|
یاسایەک کە ئازادى کارکردنمان فەراهەم نەکات .. ڕەتکراوەیە.
گروپى ڕاچەنین
پارلەمانى کوردستان ..
حکومەتى هەرێمى کوردستان ...
ڕۆژنامەوانان ...
زۆر بەنهێنى و لە کاتێکدا تەواوى ڕۆژنامەنووسان سەرقاڵى گواستنەوەى
هەواڵەگەرمەکانى سەرسنوور و ناوخۆ و جیهانن و لەوپەڕى غافڵیدا "
سەندیکاى ڕِۆژنامەنووسانى کوردستان " دوا کۆبوونەوەى خۆى لەگەڵ لیژنەى
ڕۆشنبیرى پەرلەمان لەمەڕ " پڕۆژەى یاساى کارى ڕۆژنامەگەرى " ئەنجامدا و
ئێستا پڕۆژەکە لە بەردەم دوا قۆناغى بوون بە یاسایەتى کە ئەویش
پەسەندکردنێتى لەلایەن ئەندامانى پەرلەمانەوە .
ئەوەى مایەى ڕەخنەى زۆرى ئێمەى ڕۆژنامەنووسانە گوێنەدانى بەردەوامى
سەندیکاى ڕۆژنامەنووسانە بە نوێژى هەستیار و کاریگەرى ڕۆژنامەنووسان ،
بەردەوام قسەمان لەسەر ئەو پڕۆژەیە هەبووە و دووپاتمان کردۆتەوە کە
ناکرێت یاسایەک بۆ کارى ڕۆژنامەگەرى لە کوردستان دەربچێت و لە سەردەمى
ئازادى کوردستان و گرتنەبەرى سستمى دیموکراسى دا بە ئەندازەیەکى زۆر
ئازادى کارى ڕۆژنامەنووسى تێدا نەپارێزراوبێت .
کاک زیرەک کەمال ى سکرتێرى سەندیکاکە ڕایگەیاندووە کە" 90%ى
پڕۆژەیاساکە لە بەرژەوەندى ڕۆژنامەنووساندایە " ئەمە واتاى ئەوەیە کە
سەندیکا دان بەوەدا ئەنێن کە پڕۆژەکەیان بە جۆرێک پێشکەشى پەرلەمان
کردووە کە 10%ى پڕۆژەکە دژى بەرژەوەندى ڕۆژنامەنووسان و ڕەوشى
ڕۆژنامەگەرییە ، لە کاتێکدا کە سەندیکا خۆى پڕۆژەکەى نووسیوە!ئەمە جگە
لەوەى کە سەندیکا دوا ڕەشنووسى پڕۆژەکەى بە ڕۆژنامەنووسان
ڕانەگەیاندووە و نازانین مەبەستیان لە شم شاردنەوەیە و ئەم شێوازى کارى
ژێر پەردەییەیان لەچى ؟ چۆن دەبێت جۆرە کۆبوونەوە و گفتوگۆیەکى ئاوا
گرنگ لەمەڕ یاساى ڕۆژنامەگەریى داخراوبێت و سەندیکاى ڕۆژنامەنووسان
لەچى دەترسان کە کۆبوونەوەکە کراوە و شەفاف بێت !؟
ئێمە هەموولایەک ئاگادار دەکەینەوە کە ئازادى کارى ڕۆژنامەنووسیمان
دەوێت و ئەم بەڵێنەشمان لە تەواوى دەسەڵاتى سیاسى و ئیدارى کوردستانەوە
پێ دراوە و ئەوەى دەیخوازین بە یاسا ناساندنى ئازادییەکانى کارى
ڕۆژنامەنووسییە ، هەرچ یاسایەکیش دەربچێت کە ناکۆک بێت لەگەڵ بەندەکانى
جاڕنامەى گەردوونى مافەکانى مرۆڤ و مافە مەدەنی و ئازادییەکانى ڕا
دەربڕین ئەوا مایەى ڕەتکردنەوەیە و هەوڵى گۆڕین و هەموارکردنى دەدەین .
لێرەوە داوا لە پەرلەمانى کوردستان دەکەین کە پەلە لە پەسەندکردنى
پڕۆژە یاساکە نەکەن و ئەوان خەمخۆرتر لە سەندیکاى ڕۆژنامەنووسان بتوانن
گوێ لە قسە و تێبینى و پێشنیازى ڕۆژنامەنووسان بگرن ، بە ئومێدى
دەرچواندنى یاسایەک کە ئازادى کارى ڕۆژنامەگەریى فەراهەم بکات و ڕەوشى
ڕۆژنامەگەریى کوردیمان بەرەوپێشتر بەرێت .
دواش لە تەواوى ڕۆژنامەنووسان دەکەین کە بە وردى و لە نزیکەوە چاودێرى
ئەم پێشهات و گۆڕانکارییانە بکەن و لێنەگەڕێن لە غافلگیریدا سەندیکا
چارەنووسییان دیاری بکات .
|
