هیوا ئه‌حمه‌د   

بریار بوو گه‌شته‌که‌ی پاپای ڤاتیکان "بندیکتۆسی شه‌شه‌م" بۆ به‌رریتانیا له ‌16ی سیپتامبه‌ری 2010 دا که‌ چوار رۆژی خایاند و سه‌ردانی هه‌ریه‌ک له‌ شاره‌کانی ئه‌دینبرا و گلاسکۆ و بیرمینگهام و له‌نده‌نی کرد، پشتیوانییه‌کی گه‌وره‌بێت بۆ کلێسا و کاسۆلیکیزم. له‌هه‌مان کاتدا بۆ ئه‌وه‌ی ده‌سه‌ڵات و هه‌ژمونی پاپا کۆمه‌کێک بکات به‌ رزگارکردنی کلێسا و قه‌شه‌و کاسۆلیکیزم له‌و فشار و ناره‌زایه‌تی و نه‌فره‌ته‌ گشتییه‌ی خه‌لک و سکۆلاریزم به‌ گشتی له‌ به‌رامبه‌ر ئه‌و ده‌ستدرێژییه‌ سێکسیانه‌ی قه‌شه‌و کاردیناڵه‌کان که‌ تا ئه‌م ساڵانه‌ی دوایی به‌رده‌وام بووه‌، بۆ سه‌ر هه‌زاران منداڵ له‌ کلێساکانی به‌ریتانیا و ئیرله‌ند و ئوسترالیا و زۆربه‌ی ووڵاتانی تری دنیا. سه‌ره‌رای هه‌وڵ وئاماده‌کاریه‌کی گه‌وره‌ی داموده‌زاگاکانی کڵێسا و حکومه‌ت و داروده‌سته‌ی پاشایه‌تی هه‌ر له‌ شاژن و سه‌رۆکی حکومه‌ت و تا پروپاگه‌نده‌ی ده‌زگاکانی راگه‌یاندن بۆ سازدانی که‌شێکی گونجاو و پێشوازیلێکردنێکی شیاو و گه‌رم و‌ فه‌رمی وه‌ک سه‌رۆکی ده‌وڵه‌تێک، خه‌رجکردنی پاره‌یه‌کی خه‌یاڵی به‌ بری زیاتر له‌ بیست ملێۆن پاوه‌ند بۆ تێچونی گه‌شته‌که‌ی، به‌ڵام به‌ پێی لێکدانه‌وه‌ی زۆربه‌ی لێکۆله‌ره‌وه‌کان ئه‌م گه‌شته‌ی پاپا به‌هۆی ناره‌زایه‌تی توندی سکۆلاریزم له‌ به‌رامبه‌ریدا، نه‌ک‌ هه‌ر مه‌به‌ست و ئامانجه‌که‌ی خۆی نه‌پێکا به‌لکو به‌ پێچه‌وانه‌وه‌ به‌ شکستێک و ریسواییه‌کی تر بۆ خودی پاپاو ده‌سه‌ڵاتی ئایینی ڤاتیکان و کاسۆلیکه‌کان و به‌گشتی خودی مه‌زهه‌ب ته‌واو بوو، به‌شێوه‌یه‌ک که‌ نه‌ک خه‌ڵک به‌گشتی ته‌نانه‌ت له‌ لایه‌ن که‌سانی کاسۆلیکه‌کانیشه‌و له‌ ئاستێکی نزمدا پێشوازی لێکراو ته‌نانه‌ت به‌شێکی زۆری ئه‌و بلیتانه‌ی ئاماده‌کرا بوون بۆ ئاماده‌بوون له‌ ئاهه‌نگه‌کانی پاپادا به‌ نه‌فرۆشراوی مانه‌وه‌.

سه‌ره‌رای ئه‌وه‌ی که‌ وڵاتی به‌ریتانیا به‌ گشتی کۆنه‌پارێزتره‌ به‌ به‌راورد له‌گه‌ڵ وڵاته‌ ئه‌وروپی و رۆژئاواییه‌کانی تر، که‌ ئه‌میش هۆکاره‌که‌ی ده‌گه‌رێته‌وه‌ بۆ کۆنه‌پاریزبوونی زیاتری خودی بۆرژوازی و سستمی حوکمرانی له‌م وڵاته‌، هه‌ر بۆیه‌ هێشتا ریزگرتنی ئایین نه‌ریتێکی به‌هێزه‌ تێیدا، به‌ڵام له‌گه‌ڵ ئه‌مه‌شدا بزووتنه‌وه‌ی سکۆلاریزم و مۆدێرنیزم و زانست و ئاته‌ئیزم له‌ به‌رامبه‌ر مه‌زهه‌ب و خودی ده‌سه‌ڵاتی کلێسا و یاساکانیدا هه‌ر له‌ کۆنه‌وه‌ و هه‌میشه‌ بزوتنه‌وه‌یه‌کی به‌هێز بووه‌ و له‌ ململانێیه‌کی توندی سیاسی و زانستیدا بووه‌ له‌ به‌رامبه‌ریدا.

چه‌ند هه‌فته‌ به‌ر له‌ هاتنی پاپای ڤاتیکان بۆ به‌ریتانیا که‌مپینێکی ناره‌زایه‌تی ده‌ستی پێکرد. سه‌ره‌تای ئه‌م ئه‌م که‌مپینه‌ بریتی بوو له‌ نامه‌یه‌ک که‌ له‌ لایه‌ن 50 که‌سایه‌تی سکۆلار و ئاته‌ئیست و زانا و نوسه‌ر و هونه‌رمه‌نده‌وه‌ واژو کرا بوو، له‌وانه‌ ریتچارد دۆکنز، تیری براتشیت، فلیپ بولمان، ستیڤان فرای، کینت فولیت، ستیڤ جۆنز، پیتر تاتشل،.. ئه‌م که‌مپینه‌ ناره‌زایه‌تیه‌ک بوو دژ به‌ سه‌ردان و پێشوازیلێکردنی پاپا به‌ فه‌رمی وه‌ک سه‌رۆکی وڵاتێک. هه‌روه‌ها له‌ به‌رامبه‌ر فه‌تواو و بریار و هه‌وڵه‌کانی پاپا و ده‌سه‌ڵاتی ڤاتیکان و به‌گشتی مه‌زهه‌ب له‌ ته‌ده‌خولکردنی سه‌رله‌نوێی له‌ کاروباری به‌رێوه‌بردنی کۆمه‌ڵگاو خوێندن و خێزان و شێوه‌ی ژیانی خه‌لکدا.

هه‌ڵسوراوان و رێکخه‌رانی ئه‌م بزووتنه‌وه‌ ناره‌زایه‌تییه‌ پاپا و ده‌سه‌ڵاتی ڤاتیکان به‌ به‌رپرس و تاوانبار ده‌زانن له‌به‌رامبه‌ر گیان له‌ده‌ستدانی هه‌زاران که‌س له‌ ووڵاتانی هه‌ژاری ئه‌فریقا به‌هۆی بڵاوبوونه‌وه‌ی زیاتری نه‌خۆشی ئایدز که‌ یه‌کێ له‌ هۆکاره‌ سه‌ره‌کییه‌کانی به‌کارنه‌هێنانی کۆندۆمه‌ که‌ پاپا فتوای داوه‌ که‌ به‌کارهێنانی قه‌ده‌غه‌ بکرێت. هه‌روه‌ها حه‌رامکردنی دیاریکردنی وه‌چه‌(منع) و له‌باربردن، ته‌نانه‌ت له‌و کاتانه‌شدا که‌ مه‌ترسی بۆسه‌ر گیانی ژنی دووگیان دروست ده‌کات. له‌ لایه‌کی تره‌وه‌ به‌وه‌ تاوانبار ده‌کرێت که‌ له‌هه‌وڵی دروستکردنی جیاوازی ره‌گه‌زی دایه‌ به‌وه‌ی که‌ خه‌لک و ده‌وڵه‌ته‌کان هان ده‌دات بۆ جیاکردنه‌وه‌ی هه‌ردوو ره‌گه‌زی نێرو مێ له‌ قوتابخانه‌ و سیستمی خوێندندا و دژایه‌تیکردنی مافی هۆمۆسێکشوه‌ڵه‌کان و هه‌وڵدان بۆ په‌رده‌پۆشکردنی دۆسیه‌و زانیاری ئه‌و قه‌شه‌و کڵێسایانه‌ی که‌ له‌ ساڵانی رابردوودا ده‌ستدرێژی سێکسیان کردۆته‌ سه‌ر هه‌زاران منداڵ له‌ ناو کلێساکاندا.

پاپا ده‌یزانی رووبه‌رووی چ ناره‌زایه‌تی و بزوتنه‌وه‌یه‌کی سکۆلاریستی ده‌بێته‌وه‌ و هه‌روا به‌ ئاسانی ئامانج و نه‌خشه‌ دژه‌ مرۆییه‌که‌ی گه‌شته‌که‌ی بۆ جێبه‌جێ ناکرێ، هه‌ر بۆیه‌ له‌گه‌ڵ دابه‌زینی له‌ فرۆکه‌خانه‌ی ئه‌دێنبرا ده‌ستی به‌هێرشکردن بۆسه‌ر سکۆلاریزم و زانست و ئاته‌ئیزمی ئه‌م وڵاته‌ ده‌ست پێکردو ووتی "ئه‌م وڵاته‌ پێویسته‌ له‌ به‌رامبه‌ر سکۆلاریزمی نارازی و ئاته‌ئیزمی(باوه‌ر نه‌بوون به‌ خودا) توندره‌ودا به‌رگری له‌ ریشه‌و پێشینه‌ی مه‌سیحییه‌تی خۆی بکات". هه‌روه‌ها له‌گه‌ڵ ئه‌وه‌ی که‌ له‌ کاتی لاویه‌تی خۆییدا ئه‌ندامی ریکخراوی نازییه‌کان بووه‌، به‌ڵام زۆر غه‌شیمانه‌ هیتله‌ری دایه‌پاڵ ئاته‌ئیسته‌کان. که‌ دواتر له‌ لایه‌ن ریتچارد دۆکینزه‌وه‌ که‌ یه‌کێک له‌ ناسراوترین زاناو پرۆفیسۆر و نوسه‌ری ئاته‌ئیست و دژی مه‌زهه‌به،‌ وه‌ڵامی توندی پێدرایه‌وه‌و په‌رده‌ی له‌سه‌ر هه‌موو ئه‌و تاوانانه‌ هه‌ڵدایه‌وه‌ که‌ هیتله‌ر وه‌ک کاسۆلیکێک ئه‌نجامی دوان و کلێساش پشتیوانی لێکردون.

پاپا له‌ ماوه‌ی گه‌شته‌که‌یدا رووی له‌هه‌ر شاریک کرد رووبه‌رووی ناره‌زایه‌تی سکۆلاریسته‌کان بۆوه‌، به‌ڵام گه‌وره‌ترین ناره‌زایه‌تی له‌ شاری له‌نده‌ن بوو که‌ له‌ کاتێکدا که‌ پاپا له‌ هاید پارک خه‌ریکی قسه‌کردن و خورافات هه‌ڵڕشتن بوو بۆ لایه‌نگرانی، هه‌ر له‌به‌رامبه‌ر ئه‌ودا کاتژمێر 2ی دوانیوه‌رۆی 18/9/2010 له‌ هایدپارک کۆرنه‌ر زیاتر له‌ 20 هه‌زار که‌س له‌ کۆبوونه‌وه‌یه‌کی ناره‌زایه‌تیدا دژ به‌ پاپا کۆبوونه‌وه‌ و وتارو شیعاریان ده‌دا. هه‌زاران که‌س به‌ یه‌ک ده‌نگ هاواریان ده‌کرد "شه‌رمه‌زارییه‌ بۆ پاپا"، "پاپا ده‌ستگیر بکه‌ن"، پاپا تاوانباره‌"، "ئێمه‌ ئه‌ومان ناوێ"، " پاپا له‌سه‌روی یاساوه‌ نییه‌"، " پاپا بۆ ده‌ره‌وه‌ بۆ ده‌ره‌وه‌"،... هه‌زاران لافیته‌و پلاتکارد و وێنه‌ی کاریکاتۆری دژ به‌ پاپا له‌ له‌ لایه‌ن خه‌لکه‌وه‌ به‌رزکرابوونه‌وه‌. پاشان کۆبوونه‌وه‌ ناره‌زایه‌تییه‌که‌ به‌شێوه‌ی رێپێوان به‌ ناوه‌ندی شاردا به‌رێکه‌وت به‌ره‌و ترافالگار سکویر و له‌وێشه‌وه‌ بۆ داونن ستریت و به‌رده‌م نوسینگه‌ی سه‌رۆک وه‌زیرانی به‌ریتانیا.

له‌به‌رده‌م نه‌سینگه‌ی سه‌رۆک وه‌زیران دیڤد کامرون رێپێوانه‌که‌ که‌ هه‌زاران که‌سی تری پێوه‌ په‌یوه‌ست ببوو، وه‌ستێنراو ده‌ستکرا به‌ قسه‌کردن و ووتار خوێندنه‌وه‌ له‌ لایه‌ن که‌سایه‌تی و نوێنه‌رو قسه‌که‌رانی ریکخراوه‌ مه‌ده‌نییه‌کانی مافی مرۆڤ و ژنان و دژه‌ مه‌زهه‌ب و لایه‌نگر له‌ مافی یه‌کسانی هاوڵاتییان. که‌ بریتی بوون له‌ پرۆفیسۆر ریتچار دۆکنز، ئه‌ندرۆ کاپسۆن له‌ ریکخراوی هیومانیسته‌کانی به‌ریتانیا، دکتۆر بێن گۆلدکیر رۆژنامه‌وان، جیفری رۆبرتسون، پیتر تاتشل چالاکه‌وانی مافه‌کانی مرۆڤ، پراگنا پێتڵ له‌ خوشکانی ره‌ش، کلارا کۆنۆلی له‌ ریکخراوی ژنان دژ به‌ توندره‌وی، تێری ساندرۆن له‌ کۆمه‌ڵگایه‌کی سکۆلاری نه‌ته‌وه‌یی، باربارا بلێن یه‌کێک له‌و منداڵانه‌ بووه‌ که‌ له‌ لایه‌ن قه‌شه‌کانی کڵێساوه‌ ده‌ستدرێژی سێکسی کرابووه‌سه‌ر.

شایانی باسه‌ یه‌کێکی تر له‌ قسه‌که‌رانی ئه‌م خۆپیشاندانه‌ جه‌ماوه‌رییه‌ که‌سایه‌تی سکۆلار و ناسراوی دژ به‌ مه‌زهه‌ب و رژێمی ئیسلامی ئیران، مه‌ریه‌م نه‌مازی قسه‌که‌ری که‌مپینی یه‌ک یاسای سکولار بۆ هه‌موان و دژ به‌ دادگاکانی شه‌ریعه‌ له‌ به‌ریتانیا، بوو. مه‌ریه‌م نه‌مازی له‌ ووته‌که‌یدا ئاماژه‌ی کرد به‌ پێویستی لێکهه‌ڵپێکانی بزووتنه‌وه‌ی سکۆلاریستی و دژه‌ مه‌زهه‌بی له‌ ووڵاتانی ژێر ده‌سه‌ڵاتی یاساکانی شه‌ریعه‌ی ئیسلامی وه‌ک ئیران و عیراق و رۆژهه‌ڵاتی ناوه‌راست، له‌گه‌ڵ بزووتنه‌وه‌ی سکۆلاریستی وڵاتانی رۆژئاوا و ئه‌وروپا. هه‌ر له‌م روانگه‌یه‌وه‌ که‌مپینی دژ به‌ یاساکانی شه‌ریعه‌ و یاسایه‌کی سکۆلار بۆ هه‌موان و که‌مپینی گه‌وره‌ و کۆمه‌ڵایه‌تی و جیهانی و مرۆییانه‌ی دژ به‌ به‌رده‌بارانکردنی سه‌کینه‌ محمد ئاشتیانی و پشتیوانی بێوێنه‌ی جه‌ماوه‌ری ئازادیخواز و سکۆلاری دنیا له‌و که‌مپینه‌، به‌ هه‌وڵێک و هه‌نگاوێکی گرنگ له‌وراستایه‌دا باسلێکرد. هه‌ر له‌ میانه‌ی قسه‌کانیدا باسی له‌ درێژه‌دان به‌ که‌مپینی دژ به‌ به‌رده‌بارانکردنی سه‌کینه‌ کرد و داوای پشتیوانی زیاتری له‌ ئاماده‌بوان کرد له‌ پیناو رزگارکردنی گیانی سه‌کینه‌ که‌ مه‌ترسی سه‌نگه‌سار و له‌سێداره‌دان هێشتا له‌سه‌ر سه‌رییه‌تی. که‌ هاوکات هه‌ر له‌م رۆژه‌دا له‌ 35 شاری دنیا و له‌وانه‌ش له‌ له‌نده‌ن کۆبوونه‌وه‌ و خۆپیشاندانی ناره‌زایه‌تی دژ به‌ رژێمی ئیسلامی و سزای به‌رده‌بارانکردنی سه‌کینه‌ ئه‌نجامدرا، هه‌ر بۆیه‌ قسه‌کانی‌خۆی به‌ نا بۆ به‌رده‌بارانکردن نا بۆ له‌ سێداره‌دان کۆتایی پێهێناو به‌دوای ئه‌ودا هه‌زاران که‌س پڕ به‌ گه‌روویان هاواریان ده‌کرد " نابۆ به‌رده‌باران، نا بۆ به‌رده‌باران".

ناراه‌زایه‌تی ده‌ربرین و دژایه‌تیکردنی پاپا و ده‌سه‌ڵاتی ڤاتیکان ته‌نها له‌ روانگه‌ سیاسی و پێشیلکردنی مافه‌کانی مرۆڤه‌وه خۆی نیشان نه‌دا، به‌لکو له‌ روانگه‌ی زانست و پێشکه‌تن و دۆزینه‌وه‌ زانستیه‌کانی مرۆڤایه‌تیشه‌وه‌ به‌رپه‌رچێکی تووندی لێکدانه‌وه‌ و بۆچونه‌کانی مه‌زهه‌ب و کلێسا له‌مه‌ر چۆنییه‌تی دروست بوونی ژیان و گه‌ردوونه‌وه‌ درایه‌وه‌. ئه‌گه‌ر زیاتر له‌ سه‌د ساڵ له‌مه‌وپێش زانای به‌ناوبانگی زینده‌وه‌رزانی چارلز داروین هه‌ر له‌م ووڵاته‌دا به‌ کتێبه‌ به‌ناوبانگه‌که‌ی (اێل الانواع) ده‌رباره‌ی چۆنییه‌تی په‌یدابوون و گه‌شه‌سه‌ندنی ژیانی زینده‌وه‌ره‌کان به‌ مرۆڤیشه‌وه‌ شۆرشێکی زانستی له‌به‌رامبه‌ر به‌ بیروباوه‌ره‌ خورافیه‌کانی مه‌زهه‌ب و کڵێسا درووستکرد و پاشه‌کشه‌ی پێکرد، ئه‌وا ئه‌مرۆش زانای به‌ناوبانگی زانستی فیزیا ستیڤن هۆکینگ له‌ کتێبه‌ به‌ناوبانگه‌که‌یدا سه‌باره‌ت به‌ چۆنیه‌تی دروستبوونی گه‌ردوون به‌ ناوی (دیزاینی مه‌زن) به‌ به‌ڵگه‌و به‌ رۆشنی باس له‌وه‌ ده‌کات که‌ خودا گه‌ردوونی دروست نه‌کردوه‌. شایانی باسه‌ که‌ ئه‌م کتێبه‌ له‌ 9 سێپته‌مبه‌ری 2010 دا وه‌ک ناراه‌زایه‌تیه‌ک له‌به‌رامبه‌ر به‌ سه‌ردانی پاپای ڤاتیکان بۆ به‌ریتانا و دژ به‌ بیرورا و لێکدانه‌وه‌کانی مه‌زهه‌ب و کڵیسا سه‌باره‌ت به‌ چۆنییه‌تی درووستبوونی گه‌ردوون، له‌ لایه‌ن هۆکینگه‌وه‌ بڵاوکرایه‌وه‌ و ده‌نگدانه‌وه‌یه‌کی گه‌وره‌و و ململانێیه‌کی توند ونوێی له‌ نیوان زانست و مه‌زهه‌بدا سه‌باره‌ت به‌ جیاوزایان له‌سه‌ر چۆنییه‌تی درووستبوونی گه‌رددون درووستکرد.

ئه‌مرۆ له‌گه‌ڵ پێداویستیه‌ سایسی و ئابوری و کۆمه‌ڵایه‌تییه‌کانی سیستمی سه‌رمایه‌داری و پاراستنی به‌رژه‌وه‌ندییه‌ چاوچنۆکییه‌کانی ئه‌مرۆی و به‌تایبه‌تیش هاوکات له‌گه‌ڵ قه‌یرانێکی قوڵی ئابوری و دارایی که‌ سه‌رتاپای سیستیمی سه‌رمایه‌داری جیهانی گرتۆته‌وه‌ و بۆ ته‌ مه‌ترسییه‌ک بۆسه‌ر ئه‌م به‌رژه‌وه‌ندییه‌ سایسی و ئابوری و داراییه‌ی، بره‌ودانه‌وه‌ به‌ مه‌زهه‌ب و کلێساو خورافاتی دینی و هه‌وڵدان بۆ هێنانه‌وه‌ و په‌لکێشکردنه‌وه‌ی زیاتری بۆ ناو کاروبای ده‌وڵه‌ت و ژیانی خه‌ڵک و به‌تایبه‌تیش له‌ بواری خوێندن و خێزان و په‌یوه‌ندییه‌ کۆمه‌ڵایه‌تیه‌کاندا، بۆته‌ ئه‌وله‌ویه‌ت و پێداویستیه‌کی گرنگی ئه‌م سیستمه و حکومه‌ته‌کانی‌. ئه‌ویش له‌ پێناو گێژکردن و بێ ئیراده‌کردنی خه‌ڵک و رازیکردن و قانعکردنیان به‌ قه‌یرانه‌کان و هه‌ژاری و بێکاری و هه‌لومه‌رج و ئاستێکی ژیانی خراپ که‌ تێیدا ده‌ژین و سه‌یرکردن و قبولکردنی وه‌ک چاره‌نوسێک که‌ خودا بۆی دیاریکردوون نه‌ک ئه‌وه‌ی که‌ هۆکاره‌که‌ی سیستمی سه‌رمایه‌داری و رژێم و حوکمه‌ته‌کانی بێت. به‌مه‌ش هه‌وڵدان بۆ شاردنه‌وه‌ی راستی و هۆکاری راسته‌قینه‌ی کاره‌ساته‌کان و ئه‌م ژیانه‌ سه‌خته‌. به‌ڵام حکومه‌ته‌کان و سیاسه‌ته‌مدارانی ئه‌م سیستمه‌ هه‌روا به‌ ئاسانی ئه‌م سیاسه‌ته‌یان بۆ پیاده‌ ناکرێ سه‌ره‌رای ته‌رخانکردنی پاره‌و و ئیمکاناتێکی گه‌وره‌ بۆ ئه‌م مه‌سه‌له‌یه‌. هه‌ر ئه‌مرۆ له‌ ئاستی جیهانیدا بزووتنه‌وه‌یه‌کی سکۆلاریستی و مرۆییانه‌ و یه‌کسانیخواز و تا راده‌یه‌کیش سایسی و زانستی سه‌ر له‌نوێ پێی ناوه‌ته‌ مه‌یدان و ده‌یه‌وێ به‌ر به‌سایسه‌ت و هه‌وڵ و خورافاته‌کانی مه‌زهه‌ب و کلێسا که‌ سه‌رتاپا دژ به‌ زانست و مرۆڤایه‌تی و یه‌کسانی و مافه‌کانی ژنان و منداڵانن بگرێت. به‌ تایبه‌ت له‌ به‌ریتانیا ئه‌مرۆ ئه‌م بزووتنه‌وه‌یه‌ نه‌خش وکاریگه‌ری به‌رچاوی هه‌یه‌ و له‌ ئاستێکی باشدا خه‌ریکی خۆ نواندن و ده‌ربرینی ناره‌زایه‌تی و ئه‌نجامدانی چالاکییه‌ که‌ بۆته‌ هۆی ئه‌وه‌ی که‌ هه‌رچی زیاتر فه‌زای کۆمه‌ڵگه‌ دژ به‌ مه‌زهه‌ب به‌شێوه‌یه‌کی گشتی بگۆرێت و‌ فه‌زایه‌ک بره‌خسێت که‌ تاوانه‌کانی قه‌شه‌و و کلیساکان له‌به‌رامبه‌ر ده‌ستدرێژی سێکسی بۆسه‌ر منداڵان ئاشکرا بکرێن و له‌ ئاستێکی به‌رینی کۆمه‌ڵایه‌تی وجیهانیدا کلێسا ریسوا بکرێت، ئه‌و فه‌زا کۆمه‌ڵایه‌تی و سایسییه‌ی فه‌راهه‌مکردوه‌ که‌ دژ به‌ پاپا ناره‌زایه‌تی ده‌یان هه‌زارکه‌سی بکرێت و داوای ده‌ستگیرکردنی بکرێت و وه‌ک تاوانبار بناسێنرێت. ئه‌م بزووتنه‌وه‌یه‌ هه‌رچی زیاتر روو له‌گه‌شه‌کردنه‌و به‌ دڵنیاییه‌وه‌ له‌ داهاتودا کاریگه‌ری گرنگی ده‌بێت له‌سه‌ر به‌‌هێزکردن و چونه‌پێشه‌وه‌ی هه‌رچی زیاتری سکۆلاریزم له‌ به‌رامبه‌ر مه‌زهه‌بدا له‌سه‌ر ئاستی جیهان.
________________________________________________
بۆ بینینی به‌شێک له‌و خۆپیشاندان و کۆبوونه‌وه‌ و ووتارانه‌ دتوانن کرته‌ له‌سه‌ر ئه‌م لینکانه‌ی خواره‌وه‌ بکه‌ن:

protest the pope Maryam Namazie's speech-LONDO...by HiwaAhmed

 

 

 

28\9\2010

ماڵپه‌ڕی هیوا ئه‌حمه‌د