٥\٤\٢٠١٣

 خۆشباوەڕیی، له‌ تایبه‌تمه‌ندییه خراپه‌کانی ئێمه‌ی کورد.

به‌ختیار           

ئه‌وه راستییه‌کی نکوڵیلێنه‌کراوه که ئێمه‌ی کورد له‌دوای رووخانی ئیمپراتۆرێتیی مادده‌وه هه‌تا ئێستا وه‌ک نه‌ته‌وه، نه‌ خۆمان وه‌ک نه‌ته‌وه‌یه‌کی ئازاد و نه کوردستانه‌که‌یشمان وه‌ک نیشتمانێکی سه‌ربه‌خۆ و یه‌کگرتوو نه‌بینیوه‌ته‌وه و له‌و سه‌رده‌مانه‌وه ، هه‌تا ئه‌مڕۆ له سه‌نگه‌ر و هه‌ڵوێستی به‌رگری له‌خۆکردن و جه‌نگ و شه‌ڕ و به‌ربه‌ره‌‌کانێ و ململانێی مان و نه‌مانداین.

لێره‌دا بۆ کورتکردنه‌وه‌ی رێگای دوور، ده‌ڵێین: مه‌به‌سته‌که و پرسیاره‌که له‌م وشانه‌دا ئه‌مه‌یه: بۆچی به‌درێژایی ئه‌و مێژووه نه‌بووه و نه‌مانبینیوه که چه‌ند کۆڕ و کۆمه‌ڵ و پارت و یانه و رادیۆ و ته‌له‌ڤیزیۆنێک، چه‌ند رامیاریزان و یاریزان و سه‌ماکار نووسه‌ر و رۆشنبیر و هۆزانڤان و شانۆکار و کۆمه‌ڵناس و گۆرانیبێژێکی نه‌ته‌وه دراوسێکانمان له فارس و عه‌ره‌ب و تورک، هه‌ڵوێستێکی مرۆڤپه‌روه‌رانه‌ و هاوئایینیانه‌ و دراوسێیانه‌یان به‌رامبه‌ر ئه‌و هه‌‌موو شه‌ڕ و کوشتار و ماڵوێرانی و سه‌رگه‌ردانی و سته‌ملێکراوییه‌ی که ده‌سه‌ڵاتداره داگیرکه‌ر و ره‌گه‌زپه‌رست و تاڵانچییه‌کانی ئه‌و نه‌ته‌وانه‌ و ئه‌و د‌‌ه‌وڵه‌ته‌ داگیرکه‌رانه‌ی کوردستان به‌سه‌ر ئێمه‌ی کورد دا هێناویانه، هه‌بێت.

هیچ که‌س و کۆڕ و کۆمه‌ڵێکیانمان نه‌بینی و لێمان نه‌بیستن که به‌ ته‌نها به‌یاننامه‌یه‌ک، هۆنراوه‌یه‌ک یان گۆرانیه‌ک، یان به‌ نامه‌یه‌ک، هه‌‌ستی دراوسێیانه و مرۆڤپه‌روه‌رانه‌ی خۆیان بۆ ئێمه‌ی کورد ده‌رببڕن و له‌و ماڵوێرانی و ئازار و سته‌م و کاره‌ساتانه‌دا هاوسۆز و هاوخه‌ممانبن. به‌ڵام ئه‌مڕۆ به‌هۆی ئه‌م هه‌لومه‌رج و نیمچه ئازادییه‌ی که له‌ باشووری کوردستاندا به‌ده‌ستمان هێناوه یان باشتره بڵێین ئه‌م ئازادییه‌ی ئێستا بوونی هه‌یه.

ده‌بینین ده‌یان که‌س و به‌ناو دۆستی کورد له شێوه‌ی رامیاریزان و یاریزان و سه‌ماکار و گۆرانیبێژ و شانۆکار و نووسه‌ر و رۆشنبیرمان لێ په‌یدابوون که گوایه‌ دۆستی ئێمه‌ی کوردن، ئه‌ی پێشتر ئه‌مانه له‌کوێ بوون و بۆ هیچ هه‌ڵوێستێکى مرۆڤانه و دراوسێیانه‌یان به‌رامبه‌ر ئه‌و هه‌موو رابوردووه پڕ له کاره‌ساتانه‌ماندا نه‌بووه. ئه‌ی ئه‌مڕۆ بۆ بوونه‌ته‌ گوایه‌ دۆستمان و گۆرانیشمان بۆ ده‌ڵێن.

له‌ڕاستیدا وه‌ڵامه‌که‌ی روون و ئاشکرایه‌، ئه‌مڕۆ دۆستایه‌تی کردنی کوردی باشوور و باشووری کوردستان، به‌رژه‌وه‌ندیی تایبه‌تی و پاره‌ی زۆری تێدایه.

به‌لێشاو ئاهه‌نگ و فیستڤاڵ و بۆنه‌ی جۆراوجۆر بۆ ئه‌و تازه‌ دۆستانه ساز ده‌کرێن و بانگهێشتنی باشووری کوردستان ده‌کرێن. پاره‌ی زۆریان تێدا به‌خه‌رج ده‌رێن و پاره‌ی زۆریان ده‌درێتێ، له‌باشترین هۆتێل و شوێنی مانه‌وه‌دا خزمه‌ت ده‌کرێن.

ئیمتیازی کارکردن و کۆمپانیا کردنه‌وه‌یان ده‌درێتێ، به‌لێشاو دێن و زه‌وی و خانوو و شوقه ده‌کڕن یان ئه‌وانه‌یشیان هه‌ر به دیاری ده‌درێتێ، له‌ زانکۆکاندا داده‌مه‌زرێنرێن و بۆیان هه‌یه به‌خۆڕایی بخوێنن.خوێندن به‌خۆرایی.

له‌لایه‌ن ده‌سەڵاتی کوردی یان پارته کوردییه‌کان یان سه‌رۆک و به‌رپرسه‌کانه‌وه هه‌‌موو پێداویستییه‌کیان بۆ دابین ده‌کرێت، به‌ڵام زۆربه‌ی یپێشمه‌رگه دێرینه‌کان، رۆڵه ئازاکان و شۆڕشگێڕه‌کانی رۆژانی سه‌خت و ته‌نگانه، زۆربه‌ی رۆشنبیران و نووسه‌ران و گۆرانیبێژه‌ دڵسۆزه‌کانی خۆیشمان به‌ هه‌ژاری و نه‌داری و هه‌ناسه‌‌ساردییه‌وه سه‌رده‌نێنه‌وهو که‌س لێیان ناپرسیته‌وه.

هه‌‌ر بۆنموونه، هونه‌رمه‌ندێکی گه‌وره‌ی میللیی وه‌کو ئه‌حمه‌د شه‌ماڵی نه‌مر، هه‌تا به‌ هه‌ژاری بێ خانەو لانه‌یی کۆچی دوایی نه‌کرد، که‌س باسی نه‌کرد و که‌س لێی نه‌پرسییه‌وه.

هونه‌رمه‌ندێکی دیکه‌ی میللی، خوالێخۆشبوو سه‌ڵاح داوده به هه‌ژاری و بێ خانه‌ و لانه‌یی سه‌ری نایه‌وه و که‌س لێی نه‌پرسییه‌وه. هونه‌رمه‌ندیکی میللیی و یه‌کێ له پێشمه‌رگه ئازا و دڵسۆزه‌کانی کورد و کوردستان، نه‌مر و گیانپاک ، ئیبراهیم سه‌عید، ناسراو به بله‌ی سه‌عه که‌ڕ، له ژوورێکی داروخاوی کرێچێتیدا ، له بێکه‌سی و هه‌‌ژاریدا، پاش چه‌ند رۆژێک له گیان ده‌رچوونی، ئینجا به مردنه‌که‌یزانرا …..!؟

ئه‌مه‌ ئازادی و دیمۆکراسییه، یان ئه‌مه شه‌رم و شه‌رمه‌زارییه‌ بۆ ئه‌مڕۆی کۆمه‌ڵگه‌که‌مان!؟ ئێستاش به سه‌دان پێشمه‌رگه‌ی دێرین و زیندانیی رامیاری و بریندار و که‌مئه‌ندام و په‌ککه‌وته‌ی کاره‌ساته‌کانی شۆڕش، ئێستاش به سه‌دان هونه‌رمه‌ند و شانۆکار و نووسه‌ر و رۆشنبیری هه‌ڵکه‌وتوو و دڵسۆزمان هه‌ن که به هه‌ژاری و نه‌داری ده‌ژین و که‌س لێیان ناپرسێته‌وه و ئاوڕێکی هاوکاری کردنیان لێ نادرێته‌وه . نموونه‌کان زۆر زۆرن و ئه‌گه‌ر به‌دوایدا بڕۆین، وه‌ک ده‌‌ڵێن ئه‌م هه‌ویره ئاو زۆر ده‌کێشت و ئه‌م نووسینه‌‌ش زۆر درێژ ده‌بێته‌وه.

به‌داخه‌وه که‌سانی خۆشباوه‌ڕ و ساده‌و ساکار، له‌ تێگه‌یشتن و بیرکردنه‌وه‌دا، له‌ناو میلله‌تی ئێمه‌ دا زۆر زۆرن. ئێستا له راگه‌یاندنه‌کاندا باو باوی ئه‌وه‌یه‌ که خانمه گۆرانیبێژێکی عه‌ره‌ب گۆرانییه‌کی بۆ کورد چڕیوه!؟ ئێ ئینجا چییه‌!؟ خۆ ئه‌مه په‌رجوو / موعجیزه نییه‌. ئه‌ی ئه‌و خانمه‌ به‌ڕێزه بۆچی له‌کاتی ئه‌نفالکردنی کورد و وێرانکردن و سوتماک کردنی کورد و کوردستاندا ئێمه‌ی کوردى له‌بیر نه‌بوو!؟ خۆ که‌س ده‌ستی نه‌گرتبوو.

ئه‌نفال کردنی کورد و وێران کردنی کوردستان لای که‌س شاراوه نه‌بوو!؟ ئه‌ی بۆ نووسه‌ر و رۆشنبیر و گۆرانیبێژ و که‌سێکی ناوداری ئه‌و نه‌ته‌وه دراوسێیانه‌مان نه‌بینی ته‌نها وشه‌یه‌کمان به‌باشه بۆ بنووسن، گۆرانییه‌کمان بۆ بڵێن، هه‌‌ڵوێستێکی مرۆڤپه‌روه‌رانه‌مان نیشان بده‌ن!؟ مه‌سه‌له‌که ئه‌مه‌یه‌ که ئه‌مڕۆ ئه‌م دۆستایه‌تی کردن و گۆرانی بۆ کورد وتنانه بۆ به‌رژه‌وه‌ندیی تایبه‌تییه و پاره‌ی موفت و زۆر و زه‌وه‌نده‌ی تێدایه.

ئێمه‌ی کوردیش ، زۆربه‌مان ئه‌وه‌نده خۆشباوه‌ڕ و ساده‌ و ساکارین دڵمان به‌و گۆرانی و دۆستایه‌تییه‌ تازه‌بابه‌‌ته‌ی ئه‌و گۆرانی بێژه خۆپه‌رست و به‌رژه‌وه‌ند په‌رستانه‌ خۆشه. له کۆتاییدا ده‌بێ بڵێین: ئاخۆ رۆژێک دێت که ئێمه‌ی کوردیش وه‌کو نه‌ته‌وه‌ ئازاد و پێشکه‌وتووه‌کانی دیکه له ‌خۆمان و له ژیان و له به‌رژه‌وه‌ندی و دۆست و دۆستایه‌تیی راستینه تێبگه‌ین!؟ به‌خۆمان و به‌مێژووماندا بچینه‌وه و بزانین و تێبگه‌ین به‌رژه‌وه‌ندیی باڵای نه‌ته‌وه‌یی و نیشتمانیمان له‌چیدایه و دۆستان و دوژمنانمان کێن و کێنین!؟….. به‌هیوای ئه‌و رۆژه.

bakhtiarshamaiy@aol.nl