|
٢٤\١١\٢٠١١
یاداشتنامه‌ی
دەستەى داکۆکى لە مافى زیندانییە سیاسییەکانى.
بەڕێزان:
- سەرۆکایەتى هەرێمى کوردستان.
- سەرۆکایەتى پەرلەمانى کوردستان.
- سەرۆکایەتى ئەنجومەنى وەزیرانى حکومەتى هەرێمى کوردستان.
زیندانییانى سیاسیى ، ئەو توێژە خۆبەختکەرەن کە بە شەهیدى زیندو
ناودەبرێن و بەوپەڕى لێبوردەییەوە بە گژ سیستمى حوکمى ئەشکەنجە و مەرگى
فاشیستەکاندا چونەتەوە ، لە خەباتدا پێشەنگ و سەرقافڵە بون ، لێ ئەمڕۆ
لە خراونەتە پەراوێزەوە و ئاوڕى جدییان لێنادرێتەوە ، هەروەکو ئاگادارن
زیندانییانى سیاسیى عێراق بە کۆمەڵێک ماف و ئیمتیازات بەسەر کراونەتەوە
و بە یاساش ئەو مافانەیان بۆ پارێزراوە ، یاساى ژمارە (٤)ى
تایبەت بە زیندانییان لە ساڵى 2006 ەوە لە بەرژەوەندى زیندانییە
سیاسییەکانى عێراقى فیدراڵ لەکاردایە و بە شانازییەوە لێیان دەڕوانن ،
بەڵام زیندانییانى سیاسیى کوردستان دواى هەوڵ و تێکۆشانى زۆر کە جگە لە
قەرەبوکردنەوەى ساڵانى مافخوراویى ڕابردویان ، چاوەڕوانى زیاتریش دەکرا
بۆ ئەوەى یاسایەک لە هەرێمى کوردستاندا دەربچوێنرێت لە سەرووى یاساى
ژمارە (٤)ى عێراقیشەوە بێت ، کەچى وێڕاى
درەنگکەوتنى ، بە پێچەوانەوە بە پڕ کەموکوڕییەوە پێشوازیى لە
دەستەبەریى مافەکانیان کرا !
ئێمەى ( دەستەى داکۆکى لە مافى زیندانییە سیاسییەکانى کوردستان ) ،
دەرگایەکى دەزگاپەیوەندیدارە ( حیزبى و حکومى ) یەکان نەماوە
نەیانکوتین بۆ گێڕانەوەى مافى زەوتکراوى زیندانییە سیاسییەکانى
کوردستان ، چەندین چالاکى مەدەنیى هێمنانە ( خۆپیشاندان ، مانگرتن ،
ڕێپێوان ، یاداشت و سکاڵا ) مان گرتۆتە بەر و دەنگى ناڕەزایەتى و
بێزاریى زیندانییە سیاسییەکانمان بە شێوازى جۆراوجۆر گەیاندۆتەلایەنە
بەرپرسەکان ، تەنانەت پرۆژەیەکى گەڵاڵەکراوى ئامادەشمان خستۆتە بەردەم
سەرۆکایەتى پەرلەمان و هیوادارین بەهەند وەربگیرێ و بەمەبەستى
وەدەسهێنانى مافى زیندانییە سیاسییەکان کارى لەسەر بکرێ و سوکنایى بەخش
بێت بۆیان ، مخابن تا ئێستا بە غەمساردییەوە مامەڵەى لە تەکدا کراوە و
وەڵامێکى ئەوتۆمان دەسنەکەوتووە شایەنى ئاستى خەبات و بەڕەنگاربونەوەى
ڕابردووى زیندانییە سیاسییەکاندا بێت !
لێرەوە داوا لە بەڕێزتان دەکەین هاوکار و پشتیوان بن لە بەرقەرار کردنى
یاسایەک هیچ نەبێت بە لایەنى کەمەوە هاوشێوەى یاساى ژمارە (٤)ى
عێراق بێت و هەمان ئەو دەسکەوت و پاداشتانەى بۆ زیندانییەکى سیاسیى
عێراق فەراهەم دەکرێت ، لە هەرێمى کوردستانیشدا زیندانییە سیاسییەکان
پێى شاد ببن ، چونکە بە سۆنگەى ئەشکەنجەى بەعسییەکانەوە جگە لەو ڕۆڵە
بوێرانەیەى بە نەبەردییەوە لە پێناوى پیرۆز ڕاگرتنى ناسنامەى گەل پەتى
قەنارەیان هەڵبژارد نەک ملکەچى و چۆکدادان ، لە هەمان کاتدا سەدان
هاوڕییان ئێستا ماون و دوچارى جۆرەها نەخۆشى دەرونى و کەمئەندامیى و
گرفتى کۆمەڵایەتیى هاتون و لە گوزەرانێکى ناخۆشدا ژیان بەسەر دەبەن ،
دابینکردنى مافەکانیان کەمێک لە غەمى کەڵەکەبوى سەرشانیان کەمدەکاتەوە
، بۆ ئەمەش بەڕێزتان بڕیاربەدەستن و دەتوانن بەم ئەرکە نیشتمانى و
نەتەوەییەتان پەیامى دڵسۆزیتان بگەیەننە ماڵى تاریک و خوانى بەتاڵى
خانەوادەى زیندانییە سیاسییەکانى کوردستان .
بۆ پێشەوە بەرەو کوردستانێکى ئازاد و دادپەروەرانەتر.
دەستەى داکۆکى لە مافى زیندانییە سیاسییەکانى
٢٤\١١\٢٠١١
|
