆ لاى ئەوان و سەردانى بارەگاى محەلى سلێمانى بکەین و لە کات و ڕۆژى دیارى کراودا لە لایان ئامادە بین ئەوانیش پێشنیارەکەى ئێمەیان پێ خۆش بوو ، ڕاستە ئێمە ئەوپەڕى ڕەسمیاتمان دابوو بە شێوازى گفتوگۆ و دانیشتن لە گەڵ سەرکردایەتى حشکع بەڵام لە ناوەڕۆک دا هەر چاوەڕوانى وەڵام و هەڵوێستى ئەرێنى ئەوان بووین تا بە هەموو لایەک کارێک بکەین حزب لە قەیرانەکانى دەرباز بکەین ، دواى ئەوەى نامەکەى م . س ى حشکع مان خوێندەوە بێ ئەوەى بدرێتە دەست خۆمان و وەڵاممان دایەوە و شوێن و کاتى کۆبوونەوەمان لە گەڵیان دا دیارى کرد کە کاتژمێر 10 ى سەر لەبەیانى ڕۆژى 30 9 2004 لە بارەگاى محەلى سلێمانى لە گەڕەکى عەقارى چاومان پێیان بکەوێت ، ئەوان ڕەزامەند بوون بە پێشنیارەکەمان و بە هەڵوێستێکى دڵسۆزانەى ئێمەیان لە قەڵەم دا بۆ کردنەوەى ئەو گرێ کوێرانەى تا ئێستا لەمپەر بوونە لە ڕێگەى ووتووێژەکان ، ئەمە هەروا بە گەرم و گوڕَى نەمایەوە و وەڵامیان بۆ ناردینەوە کە کۆبوونەوەکە دوا بخرێت تا دووبارە وەڵاممان لێ ئەگێڕنەوە گوایە کۆبوونەوەیان هاتۆتە پێشێ و ئەچن بۆ شەقلاوە بۆ ئەو کۆبوونەوەیەى خۆیان ئیدیعایان ئەکرد ، بەڵام ئەمە خۆدزینەوە و ڕاکردن بوو لە مەسەلەکە : 1 ڕاستگۆیى و بە گەرمى ئامادەبوونى بێ مەرجمان لە لایەن ئەوانەوە لە جیاتى ڕێز گرتن لەو هەڵوێستەمان بە خاڵى لاواز دانرا . 2 بیروڕاى جیاى نێوان سەرکردایەتى حشکع لە بەرامبەر ئێمەدا هەبوو ، لایەنى دژمان بە هێزتر بوون لەوانەى ئەیانویست چارەسەرییەک لە گەڵ ئێمەدا بدۆزنەوە بۆ خزمەتى زیاترى حزب .

ئێمە ئیشوکارى خۆمان نەوەستاند و لە سەر داواى ئەبو کاروان دانیشتنێک لە نێوان هەردووکمان لە ئوتێلى ئەبو سەنا دا کرا ، دانیشتنەکە تێکەڵەیەک بوو لە برادەرى و هاوڕێیەتى و نەمزانى ئەو تا چەند سەڵاحیەتى بڕیاردانى هەبوو بەڵام سەبارەت بە خۆم هاوڕێیان سەرپشکیان کردبووم ، دواى موناقەشەیەکى تێروتەسەل بەوە کۆتایى هات کە ئێمە بە بێ پۆست و پلە و پایە ، بە بێ قەید و مەرج و بە دەرکردنى بەیانێکى هاوبەشى هەردوولا کە ڕەخنە و لۆمەى تێدا بێت بەرامبەر بە ئێمە و لە هەمان کاتیش دا بەڵێنى حشکع ڕابگەیەنرێت تێیدا بەوەى کار بۆ بەستنى کۆنگرەیەکى بنکە فراوانى نەوعى بکرێت بۆ کۆکردنەوەى ووزە و تواناکانى حزب و سەر لەنوێ داڕشتنەوەى سیاسەتى حزب و دیارى کردنى هێڵە گشتییەکان ، هەتا بەدەم گاڵتەوە بە ئەبوکاروانم ووت ئەوە بکەن ( عفو ) ش دەرنەکەن ئێمە تەسلیم ئەبینەوە ، ئەمەش چووە ناو ئەرشیفى ئەو چەندین دانیشتن و یەکتر بینین و ووتووێژ و گفتوگۆیانەى سەرانى حشکع لێى بەترس و دوودڵ بوون !

لە پاییزێکى درەنگى بەرە و زستان و دواڕۆژەکانى دوامانگى ساڵى 2004 دا لە وەڵامى ئەو کۆبوونەوە ڕەسمییەى کە بە نامە گۆڕینەوەى نێوانمان لە ساز کردنى دا بووین سەرکردایەتى حشکع دەمەزەردیان کردەوە کە نزیکەى 4 مانگ بوو خۆیان لێ شاردبووەوە و داواى دانیشتنیان لە گەڵمان دا کردەوە و بۆ ئەم مەبەستە ئەمجارەیان ئەوان شوێن و کاتیان بە بێ پرسى ئێمە دەست نیشان کرد و ئێمەش وەڵاممان بۆ ڕەوانە کردنەوە .



07701309524
Hewarash1@yahoo.com