٣\١٢\٢٠١٣

یادەوەریی ستەم و خیانەتی پێشمەرگە پۆشەکانی یەکێتی و پارتی،

لەگەڵ چەند وردە یادەوەرییەکی هەمەچەشن.

هیوا رەش       

تا تۆزقاڵێک وەفام تێدا مابێ بۆ خوێنی شەهیدان لە ڕاستی گوتن و ئاشکرا کردنی خیانەتکاران بێ دەربەست و بێ منەتم، بۆیە ئەمجارەیان چمکێکی زانراو لەو خیانەتانە هەڵدەدەمەوە کە دەیانزانم.

لای هەمو کەس ئاشکرایە سەرکەوتنی نامەردانەی بەعس لە شەڕی نابەرامبەر و کۆکوژی گەلەکەمان و بەکار هێنانی چەکی کیمیاوی لە بەرامبەر هێزی پێشمەرگە چۆن دوژمنی جڵەوکێش کردبو بۆ بوغرایی، لە بەرامبەردا هەندێک خوێڕی نێو ڕیزەکانی یەکێتی و پارتی کە ئێستا هەندێکیان کراونەتە پاڵەوان، بە سەرشۆڕیی و کەڵبەی سووریان بە خوێنی پێشمەرگە شیوعییەکان چوونە سەر خوانی فاشییەکان و گەوادییان لە نیشتمانپەروەریی لا پەسەندتر بوو، بۆ نموونە:

آ - تاوانباری خاین و خۆفرۆش (سەڵاح شینە) کە لەو سەردەمەدا سەرتیپی یەکێتی بوو، لە پەنای دۆستایەتی و پێشمەرگایەتیدا و لە هەلی نامەردانەدا چەندین کادیر و پێشمەرگەی شیوعی لە ناوچەی هەولێر شەهید کرد و بێ شەرمانە خۆی خزاندە نێو باوەشی ئاغاکانیەوە و لە شاریشدا وەکو کەمتیاری تینوو بە خوێن لەگەڵ خوێڕییە خۆفرۆشەکانی دەوروبەریدا کەوتبوونە وێزەی خەڵکی سڤیل و بێ دەسەڵاتی گوندە رووخاو و بێداڵدەکان، لەوانەی شەهیدیان کردن:
١- شەهید کانەبی گچکە.
٢- شەهید دکتۆر عادل.
٣- شەهید ڕزگار و بەوپەڕی داوای لێبوردنەوە کە ناوی شەهیدەکانی دیکە نازانم.
ئەم تاوانبارە لە خیانەت هەڵکێشراوە لە دواییدا وا بزانم لەبەر پشتئەستووریی خۆی بە بەعسییەکان تووشی بوغرایی هاتبوو و لە دەمەقالەیەکیدا لەگەڵ هەندێ جاشی تر لە نزیک کۆڕێ کوژرا.

ب - تاوانبارانی بە خیانەت زاخاو کراو (بورهان و تەحسین) کە پارتی بوون و لە ژێرەوە پەیوەندییان بە جاشخائنێکی (تەحسین شاوەیس)ەوە کردبوو، سێ تاوانی گەورەیان ئەنجام دا:
١- لە بان جەباری شەهیدان (قاسم عەرەب و فازڵ و هەڵمەت)یان شەهید کرد .
٢- لە لایەکی ترەوە سێ پێشمەرگەی یەکێتی نیشتمانی کوردستان، شەهیدان ( کامیل و شامیل و عەزیز)یان شەهید کرد.
٣- لە دەڤەرێکی دیکەوە شەهیدان (هەڵۆی سەید عەلی جەباری و فازڵ و کەسێکی تر)یان شەهید کرد، تا ئێستا هەڵۆی لاوی شیوعی گۆڕ ونە.

ج - تاوانێکی دیکەی قێزەونی نامەردانە و ناجوامێرانەی بەرچنی خیانەتکارانی چەکدار لە ڕیزی پێشمەرگەکانی یەکێتی نیشتمانی لە لایەن (هێمنەڕەش)ەوە تۆمار کرا کە ئەو دەمە سەرتیپی یەکێتی بوو، لەم تاوانە دەگمەن و بێوێنەیەدا لە گەرمیانی سوتماکدا، شەهیدان (مولازم سەعد، سەلام قەڵامیکایلی، دڵشاد عەرەب و چیا) کرانە دیاری خوانی فاشیستەکان لە لایەن تاوانباری ناوبراو و دەستە و تاقمەکەیەوە.
جگە لەمانەش لە چەندین ناوچەی دیکەدا چەکداری وڵاتفرۆش لە ژێر پەردەی وڵاتپارێزییەوە خۆیان مەڵاس دابوو بەڵام دەرفەتیان بۆ نەڕەخسا ژەهری نامەردییان بڕێژنە جەستەی پێشمەرگەوە، بۆ نموونە:

د - من سەرپەرشتی مەفرەزەیەک ( عەلی مەحمود - قاسم نۆکانی - سەرەی مام سەعید تورکمانباغی - جەمال گوڵمکەوەیی و چەند هاوڕێیەکی تر)ی ناوشوانم دەکرد، دنیا وێران ببوو، کەس بە فریای کەسەوە نەبوو، ئێمەش دڵمان نەدەهات خەڵکی جێبهێڵین، کوناوکون و بە ئیختیفا لە ناوچەکەدا مابووینەوە، مخابن لە پەنای دۆستایەتی و لە لایەن نزیکەی ١٠٠ چەکداری شێری شێنەیی و ڕیوی دژوارییەکانەوە بە فەرمانی ئیستیخباراتی چەمچەماڵ هەوڵی ڕادەست کردن بە زیندوویی یان بە مردوییمانیان درا بوو لە هەڵەتەکانی گوندی گوڵمکەوەی سەر بە چەمچەماڵ، وریایی خۆمان و پەشۆکاویی ئەوان تاوانەکەیانی کردە بڵقی سەر ئاو و پێیان ئەنجام نەدرا.

لە ئاکامی ئەو تاوانانەی دوێنێ ناخۆشتر دۆخی ئەمڕۆیە، دوو حیزبی سیخناخ لە خاین و بەزیو و کۆنەجاش و کۆنەبەعسی، دەسەڵاتدارن و سەرانی حیزبی شیوعیش وێڕای ئەو هەمو قوربانیی و خۆڕاگریی و قارەمانێتییەی هاوڕێکانیان، ئێستا لە بن دەست و پێی پارتی و یەکێتی چاوەڕوانی پلە و پۆست و پارەن و لەو ڕێگەیەوە فوویان پێ بە زوڕنادا دەکەن، دەیانکەن بە راوێژکار و وتەبێژ و تەپڵکوت و پینەچی گەندەڵیی و ناعەدالەتی.
 

چەند وردە یادەوەرییەکی هەمەچەشن.

١- لەگەڵ شەهید سەعدون عەرەب لە هەولێرەوە بەرەو ڕانیە دەچووین، من ئۆتۆمبیلەکەم لێدەخوڕی و لە زاڵگەی - هیزۆپ - زرتەبۆزێکی ئیستیخبارات هاتە پێش و لێمانی پرسی: (من جماعة حجی عبد) (حجی عبد، ئامۆزای سەدام بوو، وەرەقەی ڕێگەپێدانی ئەو لە بازاڕ بە پارە دەکڕدرا و زۆر کەس بە تاتبەتی قاچاغچییەکان سوودیان لێ دەبینی)، منیش هاتمە وەڵام و بە پێکەنینەوە گوتم: (لا واللە احنە من جماعة حجی عزیز - مەبەستم هاوڕێ عەزیز محەمەد بوو)، ئەویش زۆر بە جوانیی بە ڕێی کردین و گوتی: (یا هلا بکم تفضلوا).
بێگومان هەر نەشیدەزانی (حجی عزیز) کێیە و چ کارەیە؟! کە لە زاڵگە دەرچووین هاوڕێ سەعدون گوتی: ئەو دینەت بسوتێنم ئەوە چیت گوت؟ رۆژێک دێ دایکمان بە گان دەدەی.

٢- لەگەڵ شەهید سەعدون عەرەب لە سلێمانییەوە بەرەو هەولێر دەگەڕاینەوە، لە زاڵگەی دوکان ڕایان گرتین، هەرگیز نەمبینیبوو داوای ناسنامە لە شۆفێریش بکرێ، ئەو جارەیان داوای ناسنامەیان لە هاوڕێ سەعدون و منی شۆفێریش کرد، کابرای زاڵگە بردیە ژورەکەی خۆیانەوە و ئێمەش هەر لە ناو ئۆتۆمبیلەکەدا چاوەڕێ بوین و تەگبیرمان لەو بارە نائاساییە دەکرد و بە هاوڕێ سەعدونم گوت: وریا بە لە جامەکەی پێشەوە هەڵت نەدەمە دەرەوە، بڕیارمان دا ئەگەر بڵێن : انزلوا ، یەکسەر بێی پێدا دەنێین و دەردەچین ، غەشیمی من لەوەدا بو گێڕەکەم دابوە نمرە چوار ، پێم وابو بەو گێڕە دەرچم ئیتر ئۆتۆمبیلەکە باڵ دەگرێ و دەفڕێ و دەرباز دەبین ، نەمدەزانی هەستان بەو گێڕە ئەستەمە و لە زۆر حاڵەتدا ئۆتۆمبیلەکە خامۆش دەبێ، بەوەی باش بو کابرا کە گەڕایەوە بە داوای لێبوردنەوە ناسنامەکەی دایەوە پێمان و (فەرموو - تفضلوا)ی لێمان کرد و ئێمەش بە شێنەیی زاڵگەکەمان جێهێشت.

٣- لەگەڵ ئەحمەد شاهین دا چوین بۆ سەردانی ماڵیان، باوکی دوای دانیشتن و بەخێر هێنانێکی زۆر هەر لە من ڕا دەما، لە دواییدا خۆی پێ نەگیرا و گوتی: ئەحمەد کوڕم ئەم برادەرە کێیە؟
ئەحمەد گوتی: هاوڕێ فڵانە (ناوێکی گوت ئێستا لە سەر خەیاڵ نیم چ ناوێکی گوت).
دوای کەمێکی دی و بە گومانەوە پرسیەوە: دەزانم فڵانە، ئاخر چ کارەیە؟
ئەحمەد گوتی: هاوڕێی خۆمانە.
دوای دەمێکی دی دووبارە پرسییەوە: دەزانم هاوڕێی خۆتانە بەس نابێ بزانم کێیە و کوڕی کێیە؟
ئەحمەد گوتی: حیزب دەزانێ.
دوای کەمێکی دی باوکی گوتی: ئەحمەد کوڕم دەزانم حیزب دەزانێ ، ئەی نابێ منیش بزانم کێیە؟
ئەحمەد گوتی: ئینجا تۆ لۆ بزانی؟ چ پێویست دەکا بیزانی؟
بابی گوتی: کوڕم کوو پێویست ناکا؟ ئاخر ئەگەر داکتی گا، نابێ ئەمنیش داکی بگێمەوە.
هەمومان بە کۆرس قاقایەکی خۆشمان لێدا.

٤- ئەم بەروارەم بیر ناچێتەوە چونکە بە بۆنەی راوەستانی جەنگی عێراق - ئێران ٨\٨\١٩٨٩ بوو، لەگەڵ ئەحمەد شاهین لە بەغدا پێکەوە چووین بۆ - ساحة الاحتفالات - کە بەو بۆنەیەوە بەعسییەکان ئاهەنگیان دەگێڕا، ئێمەش هات بە سەرماندا و روومان لەوێ کرد تا بزانین چی دەگوزەرێ؟ لەوێ بووین کاتێکمان زانی سەام هات بۆ ئەوێ، لە پێشوازیی دیکتاتۆردا هەزاران عەگال بە ئاسماندا هەڵدەدران و هێشتا نەدەکەوتە زەوی ئەوەندەی تر هەڵدەدرانەوە، کارێکیان بۆ سەدام کرد نەبێتەوە.
لە گەڕانەوەماندا ئەحمەد شاهین گوتی: هیوا دەزانی ئێمە زۆر کەرین؟
گوتم: بۆ؟
گوتی: خۆ دیوتە ئەو خەڵکە چ لۆ ئەو سەگبابەی دەکەن؟
گوتم: خەڵک هۆشیار نییە.
گوتی: دە گوی بخۆ پێت وایە بە دوو قون هەڵپچڕاوی وەکی ئەمن و ئەتو دەڕووخێندرێ؟

هەر لەو ڕۆژەدا و لە گەڕانەوەماندا چووین بۆ مەیخانە، دوای خواردنەوەیەکی زۆر گەنجێکی عەرەب هات بۆ لامان و بە ئەدەبەوە سڵاوی لێکردین و پرسی ئێوە کوردن؟
گوتمان: بەڵێ.
زۆری لێکردین بچینە سەر مێزەکەی ئەوان دانیشین و پێکەوە بخۆینەوە، وازی نەهێنا و دڵیمان نەشکاند، خۆمان کەمێک مەست و لەوێ مەستتر بووین.
ئەوەی لە خەیاڵما بێ ئەوان چوار کەس بون ، سەر مێزەکە پڕ لە مەزە و مەی بو ، لە دەمەتەقێکانماندا ئەمە گوزەرا:
گوتیان: خەڵکی کوێن؟
گوتمان: هەولێر.
یەکێکیان گوتی: (غەزوان)ی پورزام لەوێ شەهید کرا.
پرسیمان: چۆن؟
گوتی: لە کۆلێژ سەرۆکی لیژنەی ئیتیحادی بوو شیوعییە موخەڕیبەکان گرتیان و بردیان و ڕەمییان کرد.
ئێمەش: وێڕای هاوبەشی غەمی خۆمان بۆی قسەکەیمان پشتڕاست کردەوە و تێمان گەیاندن ئەو دەمە ئێمە ( فورسان - جاش ) بوین و زۆر هەوڵمان دا ڕزگاری بکەین بەڵام بێهودە بوو، ئەوان کەوتبونە جنێو بە شیوعییەکان و ئێمەش بۆمان دەسەندنەوە، بەڵام ناوەناوە بە دەم جنێوەوە مەدح و پیاهەڵدانی هاوڕێیانیشمان تێهەڵکێش دەکرد و دەمانگوت ئەو موخەڕیبانە زۆر ئازا بوون، بەو ژمارە کەمەی خۆیانەوە ئێمە بە هێزی پڕ چەک و تەیارەشەوە دەرەقەتیان نەدەهاتین، ئەوانیش قسەکانمانیان دەسەلماند، گەنجەکە لە کاتی هەستاندا دامانگیرمان ببوو دەبێ سەردانی پوری (دایکی غەزوان) بکەین، چونکە ئەو زۆر مەمنونە لە ڕۆڵی فورسانەکان و خۆشی دەوێن و هەمیشە باسی (مەردایەتی) یان دەکا.

٥- لەگەڵ نەجات دا چوین بۆ یەکێک لە گەراجەکانی هەولێر تا ئۆتۆمبیلەکەم بشۆم، کرێکارەکان ناو ئۆتۆمبیلەکەیان پاک دەکردەوە، یەکێکیان هات بۆ لام و گوتی: مامۆستا دەمانچەکەت لە دەشبوڵەکەیدایە (دەمانجەیەکی میکاریۆفم پێ بو لە دەشبوڵی ئۆتۆمبیلەکە دامنابو)، پێم گوت: با لەوێ بێ، وریای بە دەمانچەی حیزبە.
ئەو بەسزمانانە نەیاندەزانی کام حیزب دەڵێم، بە ڕەفیق حیزبیمان تێگەییشتن، هێندە ئۆتۆمبیلەکەیان پاک دەشۆری خەریک بو بۆیاغەکەی لێ بکەنەوە.

٦- کاتژمێر لە نێوان ١١ بۆ ١٢ ی شەو بوو، مەستی بینینی هاوڕێیەک بوم، چوم بۆ گەڕەکی ڕۆناکی و لە ماڵ مام فەتاح و نەمهێشت خۆشی بگٶڕێ و هەر بە پیجامەکەیەوە هاوڕێ نەجاتم لەگەڵ خۆمدا برد، زۆر تیژڕۆ ئۆتۆمبیلەکەم لێدەخوڕێ، لەسەر ڕێی هەولێر کەرکوک کۆمەڵێک چەتەوڵی چەکدار بە چەکەکانیانەوە هاتنە ناوەڕاستی شەقامەکە و لەبەر ڕوناکی لایتەکان دەرکەوتن و بە چەکەکانیان ئاماژەی وەستانیان بۆ کردم، منیش تا گەییشتمە لایان بە تۆبزی ئۆتۆمبیلەکەم گرتەوە و لە ئاستیاندا وەستام ، یەکێکیان هاتە پێشێ و ئەوانی تریش بە دەورماندا دابەش بوون، پرسی : مامۆستا لۆ هێندە پەلەی؟
منیش بە دەم پێکەنینەوە گوتم: قوربان جادە چۆڵە و خۆشم پەلەمە.
گوتی: لۆ کێندەر دەچن وا پەلەی؟
گوتم: مار و مندار لە سەردانی مارە خزمانن لە نۆهەت و دوو، تەلەفۆنیان لۆ کردم لە دویان بچم بیانهێنمەوە.
گوتی: فەرمو بەس بڕەک لەسەرەخۆ بئاژۆ.
گوتم: بەسەر چاو.
لەو گفتوگۆیەی نێوانمان وا بزانم نەجات بورابۆوە، کە بەڕی کەوتین گوتی: وەڵا حەرامە پیاو ڕەفاقەتیشت بکا.
چوین و هاوڕێکەمان بینی و گەڕاینەوە.

٧- لە بەغدا بە پیادە لەگەڵ سروود بەرەو شوقەکەمان دەگەڕاینەوە، لە کاتی پەڕینەوەمان لە جادە ئەو پێش من پەڕییەوە و من دواکەوتم، کە پەڕیمەوە ئەو فرسەخێک لە پێش منەوە دەڕۆییشت، ئۆتۆمبێلێکی سوپەر مۆدێل ١٩٨٥ ی نپ و نوێ کە هی پیاوە دەسڕۆییوەکان بو بە تەنیشتمەوە ڕایگرت و سڵاوی لێم کرد و منیش سڵاوەکەیم سەندەوە و کەوتە پرسیاری سۆراغی بەنزینخانە، بە عەرەبییە شەق و شڕەکەی خۆم تێمگەیاند کە ئەو فەرعەی دواوەی کە جێی هێشت بەنزینخانەی لێیە، ئەو مەوزوعەکەی گۆڕی و پرسی: (یبین انت مو من بغداد؟).
گوتم: (لا).
گوتی: (انت کردی؟).
گوتم: (نعم).
گوتی: (من وین؟).
گوتم: (من سلیمانیە).
گوتی: (سلیمانیە حلوە).
گوتم: (کلش، بس مو مثل بغداد).
گوتی: (ای بغداد احلی، بس یبین انت جای لبغداد للونسە).
گوتم: (لا مو شرط).
گوتی: (ترید تتونس؟).
گوتم: (اذا اکو، خیر من اللە).
گوتی: (تتونس ویای؟).
بە سەرسوڕمانەوە گوتم: (ویا من؟).
گوتی: (ویای، والله والله اریحک بشکل ماشایفها بحیاتک، حتی انطیک فلوس).
چمەز کابرا حیزە و حەجمانی نەماوە و واز ناهێنێ، بۆیە ناچار لەوە زیاتر نەوەستام و جێمهێشت.
سروود لەو وەستانەی من زۆر پەست ببوو، هەزار و یەک حیسابی ئەمنیی دەکرد ، بۆیە بە توڕەییەوە گوتی: هاوڕێ گیان بۆچی لەگەڵ ئەم سەگبابانە دەوەستی، ئەمانە هەمویان موخابەراتن.
بە پێکەنینەوە پێم گوت: ئێ کوڕە خۆ شۆڕش هەر چەکداری نییە، موخابەرات گاینیش هەر شۆڕشە.

٨- لەگەڵ هاوڕێ سرووددا لە بەغدا لە شوقەیەکدا بوین ، جاری وا هەبو دەمویست وەکو هاوکار ئیشێکی لەگەڵدا بکەم نەیدەهێشت ، دەستم دەبرد گسک بدەم و ناو ژورەکان بەاڵم ، لیێ دەستاندم و دەیگوت: داینێ تۆ نایزانی ئێستا ئەم ناوە هەموی دەکەی بە تەپ و تۆز، یان دەچوم قاپ بشۆرم، رێگەی نەدەدام و دەیگوت : وازیان لێ بهێنە خۆم دەیانشۆم تۆ هەر بە چەورییەکەوە دەیانهێڵیتەوە ، جاروباریش دەمویست پشویەکی پێ بدەم و دەمگوت: چێشت لێ دەنێم .
دەیگوت: هەمو کەس نازانێ چێشت لێ بنێ ، عەزیەت مەکێشە خۆم لێی دەنێم.
ڕۆژێکیان گەڕامەوە بۆ شوقەکە زۆرم برسی بوو، سروود خەریکی چێشت لێنان بوو، منیش یەکسەر چومە تەنیشتیەوە سەرقاپی مەنجەڵێکم هەڵدایەوە، توند دەستی گرتم و لەقاندی و گوتی: بە پەلە داینێوە.
گوتم: یا حافیز چی بووە؟
گوتی: قیمەی غیزائیە (قیمە الغذئیة)کەی دەڕوا.
گوتم: کوڕە من وا لە برسا دەمرم، گۆلکێکی وەکو من چوزانێ قیمەی غیزائیە چیە؟

٩- چووم بۆ سەردانی ماڵی مام فەتاح کە ئەوانیش بە خێزانی ئیختیفا بوون،، دایە کافیەی هاوسەری مام فەتاح هەر کە بینیمی یەکسەر خەریک بو باوکەڕۆ دەست پێ بکا و گوتی: کوڕە هیوا بە قوربان ، ئاخر بۆ وا دەکەی ، حیزبی شیوعی کەسی تێدا نیە تۆ نەبێ؟ هەمو کەتنەکان تۆ دەیکەی.
گوتم: بۆ، ئاخر چی بوە با بزانم؟!
بەسەر بادانەوە گوتی: ها، یەعنی نازانی؟
گوتم: چی بوە چی؟
گوتی: ئەو زابت (ضابط)ەت بۆ کوشت، ناترسی لە خۆت، ئەگەر بگیرێی کێ فریات دەکەوێ؟ منیش هەرچەند پاکانەم کرد و پاساوم هێنایەوە بێ سوود بوو، قەناعەتی نەدەکرد، لە دڵی خۆمدا گوتم: یاخوا چاوت دەرچێ بەس ناوت دەرنەچێ.

١٠- ماڵی مام ساڵحیش لێیان قەومابوو، بە خاوخێزانەوە لە ماڵی مام فەتاح خۆیان شاردبۆوە، دایە فاتمی هاوسەری مام ساڵح خەریکی نوێژ دابەستن بوو، لەو کاتەدا لە ڕادیۆوە گۆرانییەکی (عبدالحلیم الحافظ - قارئة الفنجان) کە من زۆر حەزم لێ بوو پەخش دەکرا، بۆیە دەنگیم زیاد کرد، دایە فاتمیش لەسەر بەڕماڵەکەوە گوتی: هیوا گیان کزی بکە با نوێژەکەم لێ تێکنەچێ، منیش هەر لە خۆمەوە ناوێکم گوت: ئەمە شێخ فڵانە قوڕئان دەخوێنێ، من لەبەر تۆ زیادم کرد، لەسەر بەڕماڵەکە دەیان جار گوتویەتی: خوایە تۆبە وامزانی گۆرانییە، پێش ئەوەی نوێژەکەی دابەستێتەوە گوتی: هیوا گیان تۆزێ زیادی کە، دەنگی زۆر حەنینە.

١١- بواری کچی مام ساڵح منداڵ بوو، لەگەڵ خۆمدا بردم بۆ بازاڕ، توشی مەفرەزەی موشتەرەکە بوم لەسەر ترافیک لایتی چوار ڕێیانی عەینکاوە، خۆم شلوێ نەکرد، زو دەستم برد بۆ گیرفانم و جگەرەیەکم دەرهێنا و گرتمە دەستمەوە، کە لە مەفرەزەکە نزیک بومەوە سڵاوم لێکردن و گوتم: زەحمەت نەبێ ئاگرتان پێیە؟ یەکێکیان دەستی برد بۆ گیرفانی و جگەرەکەی بۆ داگیرساندم و منیش جگەرەم پێشکەشیان کرد وەریان نەگرت و سوپاسی یەکترمان کرد و جێمهێشتن، گوتیان: یاخوا بەخێر بێی مامۆستا.
کەمێک دور کەوتینەوە بوار پێی گوتم: کاکە، کاکە، سەدام بزانێ ئەو جاشانە جگەرەیان بۆ پێشمەرگە داگیرساندوە هەر دەیانکوژێ.

١٢- بە دیلیی و بە برینداریی کەوتمە بەردەستی ئیستیخبارات و دوای ئەوەی حوکم درام، دایکم بۆ زیندان هات بۆ لام، یەکەم مواجەهەم بو خەڵکێکی زۆر هاتبون، دایکم شەفاعەتی بۆم دەخواست و دەیگوت: بە خوا ئەم کوڕە هیچی لە هیچدا نیە خوا بیانگرێ بە خۆڕایی گرتویانە، منیش بە پێکەنینەوە گوتم: دایە عەیبە سومعەم لەکەدار مەکە، ئەو هەموو ساڵە خەباتەم بۆ دەدەیتە دەم باوە.

ماڵپه‌ڕی هیوا ره‌ش