یاساى کارى ڕۆژنامەنووسى

 یاسایەکى دواکەوتو و کۆنەپەرستانەیە و

دەبێت هەڵبوەشێتەوە.

ڕێبین فاروق     

سەندیکاى ڕۆژنامەنووسانى کوردستان کە ڕێکخراوێکى سەربە یەکێتى و پارتیە ، فەترەیەک بەر لەئێستا پڕۆژە یاسایەکی کۆنەپەرستانەى لە چوارچێوەی فکر بەرژەوەندییەکانی دەسەڵاتى یەکێتى و پارتى و ئیسلامیەکان ئامادەکردو بردیە بەردەم  ئەندامانى پەڕلەمانى کوردستان و دواى گفتوگۆکردنى ئەندامانى  پەڕلەمان لەسەر ئەو پڕۆژەیاسایە ، ناڕەزایەتیەى لە سەرجەم ئەندامانى  پەڕلەمان بەرزبۆیەوە سەبارەت بەو مەرج و سزا و کۆتوبەندانەى کە بۆ ڕۆژنامەنووسان و ئازادیخوازان دانراوە "کــەمـــە" و دەبێت ئەو سزا و کۆتوبەندانە زۆرلەوە زیاتر بکرێت کە لە پڕۆژەیاساکەدا هاتوە ، ئەندامانی پەڕلەمان لەگەورە تا بچوکیان ئەو کۆت و بەند و سزا و غرامەکردن و بەستنى زمانى ڕۆژنامەنووسانانیان بە کافى نەزانى بۆیە ئەو بڕیارانەی کەلە پڕۆژەیاساکەدا هاتبون لەسایەی پەڕەماندا قورسترکران و بەتێکڕاى دەنـگ ، دەنــــــگ لەسەر ئەو پڕۆژە کۆنەپەرستانەیە درا و یەک دوودانە لە ئەندامانى پەڕلەمان کەبەحسابى خۆیان لە هاوپیشەکانیان ئازادیخوازترن دەنگێکى نوزنیان بۆ خۆڵ کردنەچاوى ڕۆژنامەنووسان هەڵبڕى کە نەیتوانى ببێتە مایەى گوێگرتن لێیان .

لەچەند ساڵى راِبردوودا جامى خەڵکی کوردستان لێى دەڕژا لەسەریە لەسەریەک ناڕەزایەتى بەڕێ دەکەوت ، تادەهات ئەو ناڕەزایەتیانە بەرفراوانتر دەبۆیەوە و ڕۆژبەڕۆژ ژێرپێى ئەحزابى دەسەڵاتدارى کوردستان خاڵیتر دەبۆیەوە ، خۆپیشاندان و ناڕەزایەتى و هوهــــا کێشان لە دەسەڵاتدارانى کوردستان و بەردەباران و ڕاپەڕینى یەک لەدواى یەکى خەڵکى کەلار و کفرى و ڕانیە و هەڵەبجە و ئاکرى و چەمچەماڵ و دەربەندیخان و سلێمانى و دهۆک و هولێر ..... . ناڕەزایەتى خوێندکاران بەدەست هەموو ئەو نەهامەتیانەى کە ڕۆژێک کێشەی داخلى و ڕۆژێک نەبونى هیچ پێداوستیەکى خوێندن و .....، شۆفێران بەدەست نەبونى بەنزین و ، هاوڵایان بەدەست گرانى بازاڕ و نەبونى هیچ خزمەتگوزاریەکى سەرەتایى ، لاوان بەدەست ئەو جەهەنەمە خێلەکیانەى بەسەریانەوە ڕاگیراوە ، قەسابخانەیەک کە بۆژنان دانراوە ........، شاهیدى ئەوڕاستیەن کە جێگەوڕێگەى دەسەڵاتداران لە کامەشوێنى ئەم کۆمەڵگەیەدایە ، بەڵام وەختێک ئەمڕاستیانە ڕوپەڕى ڕۆژنامەکان دادەگرێت و خەڵکى مودافع لە مافەکانیان دێنە سەرجادە و کۆمۆنیستەکان وەک ڕابەرى ناڕەزایەتیەکان بەدیلى خۆیان پیشان دەدەن ، دەسەڵاتى لێوارى مەرگ دەکەوێتە پەلەقاژەى ئیتیفاقاتى کۆنە پەرستانە وەک دوا وەڵام بۆ سەرکوتی خەڵک و مانەوەى خۆى ، دێن ڕێکەوتنى هەمەلایەنە و ستراتیژى ئەنجام دەدەن لە کۆکتێلێک لە پارتى و یەکێتى و ئەحزابى ئیسلامى و ئەوانى دیکەى گوێڕایەڵى خۆیان بەرەیەک پێک دەهێن بۆ خنکاندنى ئازادى .

ئیسلامیەکان بەمەرجیک ڕێکەوتنى ئستراتیجى ئەنجامدەدەن کە کەس ڕەخنە لە دین و بیرو باوەڕەدواکەوتوەکان نەگرێت ، وە نابێت کەس باسى گەندەڵى و دزى و ڕاوڕوت وسەروەت وسامان هەڵوشین و ڕێکەوتن و ساتوسەوداى ژێربەژێر نەکەن لەبەر ئەوەی ئەمانە دەچنە بابى هەواڵى نهێنى و پاراستنى ئاسایشى و زڕاندنى ناوى سەرکردەکانیان .

یاساى کارى ڕۆژنامەنووسى لەناو ئەم ڕێکەوتنە ئستراتیجیەوە هاتەدەرەوە بۆ ئەوەى ئەمانە لەڕێگەى یاساوە بەر بەو ناڕەزایەتیانە بگرن و بەیاساى کۆنەپەرستى سوار ملى ناڕەزایەتیەکانى خەڵکى کوردستان ببن .

میدیاکان و ڕۆژنامەنووسان و ئازادیخوازان بەودەلیلەى کە هۆکارى دیفاع و ناڕەزایەتى بەڕێخستنن، بۆیە لەڕێگەى ئەم جۆرەیاسایەوە ئاستەنگیان بۆ دەهێنرێتە پێشەوە ، جابۆیە پێویستە لەسەر تەواوى خەڵکى ناڕازى کوردسان بێن دیفاع لە ئازادیى بێسانسۆرى ڕۆژنامەوانى بکەن ، خەڵکى کوردستان چەندین ساڵە تێکۆشاون و قوربانیانداوە لەپێناوى ئازادیدا ، کەچى ئێستا ســەندیکـا و پـەڕلـەمـانەکەى یەکێتى و پارتى بە دەیان سنور و مەرجى کۆنەپەرستانە بۆ ئازادى دادەنێن و زۆر بێشەرمانە لە میدیاکانەوە خەڵى کوردستان بە کۆنەپەرستو دواکەوتو ناودەبەن (کەریم بەحرى)ئەندامى لیژنەى یاسایى پەڕلەمان لە ڕێگى (ڕادیۆى نەوا)وە ڕایگەیاند خەڵکى کوردستان دواکەوتون و یاساى مەدەنى و ڕادیکاڵیان پێ هەزم ناکرێت بۆیە دەبێت یاسایەکى کۆنەپەرستانەیان بۆ (دابنێین) .

جابۆیە نـــــە ئەندامانى پەڕلەمان و نــــــە پەڕلەمان و نـــــە سەندیکا و نــــە ئەحزابى ئیسلامى بەهیچ شێوەیەک نوێنەرى ڕۆژنامەنووسان و ئازادیخوازان نین و بەڵکو نوێنەرى ڕوتى کۆنەپەرستى کۆمەڵگەن .
 

reben_faruq@yahoo.com