یەکگرتوو لەگەڵ گورگ گۆشت دەخوا و لەگەڵ مەریش شین دەکا!

بەشدار عه‌لی  

ئەم رۆژانە راگەیاندنەکانى یەکگرتووى ئیسلامى کوردستان بە شێوەیەکى بەرنامە بۆ دارێژراو، رەخنە و گلەیى و نارەزایەتیەکانیان تۆختر کردۆتەوە لەبەرامبەر(گەندەڵى و بێ مافى و نایەکسانیەکانى)دەسەڵاتدارانى کوردستان ،بە کورتیەکەى پێمان دەڵێن( ئەو نارەزایەتیە قوڵەى لە نێو چین و توێژەکانى خەڵکدا بەدیدەکرێت،ئێمە رێبەرایەتى دەکەین و ئەو ژیانەى خەڵک شایەنى قبوڵ نیە و پێویستە بگۆردرێت و بۆ جێگرتنەوەشى تاکە هێزى(بێ خەوش) ئەوە یەکگرتووى ئیسلامى هەیە و وەرن لەگەڵمان بن!).

هەر کەسێک ئەگەر ئاگادارى وەزعیەتى کوردستان نەبێت و لە نزیکەوە بە کار و کردەوە و سیاسەتى یەکگرتوو ئاشنا نەبێت،ئەو زمانەى یەکگرتووى ئیسلامى ببیستێت کەئیستا تەبلیغى پێ دەکەن و دەیانەوێت خۆیان بکەن بە نوێنەرى هەزارەها خەڵکى نارازى،راستەوخۆ وادەزانێ ئەو حیزبە فریادڕەسە و خاوەن پرۆژە و بەرنامەیە بۆ دەرکێشانى خەڵکى کوردستان لەم وەزعیەتە مەینەتبارە،ناچێتە ناو هیچ هاوپەیمانەتیەک ئەگەر بە قازانج و گۆڕینى وەزعیەتى خەڵک تەواو نەبێت!لە دەرەوەى ئەو حکومەت و پەرلەمانەیە(کە ئەوان بە گەندەڵ و هیچ کارە وەسفى دەکەن)،خاوەنى باشترین بەدیلە بۆ کەمکردنەوەى هەژارى و نەدارى،ژن کوژى و فرە ژنى،فراوانکردنى چوارچێوەکانى ئازادى،سەربەخۆیى و کۆتایهێنان بە سەرگەردانى و بێ چارەنووسى،گۆڕینى سیستەمەکانى نێو کۆمەڵگا،هێنانەکایەى یاساو دەستورێک کە هەموان بێ جیاوازى هەست بە ئارامى و شکۆمەندى بکەن...!!!جا بۆیە یەکگرتووى ئیسلامى بێجگە لەوەى خۆى بەشێکى سەرەکیە لەم دزى و گەندەڵى و رۆتیناتەى ئیستا روودەدات،لەگەڵ ئەوەشدا لە هێنانى زۆرێک لە دیاردە قێزەوەنەکان بۆ ئیفلیج کردنى کۆمەڵکاى کوردستان،دەست پێشخەر و داهێنەریش بووە!

وێرانى وەزعیەتەکە لێرەوەیە،حیزبێکى ئیسلامى وەکو یەکگرتوو کە هەموو بەرنامە و پرۆگرامەکانیان لە ئەلفەوە تاکو یائى ناکۆکە لەگەڵ سەرەتاترین ماف و ئازادییەکانى تاک و بەهرەمەند بوون لە ژیانێکى بەختەوەر بۆ بەشەرەکان، هەمیشەکار لەسەر دورست کردنى جیاوازى و مانەوى هەژارى و برسیەتى و تیرۆر و تۆقاندن و تەقاندنەوە و مل پەڕاندن و ناکۆکى سەرگەردانى خەڵک دەدەن،کەچى ئیستا بیانەوێت خۆیان بکەنە نوێنەرى خەڵکى نارازى و وەکو فریادڕەس خۆیان بناسێنن،کەچى لە راستیدا وێرانکەرن و خەڵکى کوردستانیش ئەمە باش دەزانن،هەر لەبەر ئەمەشە سەربارى نارازى بوون و بێزارى خەڵک لە پارتى و یەکێتى،بەڵام بەلاى یەکگرتووشەوە ناچێ.

پێش هەموو شتێک پێویستە ئاماژە بەوە بکەین، حیزبێکى نقوم بوو لە دواکەوتووى و بنیات نراو بە خورافیات بە هیچ شێوەیەک نابێتە بەدیل و رزگارکەرى خەڵکێکى مەدەنى و شارستانى وەکو خەڵکى کوردستان،بۆیە ئەو خەیاڵانەى برایانى یەکگرتوو خاوە و بە هیچ شێوەیەک نابنە جێگا ئومێدى خەڵک و مانگى هەنگوینى ئیسلامیەکان دەمێکە لە کوردستان ئاوا بووە، هەرچەند پارتى و یەکێتیش گەندەڵتر و بێ سیستەمتر بن.

بێجگە لەمەش بەدرێژایى ئەو چەند ساڵەى رابردوو، دەرد و بەڵا و کێشە و گرفتەکانى یەکگرتوو بۆسەر ژنان و لاوان و گونجان و مناڵانى کوردستان کەمتر نەبووە لە کێشە و دەرد و بەڵاکانى پارتى و یەکێتى ،بەبرواى من ئەگەر لەو لۆژیکە ووردبینەوە کە یەکگرتوو کارى پێ کردووە زۆر ترسناکتر و کاریگەرتر بووە،بەدەیان ئینسانى ئازادیخواز تەنها لەسەر ووتنى ووشەى ماف و ئازادى و یەکسانى، سەریان لەلاشە جیاکردەوە و مەحکومیان کرد بە مەرگ،نوسەران و رۆشنبیران نەیانتوانى لەبەر فتواى ئیسلامیەکان بۆچونەکان لەسەر قێزەوەنترین دیاردە دەرببڕن،تێزابیان کرد بە قاچى و ئەو کچانەى جلى مەدەنیان پۆشى و خەڵکیان لەدژیان هاندا،تا ئیستاش کادیران و لایەنگرانیان لە مینبەرى مزگەوتەکاندا هەرەشە دەکەن و خوێنى ئەو خەڵکانە حەڵاک دەکەن کە وەکو ئەوان بیرناکەنەوە،خراپى گوزەرانى خەڵکیان بە فرسەت زانى و پێدانى چەند کیلۆیەک خۆراک و پێدانى چەند پۆلێکى وەرگیراو لە وڵاتانى ئیسلامى و کەنداویان کردە مەرجى لە چادر هەڵکێشانى کچان و مناڵان و راکێشانیان بۆ نێو حوجرەکانیان و شۆرینەوەى مێشکیان بە خورافیات،مزگەوتوکانیان کردە شوێنى سرینەوە و پلان دانان بۆ ئەو دەنگ و رەنگانەى لە خۆیان جیاوازن،بەرگریان لە بۆگەندەرترین سیستەمى پەروەردە و فێرکردن کرد بۆ بەرهەم هێنانى نەوەیەکى یەخسیر و گوێرایەڵ و بێ بیرکردنەوە،لە هەوڵدان بۆ هێشتنەوەى یاساو دەستورێک کە بە ئاشکرا شەرعیەت دەدا بە پلەدوویى و ژێردەستەى ئافرەتان،لە پێناوى بەدەست هێنانى سەرمایەى زیاتر دەستیان بۆ پیسترین هێز درێژ کرد.... .

جا حیزبێک ئەوە بەرنامە و پرۆگرام و کار و کردەوەى بێت،چۆن دەتوانى خۆى لەو دزى راووڕوت و گەندەڵى و رۆتیناتە جیا بکاتەوە؟!جا گورگێک لە بۆسەدا بێت بۆ پەلاماردان،چۆن خەڵک بڕوایان پێ دەکەن. بۆیە پێویستە چیتر تەمسیل نەکەن ،چونکە ئیستا خەڵکى کوردستان هێندە هۆشیار و چاوکراوەن لاپەرەى سپى دەخوێننەوە و معدنى ئەسڵى یەکگرتووش دەمێکە ئاشکرا بووە.
 

Bashdar_net@yahoo.com